Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 35

Yoku Nɔ Fiɛɛmi Nɛ Nihi Fuu Le ɔ

Yoku Nɔ Fiɛɛmi Nɛ Nihi Fuu Le ɔ

MATEO 5:1–7:29 LUKA 6:17-49

  • YOKU Ɔ NƆ FIƐƐMI Ɔ

Benɛ Yesu sɔle nyɔnyɔɔnyɔ kɛ hla e bɔfo 12 ɔmɛ ɔ, pɔ tɔ lɛ. Se benɛ je ke na a, e ná he wami bɔ nɛ sa, nɛ e suɔ kaa e maa ye bua nihi. Enɛ ɔ he ɔ, e ya Galilea yoku ko nɔ ngɛ he ko nɛ kɛ Kapernaum he kɛ we.

Nihi fuu je Yerusalem, Yudea, Tiro kɛ Sidon kɛ ya e ngɔ. Mɛni he je nɛ a ya Yesu ngɔ ɔ? ‘A ya konɛ a ya bu Yesu tue, nɛ e tsa a he hiɔhi ha mɛ.’ Ngɛ anɔkuale mi ɔ, a nine su nɔ́ nɛ a ngɛ hlae ɔ nɔ, ejakaa Yesu ‘tsa mɛ tsuo.’ Moo lɛɛ, mo susu he nɛ o hyɛ! E tsa mɛ tsuo. Yesu tsa nihi nɛ mumi yayamihi loo Satan bɔfohi nɛ a yi mi wa a “ngɛ mɛ haoe” ɔ hulɔ.​​—Luka 6:17-19.

Yesu na he ko nɛ sa ngɛ yoku ɔ nɔ, nɛ e ha nimli kpekpemi ɔmɛ a hi si ngɛ lejɛ ɔ. Eko ɔ, e kaseli ɔmɛ lɛ a hi si ngɛ e kasa nya haa a, titli ɔ, e bɔfo 12 ɔmɛ. Nɔ tsuaa nɔ pee klaalo kaa e maa bu tsɔɔlɔ nɛ e peeɔ nyakpɛ ní ɔ tue. Yesu de ni ɔmɛ níhi nɛ a ma ná he se nitsɛnitsɛ. Kɛ je jamɛ a be ɔ mi kɛ ba si mwɔnɛ ɔ, nihi babauu hu ná munyuhi nɛ e tu ɔ he se. Wɔ hu wa ma nyɛ ma ná he se, ejakaa anɔkualehi nɛ e tsɔɔ ɔmɛ a mi tɛ̃, nɛ a sisi numi yi kulaa. Yesu ngɔ níhi nɛ nihi le saminya loo níhi nɛ a pɔɔ nami kɛ tsɔɔ mɛ ní. Enɛ ɔ ha nɛ nihi nɛ a suɔ nɛ a maa sa Mawu hɛ mi nɛ a ná si himi kpakpa a nu e munyu ɔ sisi. Mɛni níhi nɛ Yesu de ngɛ yoku nɔ fiɛɛmi ɔ mi nɛ ha nɛ nihi kaiɔ e munyu ɔ?

MƐNƆMƐ NƐ A NGƐ BUA JƆMI NITSƐNITSƐ?

Nɔ tsuaa nɔ suɔ nɛ e bua nɛ jɔ ngɛ si himi mi. Yesu le enɛ ɔ, lɔ ɔ he ɔ, e tsɔɔ mɛ nɔ́ nɛ ma ha a ma ná bua jɔmi ngɛ a si himi mi. Enɛ ɔ ha nɛ ni ɔmɛ bu lɛ tue saminya. Munyuhi nɛ e tu ɔ pee mɛ nyakpɛ.

Yesu de ke: ‘Nihi nɛ a le kaa mumi mi níhi a he hia mɛ ɔ, a bua nɛ jɔ ejakaa hiɔwe Matsɛ Yemi ɔ maa pee a nɔ́. Nihi nɛ a yeɔ kɔmɔ ɔ, a bua nɛ jɔ ejakaa a maa wo a bua. Nihi nɛ nɔ́ nɛ da peemi he hwɔ kɛ kuma ngɛ mɛ yee ɔ, a bua nɛ jɔ ejakaa a maa tɔ. Nihi nɛ a waa mɛ yi mi ngɛ nɔ́ nɛ da peemi he ɔ, a bua nɛ jɔ ejakaa hiɔwe Matsɛ Yemi ɔ maa pee a nɔ́. Nihi nɛ a jɛɔ mɛ nɛ a waa mɛ yi mi ngɛ ye he ɔ, a bua nɛ jɔ. Nyɛ nya, nɛ nyɛ bua nɛ jɔ.’​—Mateo 5:3-12, NW.

Benɛ Yesu de ke “a bua nɛ jɔ” ɔ, mɛni e ngɛ tsɔɔe? Pi bua jɔmi nɛ nihi náa ngɛ hɛja jemi mi he munyu nɛ Yesu ngɛ tue. Bua jɔmi nitsɛnitsɛ mi kuɔ pe jã. Bua jɔmi nitsɛnitsɛ haa nɛ nɔ tsui nɔɔ e mi ngɛ si himi mi.

Yesu ngɛ tsɔɔe kaa nihi nɛ a le kaa mumi mi níhi a he hia mɛ, nɛ e haoɔ mɛ kaa a ji yayami peeli, nɛ a suɔ kaa a maa kase Mawu he ní konɛ a sɔmɔ lɛ ɔ, mɛ ji nihi nɛ a ngɛ bua jɔmi nitsɛnitsɛ. Ke nihi nyɛ mɛ, nɛ a wa mɛ yi mi ngɛ Mawu suɔmi nya ní nɛ a ngɛ pee ɔ he po ɔ, a bua jɔɔ, ejakaa a le kaa nɔ́ nɛ a ngɛ pee ɔ sa Mawu hɛ mi, nɛ e ma ha mɛ neneene wami.

Nihi babauu susu kaa ní nami kɛ je mi akɔnɔ níhi a se dimi lɛ ma ha mɛ bua jɔmi. Se Yesu tsɔɔ kaa nɔ́ kpa ko kulaa lɛ haa nɔ bua jɔmi. Bɔ nɛ pee nɛ e tue buli ɔmɛ nɛ a susu sane ɔ he konɛ a na slɔɔto nɛ ngɛ bua jɔmi nɛ se kɛ we, kɛ bua jɔmi nitsɛ a kpɛti ɔ, e de mɛ ke: “Se nyɛ niatsɛmɛ, musu tloo nyɛ, ejakaa nyɛ bua jɔmi ɔ tsuo ji nɛ ɔ nɛ! Nyɛ nihi nɛ nyɛ tɔ mwɔnɛ ɔ, musu tloo nyɛ, ejakaa hwɔ ma  ba ye nyɛ! Nyɛ nihi nɛ nyɛ ngɛ muɔe amlɔ nɛ ɔ, musu tloo nyɛ; ejakaa nyɛ ma ba ye kɔmɔ, nɛ nyɛ maa wo yana! Musu tloo nyɛ, ke nihi tsuo tuɔ nyɛ he munyu kpakpa; ejakaa jã nɔuu a nɛmɛ ɔmɛ pee lakpa gbali ɔmɛ!”​​—Luka 6:24-26.

Mɛni he je nɛ Yesu de ke musu tloo nihi nɛ a ná ní babauu, nihi nɛ a ngɛ muɔe amlɔ nɛ ɔ, kɛ nihi nɛ nihi jeɔ a yi ɔ? Ejakaa ke nihi ná níhi nɛ a bua jɔ he wawɛɛ ɔ, a ngmɛɔ Mawu jami he, nɛ bua jɔmi nitsɛnitsɛ ɔ bɔɔ mɛ. Pi nɛ Yesu ngɛ tsɔɔe kaa ke ohia ngɛ nɔ ko yee loo hwɔ ngɛ nɔ ko yee ɔ kɛkɛ e bua maa jɔ. Se dɛgutsɛmɛ titli ji nihi nɛ a buɔ Yesu tue, nɛ a náa bua jɔmi nitsɛnitsɛ.

Nɔ́ nɛ Yesu de kɛ tsa nɔ nɛ ɔ kɔɔ e kaseli ɔmɛ a he, e de ke: ‘Nyɛ ji ngo kɛ ha je ɔ.’ (Mateo 5:13) E ngɛ mi kaa pi ngo nitsɛnitsɛ ji mɛ mohu lɛɛ, se Yesu kɛ mɛ to bɔ nɛ a ngɔɔ ngo kɛ baa nɔ́ yi ɔ he. Ngɛ blema Israel ɔ, a kɛ ngo babauu toɔ ngɛ bɔ sami la tɛ ɔ he ngɛ Mawu sɔlemi we ɔ, nɛ a kɛ woɔ lo nɛ a kɛ sãa afɔle ɔ. A ma nyɛ maa ngɔ ngo kɛ da si kɛ ha nɔ́ ko nɛ sa we loo nɔ́ ko nɛ puɛ we. (3 Mose 2:13; Ezekiel 43:23, 24) Ngɛ blɔ ko nɔ ɔ, Yesu kaseli ɔmɛ ji “ngo kɛ ha je ɔ,” ejakaa mɛ nɛ a maa ye bua nihi konɛ a ná je mi bami kpakpa, nɛ a kɛ Mawu nɛ ná huɛ bɔmi kpakpa. Ngɛ anɔkuale mi ɔ, a sɛ gbi ɔ ma nyɛ maa baa nihi nɛ a maa bu mɛ tue ɔ a yi.

Yesu de e kaseli ɔmɛ ke: ‘Nyɛ ji la kɛ ha je ɔ.’ A su we kane kɛ mɛ kusii sisi, mohu ɔ, a ngɔɔ kɛ maa kane tso nɔ konɛ e kpɛ. Lɔ ɔ he ɔ, Yesu wo e kaseli ɔmɛ he wami ke: “Nyɛ ha nyɛ la a nɛ tso ngɛ nimli a hɛ mi jã nɔuu, konɛ a na ní kpakpahi nɛ nyɛ ngɛ pee ɔ, nɛ a wo nyɛ Tsɛ nɛ ngɛ hiɔwe ɔ hɛ mi nyami.”​—Mateo 5:14-16.

YESU HA E SE NYƐƐLI ƆMƐ MLAAHI NƐ A NƆ KUƆ

Yuda jami hɛ mi nyɛɛli ɔmɛ buu Yesu kaa nɔ ko nɛ e yi Mawu Mlaa a nɔ, nɛ a to kaa maa gbe lɛ. Enɛ ɔ he ɔ, Yesu gba mi kpoo nɛ e de ke: “Nyɛ ko susu kaa i ba nɛ ma ba gu Mose mlaa a, kɛ níhi nɛ gbali ɔmɛ tsɔɔ ɔ. Dɛbi! I bɛ mɛ gumi; se mohu i ba, konɛ ma ba tsɔɔ a sisi saminya.”​​—Mateo 5:17.

Yesu ngɛ bu nɛ mi kuɔ nitsɛ kɛ ha Mawu Mlaa a, nɛ e woɔ nihi he wami kaa mɛ hu a pee jã. E de ke: “Lɔ ɔ he ɔ, nɔ tsuaa nɔ nɛ ma tɔ̃ mlaa nɛ ɔmɛ a kpɛti nyafii kake, nɛ e maa tsɔɔ ni kpahi ke a pee jã a, a maa bu lɛ nɔmlɔ nyafii pe kulaa ngɛ hiɔwe matsɛ  yemi ɔ mi.” Yesu ngɛ tsɔɔe kaa jamɛ a nɔ ɔ nine be Matsɛ Yemi ɔ nɔ sue kɔkɔɔkɔ. ‘Se’ e ya nɔ nɛ e de ke: ‘Nɔ tsuaa nɔ nɛ yeɔ mlaa a nɔ nɛ e tsɔɔ ni kpahi hu kaa a pee jã a, a maa bu lɛ nɔmlɔ ngua ngɛ hiɔwe matsɛ yemi ɔ mi.’​​—Mateo 5:19.

Yesu tu munyu kɛ si ní peepeehi nɛ ma nyɛ ma ha nɛ nɔ ko ma tɔ̃ Mawu Mlaa a nɔ ɔ. Yesu tsɔɔ kaa Mlaa a de ke: “Koo gbe nɔmlɔ,” nɛ e de hu ke: ‘Nɔ tsuaa nɔ nɛ e mi mi fuɔ e nyɛmi ɔ, a maa kojo lɛ.’ (Mateo 5:21, 22) Ke nɔ ko mi mi fu e nyɛmi nɛ e ngmɛɛ we sane ɔ he ɔ, e ji hɛdɔ sane ejakaa enɛ ɔ ma nyɛ ma ha nɛ e gbe nɔmlɔ. Lɔ ɔ he ɔ, Yesu tsɔɔ bɔ nɛ e sa kaa waa bɔ mɔde nɛ wa dla pɛhi konɛ tue mi jɔmi nɛ ba a mi ke: “Lɔ ɔ he ɔ, ke o kɛ o nike ní ba bɔ sami la tɛ ɔ hɛ mi, nɛ o kai ngɛ lejɛ ɔ kaa o nyɛmi kɛ mo ngɛ sane ko ɔ, si o nike ní ɔ ngɛ lejɛ ɔ, ngɛ bɔ sami la tɛ ɔ hɛ mi. Yaa esɔ, nɛ o kɛ o nyɛmi ɔ ya kpata lolo, konɛ o kpale kɛ ba nɛ o kɛ o nike ní ɔ nɛ ba ha Mawu.”​​—Mateo 5:23, 24.

Mawu Mlaa a fã ko hu tu munyu kɛ si gba puɛmi. Yesu tu lɔ ɔ hu he munyu ke: “Tse nyɛ nu kaa a de blematsɛmɛ ɔmɛ ke, ‘Ko puɛ gba!’ Se imi lɛɛ i ngɛ nyɛ dee ke, nɔ tsuaa nɔ nɛ hyɛɛ yo, nɛ e he peeɔ lɛ akɔnɔ ɔ, e kɛ lɛ puɛ gba momo ngɛ e tsui mi.” (Mateo 5:27, 28) Pi bɔmi nami he juɛmi nɛ ma nyɛ maa ba nɔ ko yi mi be kpiti ko kɛkɛ ɔ he munyu nɛ Yesu ngɛ tue, mohu ɔ, e ngɛ nɔ mi mae kaa hɛdɔ ngɛ he kaa nyumu maa ya nɔ ‘maa hi yo hyɛe’ kɛ akɔnɔ hɛngmɛ. Ke nɔ ko ya nɔ nɛ e hyɛ yo loo nyumu hluu ɔ, behi fuu ɔ, e haa nɛ nɔ ɔ náa akɔnɔ yaya. Enɛ ɔ ma nyɛ ma ha nɛ e puɛ gba. Mɛni wa ma nyɛ maa pee konɛ e kó ba jã ngɛ wa blɔ fa mi? E ma bi nɛ waa wa wɔ nitsɛmɛ wa nɔmlɔ tso ɔ yi mi ngɛ blɔ ko nɔ. Yesu de ke: ‘Ke o hiɔ nɔ hɛngmɛ haa nɛ o peeɔ yayami ɔ, hiaa nɛ o sake ngɔ fɔ he. Ke o hiɔ nine haa nɛ o peeɔ yayami ɔ, poo nɛ o sake ngɔ fɔ he.’​​—Mateo 5:29, 30.

Ni komɛ ha nɛ a po a nane loo a nine ngɛ hiɔ ko nɛ fia mɛ ɔ he je, bɔ nɛ pee nɛ a hi wami mi. Lɔ ɔ he ɔ, sisi numi ngɛ he kaa Yesu tsɔɔ kaa, e he hia nɛ wa ‘sake’ ní komɛ nɛ a he jua wa ha wɔ se a ma nyɛ ma ha nɛ waa pee yayami ɔ ngɔ fɔ he,’ bɔ nɛ pee nɛ wa ko ná bɔmi nami he akɔnɔ yaya konɛ wa ko ya bɔ ajuama. Yesu tsɔɔ mi kaa, ‘E hi ha mo kaa o nɔmlɔ tso ɔ he nɔ́ ko maa laa pe nɔ́ nɛ a ma sake o nɔmlɔ tso ɔ tsuo ngɔ fɔ Gehena.’ Gehena ji biɛ nɛ a kɛ tsɛɛ kuku ko nɛ a sãa dwɔmi ngɛ nɔ ngɛ blema Yerusalem gbogbo ɔ se. Enɛ ɔ peeɔ neneene hɛ mi kpatami he foni.

Jehanɛ ɔ, Yesu kɛ ga womi ha ngɛ bɔ nɛ e sa kaa waa kɛ nihi nɛ a yeɔ wɔ awi loo a tɔ̃ɔ wa nɔ ɔ nɛ hi si ha a he. E de ke: ‘Ke nɔ ko pee nyɛ yayami ɔ, nyɛ ko pee lɛ yayami ngɔ to nane mi. Ke nɔ ko gba o hiɔ nɔ tue mi ɔ, plɛ kake ɔ hu ha lɛ.’ (Mateo 5:39) Lɔ ɔ tsɔɔ we kaa e sɛ nɛ nɔ ko nɛ e fa e he loo e weku he ke nɔ ko ba tua mɛ. Nɔ́ nɛ Yesu de kɛ kɔ tue mi ma gbami he ɔ kɔ we nɔ ko nɛ a maa pla lɛ wawɛɛ, loo a maa gbe lɛ ɔ he; mohu ɔ, e kɔɔ nɔ jɛmi he.  Yesu ngɛ tsɔɔe kaa ke nɔ ko ngɛ hlae nɛ e maa wo o mi mi la, aloo e kɛ mo ngɛ nya sae, nɛ e gba o tue mi ma loo e jɛ mo ɔ, o kɛ lɛ kó pɛ.

Jamɛ a ga womi ɔ hu tsɔɔ kaa e sa nɛ waa suɔ wa nyɛmimɛ kaa bɔ nɛ Mawu mlaa a tsɔɔ ɔ. Enɛ ɔ he ɔ, Yesu wo e tue buli ɔmɛ he wami ke: “Nyɛɛ suɔ nyɛ he nyɛli, nɛ nyɛɛ sɔle ha nihi nɛ waa nyɛ yi mi.” E tsɔɔ nɔ́ he je nɛ e sa kaa waa pee jã a. E de ke: “Konɛ nyɛɛ pee nyɛ Tsɛ nɛ ngɛ hiɔwe ɔ bimɛ. Ejakaa e haa nɛ pu ɔ jee ngɛ nimli yayamihi, kɛ nimli kpakpahi a nɔ.”​​—Mateo 5:44, 45.

Yesu mwɔ munyu nɛ e tu ngɛ yoku ɔ nɔ ɔ fa nɛ ɔ nya ke: “Lɔ ɔ he ɔ, nyɛɛ hi kɛ pi si kaa bɔ nɛ nyɛ Tsɛ nɛ ngɛ hiɔwe ɔ hi kɛ pi si ɔ.” (Mateo 5:48) E ngɛ heii kaa pi nɛ e ngɛ tsɔɔe kaa waa pee wa ní kaa nihi nɛ a ye mluku. Se ke wa kase Mawu ɔ, wa ma nyɛ maa suɔ nɔ tsuaa nɔ, kɛ wa he nyɛli po. Ngɛ blɔ ko nɔ ɔ, e ngɛ dee ke: “Nyɛɛ na nɔ tsuaa nɔ mɔbɔ kaa bɔ nɛ nyɛ Tsɛ Mawu naa nɔ tsuaa nɔ mɔbɔ ɔ.”​​—Luka 6:36.

SƆLEMI, KƐ WA HE NƐ WAA KƐ MAA FƆ MAWU NƆ

Yesu ya nɔ nɛ e wo e tue buli ɔmɛ he wami ke: “Ní tsumi kpakpa nɛ sa tsumi ngɛ nyɛ Mawu jami mi ɔ, nyɛɛ hyɛ saminya nɛ nyɛ ko tsu ngɛ ma hɛ mi nɛ nihi ba na nyɛ.” Yesu tu munyu kɛ si Mawu jami mi osato peemi. E de ke: “Lɔ ɔ he ɔ, ke o maa ke nɔ́ ɔ, koo pee lɛ hoo kaa bɔ nɛ osatotsɛmɛ ɔmɛ peeɔ” ɔ. (Mateo 6:1, 2) Ke wa ke nɔ ko nɔ́ ɔ, e sɛ nɛ wa deɔ ni kpahi.

Yesu tsa nɔ ke: “Ke nyɛ ngɛ sɔlee ɔ, nyɛ ko pee nyɛ ní kaa osatotsɛmɛ ɔmɛ! A suɔ kaa a da kpe he ɔmɛ, kɛ gbɛjegbɛ ɔmɛ a kɔ nya kɛ sɔle, konɛ nihi nɛ na mɛ.” Kɛkɛ nɛ e de e tue buli ɔmɛ ke: ‘Ke nyɛ maa sɔle ɔ, nyɛɛ sɛ nyɛ tsu mi, nɛ nyɛ nga nyɛ sinya, nɛ nyɛɛ sɔle ngɔ ha nyɛ Tsɛ nɛ a nɛ lɛ ɔ.’ (Mateo 6:5, 6) Pi nɛ Yesu ngɛ tsɔɔe kaa e sɛ nɛ a sɔle ngɛ gua mi, ejakaa lɛ nitsɛ hu e sɔle ngɛ gua mi be komɛ. Nɔ́ nɛ e sume nɛ a pee mohu ji kaa a maa sɔle kɛ hla hɛ mi nyami loo yi jemi.

E bɔ e tue buli ɔmɛ kɔkɔ ke: “Ke nyɛ ngɛ sɔlee ɔ, nyɛ ko tu munyu putɛputɛɛ kaa bɔ nɛ wɔ jali peeɔ ɔ. Mɛɛ lɛɛ a susuu kaa ke a tu munyu fuu loko Mawu maa bu mɛ tue.” (Mateo 6:7) Pi nɛ Yesu ngɛ tsɔɔe kaa tɔmi ngɛ he kaa wa maa sɔle si abɔ ngɛ nɔ́ ko he. E bua jɔɛ he kaa wa maa “tu munyu putɛputɛɛ,” loo wa maa hi nɔ́ kake pɛ dee daa. Lɔ ɔ se ɔ, e tsɔɔ bɔ nɛ e sa kaa a sɔle ha. E tsɔɔ mɛ ní kpaago komɛ nɛ a ma nyɛ maa tu he munyu ngɛ a sɔlemi mi. Ní bimi etɛ nɛ sɛ hlami ɔ kɔɔ he blɔ nɛ Mawu ngɛ kaa lɛ pɛ nɛ e sa kaa e ye je ɔ tsuo nɔ, kɛ e yi mi tomihi nɛ maa ba mi​​—nɛ ji e biɛ he nɛ ma tsɔ, e Matsɛ Yemi ɔ nɛ maa ba, kɛ e suɔmi nya ní nɛ a maa pee ɔ he. E sa nɛ waa sɔle ngɛ ní nɛ ɔmɛ a he loko waa sɔle ngɛ níhi nɛ hia wɔ kaa wa daa nya mi ngma, wa tɔmihi nɛ e kɛ maa pa wɔ, kɛ he wami nɛ waa kɛ maa da kahi a nya, kɛ yiwutsotsɛ ɔ dɛ mi nɛ e maa je wɔ kɛ je ɔ a he.

 Kɛ e sa nɛ waa bu weto níhi loo he lo nya níhi nɛ wa ngɛ ɔ ha kɛɛ? Yesu wo e tue buli ɔmɛ ga ke: “Nyɛ ko to juetli ha nyɛ he ngɛ je nɛ ɔ mi he nɛ wɔyewɔye, kɛ kana puɛɔ ní, nɛ juli juɔ ngɛ ɔ.” Ke o susu he ɔ, sisi numi be he lo? He lo nya níhi loo weto níhi hí si daa, nɛ pi lɔ ɔmɛ a nya nɛ wa ma bua a nɛ ma ha nɛ wa maa sa Mawu hɛ mi. Enɛ ɔ he ɔ, Yesu de ke: “Nyɛɛ to juetli ha nyɛ he ngɛ hiɔwe.” Wa ma nyɛ maa pee jã kɛ gu Mawu jami nɛ waa kɛ maa pee nɔ́ titli ngɛ wa si himi mi ɔ nɔ. Nɔ ko nɔ ko be nyɛe ma pɔɛ huɛ bɔmi kpakpa nɛ ngɛ waa kɛ Mawu wa kpɛti ɔ, nɛ e be nyɛe ma ha nɛ neneene wami nɛ wa ma ná a nɛ bɔ wɔ. Munyu nɛ Yesu tu kɛ nyɛɛ se ɔ ji anɔkuale: “He nɛ o juetli ngɛ ɔ, lejɛ ɔ o tsui hu maa hi.”​​—Mateo 6:19-21.

Bɔ nɛ pee nɛ e tue buli ɔmɛ nɛ a nu nɔ́ nɛ e de ɔ sisi saminya a, Yesu kɛ nɔ́ hetomi nɔ́ ko tsu ní. E de ke: “Hɛngmɛ ji nɔmlɔ tso ɔ kane. Ke o hɛngmɛ nɔ tsɔ ɔ, o nɔmlɔ tso ɔ tsuo ma hyi kɛ la. Se ke o hɛngmɛ nɔ tsɔ we ɔ, lɛɛ o nɔmlɔ tso ɔ tsuo maa wo diblii.” (Mateo 6:22, 23) Ke wa okadi peemi hɛngmɛ ɔ hyɛɛ ní saminya a, e peeɔ kane kɛ ha wa nɔmlɔ tso ɔ. Se loko e ma nyɛ maa ba mi jã a, ja wa hyɛ wa hɛ mi tɛɛ; ke pi jã a, wa be nyɛe ma ná juɛmi nɛ da ngɛ si himi he. Ke wa ha nɛ he lo nya níhi a se dimi pee nɔ́ titli ngɛ wa si himi mi pe Mawu jami ɔ, wa “nɔmlɔ tso ɔ tsuo maa wo diblii,” nɛ eko ɔ, lɔ ɔ ma ha nɛ wa ma bɔni diblii mi níhi peemi.

Kɛkɛ nɛ Yesu ha mɛ nɔ hyɛmi nɔ́ ko. E de mɛ ke: “Nɔ ko be nyɛe ma sɔmɔ nyɔmtsɛmɛ enyɔ; eko ɔ, e maa nyɛ nɔ kake, nɛ e maa suɔ nɔ kake; aloo e maa pee nɔ kake suɔmi nya ní, nɛ nɔ kake ɔ lɛɛ e be lɛ bue fɛɛ. O be nyɛe ma sɔmɔ Mawu kɛ sika tsuo.”​​—Mateo 6:24.

Eko ɔ, nihi nɛ a ngɛ Yesu tue bue ɔ a ti ni komɛ ngɛ bɔ nɛ e sa kaa a bu he lo nya níhi ha a he susue. Lɔ ɔ he ɔ, e ma nɔ mi ha mɛ kaa ke a ngɔ Mawu jami kɛ pee nɔ́ titli ngɛ a si himi mi ɔ, e he  hia we nɛ a pee yeyeeye. E de mɛ ke: “Nyɛɛ hyɛ hiɔwe lohwe pɛlitsɛmɛ ha; a du we ní, nɛ a kpa we ní; jehanɛ hu a bua we ní nya kɛ wui ngma gba mi. Se nyɛ Tsɛ nɛ ngɛ hiɔwe ɔ lɛɔ mɛ. Anɛ nyɛ he jua wɛ hluu pi mɛ lo?”​​—Mateo 6:26.

Nɛ mɔmɔhi nɛ a ngɛ yoku ɔ nɔ ɔ hu nɛɛ? Yesu tsɔɔ kaa “Matsɛ Salomo kɛ e hɛ mi nyami ɔ tsuo tete sui enɛ ɔmɛ a kpɛti kake he fɛu.” Mɛni nɛ enɛ ɔ tsɔɔ? “Nga, nɛ mwɔnɛ ɔ e bɔ, nɛ hwɔɔ kɛkɛ a sake kɛ fɔ la mi ɔ, Mawu mia lɛ saminyayoo! Anɛ Mawu be nyɛe nɛ e pee enɛ ɔ kɛ be nɔ ha nyɛ lo?” (Mateo 6:29, 30) Yesu kɛ ga womi nɛ nile ngɛ mi ha mɛ ke: ‘Lɔ ɔ he ɔ, nyɛ ko hao nyɛ he nɛ nyɛ bi ke, “Mɛni wa maa ye? Aloo mɛni wa maa nu? Aloo mɛni wa maa ngɔ kɛ ha wa he?” Nyɛ Tsɛ nɛ ngɛ hiɔwe ɔ le kaa ní nɛ ɔmɛ tsuo a he hia nyɛ. Se nyɛ hla Mawu matsɛ yemi ɔ, kɛ níhi nɛ da ngɛ e hɛ mi ɔ kekle, nɛ a kɛ ní nɛ ɔmɛ tsuo maa piɛɛ he ngɔ ha nyɛ.’​—Mateo 6:31-33.

BƆ NƐ A MAA PEE HA KƐ NÁ WAMI

Yesu kaseli ɔmɛ kɛ nihi nɛ a ngɛ tsui kpakpa a suɔ kaa a maa pee Mawu suɔmi nya ní, se a ná we lɛ gbɔjɔɔ. Farisi bi ɔmɛ a ti nihi fuu tuɔ níhi a he munyu nyanyaanya, nɛ a suɔ nihi kojomi. Enɛ ɔ he ɔ, Yesu de nihi nɛ a ngɛ lɛ tue bue ɔ ke: “Nyɛ kó kojo nihi, konɛ Mawu hu kó kojo nyɛ. Bɔ nɛ nyɛ kojoɔ nihi ɔ, jã Mawu hu maa kojo nyɛ.”​​—Mateo 7:1, 2.

Oslaa ngɛ he kaa nihi nɛ a ngɛ Yesu tue bue ɔ maa pee a ní kaa Farisi bi ɔmɛ. Yesu ha mɛ nɔ́ hetomi nɔ́ ko ke: “Anɛ hɛ yuyuilɔ ma nyɛ tsɔɔ hɛ yuyuilɔ blɔ lo? Anɛ mɛ ni enyɔ ɔmɛ tsuo a ya be muɔ mi nɔe lo?” Lɔ ɔ he ɔ, kɛ e sa kaa nihi nɛ a ngɛ Yesu tue bue ɔ nɛ a na ni kpahi ha kɛɛ? E sɛ nɛ a na a he kaa a hi pe ni kpahi, ejakaa e ji tɔmi nɛ hɛdɔ ngɛ he. E bi mɛ ke: ‘Mɛni he je o naa ngu nyafii nɛ ngɛ o nyɛmi hɛngmɛ nɔ, se plai agbo nɛ ngɛ mo nitsɛ o hɛngmɛ nɔ ɔ lɛɛ o nɛ ɔ? Osatotsɛ! Je plai ɔ ngɛ mo nitsɛ o hɛngmɛ nɔ kekle; kɛkɛ ɔ, o maa hyɛ nɔ́ saminya, nɛ o ma je ngu nyafii ɔ ngɛ o nyɛmi ɔ hɛngmɛ nɔ.’​​—Luka 6:39-42.

Enɛ ɔ tsɔɔ we kaa kaseli ɔmɛ be nyɛe maa da nɔ ko ní peepee nɔ kɛ na kaa e sa nɛ a fiɛɛ ha lɛ loo e sɛ́ nɛ a fiɛɛ ha lɛ. Ejakaa Yesu wo mɛ ga ke: “Nyɛ ko ngɔ níhi nɛ ngɛ klɔuklɔu ɔ ngɔ ha gbehi; ke nyɛ pee jã a, a ma plɛ wo nyɛ, nɛ a ma tua nyɛ. Nyɛ ko sake nyɛ june ngɔ pue kpotoohi a blɔ mi; ke nyɛ pee jã a, a maa naa nɔ.” (Mateo 7:6) Mawu Munyu ɔ mi anɔkuale ɔmɛ a he jua wa kaa june. Ke ni komɛ pee a ní kaa lohwehi, nɛ a bua jɔɛ anɔkuale nɛ ɔmɛ a he ɔ, e sɛ nɛ kaseli ɔmɛ nɛ a puɛ a be ngɛ a he, mohu ɔ, e sa nɛ a ya hla nihi nɛ a ngɛ tsui kpakpa nɛ a maa bu mɛ tue.

Yesu kpale ma nɔ mi kaa e sa nɛ a kɛ hɛdɔ nɛ sɔle daa. E de mɛ ke. “Nyɛ bi, nɛ a ma ha nyɛ.” Yesu tsɔɔ kaa Mawu pee klaalo kaa e maa bu a sɔlemihi tue. E bi mɛ ke: ‘Nyɛ ti mɛnɔ nɛ ke e bi bi lɛ abolo nɛ e ma ha lɛ tɛ? Nyɛ nɛ nyɛ peeɔ yayami po, tse nyɛ le bɔ nɛ nyɛ haa nyɛ bimɛ ní kpakpahi! Nyɛ Tsɛ nɛ ngɛ hiɔwe ɔ, anɛ lɛɛ e be nyɛe ma ha nihi nɛ biɔ lɛ ɔ ní kpakpahi nɛ pe enɛ ɔmɛ lo?’​​—Mateo 7:7-11.

Yesu ya nɔ nɛ e tu munyu ko nɛ pee se ɔ, nihi ba le wawɛɛ. E de ke: “Lɔ ɔ he ɔ, nɔ́ tsuaa nɔ́ nɛ nyɛ hlaa kaa nihi nɛ pee ha nyɛ ɔ, nyɛ hu nyɛɛ pee  jã nɔuu ngɔ ha mɛ.” Anɛ e sɛ kaa wɔ tsuo wa bua nɛ jɔ mlaa nɛ ɔ he nɛ waa bɔ mɔde kaa waa kɛ ma tsu ní lo? Jã a peemi be gbɔjɔɔ. Lɔ ɔ he ɔ, Yesu wo wɔ ga ke: “Nyɛɛ sɛ agbo tokofii ɔ mi, ejakaa agbo nɛ kɛ nɔ yaa hɛ mi kpatami mi ɔ mi bli. Blɔ nɛ yaa lejɛ ɔ hu ngɛ gbajaa, nɛ nihi babauu nyɛɛɔ nɔ kɛ sɛɛ mi. Se agbo nɛ kɛ nɔ yaa wami mi ɔ ngɛ tokofii; blɔ ɔ hu hí, nɛ nihi bɔɔ pɛ lɛ naa blɔ ɔ.”​​—Mateo 7:12-14.

Akɛnɛ ni komɛ maa bɔ mɔde kaa a maa puɛ kaseli ɔmɛ a juɛmi ngɛ anɔkuale ɔ he he je ɔ, Yesu bɔ mɛ kɔkɔ ke: “Nyɛɛ hyɛ saminya ngɛ lakpa gbali a he. Ke a ba nyɛ ngɔ ɔ, a naa mɛ kaa jijɔ, se anɔkuale mi ɔ, a ngɛ kaa ogbeteehi.” (Mateo 7:15) Yesu tsɔɔ kaa tso tsuaa tso ɔ, e yiblii nɛ a kɛ naa lɛ kaa tso kpakpa loo tso yaya. Jã a kɛ̃ nɛ e ngɛ ngɛ nimli hu a he. Enɛ ɔ he ɔ, wa ma nyɛ maa na lakpa gbali ɔmɛ kɛ gu a tsɔɔmihi kɛ a ní peepeehi a nɔ. Ngɛ anɔkuale mi ɔ, Yesu tsɔɔ mi kaa, pi nɔ́ nɛ nɔ ko ma de ɔ nɛ tsɔɔ kaa e ji e se nyɛɛlɔ, mohu ɔ, e ní peepee lɛ maa tsɔɔ. Nɛ nihi nɛ a deɔ ke Yesu ji a Nyɔmtsɛ se a pee we Mawu suɔmi nya ní ɔ hu nɛɛ? Yesu de ke: “Imi hu ma de mɛ ke, ‘I li nyɛ! Nyɛɛ je ye nɔ, nyɛ nihi nɛ nyɛ peeɔ níhi nɛ dɛ blɔ!’”​​—Mateo 7:23.

Benɛ Yesu ngɛ e munyu ɔ nya gbee ɔ, e de ke: “Lɔ ɔ he ɔ, nɔ tsuaa nɔ nɛ nuɔ ye munyu nɛ ɔmɛ, nɛ e yeɔ nɔ ɔ, e ngɛ kaa ní lelɔ ko nɛ ma e tsu ngɛ tɛ sa nɔ. Hiɔmi ba nɛ, nɛ pahi hia, nɛ kɔɔhiɔ fia wawɛɛ kɛ si tsu ɔ. Se tsu ɔ hule we, ejakaa a to sisi ngɛ tɛ sa nɔ.” (Mateo 7:24, 25) Mɛni he je nɛ tsu ɔ hule we ɔ? Ejakaa nyumu ɔ “tsua si voo, nɛ e to sisi ngɛ tɛ sa nɔ.” (Luka 6:48) Enɛ ɔ tsɔɔ kaa Yesu munyu ɔmɛ tue nɛ wa maa bu ɔ pɛ pi. E sa nɛ waa bɔ mɔde kaa wa maa ‘ye a nɔ.’

Se nɔ nɛ e ‘nuɔ munyu nɛ ɔmɛ, nɛ e yi nɔ ɔ’ hu nɛɛ? E ngɛ kaa “nyumu kuasia nɛ ma e tsu ngɛ zia nɔ.” (Mateo 7:26) Hiɔmi maa nɛ, pahi maa hia, nɛ kɔɔhiɔ maa fia nɛ tsu ɔ maa hule kɛ pue si butuu.

Nimli kpekpemi ɔ tsuo a nya kpɛ a he ngɛ níhi nɛ Yesu tsɔɔ mɛ ɔ he. Yesu tu we munyu kaa bɔ nɛ jami hɛ mi nyɛɛli ɔmɛ peeɔ ɔ, mohu ɔ, e tsɔɔ ní kaa nɔ ko nɛ e ngɛ he wami. Eko ɔ, nihi nɛ a bu Yesu tue ngɛ yoku ɔ nɔ ɔ a kpɛti nihi fuu ba pee e kaseli.