Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 66

E Ya Yerusalem Ngɛ Gbasisihimi Nyami ɔ He

E Ya Yerusalem Ngɛ Gbasisihimi Nyami ɔ He

YOHANE 7:11-32

  • YESU YA TSƆƆ NÍ NGƐ SƆLEMI WE Ɔ

Ngɛ Yesu baptisimi ɔ se ɔ, e fiɛɛmi ní tsumi ɔ ha nɛ nihi fuu nu e he. Yuda bi fuu na nyakpɛ níhi nɛ e pee ɔ, nɛ e he munyu gbɛ fia Israel zugba a nɔ tsuo. Jehanɛ ɔ, be su nɛ a maa ye Gbasisihimi Nyami ɔ ngɛ Yerusalem, nɛ nihi fuu ngɛ blɔ hyɛe kaa Yesu maa ya lejɛ ɔ.

E slo nɔ́ nɛ nɔ tsuaa nɔ ngɛ dee ngɛ Yesu he. Ni komɛ ke: “Nɔmlɔ kpakpa ji lɛ.” Ni komɛ hu ke: “E ngɛ ma a nane tɔtɔe.” (Yohane 7:12) Benɛ gbijlɔ yemi ɔ je sisi ɔ, munyu nɛ ɔ he pɛ nɛ a ngɛ susue. Se nɔ ko nɔ ko ná we kã nɛ e ma fa Yesu he ngɛ ma a hɛ mi, ejakaa a ngɛ Yuda ma nimeli ɔmɛ gbeye yee.

Benɛ nyami ɔ ngɛ nɔ yae ɔ, Yesu ba hia si ngɛ sɔlemi we ɔ. Bɔ nɛ e tsɔɔ ní ha a pee nihi fuu nyakpɛ. E yɛ Yuda bi a tsɔɔli ɔmɛ a sukuu ɔ eko, lɔ ɔ he ɔ, Yuda bi ɔmɛ bi ke: “Nɔmlɔ nɛ kase we ní ɔ, kɛ peeɔ kɛɛ nɛ e le ní kikɛ nɛ ɔ?”​​—Yohane 7:15.

Yesu de mɛ ke: “Nɔ́ nɛ i ngɛ nyɛ tsɔɔe ɔ ji imi nitsɛ ye yi mi; nɔ nɛ tsɔ mi ɔ nɛ ngɔ ha mi. Nɔ tsuaa nɔ nɛ suɔ kaa e maa pee Mawu suɔmi nya ní ɔ, e maa na kaa nɔ́ nɛ i ngɛ tsɔɔe ɔ je Mawu ngɔ se pi imi nitsɛ ye he wami nya.” (Yohane 7:16, 17) Níhi nɛ Yesu tsɔɔ ɔ kɛ Mawu Mlaa a kɔ, enɛ ɔ he ɔ, jinɛ e sa nɛ ni ɔmɛ ko na kaa pi hɛ mi nyami nɛ e ngɛ hlae, mohu ɔ, e ngɛ Mawu hɛ mi nyami woe.

Yesu de ke: “Pi Mose nɛ wo nyɛ mlaa a? Nɛ nyɛ ti nɔ ko nɔ ko yi nɔ ɔ? Mɛni he je nyɛ ngɛ hlae nɛ nyɛɛ gbe mi ɔ?” Nibwɔhi nɛ a ba ma a mi ɔ lɛɛ a li kaa ma nimeli ɔmɛ ngɛ hlae nɛ a maa gbe Yesu. A he we yi kaa nɔ ko maa to kaa e maa gbe nɔ ko nɛ le ní tsɔɔmi kaa jã. Lɔ ɔ he ɔ, a susu kaa e sɛ nɛ Yesu ko de jã. A de ke: “Mo nɔmlɔ nɛ ɔ, mumi yayami ngɛ o mi! Mɛnɔ ngɛ mo hlae nɛ e gbe?”​​—Yohane 7:19, 20.

Se ngɛ anɔkuale mi ɔ, jeha kake kɛ fa loko Gbasisihimi nyami nɛ ɔ maa su ɔ, Yesu tsa nyumu ko ngɛ Hejɔɔmi ligbi ɔ nɔ, nɛ e piɛ nguɛ nya nɛ Yuda ma nimeli ɔmɛ gbe lɛ. Yesu kɛ mɛ susu níhi a he kɛ ya tsitsaa, nɛ kɛ gu jamɛ a blɔ ɔ nɔ ɔ, e ha nɛ a na kaa a susumihi dɛ. E kai mɛ kaa ngɛ Mlaa a nya a, e sa nɛ a po binyumuhi ngɛ ligbi kpaanyɔne ɔ nɔ ke e ji Hejɔɔmi ligbi po. Kɛkɛ nɛ e ya nɔ nɛ e de ke: “Ke Hejɔɔmi ligbi ɔ, nyɛ poɔ nɔ, konɛ a ko tɔ̃ Mose mlaa a, mɛni he je nyɛ mi mi fuɔ mi kaa i tsa hiɔtsɛ Hejɔɔmi ligbi ɔ? Ke nyɛ ngɛ kojoe ɔ, nyɛ kpa nɔ hɛ mi hyɛmi, nɛ́ nyɛɛ ye dami sane.”​​—Yohane 7:23, 24.

Yerusalem bi nɛ a le nɔ́ nɛ ngɛ nɔ yae ngɛ Yesu kɛ ma nimeli ɔmɛ a kpɛti ɔ bi ke: “Anɛ pi nyumu nɛ ɔ nɛ ma nimeli ɔmɛ ngɛ hlae nɛ a gbe ɔ? Hyɛ kaa jehanɛ lɛɛ e daa si paa ngɛ ní tsɔɔe nɛ a de we lɛ nɔ́ ko. Eko piɔ a na kaa lɛ ji Kristo ɔ niinɛ?” Mɛni he je mɔ nɛ ni ɔmɛ a he we yi kaa Yesu ji Kristo ɔ? A ya nɔ nɛ a bi ke: “Kristo ɔ nɛɛ, anɛ nɔ ko maa le he nɛ e maa je lo? Tse wɔ tsuo wa le he nɛ nɔmlɔ nɛ ɔ je.”​​—Yohane 7:25-27.

Yesu ha mɛ heto ke: ‘Nyɛ le mi, nɛ nyɛ le he nɛ i je. Pi imi nitsɛ ye he wami nya nɛ i ba. Nɔ nɛ tsɔ mi ɔ, anɔkualetsɛ ji lɛ; nyɛɛ nyɛ li lɛ. Imi lɛɛ i le lɛ, ejakaa e ngɔ nɛ i je, nɛ lɛ ji nɔ nɛ tsɔ mi.’ (Yohane 7:28, 29) Benɛ Yesu de jã pɛ nɛ a pee kaa a maa nu lɛ konɛ a gbe lɛ loo a wo lɛ tsu mi. Se nɔ ko nyɛ we nɛ e nu lɛ, ejakaa be nɛ e ma gbo ɔ sui lolo.

Se kɛ̃ ɔ, níhi nɛ Yesu pee ɔ ha nɛ ni komɛ he lɛ ye. E nyɛɛ ngɛ nyu hɛ mi, e ha nɛ kɔɔhiɔ ngmɛ dii, e ngɔ abolo bɔɔ kɛ lo bɔɔ kɛ lɛ nihi akpehi abɔ, e tsa hiɔtsɛmɛ, e ha nɛ nihi nɛ a hule nyɛɛ, e ha nɛ hɛ yuyuili hyɛ nɔ, e tsa kpititsɛmɛ, nɛ  e tle gbogboehi po si. Ní nɛ ɔmɛ nɛ ni ɔmɛ na he je ɔ, e da blɔ kaa a bi ke: “Anɛ Mesia a nɛ maa ba a ma nyɛ to okadi pe nɔmlɔ nɛ ɔ lo?”​​—Yohane 7:31.

Benɛ Farisi bi ɔmɛ nu nɛ ma kpekpemi ɔ de jã a, a kɛ osɔfo nikɔtɔma amɛ pee kake nɛ a tsɔ nihi konɛ a ya nu Yesu.