Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 7

Dodoe Mi Hyɛli Komɛ Ya Slaa Yesu

Dodoe Mi Hyɛli Komɛ Ya Slaa Yesu

MATEO 2:1-12

  • DODOE MI HYƐLI NYƐƐ “DODOE” KO SE KƐ YA YERUSALEM, NƐ LƆ Ɔ SE Ɔ, A YA YESU NGƆ

Nyumu komɛ je Beleku kɛ ba. A ji dodoe mi hyɛli nɛ a kaseɔ dodoehi a he ní, nɛ a tsɔɔ kaa ke a na he nɛ dodoe ko ngɛ ɔ, a nyɛɛ nɛ a tsɔɔ bɔ nɛ nɔ ko si himi ma ji ha. (Yesaya 47:13) Benɛ a fɔ Yesu ngɛ Betlehem ɔ, nyumu nɛ ɔmɛ na “dodoe” ko. Enɛ ɔ he ɔ, a hia blɔ gagaa kɛ nyɛɛ dodoe ɔ se. A ya na dodoe ɔ ngɛ Yerusalem, se pi Betlehem.

Benɛ a ya su ɔ, a bi ke: “Bimwɔyo ɔ nɛ a fɔ nɛ e ba ye Yuda bi ɔmɛ a nɔ matsɛ ɔ, jije e ngɛ? Wa na e dodoe ngɛ beleku, nɛ wa ba, konɛ wa ba ja lɛ.”​​—Mateo 2:1, 2.

Benɛ matsɛ Herode nu nɔ́ nɛ ɔ, e mi mi fu wawɛɛ. Lɔ ɔ he ɔ, e tsɛ osɔfo nikɔtɔma amɛ kɛ jami hɛ mi nyɛɛli ɔmɛ, nɛ e bi mɛ he nɛ a ma fɔ Kristo ɔ ngɛ. A da Ngmami ɔ nɔ kɛ ha lɛ heto ke: “Ngɛ Betlehem.” (Mateo 2:5; Mika 5:2) Benɛ Herode nu nɔ́ nɛ ɔ, e tsɛ dodoe mi hyɛli ɔmɛ zaa nɛ e de mɛ ke: “Nyɛɛ ya nɛ nyɛ ya hla bimwɔyo ɔ fitsofitso. Ke nyɛ na lɛ ɔ, nyɛ ba de mi, konɛ imi hu ma ya nɛ ma ya ja lɛ.” (Mateo 2:8) Se ngɛ anɔkuale mi ɔ, Herode ngɛ hlae nɛ e maa gbe jokuɛyo ɔ!

Benɛ dodoe mi hyɛli ɔmɛ je Herode ngɔ ɔ, nyakpɛ nɔ́ ko ba. “Dodoe” ɔ nɛ a na benɛ a ngɛ Beleku ɔ bɔni nyɛɛmi. Enɛ ɔ tsɔɔ kaa dodoe nɛ ɔ pi dodoe gu ko kɛkɛ. E ji dodoe nɛ nɔ ko je blɔ kɛ ngɛ mɛ blɔ tsɔɔe. Dodoe mi hyɛli ɔmɛ nyɛɛ dodoe ɔ se hluu kɛ ya si benɛ dodoe ɔ ya da we nɛ Yosef kɛ Maria kɛ a bi ɔ ngɛ mi ɔ yi mi.

Benɛ dodoe mi hyɛli ɔmɛ a sɛ we ɔ mi ɔ, a na Maria kɛ e bi Yesu. Kɛkɛ nɛ a kpla si nɛ a ja Yesu. Nɛ a ke lɛ sika tsu, mimɛ, kɛ mire. Benɛ a pee a juɛmi kaa a maa kpale kɛ ya Herode ngɔ ɔ, Mawu bɔ mɛ kɔkɔ ngɛ nlami mi kaa a ko ya. Lɔ ɔ he ɔ, a gu he kpa kɛ ho a ma mi ya.

Mɛnɔ nɛ o susu kaa e kɛ “dodoe” ɔ tsɔɔ dodoe mi hyɛli ɔmɛ blɔ ɔ? Mo kai kaa dodoe ɔ se nɛ a nyɛɛ ɔ kɛ mɛ yɛ Yesu ngɔ tɛɛ ngɛ Betlehem. Mohu ɔ, e kɛ mɛ ya Yerusalem kekle ngɛ Matsɛ Herode nɛ e ngɛ hlae nɛ e maa gbe Yesu ɔ ngɔ. Ke pi nɛ Mawu ngɔ e he kɛ wo sane ɔ mi nɛ e de dodoe mi hyɛli ɔmɛ kaa a ko ya de Herode he nɛ Yesu ngɛ ɔ, jinɛ e ko gbe lɛ niinɛ. E ngɛ heii kaa Mawu he nyɛlɔ nɛ ji Satan, nɛ́ e suɔ kaa e maa gbe Yesu ɔ lɛ e kɛ dodoe ɔ tsu ní ɔ nɛ.