Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 69

Anɛ A Tsɛ Ji Abraham Loo Abosiami?

Anɛ A Tsɛ Ji Abraham Loo Abosiami?

YOHANE 8:37-59

  • YUDA BI ƆMƐ DE KE A TSƐ JI ABRAHAM

  • YESU NGƐ LOKO A FƆ ABRAHAM

Benɛ Gbasisihimi Nyami ɔ ngɛ nɔ yae ngɛ Yerusalem ɔ, Yesu ya nɔ nɛ e tsɔɔ nihi ní. Yuda bi komɛ nɛ a ngɛ lejɛ ɔ de lɛ ke: “Abraham nina ji wɔ, nɛ wɔɔ lɛɛ wa yi nyɔguɛ ha nɔ ko hyɛ.” Yesu de mɛ ke: “I le kaa Abraham nina ji nyɛ! Mɛni he je mɔ nɛ nyɛ ngɔɛ ye tsɔɔmi ɔ, nɛ nyɛ ngɛ mi hlae nyɛɛ gbe mohu ɔ. Imi lɛɛ níhi nɛ Tsaatsɛ tsɔɔ mi ɔ, lɔ ɔmɛ i deɔ; se nyɛɛ lɛɛ níhi nɛ nyɛ tsɛ ɔ de nyɛ ɔ, lɔ ɔmɛ nyɛ peeɔ.”​​—Yohane 8:33, 37, 38.

Nɔ́ nɛ Yesu ngɛ tsɔɔe ji kaa, e slo e Tsɛ nɛ e slo mɛ hu a tsɛ. Yuda bi ɔmɛ nui nɔ́ nɛ Yesu de ɔ sisi, lɔ ɔ he ɔ, a kpale de lɛ ke: “Wɔɔ lɛɛ wa tsɛ ji Abraham.” (Yohane 8:39; Yesaya 41:8) A ji Abraham nina niinɛ. Enɛ ɔ he ɔ, a susu kaa a ngɛ hemi kɛ yemi kaa Abraham.

Se Yesu de nɔ́ ko nɛ ha nɛ mɛ tsuo a nya kpɛ a he. E de mɛ ke: “Abraham nina ji nyɛ jinɛ nyɛ maa pee níhi nɛ Abraham pee ɔ nɔuu.” Atsinyɛ jemi ko be he kaa bi kaseɔ e tsɛ. Yesu ya nɔ nɛ e de mɛ ke: “Imi lɛɛ anɔkuale ɔ nɛ i nu kɛ je Tsaatsɛ Mawu nya a, lɔ ɔ i deɔ nyɛ; se nyɛ ngɛ mi hlae nɛ nyɛɛ gbe. Abraham pee we nɔ́ ko kaa kikɛ nɛ ɔ.” Kɛkɛ nɛ Yesu de nɔ́ ko, se a juɛmi kpi he. E de mɛ ke: “Níhi nɛ nyɛ tsɛ peeɔ ɔ, lɔ ɔmɛ nyɛ peeɔ ɔ nɛ.”​​—Yohane 8:39-41.

Loloolo ɔ, a nɛ́ nɔ́ nɛ Yesu ngɛ tsɔɔe ɔ nya. Mɛɛ lɛɛ a susu kaa pi plã bimɛ ji mɛ, lɔ ɔ he ɔ, a de ke: “Wɔɔ lɛɛ pi ajuama mi bimɛ ji wɔ. Wa ngɛ tsɛ kake. Wa tsɛ ji Mawu.” Se Yesu de mɛ ke: “Mawu ji nyɛ Tsɛ niinɛ jinɛ nyɛ maa suɔ mi, ejakaa Mawu nɛ tsɔ mi; se pi imi nitsɛ ye yi mi nɛ i to kɛ ba. Mawu ngɔ nɛ i je kɛ ba nyɛ ngɔ.” Yesu ya nɔ nɛ e de mɛ ke: “Munyu nɛ i kɛ nyɛ tu ɔ, nyɛ nɛ nya, ejakaa nyɛ bui ye munyu ɔ.”​​—Yohane 8:41-43.

Yesu bɔ mɔde si abɔ kaa e maa ye bua mɛ konɛ a na kaa ke a ya nɔ nɛ a kua lɛ ɔ, haomi maa ba a nɔ. Se jehanɛ ɔ lɛɛ e gba mi kpoo nɛ e de mɛ ke: “Nyɛ tsɛ nɛ fɔ nyɛ ji Abosiami; nɛ nyɛ suɔ kaa nyɛ maa pee e suɔmi nya ní.” Kɛ a tsɛ Abosiami ɔ ngɛ kɛɛ? Yesu de ngɛ a tsɛ ɔ he ke: “Kɛ je sisije ɔ, nɔ gbelɔ ji lɛ, nɛ e kɛ anɔkuale yi gblegbleegble, ejakaa anɔkuale be e mi.” Yesu ya nɔ nɛ e de ke: “Nɔ nɛ je Mawu ngɔ ɔ, e nuɔ Mawu munyu. Se nyɛɛ lɛɛ nyɛ nui, ejakaa pi Mawu ngɔ nɛ nyɛ je.”​​—Yohane 8:44, 47.

Munyu nɛ Yesu tu kɛ si Yuda bi ɔmɛ ɔ wo a mi mi la, nɛ a de lɛ ke: “Ke wa de ke Samaria no ji mo, nɛ mumi yayami ngɛ o mi ɔ, wa tɔ lo?” Tsɛmi nɛ a tsɛ Yesu ke “Samaria no” ɔ tsɔɔ kaa a sume lɛ kulaa. Se e hɛwi Yesu kaa a jɛ lɛ. E de mɛ ke: “Mumi yayami be ye mi. Imi lɛɛ Tsaatsɛ hɛ mi nyami i woɔ, se nyɛɛ lɛɛ nyɛ ngɛ ye he guɛ gbee.” Bɔ nɛ pee nɛ a na kaa hɛdɔ ngɛ munyu nɛ a tu ɔ he ɔ, Yesu de mɛ nɔ́ ko nɛ ha nɛ a nya kpɛ a he. E de mɛ ke: “Nɔ tsuaa nɔ nɛ buu ye tsɔɔmi ɔ tue ɔ, e be gboe gblegbleegble.” Pi nɛ Yesu ngɛ tsɔɔe kaa e kaseli ɔmɛ kɛ nihi nɛ a ngɛ e se nyɛɛe ɔ be gboe. Mohu ɔ, e ngɛ tsɔɔe kaa a be a hɛ mi kpatae, ejakaa “gbenɔ enyɔne” ɔ be a nɔ he wami.​​—Yohane 8:48-51; Kpojemi 21:8.

Se Yuda bi ɔmɛ lɛɛ a susu kaa gbenɔ nitsɛnitsɛ he munyu nɛ Yesu ngɛ tue ɔ nɛ. A de ke: ‘Jehanɛ lɛɛ wa ná nɔ mi mami kaa mumi yayami ngɛ o mi. Abraham gbo, nɛ gbali ɔmɛ hu gbo, se moo lɛɛ o ngɛ dee ke nɔ tsuaa nɔ nɛ buu o tsɔɔmi tue ɔ, e be gboe gblegbleegble. Tsaatsɛ Abraham nɛ gbo ɔ, o pe lɛ lo? Kɛ moo lɛɛ o buɔ o he kɛɛ?’​​—Yohane 8:52, 53.

Yesu ngɛ mɛ tsɔɔe kaa lɛ ji Mesia a nɛ. Se e ha we a sane bimɛ ɔ heto tɛɛ. Mohu ɔ, e de mɛ ke: ‘Kaa imi nitsɛ nɛ i woɔ ye hɛ mi nyami ɔ, lɛɛ lɔ ɔ pi nɔ́ ko; se hyɛ, Tsaatsɛ nɛ nyɛ tsɛɔ ke nyɛ Mawu ɔ, lɛ nɔuu nɛ woɔ ye hɛ mi nyami. Imi lɛɛ i le lɛ, se nyɛɛ lɛɛ nyɛ li lɛ. Ke i de ke i li lɛ ɔ, lɛɛ lakpatsɛ ji mi kaa nyɛ nɔuu.’​​—Yohane 8:54, 55.

 Yesu gbla a juɛmi kɛ ya a nɛ̃ Abraham nɛ e kɛ anɔkuale yemi sɔmɔ Mawu ɔ nɔ. E de mɛ ke: “Nyɛ tsɛ Abraham hla nɛ e na ye bami be ɔ kɛ bua jɔmi. E na hulɔ, nɛ e nya.” Akɛnɛ Abraham he Mawu si womi ɔmɛ ye he je ɔ, e kɛ bua jɔmi hyɛ Mesia a bami ɔ blɔ. Loloolo ɔ, Yuda bi ɔmɛ he we Yesu yi nɛ a de lɛ ke: “Mo nɛ o ná we jeha nyingmi enuɔ po ɔ, o na Abraham lo?” Yesu ha mɛ heto ke: “I ngɛ nyɛ dee anɔkuale mi ke i ngɛ loko a fɔ Abraham.” Benɛ e ngɛ hiɔwe kaa mumi mi nɔmlɔ nɛ e hɛɛ blɔ nya ngua a he munyu lɛ e ngɛ tue ɔ nɛ.​​—Yohane 8:56-58.

Se Yuda bi ɔmɛ a mi mi fu Yesu wawɛɛ kaa e de ke e ngɛ loko a fɔ Abraham. Enɛ ɔ he ɔ, a kukuɔ tɛ kaa a maa fiaa lɛ. Se Yesu je a dɛ slɔkee.