YOHANE 8:12-36

  •   YESU TSƆƆ NƆ NƐ BI Ɔ JI

  • MƐNI BLƆ NƆ NƐ YUDA BI ƆMƐ A JI NYƆGUƐHI?

Ngɛ Gbasisihimi Nyami be ɔ we ligbi kpaagone ɔ nɔ ɔ, Yesu ya sɔlemi we ɔ nɛ e ya da he nɛ a ngɔɔ “tó tsumi daka” a kɛ ma a, nɛ e tsɔɔ ní. (Yohane 8:20; Luka 21:1) Lejɛ ɔ ngɛ yi ɔmɛ a kpo ɔ nɔ ngɛ he nɛ nihi ngɔɔ sika kɛ ya woɔ tó tsumi daka a mi ngɛ ɔ.

Ke e su gbijlɔ yemi be nɛ je jɔ ɔ, a suɔ kane ngɛ lejɛ ɔ. Kane tso nguahi eywiɛ ngɛ lejɛ ɔ, nɛ kãhi nɛ nu ngɛ mi ngɛ kane tso ɔmɛ a sisi. Kane nɛ ɔmɛ a nya wa, nɛ a hyɛɛ nɔ́ kɛ yaa tsitsaa. Enɛ ɔ he ɔ, nɔ́ nɛ Yesu de kɛ nyɛɛ se ɔ ma ha nɛ a juɛmi nɛ ya kane ɔ nɔ. E de ke: “Imi ji je ɔ la a nɛ. Nɔ tsuaa nɔ nɛ nyɛɛɔ ye se ɔ, e naa la a nɛ haa nɔ wami ɔ; nɛ e be diblii mi nyɛɛe kɔkɔɔkɔ.”​​—Yohane 8:12.

Farisi bi ɔmɛ a bua jɔɛ nɔ́ nɛ Yesu de ɔ he nɛ a de ke: “Jehanɛ lɛɛ o ngɛ mo nitsɛ o he odase yee. Nɔ́ nɛ o ngɛ dee ɔ be mi fɛɛ.” Yesu he nɔ ke: “E ngɛ mi mohu kaa imi nitsɛ i ngɛ ye he odase yee lɛɛ, se ye odase ɔ ngɛ mi, ejakaa i le he nɛ i je, kɛ he nɛ i yaa.” E ya nɔ nɛ e de ke: “A ngma ngɛ nyɛ mlaa a mi ke, ke ni enyɔ ye odase nɛ kɔɔ ɔ, e peeɔ anɔkuale. Imi lɛɛ i yeɔ imi nitsɛ ye he odase, nɛ Tsɛ ɔ nɛ tsɔ mi ɔ hu yeɔ ye he odase.”​​—Yohane 8:13-18.

Loloolo ɔ, Farisi bi ɔmɛ he we nɔ́ nɛ e de ɔ yi, nɛ a bi lɛ ke: “O Tsɛ ɔ, jije e ngɛ?” Yesu gba mi kpoo nɛ e de mɛ ke: ‘Nyɛ li mi, nɛ ye Tsɛ ɔ hu nyɛ li lɛ. Kaa nyɛ le mi jinɛ nyɛ maa le Tsɛ ɔ hulɔ.’ (Yohane 8:19) E ngɛ mi kaa loloolo ɔ, Farisi bi ɔmɛ a ngɛ hlae nɛ a maa nu Yesu mohu lɛɛ, se nɔ ko nɔ ko nyɛ we nɛ e ta e he.

Yesu kpale ti munyu ko nɛ e tu momo ɔ mi ke: “Imi lɛɛ i yaa! Nyɛ ma hla mi, se nyɛ ma gbo kɛ nyɛ he yayami. He nɛ i yaa a, nyɛ be nyɛe maa ba.” Yuda bi ɔmɛ nui nɔ́ nɛ Yesu de ɔ sisi nɛ a bi ke: “Ke e de ke ‘he nɛ e yaa a, wa be nyɛe maa ya a’, kɛ e ngɛ tsɔɔe kɛɛ? E yaa gbe e he lo?” A nui nɔ́ nɛ Yesu de ɔ sisi, ejakaa a li he nɛ e je. E de mɛ ke: “Nyɛɛ lɛɛ je nɛ ɔ mi bi ji nyɛ; se imi lɛɛ hiɔwe i je. Je nɛ ɔ mi bi ji nyɛ, se imi lɛɛ i ji je nɛ ɔ mi.”​​—Yohane 8:21-23.

Yesu ngɛ e si himi ngɛ hiɔwe loko e ba zugba nɛ ɔ nɔ, kɛ Mesia loo Kristo nɛ e ji ɔ he munyu tue. E ngɛ mi kaa jami hɛ mi nyɛɛli ɔmɛ ngɛ Kristo ɔ blɔ hyɛe, se kɛ̃ ɔ, a kɛ abofu bi ke: “Mɛnɔ ji mo?”​​—Yohane 8:25.

Ngɛ abofu nɛ Yuda bi ɔmɛ kɛ kpee Yesu ɔ tsuo se ɔ, e ha mɛ heto ke: “Sisije ɔ, mɛni i de nyɛ ɔ?” E ya nɔ nɛ e gbla a juɛmi kɛ ya e Tsɛ ɔ nɔ, nɛ e tsɔɔ nɔ́ he je nɛ e sa kaa a bu Bi ɔ tue ɔ. E de ke: “Se nɔ nɛ tsɔ mi ɔ, anɔkualetsɛ ji lɛ, lɔ ɔ he ɔ, nɔ́ nɛ i nu kɛ je e nya a, lɔ ɔ i deɔ je ɔ.”​​—Yohane 8:25, 26.

Lɔ ɔ se ɔ, Yesu je hemi kɛ yemi nɛ e ngɛ ngɛ e Tsɛ ɔ mi ɔ kpo heii ke: “Ke nyɛ ná wó Nɔmlɔ Bi ɔ nɔ ɔ, nyɛ maa le kaa imi ji nɔ nɛ i ji ɔ. Kɛkɛ ɔ, nyɛ maa le kaa i to we imi nitsɛ ye yi mi kɛ tsu we nɔ́ ko gblegbleegble. Mohu nɔ́ nɛ Tsɛ ɔ tsɔɔ mi ɔ, lɔ ɔ pɛ i deɔ. Tsɛ ɔ nɛ tsɔ mi ɔ kɛ mi ngɛ; e si we imi nɔ kake too, ejakaa i peeɔ e suɔmi nya ní.” Yuda bi ɔmɛ a be kikɛmɛ a hemi kɛ yemi nɛ ɔ eko.​​—Yohane 8:28, 29.

Se Yuda bi komɛ lɛɛ a he Yesu ye, lɔ ɔ he ɔ, e de mɛ ke: “Ke nyɛ pɛtɛ ye munyu ɔ he ɔ, lɛɛ nyɛ maa pee ye kaseli nitsɛnitsɛmɛ. Kɛkɛ ɔ, nyɛ maa le anɔkuale ɔ; nɛ anɔkuale ɔ ma ha nyɛ maa ye nyɛ he.”​​—Yohane 8:31, 32.

Se ni komɛ hu lɛɛ, nɔ́ nɛ e de ɔ pee mɛ yaa. Akɛnɛ a kɛ Yesu kpa we gbi he je ɔ, a de ke: “Abraham nina ji wɔ, nɛ wɔɔ lɛɛ wa yi nyɔguɛ ha nɔ ko hyɛ. Ke o de ke, ‘Nyɛ maa ye nyɛ he’ ɔ, kɛ o ngɛ tsɔɔe kɛɛ?” E ngɛ mi kaa Yuda bi ɔmɛ a le kaa be komɛ ɔ, ma je li yeɔ a nɔ mohu lɛɛ, se a sume nɛ a tsɛ mɛ ke nyɔguɛhi. Yesu de mɛ nɔ́ ko nɛ tsɔɔ kaa, ke a pee mɛnimɛni po ɔ, nyɔguɛhi ji mɛ. E de ke: “I ngɛ nyɛ dee anɔkuale mi ke nɔ tsuaa nɔ nɛ peeɔ yayami ɔ, yayami ɔ nyɔguɛ ji lɛ.”​​—Yohane 8:33, 34.

Yuda bi nɛ a kplɛɛ we nɔ kaa yayami pee mɛ nyɔguɛ ɔ ngɔ a he kɛ ngɛ oslaa mi woe. Yesu tsɔɔ mi ke: “Nyɔguɛ hí we mi kɛ yɛ neneene, se bi lɛɛ e hii si kɛ yaa neneene.” (Yohane 8:35) Nyɔguɛ be he blɔ kaa e naa weto ní, nɛ a ma nyɛ maa fiee lɛ be saa be. Se nɔ nitsɛ bi, loo nɔ ko bi nɛ a ngɔ lɛ kɛ pee bi pɛ lɛ ngɛ he blɔ nɛ e hii we mi kɛ yaa “neneene,” nɛ tsɔɔ kaa e maa hi we ɔ mi kɛ ya si benɛ e ma gbo.

Enɛ ɔ he ɔ, anɔkuale nɛ kɔɔ Bi ɔ he ɔ ji nɔ́ nɛ ma ha nɛ nihi maa ye a he ngɛ yayami kɛ gbenɔ he kɛ ya neneene. Yesu de ke: “Ke Bi ɔ ha nyɛ ye nyɛ he ɔ, nyɛ maa ye nyɛ he niinɛ.”​​—Yohane 8:36.