Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 37

Yesu Tle Yalɔyo Ko Binyumu Si

Yesu Tle Yalɔyo Ko Binyumu Si

LUKA 7:11-17

  • YESU TLE GBOGBOE SI NGƐ NAIN

Benɛ Yesu tsa asafoatsɛ ɔ nyɔguɛ ɔ ta a, e kɛ we nɛ e je Kapernaum kɛ ho Nain ya. Kɛ je Kapernaum kɛ yaa Nain kɛmi maa pee kaa si tomi 20. Se pi Yesu pɛ nɛ e yaa. E kaseli ɔmɛ kɛ nimli jiji piɛɛ e he. A ya su Nain ma a nya gbɔkuɛ nya si. A kɛ Yuda bi komɛ kpe ngɛ blɔ ɔ nɔ nɛ a ngɛ ya foe. A tloo niheyo ko nɛ e gbo nɛ a yaa pu lɛ.

Niheyo ɔ nyɛ lɛ ngɛ aywilɛho yee wawɛɛ pe nɔ tsuaa nɔ. Yalɔyo ji lɛ, nɛ amlɔ nɛ ɔ, e bi kake nɛ e ngɛ ɔ hu gbo. Benɛ e huno gbo ɔ, e le kaa ke e hí kulaa a, e binyumu ɔ maa wo e bua. Moo lɛɛ mo susu bɔ nɛ e suɔ e bi ɔ ha a he nɛ o hyɛ. E bi ɔ ji e nɔ́ tsuaa nɔ́, lɛ ji nɔ nɛ maa hyɛ lɛ. Se piɔ lɛɛ, lɛ hu e gbo. Mɛnɔ lɛ ngɛ nɛ maa hyɛ yo nɛ ɔ, nɛ e ye bua lɛ?

Benɛ Yesu na yo ɔ nɛ e ngɛ aywilɛho yee nɛ e ngɛ ya foe ɔ, e ní pee lɛ mɔbɔ. Yesu je suɔmi mi nɛ e de yo ɔ ke: “Ko fo ya!” Yesu ya nɔ nɛ e pee nɔ́ ko kɛ ye bua yo ɔ. Yesu hɛ kɛ su gbogboe ɔ he. (Luka 7:13, 14) Ngɛ anɔkuale mi ɔ, bɔ nɛ Yesu pee e ní ha a ha nɛ ni ɔmɛ tsuo da si si kake too. A kpɛti nihi fuu maa hi susue ke: ‘Mɛni e yaa pee? Kɛ e ngɛ hlae maa tsɔɔ kɛɛ?’

Nihi nɛ a kɛ Yesu ngɛ blɔ hiae ɔ na bɔ nɛ Yesu tsa hiɔtsɛmɛ babauu ha. Se a nɛ́ kaa Yesu tle nɔ ko nɛ e gbo si. E ngɛ mi kaa blema a, a tle ni komɛ si mohu lɛɛ, se anɛ Yesu ma nyɛ ma tle gbogboe si lo? (1 Matsɛmɛ 17:17-23; 2 Matsɛmɛ 4:32-37) Yesu fa ke: “Niheyo, i ngɛ mo dee ke, tee si!” (Luka 7:14) Benɛ Yesu de jã a, mɛni lɛ ba? Niheyo ɔ te si nɛ e hi si, kɛkɛ nɛ e bɔni munyu tumi! E pee niheyo ɔ nyɛ ɔ nyakpɛ, nɛ e bua jɔ. Yesu ngɔ e bi ɔ kɛ ha lɛ. Piɔ lɛɛ e be aywilɛho yee hu.

Benɛ ni ɔmɛ na kaa niheyo ɔ ba wami mi niinɛ ɔ, a je Yehowa nɛ ji Wami Halɔ ɔ yi ke:  “Gbalɔ ngua ko te si ngɛ wa kpɛti.” A kpɛti ni komɛ nu nyakpɛ ní nɛ Yesu pee ɔ sisi, lɔ ɔ he ɔ, a de ke: ‘Mawu ba konɛ e ba kpɔ e ma a.’ (Luka 7:16) Nihi babauu nu nyakpɛ ní nɛ Yesu pee nɛ ɔ he ngɛ ma kpahi a nɔ. E maa pee kaa nihi nɛ a ngɛ Nazaret nɛ e kɛ Nain a kpɛti kɛmi maa pee si tomi ekpa a hu nu he. Nihi nu sane ɔ he ngɛ Yudea po.

Loloolo ɔ, a je we Yohane Nɔ Baptisilɔ ɔ ngɛ tsu mi, se e bua jɔ níhi nɛ Yesu ngɛ pee ɔ he wawɛɛ. Yohane kaseli ɔmɛ ya e ngɔ nɛ a ya bɔ lɛ nyakpɛ níhi nɛ Yesu pee ɔ tsuo. Mɛni Yohane de ngɛ nɔ́ nɛ e nu ɔ he?