Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 94

Sɔlemi Kɛ He Si Bami He Hia Saminya

Sɔlemi Kɛ He Si Bami He Hia Saminya

LUKA 18:1-14

  • YALƆYO NƐ GBAA NƆ NYA A

  • FARISI NO KO KƐ TÓ TSULƆ KO

Be ko nɛ be ɔ, Yesu ngɔ nɔ́ hetomi nɔ́ ko kɛ tsu ní nɛ e kɛ tsɔɔ e kaseli ɔmɛ kaa e sa nɛ a fĩ si nɛ a sɔle be tsuaa be. (Luka 11:5-13) Mo kai kaa Yesu ngɛ Samaria loo Galilea ni ɔmɛ a mi loloolo. E kpale ma nɔ mi kɛ ha e kaseli ɔmɛ kaa e he hia nɛ a ya nɔ nɛ a sɔle. E ngɔ nɔ́ hetomi nɔ́ nɛ nyɛɛ se nɛ ɔ kɛ tsɔɔ mi. E de mɛ ke:

“Kojolɔ ko hi ma ko mi; e yi Mawu gbeye ɔ, e bui adesa hulɔ. Yalɔyo ko hu hi jamɛ a ma a mi. Ke pee ɔ, yalɔyo ɔ baa kojolɔ ɔ ngɔ ba deɔ lɛ ke, ‘Nɔ ko ye mi amimi; i kpa mo pɛɛ nɛ o ye dami sane ha mi.’ Kojolɔ ɔ pee we nɔ́ ko nɔ́ ko ngɛ sane ɔ he hluu kɛ ya su be ko. Kɛkɛ nɛ e de ngɛ e yi mi ke, ‘E ngɛ mi kaa i yi Mawu gbeye, nɛ i bui adesa hulɔ, se akɛnɛ yalɔyo nɛ ɔ ngɛ ye nya doe he je ɔ, ma hyɛ nɛ a ye dami sane ha lɛ. Ke i pee we jã a, e maa hi ye ngɔ bae kpamisa, nɛ e be hae nɛ ma ná tue mi jɔmi.’”​​—Luka 18:2-5.

Yesu ya nɔ nɛ e de ke: ‘Tse nyɛ nu nɔ́ nɛ kojolɔ yi si fialɔ ɔ de ɔ? Yoo, lɛɛ nihi nɛ Mawu nitsɛ hla a, ke a fa kue ha lɛ nyɔ kɛ pia a, anɛ e be mɛɛ a sane yee ha mɛ lo? Anɛ e maa to tsle hluu loko e ma ba piɛɛ a he lo?’ (Luka 18:6, 7) Mɛni Yesu ngɛ hlae nɛ a le ngɛ e Tsɛ ɔ he?

Nɔ́ nɛ Yesu de ɔ tsɔɔ we kaa Yehowa Mawu ngɛ kaa kojolɔ nɛ e yi mluku ɔ. Mohu ɔ, Yesu ngɛ tsɔɔe kaa ke nɔmlɔ nɛ e yi mluku po bu yalɔyo ɔ pɛɛ kpami ɔ tue ɔ, lɛɛ atsinyɛ jemi ko be he kaa Mawu maa pee pe jã po. Mawu peeɔ nɔ́ nɛ da, nɛ e mi mi hi. Enɛ ɔ he ɔ, ke wa ya nɔ nɛ wa bi lɛ nɔ́ ko ɔ, e maa pee ha wɔ. Wa naa enɛ ɔ ngɛ nɔ́ nɛ Yesu de kɛ nyɛɛ se nɛ ɔ mi. E de ke: “I ngɛ nyɛ dee ke, [Mawu] maa ye a sane ɔ ha mɛ nɔuu.”​​—Luka 18:8.

Ke ohiatsɛ kɛ sikatsɛ ya kojomi he ɔ, a buɔ ohiatsɛ ɔ fɔ, nɛ a buɔ sikatsɛ ɔ bemi. Se Mawu lɛɛ e be jã. Ke be su nɛ e maa kojo ɔ, e maa ye dami sane; e maa gbla yiwutsotsɛmɛ a tue, nɛ e ma ha nihi nɛ a sɔmɔɔ lɛ ɔ neneene wami.

Mɛnɔmɛ nɛ a ngɛ hemi kɛ yemi kaa yalɔyo ɔ? Nihi enyɛmɛ nɛ a ngɛ hemi kɛ yemi kaa Mawu ‘maa ye a sane ha mɛ nɔuu’? Benɛ Yesu ngɔ nɔ́ hetomi nɔ́ nɛ ɔ kɛ tsɔɔ nɔ́ he je nɛ e sa nɛ a ya nɔ nɛ a sɔle ɔ mi ta a, e bi mɛ ke: ‘Se ke nɔmlɔ Bi ɔ kpale kɛ ba a, anɛ e ma ba na nihi ngɛ je ɔ mi nɛ a ngɛ hemi kɛ yemi nɛ ɔ lo?’ (Luka 18:8) Enɛ ɔ tsɔɔ kaa ke Kristo ba a, e be nihi nɛ a ngɛ hemi kɛ yemi kaa jã a fuu nae ngɛ zugba a nɔ.

Nihi nɛ a ngɛ Yesu tue bue ɔ a kpɛti ni komɛ susu kaa a ngɛ hemi kɛ yemi nɛ mi wa. A susu kaa yayami ko be a he, nɛ a buu ni kpahi kaa yayami peeli. Se Yesu de mɛ ke:

“Ligbi ko ɔ, ni enyɔ ya sɔlemi we ɔ nɛ a ya sɔle; nɔ kake ɔ, Farisi no ji lɛ, nɛ nɔ kake lɛɛ tó tsulɔ. Farisi no ɔ ya da si ngɛ he ko banee nɛ e sɔle ke, ‘Mawu, i naa mo si kaa i pee we jiklɔɔ; i sisi we nɔ, nɛ i puɛ we gba kaa bɔ nɛ ni komɛ peeɔ ɔ. I naa mo si ekohu kaa i be kaa tó tsulɔ nɛ ɔ hulɔ. I haa hwɔ si enyɔ ngɛ otsi mi, nɛ i haa mo níhi tsuo nɛ i náa a mi dlami nyɔngmanyɔngma mi kakaaka.’”​​—Luka 18:10-12.

 A le Farisi bi ɔmɛ kaa ke a ngɛ ma hɛ mi ɔ, a suɔ nɛ nihi nɛ na mɛ kaa a da, bɔ nɛ pee nɛ a wo a hɛ mi nyami. A pɔɔ hwɔ hami Hɔɛgbi kɛ So ngɛ a jua ligbi ɔmɛ a nɔ konɛ nihi fuu nɛ na mɛ. Jehanɛ hu ɔ, a woɔ ba tsɔwi po a he mi dlami nyɔngmanyɔngma mi kakaaka. (Luka 11:42) Be ko nɛ be ɔ, Farisi bi ɔmɛ de nɔ́ ko nɛ tsɔɔ kaa a bui nihi nɛ a ba si ɔ. A de ke: “Ma kpekpemi nɛ ɔ, a gbiɛ mɛ pɛ, ejakaa [ngɛ Farisi bi ɔmɛ a susumi nya a] a li Mose mlaa a.”​​—Yohane 7:49.

Yesu tsa nɔ́ hetomi nɔ́ ɔ nɔ ke: “Se tó tsulɔ ɔ ya da si ngɛ se lokoo, nɛ e yi nɔ tete po e wo we kɛ yɛ hiɔwe; mohu ɔ, e gbe e gugue nɛ e de ke, ‘Mawu, yayami peelɔ ji mi; naa mi mɔbɔ!’” Tó tsulɔ ɔ kplɛɛ nɔ kaa e ji yayami peelɔ. Yesu ya nɔ nɛ e de ke: “I ngɛ nyɛ dee ke nyumu nɛ ɔ kpale e se kɛ ho we mi ya kaa nɔ nɛ pee nɔ́ nɛ sa Mawu hɛ mi pe Farisi no ɔ. Ejakaa nɔ tsuaa nɔ nɛ woɔ e he nɔ ɔ, a maa ba lɛ si; se nɔ nɛ baa e he si ɔ, a ma wo e nɔ.”​​—Luka 18:13, 14.

Yesu ha nɛ e pee heii kaa he si bami he hia wawɛɛ. Yesu kaseli ɔmɛ ma ná ga womi nɛ ɔ he se ejakaa Farisi bi ɔmɛ nɛ a buu a he dali, nɛ a suɔ blɔ nya a, a kpɛti nɛ kaseli ɔmɛ hi kɛ wa. E ji ga womi nɛ Yesu se nyɛɛli tsuo ma ná he se.