Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 30

Mawu Bi Ji Yesu

Mawu Bi Ji Yesu

YOHANE 5:17-47

  • MAWU BI JI YESU

  • GBOGBOEHI MAA TE SI

Yesu tsa nyumu ko ngɛ Hejɔɔmi ligbi ɔ nɔ, se Yuda bi ɔmɛ ke e tɔ̃. Yesu de mɛ ke: ‘Ye Tsɛ ɔ ngɛ ní tsue be tsuaa be, nɛ imi hu i ngɛ ní tsue.’​—Yohane 5:17.

Nɔ́ nɛ Yesu pee ngɛ Hejɔɔmi ligbi ɔ nɔ ɔ ti si kɛ wui Mawu mlaa a. Yesu le kaa e Tsɛ ɔ tsuɔ ní tsumi kpakpahi daa. Yesu fiɛɛ nɛ e tsa hiɔtsɛmɛ kɛ tsɔɔ kaa e kase e hiɔwe Tsɛ ɔ. Lɔ ɔ he ɔ, daa ligbi ɔ, Yesu peeɔ nɔ́ kpakpa. Heto nɛ Yesu ha nihi nɛ a po e nya a ha nɛ a mi mi fu lɛ wawɛɛ, nɛ a to kaa a maa gbe lɛ. Mɛni he je nɛ a mi mi fu ɔ?

Ngɛ juɛmi nɛ dɛ nɛ a ná ngɛ Yesu he kaa e sɛ nɛ e tsaa nɔ ko ngɛ Hejɔɔmi ligbi ɔ nɔ se ɔ, a mi mi fu wawɛɛ kaa Yesu de ke Mawu Bi ji lɛ. A ke Yesu bɔ musu kaa e de ke Yehowa Bi ji lɛ, ejakaa, a susu kaa Yesu ngɛ tsɔɔe kaa e kɛ Mawu sɔ. Se nɔ́ nɛ ɔ wui Yesu he gbeye, mohu ɔ, e ya nɔ nɛ e tsɔɔ mɛ kaa e Tsɛ ji Mawu. E de mɛ ke: “Tsɛ ɔ suɔ Bi ɔ saminya, nɛ e tsɔɔ lɛ nɔ́ tsuaa nɔ́ nɛ lɛ nitsɛ e peeɔ.”​​—Yohane 5:20.

Akɛnɛ Tsɛ ɔ ji Wami Halɔ he je ɔ, e ha ni komɛ nɛ a hi si blema a he wami nɛ a tle ni komɛ nɛ a gbo si. Yesu ya nɔ nɛ e de ke: ‘Kaa bɔ nɛ Tsɛ ɔ tleɔ gbogboe si, nɛ e haa lɛ wami ɔ, jã nɔuu Bi ɔ hu haa nihi nɛ e suɔ mɛ ɔ wami.’ (Yohane 5:21) Nɔ́ nɛ Yesu de nɛ ɔ he hia ejakaa lɔ ɔ tsɔɔ kaa hɛ nɔ kami ko ngɛ kɛ ha wɔ hwɔɔ se! Jamɛ a be ɔ mi po ɔ, Bi ɔ ngɛ nihi nɛ a gbo ngɛ mumi mi ɔ si tlee. Enɛ ɔ he ɔ, Yesu de ke: “Nɔ tsuaa nɔ nɛ buɔ ye munyu tue, nɛ e heɔ nɔ nɛ tsɔ mi ɔ yeɔ ɔ, e nine su neneene wami nɔ. A be lɛ fɔ bue, ejakaa e po mi ngɛ gbenɔ mi kɛ ho wami mi ya.”​—Yohane 5:24.

Kɛ je be nɛ Yesu je e sɔmɔmi ní tsumi ɔ sisi kɛ ya si be nɛ e tu munyu nɛ ɔ, odase ko be nɛ tsɔɔ kaa Yesu tle nɔ ko nɛ e gbo si kɛ ba wami mi, se Yesu ngɛ nihi nɛ a ngɛ e nya poe ɔ dee kaa gbogboehi a si temi maa ba nɛ a maa na. E de mɛ ke: “Be maa su nɛ gbogboehi tsuo maa nu Mawu Bi ɔ gbi, nɛ a maa je kpo kɛ je a yɔkɔ ɔmɛ a mi.”​—Yohane 5:28, 29.

E ngɛ mi kaa Yesu hɛɛ blɔ nya ngua mohu lɛɛ, se e pee lɛ heii kaa Mawu kle pe lɛ. E de ke: ‘I be he blɔ nɛ i peeɔ imi nitsɛ ye yi mi nɔ́ ko. I hla we kaa ma pee nɔ́ nɛ imi nitsɛ i suɔ, se mohu Tsaatsɛ nɛ tsɔ mi ɔ suɔmi nya ní i peeɔ.’ (Yohane 5:30) Jinɛ Yesu de we ngɛ gua mi kaa lɛ ji nɔ́ nɛ Mawu gu e nɔ kɛ ngɛ E yi mi tomi he ní tsue, se amlɔ nɛ ɔ lɛɛ, e de mɛ. Yesu de nihi nɛ a ngɛ e nya poe ɔ nɔ́ kpa ko nɛ a pee, se a li kaa e le. Yesu de mɛ ke: “Nyɛɛ lɛɛ nyɛ tsɔ kɛ ya Yohane [Nɔ Baptisilɔ ɔ] ngɔ, nɛ e ye anɔkuale ɔ he odase.”​—Yohane 5:33.

Eko ɔ, nihi nɛ a ngɛ Yesu nya poe ɔ kai kaa benɛ Yuda jami hɛ mi nyɛɛli ɔmɛ ya Yohane ngɔ maa pee jeha enyɔ nɛ be ɔ, e de mɛ kaa Nɔ ko maa ba ngɛ e se nɛ a tsɛɛ lɛ ke “Gbalɔ” kɛ “Kristo.” (Yohane 1:20-25) Benɛ Yesu ngɛ nihi nɛ a ngɛ e nya poe ɔ kaie kaa be ko nɛ be ɔ, jinɛ a buu Yohane Nɔ Baptisilɔ nɛ a wo lɛ tsu ɔ kaa e ji nɔmlɔ ngua a, e de mɛ ke: “Se be bɔɔ pɛ nɛ nyɛ ná e he bua jɔmi.” (Yohane 5:35) Se kɛ̃ ɔ, Yesu pee ní nguanguahi po pe nɔ́ nɛ Yohane Nɔ Baptisilɔ ɔ pee ɔ.

Yesu de ke: “Jamɛ a ní tsumi ɔmɛ nɛ́ i tsuɔ ɔ [kɛ nyakpɛ ní ɔmɛ] yeɔ ye he odase kaa Tsɛ ɔ lɛ tsɔ mi.” E ya nɔ nɛ e de ke: “Tsɛ ɔ nɛ tsɔ mi ɔ, lɛ nitsɛ e yeɔ ye he odase.” (Yohane 5:36, 37) Kaa nɔ hyɛmi nɔ́ ɔ, Mawu ye Yesu he odase benɛ Yohane ngɛ lɛ baptisie ɔ.​—Mateo 3:17.

Nihi nɛ a ngɛ Yesu he guɛ gbee ɔ be nɔ́ ko nɛ a maa da nɔ kɛ je a nya kaa pi Mawu bi ji lɛ. Ngmami ɔ nɛ a ke a kaseɔ ɔ po ye Yesu he odase. Enɛ ɔ he ɔ, Yesu de mɛ ke: “Kaa nyɛ he Mose ye jinɛ imi hu nyɛ ma he mi maa ye, ejakaa munyuhi nɛ e ngma a, ye he e ngma ngɛ. Se nɛ nyɛ bui níhi nɛ e ngma a, kɛ maa pee kɛɛ nɛ nyɛ ma he ye munyu ɔmɛ maa ye mɔ?”​—Yohane 5:46, 47.