Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 32

Mɛni Nɛ Mlaa a Ngmɛɔ Blɔ Ngɛ Hejɔɔmi Ligbi ɔ Nɔ?

Mɛni Nɛ Mlaa a Ngmɛɔ Blɔ Ngɛ Hejɔɔmi Ligbi ɔ Nɔ?

MATEO 12:9-14 MARKO 3:1-6 LUKA 6:6-11

  • YESU TSA NYUMU KO NƐ E NINE KAKE GBO NGƐ HEJƆƆMI LIGBI Ɔ NƆ

Hejɔɔmi ligbi ko ɔ, Yesu ya kpe he ko ngɛ Galilea. E ya na nyumu ko nɛ e hiɔ nine gbo. (Luka 6:6) Jamɛ a be ɔ mi ɔ, Farisi bi ɔmɛ kɛ mlaa tsɔɔli ɔmɛ a daa si ngɛ he ko nɛ a ngɛ Yesu hyɛɛ too. Mɛni he je? Nɔ́ nɛ a bi Yesu ɔ je nɔ́ nɛ ngɛ a tsui mi ɔ kpo. A bi lɛ ke: ‘Ke a tsa nɔ ko ngɛ Hejɔɔmi ligbi ɔ nɔ ɔ, anɛ a tɔ̃ mlaa a lo?’​​—Mateo 12:10.

Yuda jami hɛ mi nyɛɛli ɔmɛ he ye kaa ja nɔ ko wami ngɛ oslaa mi pɛ loko a ma nyɛ ma tsa lɛ ngɛ Hejɔɔmi ligbi ɔ nɔ. Kaa nɔ hyɛmi nɔ́ ɔ, ke nɔ ko nine loo e nane tsɔ̃ nɛ a gbla ha lɛ loo a fi ha lɛ ngɛ Hejɔɔmi ligbi ɔ nɔ ɔ, a tɔ̃ mlaa ejakaa lɔ ɔ be nɔ ɔ gbee. E ngɛ heii kaa pi nyumu ɔ nɛ e ngɛ nɔ́ nae ɔ he mɔbɔ nɛ ngɛ mɛ pee he je nɛ a ya bi Yesu sane ɔ. A ngɛ nɔ́ ko hlae nɛ a maa da nɔ kɛ fi Yesu yi kɛ wo tso he.

Se Yesu na a juɛmi ɔ momoomo. E na kaa juɛmi nɛ a hɛɛ ɔ dɛ kulaa. A li nɔ́ nɛ ke nɔ ko pee ngɛ Hejɔɔmi ligbi ɔ nɔ nɛ tsɔɔ kaa e tɔ̃ Mawu mlaa. (2 Mose 20:8-10) E kɛ si fɔfɔɛ kaa kikɛ kpe hyɛ. Jehanɛ ɔ lɛɛ Yesu pee e juɛmi kaa e maa tsɔ̃ a nya konɛ e maa hyɛ nɔ́ nɛ a maa pee. Lɔ ɔ he ɔ, e de nyumu ɔ ke: “Hɛɛ mo kɛ ba ye ngɔ.”​​—Marko 3:3.

Kɛkɛ nɛ Yesu plɛ e hɛ mi kɛ tsɔɔ Farisi bi ɔmɛ, nɛ e de mɛ ke: “Waa ngɔ lɛ kaa nyɛ ti nɔ ko ngɛ to kake pɛ, nɛ to ɔ ya nɔ muɔ mi Hejɔɔmi ligbi ɔ. Anɛ e be to ɔ he pɛtɛe nɛ e je lɛ lo?” (Mateo 12:11) Jamɛ a be ɔ mi ɔ, to lɛmi ji ni komɛ a ní tsumi titli nɛ haa mɛ sika, lɔ ɔ he ɔ, ke nɔ ko to ya nɔ muɔ mi nɛ a je we lɛ mla a, e ma gbo, nɛ e sika maa sã. Ngmami ɔ po de ke: “Nɔmlɔ kpakpa hyɛɛ e lohwehi a nɔ saminya.”​​—Abɛ 12:10.

Yesu ya nɔ nɛ e de ke: ‘Anɛ nɔmlɔ he jua wɛ kulaa pi to lo! Lɔ ɔ he ɔ, wa mlaa a ngmɛɔ blɔ kaa a peeɔ kpakpa ngɛ Hejɔɔmi ligbi ɔ nɔ.’ (Mateo 12:12) Enɛ ɔ tsɔɔ kaa ke Yesu tsa nɔ ko ngɛ Hejɔɔmi ligbi ɔ nɔ ɔ, e tɔ̃ we. Jami hɛ mi nyɛɛli ɔmɛ a nɛ́ nɔ́ ko nɛ a ma de Yesu. Kɛkɛ nɛ a lulu kɛ daa si.

Yesu na kaa nɔ́ nɛ e de ɔ dɔ mɛ nɛ a mi mi fu, se e pui a nya mi. E de nyumu ɔ ke: “Kpã o nine mi.” (Mateo 12:13) Nyumu ɔ kpã e nine ɔ mi, nɛ e ná tsami. Nyumu ɔ bua jɔ wawɛɛ, se kɛ nihi nɛ a ngɛ Yesu klama tsɔe ɔ pee a ní ha kɛɛ?

Ngɛ be mi nɛ e sa kaa Farisi bi ɔmɛ a bua ko jɔ kaa a tsa nyumu ɔ, a kɛ abofu je kpe he ɔ nɔuu, nɛ a kɛ Herode se nyɛɛli “ɔmɛ ya so Yesu yi nɔ,” bɔ nɛ pee nɛ a kpata e hɛ mi. (Marko 3:6) Saduki jami ɔ mi bi hu piɛɛ nimli nɛ ɔmɛ a he. Jinɛ Saduki bi kɛ Farisi bi yí, se amlɔ nɛ ɔ lɛɛ a pee kake kɛ wo Yesu he.