LUKA 1:34-56

  • MARIA YA SLAA E WEKU NO ELIZABET

Bɔfo Gabriel ya de Maria kaa e ma fɔ binyumu, nɛ a ma tsɛ lɛ Yesu, nɛ e maa ye Matsɛ kɛ maa ya neneene. Se Maria bi lɛ ke: ‘I li nyumu. Kɛ e maa pee kɛɛ nɛ enɛ ɔ maa ba mi?’​​—Luka 1:34.

Kɛkɛ nɛ Gabriel ha lɛ heto ke: ‘Mumi klɔuklɔu ɔ maa ba o nɔ; Hiɔwe No ɔ he wami ɔ maa ba o nɔ. Enɛ ɔ he je ɔ, bi klɔuklɔu ɔ nɛ o ma fɔ ɔ, a ma tsɛ lɛ Mawu Bi.’​​—Luka 1:35.

Akɛnɛ Gabriel suɔ kaa Maria nɛ he nɔ́ nɛ e ngɛ dee ɔ ye he je ɔ, e de lɛ ke: “Ná nɛ o le kaa o weku no Elizabet nɛ bwɔ ɔ hu hɛɛ hɔ. Sa a, a le lɛ kaa yosa; se amlɔ nɛ ɔ, e hɛɛ mi nyɔhiɔ ekpa. Ejakaa Mawu lɛɛ nɔ́ ko nɔ́ ko be nɛ e be nyɛe maa pee.”​​—Luka 1:36, 37.

Heto nɛ Maria ha a tsɔɔ kaa e he Gabriel munyu ɔ ye. Maria de ke, ‘Yehowa mawayo ji mi; bɔ nɛ o de ɔ, e ba mi jã.’​​—Luka 1:38.

Benɛ bɔfo ɔ je ɔ, Maria dla e he konɛ e ya slaa Elizabet nɛ e kɛ e huno Zakaria a ngɛ Yudea a. Maria maa ye ligbi etɛ loo ligbi eywiɛ ngɛ blɔ ɔ nɔ loko e ma ya su he nɛ Elizabet ngɛ ɔ.

Bɔɔbɔɔbɔɔ ɔ, Maria ya su Zakaria we ɔ mi. Benɛ e sɛ we ɔ mi ɔ, e nga Elizabet. Kɛkɛ nɛ mumi klɔuklɔu ɔ ba Elizabet nɔ, nɛ e de Maria ke: ‘Mawu gbaa mo kulaa pe bɔ nɛ e gbaa yihi tsuo! Bi nɛ ngɛ o mi mi ɔ hu e gbaa lɛ! Kɛ ba lɛ kɛɛ nɛ a ha mi he blɔ ngua nɛ ɔ, kaa ye Nyɔmtsɛ ɔ nyɛ ma ba slaa mi? Benɛ i nu o ngami ɔ pɛ ɔ, bimwɔyo ɔ hua ngɛ ye mi mi kɛ bua jɔmi.’​​—Luka 1:42-44.

Kɛkɛ nɛ Maria kɛ bua jɔmi de ke: ‘I ngɔ ye tsui tsuo kɛ ngɛ Yehowa yi jee. Ye bua jɔ, kaa Mawu ji ye Yi Wami Helɔ, ejakaa e kai imi, e mawayo humi ɔ! Kɛ je mwɔnɛ ɔ kɛ yaa a, nihi tsuo ma tsɛ mi yo nɛ a gbaa lɛ, ejakaa Mawu Ope ɔ pee ní nguanguahi ha mi.’ Wa na kaa ngɛ he blɔ nɛ Maria ná a tsuo se ɔ, e wo we e he nɔ, mohu ɔ, e ngɔ yi jemi ɔ tsuo kɛ ha Mawu. E de ngɛ Mawu he ke: “E biɛ ngɛ klɔuklɔu. E naa nihi nɛ buɔ lɛ ɔ mɔbɔ yi nɔhi tsuo.”​​—Luka 1:46-50.

Maria ngɔ gbami munyuhi nɛ ngɛ ngmami ɔ mi ɔ kɛ je Mawu yi ke: “E kɛ e he wami kpetekpleenyɛ ɔ gbɛ he nɔ woli, kɛ a juɛmi yaya a tsuo ngɔ fĩa. E kpa matsɛmɛ nguanguahi kɛ je a sɛhi a nɔ, nɛ e wó humihi a nɔ. E ha hwɔ hwɔli ní kpakpahi nɛ a ye, nɛ a tɔ; se niatsɛmɛ lɛɛ e fie mɛ kɛ ho kɛ a dɛ gu. Si nɛ e wo wa nɛmɛ ɔmɛ ɔ, e ye nɔ; nɛ e ba piɛɛ e tsɔlɔ Israel he. E kai Abraham, nɛ e na lɛ, kɛ e nina tsuo mɔbɔ kɛ yaa neneene!”​​—Luka 1:51-55.

Maria hi Elizabet ngɔ maa pee nyɔhiɔ etɛ. Eko ɔ, e suɔ nɛ e ye bua Elizabet ejakaa e be kɛe nɛ e ma fɔ. Atsinyɛ jemi ko be he kaa yihi enyɔ nɛ a yeɔ Mawu gbeye, nɛ mɛ tsuo a hɛɛ hɔ kɛ gu Mawu yemi kɛ buami nɔ ɔ a bua jɔ huɛ bɔmi nɛ mɛ ni enyɔ ɔmɛ a ná a he!

Mo kadi kaa a wo Yesu hɛ mi nyami benɛ a fɔ we lɛ lolo po. Benɛ Elizabet na Maria a, e tsɛ bimwɔyo nɛ ngɛ Maria mi mi ɔ ke “ye Nyɔmtsɛ,” kɛkɛ nɛ bimwɔyo ɔ “hua kɛ bua jɔmi.” Elizabet wo Maria kɛ e bi ɔ a hɛ mi nyami, se wa maa na pee se kaa nihi fuu bui mɛ.