MATEO 18:21-35

  • ANƐ E SA NƐ WAA NGƆ YAYAMI KƐ PA SI KPAAGO LO?

  • NƆ́ HETOMI NƆ́ NƐ KƆƆ TSƆLƆ NƐ E KƐ NƆ́ KI Ɔ HE Ɔ

Benɛ Yesu ngɛ e kaseli ɔmɛ bɔ nɛ a maa pee ha kɛ dla pɛ ngɛ a kɛ a nyɛmimɛ a kpɛti ɔ tsɔɔe ɔ, Petro ngɛ lejɛ ɔ, nɛ e nu nɔ́ nɛ Yesu de ɔ tsuo. Se Petro suɔ nɛ e le si abɔ nɛ e sa kaa a ngɔ tɔmi kɛ pa.

Petro bi Yesu ke: “Nyɔmtsɛ, si enyɛmɛ ke ye nyɛmi tɔ ye nɔ nɛ ma kɛ pa lɛ? Si kpaago lo?” Jami hɛ mi nyɛɛli ɔmɛ ekomɛ tsɔɔ kaa e sa nɛ a ngɔ yayami kɛ pa si etɛ. Lɔ ɔ he ɔ, Petro susu kaa ke e nyɛmi tɔ e nɔ nɛ e nyɛ nɛ e ngɔ kɛ pa lɛ “si kpaago” sɔuu ɔ, lɛɛ e bɔ mɔde.​​—Mateo 18:21.

Se nɔ he tɔmihi nɛ a maa kane ɔ kɛ níhi nɛ Yesu tsɔɔ ɔ kɔ we. Lɔ ɔ he ɔ, e dla Petro juɛmi. E de lɛ ke: ‘Dɛbi, i de we mo ke si kpaago, se mohu si 77.’ (Mateo 18:22) Ngɛ blɔ ko nɔ ɔ, e ngɛ tsɔɔe kaa yayami kɛ pami nya be tami. Enɛ ɔ ngɛ Petro tsɔɔe kaa be tsuaa be nɛ e nyɛmi ma tɔ e nɔ ɔ, e sa nɛ e kɛ pa lɛ.

Yesu ya nɔ nɛ e de Petro kɛ kaseli kpa amɛ nɔ́ ko nɛ ma ha nɛ a na kaa e he hia nɛ a ngɔ ni kpahi a tɔmi kɛ pa mɛ. Nɔ́ nɛ e de mɛ ɔ kɔɔ tsɔlɔ ko nɛ e nyɔmtsɛ na lɛ mɔbɔ se e kase we nɔ́ ko kɛ ji mi ɔ he. Matsɛ ɔ tsɛ e tsɔli ɔmɛ konɛ a bu ní tsumi nɛ e kɛ wo a dɛ ɔ he akɔtaa kɛ ha lɛ. A ngɔ tsɔli ɔmɛ a kpɛti nɔ kake nɛ e ye hiɔ talenta 10,000 [denario 60,000,000] kɛ ba matsɛ ɔ ngɔ. E be nyɛe maa wo jamɛ a hiɔ ɔ gblee. Enɛ ɔ he ɔ, matsɛ ɔ fa ke a jua tsɔlɔ ɔ, kɛ e yo, kɛ e bimɛ konɛ a kɛ tsɔ hiɔ ɔ. Benɛ e nu nɔ́ nɛ ɔ, e ya kpla si ngɛ matsɛ ɔ nane nya nɛ e nu matsɛ ɔ nane, nɛ e de ke: “I kpa mo pɛɛ, ná tsui ha mi nɛ ma wo mo hiɔ ɔ tsuo.”​​—Mateo 18:26.

Tsɔlɔ ɔ he pee matsɛ ɔ mɔbɔ nɛ e ngɔ hiɔ ɔ tsuo nɛ e ye ɔ kɛ ke lɛ. Benɛ matsɛ ɔ ngmɛɛ e he nɛ e je kpo ɔ, lɛ hu e ya na tsɔlɔ kpa nɛ ye lɛ hiɔ denario 100. Kɛkɛ nɛ e bɔni tsɔlɔ kaketsɛ ɔ kuɔ si miami ke: “Wo mi hiɔ nɛ o hɛɛ mi ɔ.” Se e nyɛmi tsɔlɔ ɔ kpla si ngɛ e hɛ mi nɛ e de ke: “I kpa mo pɛɛ, ná tsui ha mi nɛ ma wo mo hiɔ ɔ tsuo.”  (Mateo 18:28, 29) Se tsɔlɔ ɔ nɛ matsɛ ɔ na lɛ mɔbɔ nɛ e ngɔ hiɔ nɛ e ye ɔ kɛ ke lɛ ɔ kplɛɛ we, nɛ e kase we e nyɔmtsɛ ɔ. E ha nɛ a nu e nyɛmi tsɔlɔ nɛ e ye lɛ hiɔ bɔɔ pɛ ɔ kɛ wo tsu mi kɛ yaa si benɛ e maa wo hiɔ ɔ tsuo.

Yesu ya nɔ nɛ e de kaa, tsɔli kpahi nɛ a na yi wu tso ní nɛ tsɔlɔ nɛ ɔ pee ɔ ya bɔ a nyɔmtsɛ ɔ amaniɛ. Matsɛ ɔ mi mi fu wawɛɛ nɛ e de ke: “Mo tsɔlɔ yiwutsotsɛ! Akɛnɛ o kpa mi pɛɛ he je ɔ, i ngɔ hiɔ nɛ ɔ tsuo ngɔ ke mo. Anɛ mo hu e sɛ kaa o naa o nyɛmi tsɔlɔ ɔ mɔbɔ kaa bɔ nɛ i na mo mɔbɔ ɔ lo?” Matsɛ ɔ mi mi fu wawɛɛ, nɛ e wo tsɔlɔ ɔ tsu kɛ yaa si be nɛ e maa wo hiɔ ɔ tsuo. Yesu mwɔ nya ke: “Ke nyɛ ngɔɛ nyɛ nyɛmimɛ a tɔmi ngɔ pɛ mɛ kɛ je nyɛ tsui mi ɔ, bɔ nɛ Tsaatsɛ nɛ ngɛ hiɔwe ɔ maa pee nyɛ ti nɔ tsuaa nɔ ji nɛ ɔ nɛ.”​​—Mateo 18:32-35.

E sa nɛ waa kase ní kɛ je nɔ́ hetomi nɔ́ nɛ ɔ mi, nɛ waa ngɔ nihi a tɔmihi kɛ pa mɛ. Mawu ngɔ wa he yayami babauu kɛ pa wɔ. Ke wa ngɔ yayami nɛ wa nyɛmimɛ Kristofohi peeɔ wɔ ɔ kɛ to nɔ́ nɛ Mawu kɛ pa wɔ ɔ he ɔ, a nɔ́ ɔ sui nɔ́ ko kulaa. Jehanɛ hu ɔ, pi si kake pɛ nɛ Yehowa ngɔ wa he yayamihi kɛ pa wɔ, mohu ɔ, si akpehi abɔ. Anɛ e sɛ nɛ waa ngɔ wa nyɛmimɛ a tɔmihi kɛ pa mɛ ke ji kaa nɔ́ nɛ a pee ɔ dɔ wɔ wawɛɛ po lo? Lɔ ɔ he ɔ, kaa bɔ nɛ Yesu de ngɛ e Yoku ɔ Nɔ Fiɛɛmi ɔ mi ɔ, Mawu maa ngɔ “wa tɔmi ɔmɛ kɛ pa wɔ kaa bɔ nɛ wɔ hu waa kɛ paa nihi nɛ tɔɔ wa nɔ ɔ.”​​—Mateo 6:12.