Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

 YI 8

A Tu Fo Kɛ Je Matsɛ Yiwutsotsɛ ɔ Dɛ Mi

A Tu Fo Kɛ Je Matsɛ Yiwutsotsɛ ɔ Dɛ Mi

MATEO 2:13-23

  • YOSEF KƐ E WEKU Ɔ TU FO KƐ HO EGIPT YA

  • YOSEF KƐ E WEKU Ɔ HIA KƐ YA HI NAZARET

Ligbi ko nyɔ mi nɛ Maria hwɔɔ si ɔ, Yosef tsɛ̃ɛ lɛ nɛ e de lɛ sɛ gbi ko nɛ e biɔ nɛ a tsu he ní oya. Yehowa bɔfo ko kɛ Yosef tu munyu ngɛ nlami mi nɛ e de lɛ ke: “Herode ma ba hla bimwɔyo ɔ nɛ e gbe lɛ. Lɔ ɔ he ɔ, tee si! Ngɔɔ bimwɔyo ɔ, kɛ e nyɛ ɔ, nɛ o kɛ mɛ nɛ tu fo kɛ ya Egipt. Nyɛ ya hi lejɛ ɔ kɛ yaa si be nɛ ma to mo.”​​—Mateo 2:13.

Jamɛ a nyɔ ɔ mi nɔuu nɛ Yosef kɛ Maria kɛ a bi ɔ a tu fo kɛ ho Egipt ya. E hi kaa a puɛ we be, ejakaa Herode yɔse kaa dodoe mi hyɛli ɔmɛ gu e kuɛ se mi kɛ fɔ e hɛ mi. E de mɛ ke, ke a ya na jokuɛ ɔ, a ba de lɛ. Se nɛ a ya na jokuɛ ɔ, a ya de we lɛ nɛ a je. Enɛ ɔ ha nɛ Herode mi mi fu wawɛɛ. Akɛnɛ e ma e juɛmi nya si kaa e maa gbe Yesu he je ɔ, e fa ke a gbe jokuɛ nyumuwi nɛ a ye kɛ je jeha enyɔ kɛ kple ɔ tsuo ngɛ Betlehem kɛ mahi nɛ ngɛ Betlehem kasa nya amɛ a mi. E da nɔ́ nɛ dodoe mi hyɛli nɛ a je Beleku ɔ de lɛ ɔ nɔ kɛ bu jeha nɛ eko ɔ jokuɛ ɔ maa ye.

Jokuɛ nyumuwi nɛ a gbe ɔ ngɛ mɔbɔ! Wa li jokuɛwi abɔ nɛ a gbe, se kɔmɔ nɛ a nyɛmɛ ɔmɛ ye, kɛ ya nɛ a fo ɔ ha nɛ gbami ko nɛ Mawu gbalɔ Yeremia gba a ba mi.​​—Yeremia 31:15.

Bɔɔbɔɔbɔɔ ɔ, Yosef kɛ e weku ɔ ya su Egipt, nɛ a hi lejɛ ɔ. Ligbi ko benɛ Yosef hwɔɔ si nyɔ mi ɔ, Mawu bɔfo ko kpale je e he kpo kɛ tsɔɔ lɛ ngɛ nlami mi. E de lɛ ke: “Tee si! Ngɔɔ bimwɔyo ɔ, kɛ e nyɛ ɔ, nɛ o kpale o se kɛ ya Israel zugba a nɔ. Ejakaa nihi nɛ hla kaa a gbe bimwɔyo ɔ, a gbo.” (Mateo 2:20) Jehanɛ ɔ lɛɛ Yosef na kaa a ma nyɛ maa kpale kɛ ya a ma mi. Jã a nɛ a pee ɔ ha nɛ Baiblo gbami kpa ko nɛ de ke, i tsɛ ye Bi ɔ kɛ je Egipt ɔ hu ba mi.​​—Hosea 11:1.

Jinɛ Yosef to kaa e kɛ e weku ɔ ma ya hi he ko ngɛ Betlehem kasa nya. Eko ɔ, lejɛ ɔ nɛ a  hi loko a tu fo kɛ ho Egipt ya a nɛ. Se a de lɛ kaa Herode bi Arkelao yiwutsotsɛ ɔ lɛ ngɛ matsɛ yee ngɛ Yudea. Yehowa bɔ Yosef kɔkɔ ngɛ nlami mi kaa e ko ya lejɛ ɔ. Lɔ ɔ he ɔ, Yosef kɛ e weku ɔ hia kɛ ya yiti je, nɛ a ya hi Nazaret ngɛ Galilea kpokpa a nɔ. Nazaret kɛ he nɛ Yuda jami he si ngɛ wawɛɛ ɔ kpɛti kɛ. Ma nɛ ɔ mi nɛ Yesu hi kɛ wa, nɛ lɔ ɔ ha nɛ gbami kpa ko nɛ de ke: “A ma tsɛ lɛ Nazaret no” ɔ hu ba mi.​​—Mateo 2:23.