Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 25

Yesu Na Kpititsɛ Ko Mɔbɔ Nɛ E Tsa Lɛ

Yesu Na Kpititsɛ Ko Mɔbɔ Nɛ E Tsa Lɛ

MATEO 8:1-4 MARKO 1:40-45 LUKA 5:12-16

  • YESU TSA KPITITSƐ KO

Benɛ Yesu kɛ e kaseli eywiɛ ɔmɛ ngɛ ‘fiɛɛe ngɛ kpe he ɔmɛ ngɛ Galilea’ a, nyakpɛ níhi nɛ Yesu pee ɔ he sane gbɛ fĩa. (Marko 1:39) A nu Yesu he ngɛ ma ko nɛ kpititsɛ ko ngɛ mi ɔ nɔ. Luka nɛ e ji tsopa peelɔ ɔ bɔ amaniɛ kaa “he womi nɔ hiɔ yaya” ngɛ nyumu ɔ he. (Luka 5:12) Ke hiɔ nɛ ɔ se kɛ ngɛ nɔ ko he ɔ, e puɛɔ nɔ ɔ he womi.

Kpititsɛ nɛ ɔ ní ngɛ mɔbɔ ejakaa e sɛ nɛ e yaa nimli a kpɛti. Jehanɛ se hu ɔ, ke e yaa he nɛ nihi ngɛ ɔ, mlaa a tsɔɔ kaa e sa nɛ e hi dee boboobo ke, “Ye he tsɔ we oo, ye he tsɔ we,” bɔ nɛ pee nɛ nihi kó su e he tsɔ nɛ e hiɔ ɔ ba sa mɛ. (3 Mose 13:45, 46) Se mɛni nɛ kpititsɛ nɛ ɔ pee? E hɛ lɛ kɛ su Yesu he nɛ e kpla si, nɛ e ngɔ e hɛ mi ngɔ bu si nɛ e kpa lɛ pɛɛ ke: “Nyɔmtsɛ, ke o suɔ kaa ye he nɛ tsɔ ɔ, o ma nyɛ pee.”​​—Mateo 8:2.

Nyumu ɔ ngɛ hemi kɛ yemi ngɛ Yesu mi! Se hiɔ ɔ ha nɛ e ní pee mɔbɔ! Ke o ngɛ lejɛ ɔ, jinɛ mɛni o ko pee? Mɛni nɛ Yesu pee? Yesu mi mi sã lɛ, nɛ e kpã e nine mi, nɛ e ta nyumu ɔ he. Yesu de lɛ ke, “I suɔ; o he nɛ tsɔ!” (Mateo 8:3) Kpiti ɔ je nyumu ɔ he amlɔ nɔuu, nɛ enɛ ɔ pee nihi nyakpɛ.

Anɛ o bua be jɔe kaa nɔ ko kaa Yesu nɛ e ngɛ he wami nɛ e mi mi saa lɛ ngɛ adesahi a he ɔ maa ye o nɔ lo? Bɔ nɛ Yesu tsa kpititsɛ ɔ haa maa nɔ mi kaa ke Yesu ba ye zugba a tsuo nɔ ɔ, gbami nɛ nyɛɛ se nɛ ɔ maa ba mi. Baiblo ɔ de ke: “Nihi nɛ gbɔjɔ, kɛ nihi nɛ e fi mɛ ɔ, e naa mɛ mɔbɔ. Nihi nɛ e fi mɛ ɔ, e heɔ a yi wami.” (La 72:13) Enɛ ɔ he ɔ, Yesu maa ye bua nihi nɛ a waa mɛ yi mi ɔ tsuo, ejakaa e mi mi sãa lɛ ngɛ a he.

Mo kai kaa benɛ Yesu ná we nɛ e tsa kpititsɛ ɔ po ɔ, e fiɛɛmi ní tsumi ɔ ha nɛ ma a mi pee hoo. Nihi nu nyakpɛ níhi nɛ e pee ɔ he. Se Yesu sume nɛ nihi nɛ a da akeake nɔ kɛ ná hemi kɛ yemi ngɛ e mi. E le kaa ngmami ɔ de ngɛ e he ke: “E be ngmla kpae, nɛ e be munyu tue boboobo nɛ a nu ngɛ gbɛjegbɛ ɔmɛ a nɔ hulɔ.” (Yesaya 42:1, 2) Enɛ ɔ he ɔ, benɛ Yesu tsa kpititsɛ ɔ, e de lɛ ke: “Ko ya de nɔ ko nɔ́ ko oo! Se mohu yaa nɛ o kɛ o he ya tsɔɔ osɔfo ɔ, nɛ e hyɛ mo. Lɔ ɔ se ɔ, bɔ nɛ pee nɛ nihi tsuo nɛ a na kaa a tsa mo ɔ, yaa sã bɔ kaa bɔ nɛ Mose wo mlaa ke a pee ɔ.”​​—Mateo 8:4.

Se kaa bɔ nɛ o le ɔ, tsami nɛ a tsa lɛ ɔ ha nɛ e bua jɔ, nɛ e nyɛ we nɛ e ma e nya ngɔ to nɔ́ nɛ Yesu pee ha lɛ ɔ nɔ. E tu fo kɛ ya ma a mi nɛ e ya bɔni nihi amaniɛ bɔmi. Enɛ ɔ ha nɛ nihi fuu bɔni Yesu se blɔ hlami. E su he ko po nɛ Yesu nyɛ we nɛ e ya ma a mi hu. Enɛ ɔ he ɔ, e ya laa e he ngɛ he ko banee. Se kɛ̃ ɔ, nihi je ma slɔɔtohi a mi kɛ ya e ngɔ kaa e tsɔɔ mɛ ní nɛ e tsa mɛ.