Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 100

Nɔ́ Hetomi Nɔ́ Nɛ Kɔɔ Mina Nyɔngma a He ɔ

Nɔ́ Hetomi Nɔ́ Nɛ Kɔɔ Mina Nyɔngma a He ɔ

LUKA 19:11-28

  • YESU NƆ́ HETOMI NƆ́ NƐ KƆƆ MINA NYƆNGMA A HE Ɔ

Jinɛ Yesu ngɛ blɔ nɔ kɛ yaa Yerusalem loko e na Zakeo ɔ nɛ. Se e ma nyɛ maa pee kaa e kɛ e kaseli ɔmɛ a se kɛ bɔɔ ngɛ Zakeo we ɔ mi. Jamɛ a be ɔ mi ɔ, kaseli ɔmɛ susu kaa e be kɛe nɛ a maa to “Mawu matsɛ yemi ɔ” sisi, nɛ a maa wo Yesu Matsɛ. (Luka 19:11) Kaa bɔ nɛ a nui sisi kaa e sa nɛ Yesu nɛ gbo ɔ, jã a kɛ̃ nɛ a nui sane nɛ ɔ hu sisi. Enɛ ɔ he ɔ, Yesu ngɔ nɔ́ hetomi nɔ́ ko kɛ tsu ní konɛ e kɛ ye bua mɛ nɛ a na kaa jehahi babauu maa be loko Matsɛ Yemi ɔ maa ba.

Yesu de mɛ ke: “Be ko ɔ, ablade ko doma kɛ ho lokoo ya, konɛ a ya wo lɛ matsɛ nɛ e kpale kɛ ba.” (Luka 19:12) Ablade ɔ se ma ya kɛ bɔɔ loko e maa kpale kɛ ba. E ngɛ heii kaa Yesu ji “ablade” ɔ nɛ hia blɔ kɛ ya tsitsaa “lokoo” ɔ nɛ. E ya hiɔwe konɛ e Tsɛ ɔ ya wo lɛ matsɛ.

Ngɛ nɔ́ hetomi nɔ́ nɛ ɔ mi ɔ, Yesu tsɔɔ kaa loko “ablade” ɔ maa hia blɔ ɔ, e tsɛ e sɔmɔli nyɔngma, nɛ e ha a ti nɔ tsuaa nɔ mina kakaaka, nɛ e de mɛ ke: “Nyɛɛ ngɔ sika nɛ ɔ kɛ tsu ní kɛ yaa su be nɛ ma ba.” (Luka 19:13) Blema a, mina ji sika nɛ e mi jiɔ wawɛɛ. A ma nyɛ maa ngɔ mina kake kɛ wo apaatsɛ hiɔ nyɔhiɔ etɛ kɛ se.

Eko ɔ, kaseli ɔmɛ susu kaa mɛ ji tsɔli nyɔngma amɛ nɛ a tu a he munyu ngɛ nɔ́ hetomi nɔ́ ɔ mi ɔ, ejakaa a kai kaa be ko nɛ be ɔ, Yesu kɛ mɛ to apaatsɛmɛ a he. (Mateo 9:35-38) Yesu de we mɛ ke a ya ngmɔ nitsɛ ko mi nɛ a ya kpa ní ha lɛ. Mohu ɔ, nihi nɛ kaseli ɔmɛ maa ye bua mɛ konɛ a nine nɛ su Mawu Matsɛ Yemi ɔ nɔ ɔ ji ní nɛ a ma kpa a nɛ. Kaseli ɔmɛ maa ngɔ níhi nɛ a ngɛ ɔ kɛ fĩ fiɛɛmi ní tsumi ɔ se konɛ a hla nihi nɛ a maa piɛɛ Yesu he kɛ ye matsɛ ngɛ Mawu Matsɛ Yemi ɔ mi ɔ.

Mɛni hu nɛ Yesu tu he munyu ngɛ nɔ́ hetomi nɔ́ ɔ mi? Yesu tsɔɔ kaa ma a mi bi ɔmɛ “sume [ablade ɔ]. Lɔ ɔ he ɔ, a tsɔ nihi kɛ fie e se ke a ya de ke, ‘Wa sume nɛ nyumu nɛ ɔ ba ye wa nɔ matsɛ.’” (Luka 19:14) Kaseli ɔmɛ le kaa Yuda bi ɔmɛ he we Yesu yi ejakaa a ti ni komɛ suɔ nɛ a gbe lɛ. Benɛ Yesu gbo nɛ e ho hiɔwe ya se ɔ, Yuda bi ɔmɛ te si kɛ wo kaseli ɔmɛ kɛ tsɔɔ kaa a sume Yesu. A ha nɛ e pee heii kaa a sume nɛ Yesu nɛ pee a Matsɛ.​​—Yohane 19:15, 16; Bɔfo Ɔmɛ A Ní Tsumi 4:13-18; 5:40.

Mɛni nɛ tsɔli nyɔngma amɛ ngɔ sika nɛ a ha mɛ ɔ kɛ pee loko “ablade” nɛ a ya wo lɛ “matsɛ” ɔ kpale kɛ ba? Yesu de ke: “A ya wo nyumu ɔ matsɛ nɛ e kpale e se kɛ ba. Amlɔ nɔuu ɔ, e fa ke a tsɛ e tsɔli ɔmɛ nɛ e ha mɛ sika a kɛ ba, konɛ e hyɛ nɔ́ nɛ a ná ngɛ se. Kekle nɔ ɔ ba de ke, ‘Mina kake ɔ nɛ o ha mi ɔ fɔ mina nyɔngma.’ E de lɛ ke, ‘Ayekoo! Tsɔlɔ kpakpa ji mo! O ye anɔkuale ngɛ nɔ́ nyafii mi, lɔ ɔ he ɔ, o maa ye ma nyɔngma nɔ.’ Nɔ nɛ ji enyɔ ɔ ba de lɛ ke, ‘Nyɔmtsɛ, o mina a fɔ mina enuɔ.’ Nyɔmtsɛ ɔ de lɛ hu ke, ‘O maa ye ma enuɔ nɔ.’”​​—Luka 19:15-19, NW.

Ke kaseli ɔmɛ pee a ní kaa tsɔli nɛ ɔmɛ, nɛ a ngɔ níhi nɛ a ngɛ ɔ kɛ fĩ Matsɛ Yemi ɔ se, nɛ a pee kaseli fuu ɔ, a tsui maa nɔ a mi, ejakaa Yesu bua maa jɔ a he. Jehanɛ hu ɔ, a ma ná nɔ mi mami kaa a ma ná a dengme gbomi ɔ he se. Ngɛ anɔkuale mi ɔ, Yesu kaseli ɔmɛ a si fɔfɔɛ ngɛ ekpaekpa, nɛ e slo nɔ́ nɛ a ti nɔ tsuaa nɔ ma nyɛ ma tsu. Se kɛ̃ ɔ, Matsɛ Yesu maa na a mɔde bɔmi ɔ, nɛ e maa jɔɔ mɛ ngɛ anɔkuale yemi nɛ a kɛ pee nihi kaseli ɔ he.​​—Mateo 28:19, 20.

Se moo hyɛ bɔ nɛ Yesu gbe nɔ́ hetomi nɔ́ ɔ nya ha. E de ke: ‘Tsɔlɔ kpa hu ba ba de ke, “Nyɔmtsɛ, o mina a nɛ i fi ngɔ wo duku mi kɛ to ɔ ji nɛ ɔ nɛ. I ya ye mo gbeye, ejakaa o yi mi wa. Nɔ́ nɛ pi o nɔ́ kɛkɛ o ngɔ; nɔ́ nɛ o du we kɛkɛ o ya kpa.” Nyɔmtsɛ ɔ de lɛ ke, “Tsɔlɔ angmaletsɛ! Mo nitsɛ o nya mi munyu ma kɛ bu mo fɔ! Tse o le kaa ye yi mi wa! Nɔ́ nɛ pi ye nɔ́ kɛkɛ i ya ngɔ; nɔ́ nɛ i du we kɛkɛ i ya kpa. Saminya! Mɛni he je mɔ nɛ o kɛ ye sika a yɛ sika to he, konɛ ke i kpale  kɛ ba a, ma ba he ye ní kɛ hekpa?” Jehanɛ ɔ, e de nihi nɛ daa si ngɛ e kasa nya a ke, “Nyɛ kpɔ mina a ngɛ e dɛ nɛ nyɛɛ ngɔ kɛ ha tsɔlɔ ɔ nɛ ngɛ mina nyɔngma a.”’​​—Luka 19:20-24.

Akɛnɛ tsɔlɔ nɛ ɔ kua ke e be ní tsue konɛ e nyɔmtsɛ ɔ nɛ ná ní babauu ngɛ e Matsɛ Yemi ɔ mi he je ɔ, nɔ́ nɛ ngɛ e dɛ ɔ po bɔ lɛ. Kaseli ɔmɛ ngɛ blɔ hyɛe kaa Yesu maa pee Mawu Matsɛ Yemi ɔ nya matsɛ. Enɛ ɔ he ɔ, a nu nɔ́ nɛ Yesu de ɔ sisi kaa ke a ti ni komɛ pee a ní kaa tsɔlɔ hejɔtsɛ ɔ, a be mɛ blɔ ngmɛe nɛ a sɛ Matsɛ Yemi ɔ mi.

Nɔ́ nɛ Yesu de ɔ maa wo e kaseli anɔkualetsɛmɛ ɔmɛ he wami konɛ a tsu sɔmɔmi ní tsumi ɔ saminya. E mwɔ e munyu ɔ nya ke: “I ngɛ nyɛ dee ke, nɔ tsuaa nɔ nɛ nɔ́ ko ngɛ e dɛ ɔ, Mawu ma ha lɛ fuu kɛ piɛɛ he. Se nɔ nɛ be nɔ́ ko ɔ, bɔbɔyoo nɛ ngɛ e dɛ ɔ tete po a ma kpɔ ngɛ e dɛ.” Kɛkɛ nɛ Yesu de hu kaa a ma kpata e he nyɛli ɔmɛ nɛ a sume kaa “e ye a nɔ matsɛ ɔ,” a hɛ mi. Enɛ ɔ se ɔ, Yesu tsa blɔ nɛ e ngɛ hiae kɛ yaa Yerusalem ɔ nɔ.​​—Luka 19:26-28.