Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 137

Nihi Babauu Na Lɛ Loko Pentekoste Ligbi ɔ Su

Nihi Babauu Na Lɛ Loko Pentekoste Ligbi ɔ Su

MATEO 28:16-20 LUKA 24:50-52 BƆFO ƆMƐ A NÍ TSUMI 1:1-12; 2:1-4

  • YESU JE E HE KPO KƐ TSƆƆ NIHI BABAUU

  • YESU HO HIƆWE YA

  • YESU NGƆ MUMI KLƆUKLƆU Ɔ KƐ PUE KASELI 120 A NƆ

Benɛ a tle Yesu si ɔ, e ha nɛ bɔfo 11 ɔmɛ ya po lɛ ngɛ Galilea yoku ko he. Kaseli kpahi nɛ a he hiɛmi maa su 500 hu ya eko. A ti ni komɛ nɛ be ko ɔ, a juɛmi peeɔ mɛ enyɔɔnyɔ ngɛ Yesu he ɔ po piɛɛ a he. (Mateo 28:17; 1 Korinto Bi 15:6) Nɔ́ nɛ Yesu de jehanɛ ɔ ha nɛ a ti nɔ tsuaa nɔ ná nɔ mi mami kaa Yesu te si kɛ je gbeje, nɛ e ngɛ wami mi.

Yesu tsɔɔ kaa Mawu ha lɛ he wami ngɛ hiɔwe kɛ zugba a tsuo nɔ. Enɛ ɔ he ɔ, Yesu de e kaseli ɔmɛ ke: ‘Lɔ ɔ he ɔ, nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli. Nyɛɛ baptisi mɛ ngɔ wo Tsɛ ɔ, kɛ Bi ɔ, kɛ mumi klɔuklɔu ɔ biɛ mi, nɛ nyɛɛ tsɔɔ mɛ nɛ a ye níhi tsuo nɛ i fa nyɛ ke nyɛɛ pee ɔ a nɔ.’ (Mateo 28:18-20) Ngɛ anɔkuale mi ɔ, benɛ a tle Yesu si po ɔ, nɔ́ nɛ e he hia lɛ wawɛɛ ji sane kpakpa a nɛ a maa fiɛɛ ngɛ he tsuaa he ɔ.

Enɛ ɔ he ɔ, e sa nɛ nyumuhi, kɛ yihi kɛ jokuɛwi tsuo nɛ a ji Yesu se nyɛɛli ɔ nɛ a pee nihi kaseli. He nyɛli maa bɔ mɔde kaa a maa tsi a fiɛɛmi ní tsumi ɔ nya, se kɛ̃ ɔ, Yesu wo mɛ he wami ke: “A ha mi he blɔ ngɛ níhi tsuo nɛ ngɛ hiɔwe kɛ zugba a nɔ.” Mɛni blɔ nɔ nɛ munyu nɛ ɔ maa wo e kaseli ɔmɛ he wami ngɛ? Yesu de mɛ ke: “Hyɛ, i kɛ nyɛ maa hi si daa kɛ yaa su je mi nyagbe.” Yesu de we ke e ma ha nɛ nɔ tsuaa nɔ nɛ maa fiɛɛ sane kpakpa a nɛ pee nyakpɛ níhi. Se kɛ̃ ɔ, mumi klɔuklɔu ɔ maa ye bua mɛ tsuo.

Benɛ a tle Yesu si se ɔ, e je e he kpo si abɔ kɛ tsɔɔ e kaseli ɔmɛ ngɛ “kekleekle ligbi nyingmi eywiɛ ɔmɛ” a mi. E je e he kpo ngɛ nɔmlɔ tso slɔɔtohi a mi kɛ “tsɔɔ bɔfo ɔmɛ kaa e ngɛ wami mi,” nɛ jehanɛ hu ɔ, e tsɔɔ mɛ “Mawu matsɛ yemi ɔ he ní.”​​—Bɔfo Ɔmɛ A Ní Tsumi 1:3; 1 Korinto Bi 15:7.

E maa pee kaa benɛ bɔfo ɔmɛ ngɛ Galilea loloolo ɔ, Yesu de mɛ ke a kpale kɛ ho Yerusalem ya. Benɛ e kɛ mɛ ya pee kpe ko ngɛ ma a mi ɔ, e de mɛ ke: ‘Nyɛ ko je Yerusalem; se mohu nyɛɛ mlɛ kɛ yaa si be nɛ si nɛ Tsaatsɛ wo ɔ maa ba mi kaa bɔ nɛ i de nyɛ momo ɔ; Yohane ngɔ nyu kɛ baptisi nihi, se nyɛɛ lɛɛ e be kɛe nɛ a kɛ mumi klɔuklɔu ɔ maa baptisi nyɛ.’​​—Bɔfo Ɔmɛ A Ní Tsumi 1:4, 5.

Pee se ɔ, Yesu kɛ e bɔfo ɔmɛ kpe ekohu. E ngɔ mɛ “kɛ ho Betania ya” ngɛ Oliv Yo ɔ nɔ kɛ yaa beleku je. (Luka 24:50) Ngɛ níhi nɛ Yesu tsɔɔ mɛ ngɛ jemi nɛ e maa je kɛ ho hiɔwe ya a he ɔ tsuo se ɔ, e kaseli ɔmɛ susu kaa e maa to e Matsɛ Yemi ɔ sisi ngɛ zugba a nɔ.​​—Luka 22:16, 18, 30; Yohane 14:2, 3.

Enɛ ɔ he ɔ, a bi Yesu ke: “Nyɔmtsɛ, anɛ kikɛmɛ a be nɛ ɔ mi nɛ o maa kpale ngɔ matsɛ yemi ɔ kɛ ha Israel ɔ lo?” Nɔ́ nɛ e de mɛ pɛ ji: “Benɛ ní nɛ ɔmɛ maa ba mi ɔ, Tsaatsɛ pɛ lɛ to, nɛ e pi nyɛ blɔ nya kaa nyɛ maa le.” Kɛkɛ nɛ e kpale ma ní tsumi nɛ e sa nɛ a tsu ɔ nɔ mi kɛ ha mɛ ke: “Ke mumi klɔuklɔu ɔ ná ba nyɛ nɔ ɔ, nyɛ ma ná he wami kɛ fiɛɛ, nɛ nyɛ maa ye odase ha mi ngɛ Yerusalem, Yudea, kɛ Samaria tsuo kɛ yaa su je ɔ nyagbe he tɔɔ.”​​—Bɔfo Ɔmɛ A Ní Tsumi 1:6-8.

Yesu kɛ e bɔfo ɔmɛ sɛɛ ní saii ngɛ Oliv Yo ɔ nɔ, kɛkɛ nɛ a na nɛ a wo e nɔ kɛ yaa hiɔwe. E kɛ we nɛ bɔku ko ba ha a hɛ mi. Eko ɔ, o ma kai kaa benɛ a tle Yesu si ɔ, e tsake e he kɛ wo nɔmlɔ tso slɔɔtohi a mi. Se ngɛ be nɛ ɔ mi lɛɛ, e kuɔ kɛ ho hiɔwe ya kaa mumi mi nɔmlɔ. (1 Korinto Bi 15:44, 50; 1 Petro 3:18) Benɛ kaseli anɔkualetsɛmɛ ɔmɛ ngɛ Yesu hyɛe nɛ e yaa a, “nyumuhi enyɔ nɛ wo tade hiɔ,” ba da si ngɛ a kasa nya. A ji hiɔwe bɔfohi nɛ a tsake kɛ pee nimli, nɛ a bi kaseli ɔmɛ ke: “Nyɛ Galilea bi, mɛni he je nyɛ daa si ngɛ kɔɔhiɔ mi hyɛe kikɛ nɛ ɔ? Yesu ɔ nɛ a ngɔ kɛ ho hiɔwe ya nɛ ɔ, e maa kpale kɛ ba jã nɔuu kaa bɔ nɛ nyɛ na lɛ nɛ e yaa a.”​​—Bɔfo Ɔmɛ A Ní Tsumi 1:10, 11.

Benɛ Yesu maa je kɛ ho hiɔwe ya a, e ji ngɛ ma hɛ mi, mohu ɔ, e kaseli nɛ a yeɔ anɔkuale ɔ pɛ nɛ a na lɛ. “Jã nɔuu” nɛ e maa kpale kɛ ba​​—pi ngɛ  ma hɛ mi, se e se nyɛɛli anɔkualetsɛmɛ ɔmɛ pɛ nɛ a ma yɔse kaa e ba, nɛ e ngɛ matsɛ yee.

Lɔ ɔ se ɔ, Yesu bɔfo ɔmɛ kpale kɛ ho Yerusalem ya. Ligbi komɛ a se ɔ, a kɛ kaseli kpa amɛ bua a he nya, nɛ “Yesu nyɛ Maria, kɛ Yesu nyɛminyumu ɔmɛ” hu piɛɛ a he. (Bɔfo Ɔmɛ A Ní Tsumi 1:14) A pɔɔ a he nya buami kɛ sɔleɔ. Nɔ́ kake nɛ a sɔleɔ ngɛ he ji, nɔ nɛ maa da Yuda Iskariot nane mi konɛ bɔfo ɔmɛ a yibɔ nɛ su 12 kaa bɔ nɛ e ngɛ kɛ je sisije ɔ. (Mateo 19:28) A suɔ nɛ bɔfo nɛ a maa hla a nɛ pee nɔ ko nɛ e na níhi nɛ Yesu pee, kɛ e si temi ɔ hulɔ. Enɛ ɔ he ɔ, a fɔ̃ sɔ konɛ a na nɔ nɛ Mawu suɔ kaa a hla. Ngɛ Baiblo ɔ mi ɔ, enɛ ɔ ji nyagbe sɔ nɛ a fɔ̃ kɛ hla Mawu blɔ tsɔɔmi. (La 109:8; Abɛ 16:33) A hla Matia nɛ eko ɔ, e piɛɛ kaseli 70 nɛ Yesu tsɔ mɛ be ko ɔ a he ɔ, nɛ “a ngɔ lɛ ngɔ piɛɛ bɔfo nyɔngma kɛ kake ɔmɛ a he.”​​—Bɔfo Ɔmɛ A Ní Tsumi 1:26.

Ngɛ jeha 33 mi benɛ Yesu ho hiɔwe ya a we ligbi nyɔngma se ɔ, e ba su Yuda bi ɔmɛ a gbijlɔ nɛ ji Pentekoste ɔ nɔ. Jamɛ a ligbi ɔ, kaseli maa pee 120 bua a he nya ngɛ Yerusalem, ngɛ mɔ ko nɔ. Si kake too ɔ, huhui ko nɛ ngɛ pɛe kaa kɔɔhiɔ ba hyi we ɔ mi tsuo tɔ. Kɛkɛ nɛ la lilɛ ba ma a ti nɔ tsuaa nɔ yi mi. Nɔuu nɛ kaseli ɔmɛ bɔni gbi slɔɔtoslɔɔtohi tumi. Enɛ ɔ ji mumi klɔuklɔu ɔ nɛ Yesu wo mɛ si kaa e ma plɛ kɛ pue a nɔ ɔ nɛ!​​—Yohane 14:26.