Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 61

Yesu Tsa Nyumuyo Ko Nɛ Mumi Yayami Ngɛ E Mi

Yesu Tsa Nyumuyo Ko Nɛ Mumi Yayami Ngɛ E Mi

MATEO 17:14-20 MARKO 9:14-29 LUKA 9:37-43

  • KASELI ƆMƐ NYƐ WE NƐ A TSA JOKUƐ NYUMUYO KO NƐ DAIMONIO NGƐ E MI EJAKAA A HEMI KƐ YEMI PI

Benɛ Yesu, Petro, Yakobo kɛ Yohane a kple si kɛ je yoku ɔ nɔ ɔ, a na nihi babauu. A na kaa nɔ́ ko yɛ nɔ saminya. Mlaa tsɔɔli ɔmɛ a bua wo kaseli ɔmɛ a he nɛ a kɛ mɛ ngɛ nɔ́ nya hlae. Benɛ ni ɔmɛ na Yesu ɔ, e pee mɛ nyakpɛ, nɛ a sa fo kɛ ya e ngɔ, nɛ a ya nga lɛ. Yesu bi mɛ ke: “Mɛni mi nyɛɛ kɛ ni ɔmɛ ngɛ hlae ɔ?”​​—Marko 9:16.

Nyumu ko nɛ e ngɛ ni ɔmɛ a kpɛti ba kpla si ngɛ Yesu hɛ mi nɛ e de lɛ ke: “Tsɔɔlɔ, i kɛ ye binyumu ba o ngɔ, ejakaa mumi yayami ngɛ e mi, nɛ e nyɛ we nɛ e tu munyu. He tsuaa he nɛ e maa nu lɛ ngɛ ɔ, e tsɛ̃ɛ̃ lɛ fiaa si; e nya mi fiaa hwɔli, nɛ e kpeɔ e lungu nya, nɛ e luaa gaganii. I de o kaseli ɔmɛ nɛ a hia mumi ɔ kɛ je e mi ɔ, a nyɛ we.”​​—Marko 9:17, 18.

E ma nyɛ maa pee kaa mlaa tsɔɔli ɔmɛ ngɛ kaseli ɔmɛ dee kaa a yi ta, ejakaa a nyɛ we nɛ a tsa jokuɛ nyumuyo ɔ. Yesu ha we bitsɛ ɔ heto, mohu ɔ, e de nimli kpekpemi ɔ ke: “Nyɛ yi nɔ yayami bi nɛ nyɛ be hemi kɛ yemi! Mɛni be i kɛ nyɛ maa hi si kɛ ya si?” Mlaa tsɔɔli ɔmɛ nɛ a ngɛ kaseli ɔmɛ a nya dooe ɔ lɛ Yesu kɛ ngɛ munyu tue ɔ nɛ. Enɛ ɔ se ɔ, Yesu plɛ e hɛ mi kɛ tsɔɔ nyumu ɔ nɛ e de lɛ ke: “Ngɔɔ jokuɛ ɔ kɛ ba ye ngɔ ngɛ hiɛ ɔ.”​​—Mateo 17:17.

Benɛ a kɛ jokuɛ ɔ ngɛ Yesu he sue ɔ, mumi yayami ɔ po lɛ ngɔ fɔ si nɛ e ha nɛ jokuɛ ɔ lua gaganii. E kɛ e he wuwlua si, nɛ e nya mi fia hwɔli. Yesu bi lɛ ke: “Mɛni be enɛ ɔ bɔni lɛ peemi?” Nyumu ɔ he nɔ ke: ‘Kɛ je e jokuɛwi a si. Ke pee ɔ, e sakeɔ lɛ fɔɔ la mi, kɛ nyu mi hulɔ, konɛ e tane e yi. Se ke o ma nyɛ pee he nɔ́ ko ha wɔ ɔ, lɛɛ naa wɔ mɔbɔ.’​​—Marko 9:21, 22.

 Jokuɛ ɔ tsɛ ɔ hao wawɛɛ ejakaa Yesu kaseli ɔmɛ a nyɛ we nɛ a tsa jokuɛ ɔ. Benɛ Yesu na kaa nyumu ɔ pee basaa a, e de lɛ ke: “O ngɛ dee ke, ‘Ke o ma nyɛ,’ pi jã a? A ma nyɛ pee nɔ́ tsuaa nɔ́ ha nɔ nɛ heɔ yeɔ ɔ!” Kɛkɛ nɛ jokuɛ ɔ tsɛ ɔ de ke: ‘I heɔ yeɔ, se ye hemi kɛ yemi ɔ pi. Piɛɛ he ha mi!’​​—Marko 9:23, 24.

Yesu na kaa nimli babauu sa fo kɛ ma e ngɔ. Enɛ ɔ he ɔ, e ke mumi ɔ yi ke: “Mo amuɛti kɛ tue kpoku mumi, i ngɛ mo fae ke, jee e mi, nɛ o ko sɛ e mi hu!” Benɛ mumi yayami ɔ ngɛ jokuɛ ɔ mi jee ɔ, e ha nɛ jokuɛ ɔ kpa ngmlaa nɛ e wlua gaganii. Jokuɛ ɔ pee kaa nɔ gbogboe. Benɛ ni ɔmɛ na nɔ́ nɛ ɔ, a de ke: “Jokuɛ ɔ gbo!” (Marko 9:25, 26) Se Yesu pɛtɛ jokuɛ ɔ nine he, “nɛ e tsa lɛ jamɛ a ngmlɛfia a nɔuu.” (Mateo 17:18) E be nyakpɛ kaa nɔ́ nɛ Yesu pee ɔ ha nɛ ni ɔmɛ a nya kpɛ a he.

Be ko nɛ be ɔ, Yesu tsɔ e kaseli ɔmɛ ke a ya fiɛɛ, nɛ a nyɛ nɛ a hia mumi yayamihi. Enɛ ɔ he ɔ, benɛ e piɛ a kɛ Yesu pɛ ngɛ we mi ɔ, a bi lɛ ke: “Mɛni he je nɛ wɔɔ lɛɛ wa nyɛ we mumi ɔ nɛ waa hia a?” Yesu ha nɛ a le kaa a hemi kɛ yemi nɛ pi he je nɛ a nyɛ we mumi yayami ɔ hiami ɔ nɛ. E de ke: “Kikɛmɛ a mumi nɛ ɔ, nɔ́ ko nɔ́ ko nyɛ we lɛ hiami, ja sɔlemi.” (Marko 9:28, 29) E biɔ hemi kɛ yemi nɛ mi wa, kɛ Mawu yemi kɛ buami loko a ma nyɛ maa hia mumi yayami kaa kikɛ.

Yesu ma nya si ke: “Nyɛ hemi kɛ yemi pi. Niinɛ, i ngɛ nyɛ dee ke, ke nyɛ ngɛ hemi kɛ yemi nɛ kle kaa sinapi wu ɔ, nyɛ ma de yo nɛ ɔ ke, ‘Hiaa kɛ je hiɛ ɔ kɛ ya lejɛ ɔ,’ nɛ e maa hia. Nɔ́ ko nɔ́ ko peemi be wae ha nyɛ!” (Mateo 17:20) Enɛ ɔ tsɔɔ kaa hemi kɛ yemi ma nyɛ ma tsu ní nguahi!

Haomihi nɛ ma nyɛ maa tsi wa nya ngɛ Yehowa sɔmɔmi mi ɔ ngɛ kaa yoku gojoo ngɛ wa blɔ mi. Se ke wa ngɛ hemi kɛ yemi ɔ, wa ma nyɛ maa ye jamɛ a blɔ tsimi níhi nɛ a ngɛ kaa yoku ɔ a nɔ.