Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Yesu Ji Blɔ ɔ, Anɔkuale ɔ, Kɛ Wami ɔ

 YI 34

Yesu Hla Bɔfohi Nyɔngma Kɛ Enyɔ

Yesu Hla Bɔfohi Nyɔngma Kɛ Enyɔ

MARKO 3:13-19 LUKA 6:12-16

  • BƆFO 12 ƆMƐ

Maa pee jeha kake kɛ fa ji nɛ ɔ nɛ Yohane Nɔ Baptisilɔ ɔ de nihi kaa Yesu ji Mawu To Bi ɔ. Benɛ Yesu je e fiɛɛmi ní tsumi ɔ sisi ɔ, nyumu komɛ nɛ a ngɛ tsui kpakpa ba pee e kaseli. A ti ni komɛ ji Andrea, Simon Petro, Yohane, Yakobo (Yohane nyɛmi ɔ), Filipo, kɛ Bartolomeo (nɛ a tsɛɛ lɛ hu ke Natanael ɔ). Pee se ɔ, nihi fuu ba nyɛɛ Kristo se.​​—Yohane 1:45-47.

Be ba su nɛ Yesu maa hla ni komɛ kaa e bɔfohi. E kɛ mɛ maa bɔ wawɛɛ, nɛ e ma tsɔse mɛ kɛ ha ní tsumi klɛdɛɛ ko. Se loko Yesu maa hla mɛ ɔ, e ya yoku ko nɔ ngɛ he ko nɛ kɛ Galilea Wo ɔ kɛ Kapernaum he kɛ we. E hi lejɛ ɔ nɛ e sɔle nyɔnyɔɔnyɔ konɛ Mawu nɛ ha lɛ nile, nɛ e jɔɔ yi mi kpɔ nɛ e maa mwɔ ɔ nɔ. E nɔ jena a, e tsɛ e kaseli ɔmɛ nɛ e hla a ti nihi 12 kaa e bɔfohi.

Yesu hla kaseli ekpa nɛ wa sɛ hlami tu a he munyu ɔ, nɛ e hla Mateo tó tsulɔ ɔ hu kɛ piɛɛ a he. Nihi enuɔ nɛ e hla mɛ kɛ piɛɛ a he ji Yuda (nɔ nɛ a tsɛɛ lɛ hu ke Tadeo loo “Yakobo bi ɔ”), Simon nɛ ji Kãtsɛ ɔ, Toma, Alfeo bi Yakobo, kɛ Yuda Iskariot.​—Mateo 10:2-4; Luka 6:16.

Yesu kɛ nihi 12 nɛ ɔmɛ bɔ wawɛɛ nɛ e ba le mɛ saminya. A ti ni komɛ ji e weku li. Yakobo kɛ Yohane peeɔ e nyɛngua loo e nyɛwayo bimɛ. Ke Alfeo ji Yesu papaa Yosef nyɛmi kaa bɔ nɛ ni komɛ susuɔ ɔ, lɛɛ Alfeo bi Yakobo ba peeɔ Yesu tsɛngua loo e tsɛwayo bi.

Yesu ma nyɛ ma kai e bɔfo ɔmɛ tsuo a biɛ nɛ e hɛ be nɔ kake po nɔ jee. Se anɛ o le mɛ tsuo a biɛ lo? Nɔ́ nɛ maa ye bua mo konɛ o kai a biɛhi ji, a tsɛɛ a kpɛti nihi enyɔ ke Simon, a tsɛɛ nihi enyɔ hu ke Yakobo, nɛ a tsɛɛ a kpɛti nihi enyɔ hu ke Yuda. Simon (Petro) ngɛ nyɛminyumu nɛ a tsɛɛ lɛ ke Andrea, nɛ Yakobo (Zebedeo binyumu ɔ) hu ngɛ nyɛminyumu ko nɛ a tsɛɛ lɛ ke Yohane. Enɛ ɔ maa ye bua mo konɛ o nyɛ nɛ o kai bɔfo ɔmɛ a kpɛti nihi kpaanyɔ a biɛ. Bɔfohi eywiɛ nɛ a piɛ ɔ ji (Mateo) tó tsulɔ ɔ, (Toma) nɔ nɛ pee se ɔ, e je atsinyɛ ngɛ Yesu si temi ɔ he ɔ, (Natanael) nɔ nɛ Yesu tsɛ lɛ benɛ e hii si ngɛ ngmɔkɔ tso ko sisi ɔ, kɛ Natanael huɛ (Filipo).

Bɔfo ɔmɛ a kpɛti nihi nyɔngma kɛ kake je Galilea kpokpa a nɔ ngɛ he nɛ Yesu hu je ɔ. Natanael je Kana. Filipo, Petro, kɛ Andrea hu a je Betsaida. Pee se ɔ, Petro kɛ Andrea hia kɛ ya hi Kapernaum ngɛ he nɛ Mateo je ɔ. Yakobo kɛ Yohane hu a hi he ko nɛ e kɛ Kapernaum he kɛ we, nɛ jinɛ a ji wo hɛli ngɛ lejɛ ɔ. Yuda Iskariot, nɔ nɛ pee se ɔ, e tsɔɔ Yesu se blɔ ɔ pɛ ji bɔfo nɛ je Yudea.