Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 41

Mɛnɔ He Wami Nya Nɛ Yesu Pee Nyakpɛ Níhi Ngɛ?

Mɛnɔ He Wami Nya Nɛ Yesu Pee Nyakpɛ Níhi Ngɛ?

MATEO 12:22-32 MARKO 3:19-30 LUKA 8:1-3

  • YESU KPALE HIA BLƆ KƐ YA FIƐƐ

  • YESU HIA MUMI YAYAMIHI, NƐ E BƆ NIHI KƆKƆ NGƐ YAYAMI KO NƐ A KƐ PƐ Ɔ HE

Benɛ Yesu je Farisi no ko nɛ a tsɛɛ lɛ Simon we ɔ mi ɔ, e ya Galilea konɛ e ya fiɛɛ. Kɛ ba si jamɛ a be ɔ mi ɔ, Yesu fiɛɛ maa pee jeha enyɔ. Ngɛ e blɔ hiami nɛ ɔ mi ɔ, pi lɛ pɛ nɛ e yaa. E bɔfohi 12 ɔmɛ piɛɛ e he, nɛ “yi komɛ hu nɛ e hia mumi yayamihi ngɛ a mi, nɛ e tsa a hiɔhi ha mɛ” ɔ hu piɛɛ e he. (Luka 8:2) A kpɛti ni komɛ ji Maria Magdalena, Susana, kɛ Yohana nɛ e huno ji Matsɛ Herode Antipa tsɔlɔ nɔkɔtɔma a.

Benɛ nihi fuu ngɛ Yesu he nue ɔ, nihi hu bɔni atsinyɛ jemi wawɛɛ ngɛ níhi nɛ e ngɛ pee ɔ he. Enɛ ɔ pee heii benɛ Yesu tsa nyumu ko nɛ mumi yayami ngɛ e mi nɛ e hɛngmɛ yu nɛ e nyɛ we munyu tumi ɔ. Mumi yayami ɔ je nyumu ɔ mi nɛ e hɛngmɛ bli, kɛkɛ nɛ e bɔni munyu tumi. Ni ɔmɛ a nya kpɛ a he, nɛ a bi ke, “David Bi ɔ ji nɛ ɔ?”​​—Mateo 12:23.

Nihi nɛ a ba bua a he nya ngɛ he nɛ Yesu ya to ɔ hiɛ babauu, nɛ Yesu kɛ e kaseli ɔmɛ a nɛ́ deka nɛ a kɛ maa ye ní po. Se pi ni ɔmɛ tsuo nɛ a he ye kaa Yesu ji “David Bi” nɛ a wo e he si ɔ. Farisi bi komɛ je Yerusalem tɔɔ kɛ ba Yesu ngɔ​​—se a bɛ kaa a ma lɛ tue bumi loo a ma e se nyɛɛmi. A de nihi ke: ‘Beelzebul ngɛ Yesu mi’ nɛ e kɛ “mumi yayami ɔmɛ a tsɛ” lɛ ngɛ ní tsue. (Marko 3:22) Benɛ Yesu weku li ɔmɛ a nu munyu nɛ ɔ, a ba konɛ a ba nu lɛ kɛ ho. Mɛni he je nɛ a ma lɛ numi ɔ?

Jamɛ a be ɔ mi tsuo ɔ, Yesu nyɛmimɛ ɔmɛ a he we yi kaa lɛ ji Mawu Bi ɔ. (Yohane 7:5) A kɛ Yesu tsuo nɛ hi Nazaret kɛ wa, enɛ ɔ he ɔ, a na kaa bɔ nɛ a le lɛ ha kɛ je a jokuɛ mi ɔ, pi jã nɛ e ngɛ hu. A susu kaa eko ɔ, nɔ́ ko ngɛ e juɛmi he kɔe, enɛ ɔ he ɔ, a de ke: “E yi mi ngɛ puɛe.”​​—Marko 3:21.

Anɛ níhi nɛ Yesu ngɛ pee ɔ tsɔɔ kaa e ngɛ godo nue lo? Yesu hia mumi yayami ngɛ nyumu ko mi, nɛ nyumu ɔ hɛngmɛ bli nɛ e bɔni munyu  tumi. Nɔ ko be nyɛe maa je nɔ́ nɛ ɔ he atsinyɛ. Se Farisi bi ɔmɛ kɛ mlaa tsɔɔli ɔmɛ ngɛ hlae nɛ a tsɔɔ kaa mumi yayami nɛ Yesu kɛ tsu jamɛ a nyakpɛ ní ɔ nɛ. A de ke: “Mumi yayamihi a tsɛ Beelzebul ɔ biɛ mi pɛ nyumu nɛ ɔ ngɛ mumi yayami ɔmɛ hiae ngɛ ɔ nɛ.”​​—Mateo 12:24.

Yesu le nɔ́ nɛ Farisi bi ɔmɛ kɛ mlaa tsɔɔli ɔmɛ ngɛ susue, lɔ ɔ he ɔ, e de mɛ ke: “Matsɛ yemi tsuaa matsɛ yemi nɛ mi ma gba, nɛ a kɛ a he hwuɔ ta a, e se kɛ we. Jã kɛ̃ nɛ ma tsuaa ma loo we tsuaa we nɛ e mi ma gba, nɛ a kɛ a he hwuɔ ta a, e dɛ si. Lɔ ɔ he ɔ, ke Satan hia Satan ɔ, e tsɔɔ kaa e mi gba, nɛ e kɛ lɛ nitsɛ e he ngɛ ta hwue. Lɛɛ kɛ e matsɛ yemi ɔ maa pee kɛ da si kɛɛ!”​​—Mateo 12:25, 26.

Ngɛ anɔkuale mi ɔ, Yesu nya mi tsɔ saminya! Farisi bi ɔmɛ le kaa Yuda bi komɛ hiaa mumi yayamihi ngɛ nihi a mi. (Bɔfo Ɔmɛ A Ní Tsumi 19:13) Enɛ ɔ he ɔ, Yesu bi mɛ ke: “Ke Beelzebul he wami lɛ i kɛ ngɛ mumi yayami ɔmɛ hiae ɔ, nyɛ se nyɛɛli ɔmɛ lɛɛ mɛnɔ he wami nya nɛ mɛɛ a ngɛ mɛ hiae ngɛ mɔ?” Ngɛ blɔ ko nɔ ɔ, nɔ́ nɛ a ngɛ dee ngɛ Yesu he ɔ kɔ mɛ nitsɛmɛ nɔuu a he. Yesu ya nɔ nɛ e de ke: “Ke Mawu mumi ɔ lɛ haa mi he wami nɛ i kɛ hiaa mumi yayami ɔmɛ ɔ, e tsɔɔ kaa Mawu matsɛ yemi ɔ ba ná nyɛ momo.”​​—Mateo 12:27, 28.

Yesu kɛ nɔ́ hetomi nɔ́ ko tsu ní kɛ tsɔɔ mɛ kaa mumi yayamihi nɛ e ngɛ hiae ɔ tsɔɔ kaa e ngɛ he wami ngɛ Satan nɔ. E de ke: ‘Kɛ nɔ ko ma plɛ kɛ sɛ nɔ nɛ he wa we mi nɛ e ya ju kɛɛ? Ja e fi nɔmlɔ nɛ he wa nɛ ɔ kekle, loko e ma nyɛ ma ya ju ngɛ e we mi. Nɔ nɛ be ye blɔ fa mi ɔ, te si ngɔ wo mi, nɛ nɔ nɛ kɛ mi bua we nɔ́ nya a, e ngɛ gbɛe kɛ ngɛ fĩae.’ (Mateo 12:29, 30) Farisi bi ɔmɛ kɛ Mlaa tsɔɔli ɔmɛ a te si kɛ wo Yesu, lɔ ɔ he ɔ, a ní peepee tsɔɔ kaa Satan kɛ mɛ ngɛ ní tsue. A ngɛ nihi fiee kɛ ngɛ Mawu Bi nɛ mumi klɔuklɔu ngɛ e nɔ ɔ he jee.

Yesu bɔ mɛ kɔkɔ ke: “I ngɛ nyɛ dee anɔkuale mi ke, a kɛ nimli a he yayamihi tsuo maa pa mɛ; a kɛ munyuhi nɛ a maa tu kɛ bɔ musu tsuo hu maa pa jã nɔuu. Se nɔ nɛ bɔɔ musu kɛ siɔ mumi klɔuklɔu ɔ, a kɛ be lɛ pae gblegbleegble kɛ maa ya neneene; ejakaa e yeɔ fɔ kɛ yaa neneene.” (Marko 3:28, 29) Nihi nɛ a de ke Satan he wami lɛ tsu nyakpɛ níhi nɛ Mawu mumi klɔuklɔu ɔ tsu ɔ, ke o hyɛ ɔ, mɛni lɛ maa ba a nɔ!