Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 78

Tsɔlɔ Anɔkualetsɛ, Moo Pee Klaalo!

Tsɔlɔ Anɔkualetsɛ, Moo Pee Klaalo!

LUKA 12:35-59

  • E SA NƐ TSƆLƆ ANƆKUALETSƐ Ɔ NƐ PEE KLAALO

  • YESU BAMI Ɔ KƐ MI GBAMI BA JE Ɔ MI

Yesu tsɔɔ kaa “kuu nyafii” ko pɛ nɛ a nine maa su hiɔwe Matsɛ Yemi ɔ nɔ. (Luka 12:32) Se e sɛ nɛ a ngɔ he blɔ ngua nɛ a ma ná nɛ ɔ kɛ fiɛ. E ya nɔ nɛ e de mɛ kaa ke a suɔ nɛ a maa hi Matsɛ Yemi ɔ mi ɔ, e sa nɛ a ná su kpakpahi.

Yesu bɔ e kaseli ɔmɛ kɔkɔ kaa a pee klaalo nɛ a mlɛ e bami ɔ. E de mɛ ke: “Nyɛɛ mia, nɛ nyɛɛ pee klaalo; nɛ nyɛ kane ɔmɛ nɛ a hi tsoe kaa nihi nɛ a nyɔmtsɛ ho yo kpeemi ya, nɛ a ngɛ lɛ blɔ hyɛe. Ke a pee klaalo ɔ, ke e kpale kɛ ba nɛ e ba si sinya pɛ kɛkɛ a bli ha lɛ amlɔ. Jamɛ a tsɔli ɔmɛ nɛ a nyɔmtsɛ ɔ ma ba na mɛ kaa a hwɔ we mahe ɔ, a bua maa jɔ!”​​—Luka 12:35-37.

E he be wae kɛ ha kaseli ɔmɛ kaa a maa nu nɔ́ hetomi nɔ́ nɛ Yesu kɛ tsu ní ɔ sisi. Tsɔli nɛ Yesu tu a he munyu ɔ pee klaalo nɛ a ngɛ a nyɔmtsɛ mlɛe. Yesu tsɔɔ mi ke: “Ke [a nyɔmtsɛ ɔ] ba nyɔ mi kpɛti [kɛ je gbɔkuɛ ngmlɛ nɛɛ kɛ ya si ngmlɛ nyɔngma kɛ enyɔ], aloo makɛ tete po [kɛ je ngmlɛ nyɔngma kɛ enyɔ kɛ ya si makɛ ngmlɛ etɛ], nɛ e ba na jã a, a gbaa mɛ!”​​—Luka 12:38.

Pi bɔ nɛ e sa nɛ tsɔli loo ní tsuli nɛ a tsu ní saminya ngɛ we mi ha a he ga nɛ Yesu ngɛ mɛ woe. Enɛ ɔ pee heii ngɛ bɔ nɛ Yesu ngɔ e he kɛ wo nɔ́ hetomi nɔ́ ɔ mi ha a mi. E de e kaseli ɔmɛ ke: “Lɔ ɔ he ɔ, nyɛ hu nyɛɛ pee klaalo, ejakaa Nɔmlɔ Bi ɔ maa ba be mi nɛ nyɛ hyɛ we lɛ blɔ.” (Luka 12:40) Enɛ ɔ tsɔɔ kaa be ko ma ngɛ a hɛ mi nɛ Yesu maa ba. E suɔ nɛ e kaseli ɔmɛ​​—titli ɔ nihi nɛ a ngɛ “kuu nyafii” ɔ mi ɔ nɛ a pee klaalo.

Petro suɔ nɛ e maa nu nɔ́ nɛ Yesu ngɛ tsɔɔe ɔ sisi saminya, enɛ ɔ he ɔ, e bi Yesu ke: ‘Nyɔmtsɛ, abɛ nɛ o bu nɛ ɔ, wa he e kɔɔ, loo ni ɔmɛ tsuo?’ Yesu ha we Petro heto tɛɛ, mohu ɔ, e kɛ nɔ́ hetomi nɔ́ ko nɛ ngɛ kaa kekle nɔ́ ɔ tsɔɔ lɛ nya. E de ke: “Ma tsɔɔ nyɛ bɔ nɛ tsɔlɔ nɛ yeɔ anɔkuale, nɛ le ní hulɔ ɔ ngɛ ha. Lɛ ji nɔ nɛ ke e nyɔmtsɛ ɔ maa hia blɔ, nɛ e toɔ we ɔ ngɔ woɔ e dɛ mi; lɛ nɛ e haa tsɔli kpa amɛ a niye ní ngɛ be nɛ sa mi. Jamɛ a tsɔlɔ ɔ nɛ ke e nyɔmtsɛ ɔ ba nɛ e ma ba na kaa e ngɛ ní tsue kikɛ nɛ ɔ, a gbaa lɛ! Niinɛ, i ngɛ nyɛ dee ke, nyɔmtsɛ ɔ maa tu e níhi tsuo ngɔ wo jamɛ a tsɔlɔ ɔ dɛ mi nɛ e hyɛ nɔ.”​​—Luka 12:41-44.

E ngɛ heii kaa ngɛ nɔ́ hetomi nɔ́ nɛ sɛ hlami ɔ mi ɔ, Yesu nɛ ji nɔmlɔ Bi ɔ ji “nyɔmtsɛ ɔ” nɛ. Ke jã a, lɛɛ “tsɔlɔ anɔkualetsɛ ɔ” hu ba peeɔ “kuu nyafii” ɔ nɛ a kɛ Matsɛ Yemi ɔ ma ha mɛ ɔ mi bimɛ ɔmɛ ekomɛ. (Luka 12:32) Yesu ngɛ tsɔɔe kaa kuu nɛ ɔ mi bimɛ ɔmɛ ekomɛ ma ha “tsɔli kpa amɛ” a “niye ní ngɛ be nɛ sa mi.” Enɛ ɔ ma ha nɛ Petro kɛ kaseli kpa amɛ nɛ Yesu ngɛ mɛ ní tsɔɔe, nɛ e ngɛ mɛ mumi mi niye ní hae ɔ maa na kaa be ko maa su nɛ nɔmlɔ Bi ɔ maa ba. Ke jamɛ a be ɔ su ɔ, a ma ná ni komɛ nɛ a ma ha Yesu se nyɛɛli tsuo nɛ a ji Nyɔmtsɛ ɔ “tsɔli kpa amɛ” mumi mi niye ní.

Yesu gu blɔ kpa nɔ nɛ e ma nɔ mi kɛ ha kaseli ɔmɛ kaa e he hia kaa a maa pee klaalo, nɛ́ a hyɛ a ní peepee nɛ hi. Nɔ́ he je nɛ e pee jã a ji kaa, e he wɛ kaa a hɛ maa je a he nɔ nɛ a kpɛti ni komɛ po maa te si kɛ wo a nyɛmimɛ ɔmɛ. E de ke: “Se ke jamɛ a tsɔlɔ ɔ ma de ngɛ e yi mi ke e nyɔmtsɛ ɔ se ma ya fia si bɔɔ, nɛ e be bae mla a, lɛɛ e ma bɔni tsɔli kpa amɛ, kɛ mawayi ɔmɛ kongomi. E maa ye ní, nɛ e maa nu ní, nɛ e maa tɔ dã kpɔtɔɔ. Nyɔmtsɛ ɔ maa kpale kɛ ba tlukaa ligbi nɛ e tsɔlɔ ɔ hyɛ we lɛ blɔ, nɛ́ e hɛ be e he nɔ hulɔ. E maa gbla jamɛ a tsɔlɔ ɔ tue; nɛ e maa poo e mi kpɔ nya kpɔ nya kaa bɔ nɛ sa tue gbolɔ.”​​—Luka 12:45, 46.

Yesu de kaa e ba ‘konɛ e ba mɛ je ɔ he la.’ Nɛ e pee jã a hulɔ ejakaa munyuhi nɛ e tu ɔ ha nɛ  nihi sa nya ngɛ lakpa tsɔɔmihi kɛ blema nimeli ɔmɛ a tsɔɔmihi a he, nɛ a ti nihi fuu ngmɛɛ jamɛ a tsɔɔmi ɔmɛ a he. Enɛ ɔ ha nɛ mi gbami ba nihi nɛ kake peemi ngɛ a kpɛti po a mi; mi gbami ba ‘tsɛmɛ kɛ a binyumuhi, nyɛmɛ kɛ a biyihi, kɛ nganyɛmɛ kɛ a nganyɛmɛ hu a kpɛti.’​​—Luka 12:49, 53.

E kaseli ɔmɛ titli nɛ e kɛ mɛ ngɛ munyu nɛ ɔ tue ɔ nɛ. Se jehanɛ ɔ, e plɛ e he kɛ tsɔɔ ma kpekpemi ɔ. A kpɛti nihi fuu je blɔ nɛ a ma a hɛ ngɔ fɔ odasehi nɛ tsɔɔ kaa Yesu ji Mesia a nɔ, nɛ a he we lɛ yi. Enɛ ɔ he ɔ, e de mɛ ke: “Ke nyɛ na bɔku nɛ ngɛ e he nya buae ngɛ bonyoku ɔ, amlɔ ɔ, nyɛ deɔ ke, ‘Hiɔmi ma’, nɛ e baa mi ja niinɛ. Nɛ ke leneyi kɔɔhiɔ ngɛ fiae ɔ, nyɛ deɔ ke, ‘Latsa maa tsa’, nɛ e baa mi jã pɛpɛɛpɛ. Osatotsɛmɛ! Nyɛ le je nɛ ɔ mi níhi, kɛ hiɔwe níhi a sisi tsɔɔmi. Mɛni he je mɔ nɛ níhi nɛ ngɛ nɔ yae be nɛ ɔ mi ɔ lɛɛ nyɛ li ɔ?” (Luka 12:54-56) Enɛ ɔ tsɔɔ kaa a pee we klaalo kulaa.