Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

 YI 51

A Gbe Nɔ Ko Ngɛ Nɔ Ko Fɔmi Ligbi Yemi Sisi

A Gbe Nɔ Ko Ngɛ Nɔ Ko Fɔmi Ligbi Yemi Sisi

MATEO 14:1-12 MARKO 6:14-29 LUKA 9:7-9

  • HERODE HA NƐ A PO YOHANE NƆ BAPTISILƆ Ɔ YI

Be mi nɛ Yesu kaseli ɔmɛ ngɛ fiɛɛe ngɛ Galilea a, nɔ nɛ dla blɔ ɔ kɛ ha Yesu ɔ lɛɛ a wo lɛ tsu. Kɛ je benɛ Yohane Nɔ Baptisilɔ ɔ ngɔ Yesu kɛ tsɔɔ kaseli ɔmɛ, nɛ lɔ ɔ se a wo lɛ tsu ɔ, jeha enyɔ be.

Matsɛ Herode Antipa ngɔ lɛ nitsɛ e nyɛminyumu Filipo yo nɛ a tsɛɛ lɛ Herodia a kɛ pee e yo, nɛ Yohane de kaa nɔ́ nɛ e pee ɔ hí. Herode ngmɛɛ e kekleekle yo he, nɛ e ya ngɔ Herodia. Herode tsɔɔ kaa e kɛ Mose Mlaa a tsuɔ ní, se ngɛ mlaa a nya a, e puɛ gba. Benɛ Yohane de Herode kaa nɔ́ nɛ e pee ɔ dɛ ɔ, Herodia wo Herode he wami, nɛ e ha nɛ a wo Yohane tsu.

Akɛnɛ Yuda bi ɔmɛ a ‘buɔ Yohane kaa gbalɔ’ he je ɔ, Herode ngɛ gbeye yee kaa e maa gbe lɛ. (Mateo 14:5) Se Herodia lɛɛ e suɔ nɛ a gbe Yohane. Enɛ ɔ he ɔ, e “dɔ Yohane ninyɛ,” nɛ e hla kaa e maa gbe lɛ. (Marko 6:19) Nyagbenyagbe ɔ, he blɔ ɔ kɛ e he ba.

Benɛ e piɛ bɔɔ nɛ jeha 32 Hetsɔmi ɔ maa su ɔ, Herode ngmɛ okplɔɔ ngua ko ngɛ e fɔmi ligbi ɔ nɔ. Jamɛ a ligbi ɔ, e tsɛ e ganɔ ɔmɛ kɛ e ta buli nikɔtɔma amɛ, kɛ Galilea ma nimeli ɔmɛ ní yemi. Benɛ a ngɛ ní yee nɛ a ngɛ ní nue ɔ, Herodia biyo Salome nɛ e kɛ e huno momo Filipo fɔ ɔ ba do ha nibwɔ ɔmɛ. Bɔ nɛ yiheyo ɔ do ha a pee nɔ tsuaa nɔ fɛu.

Bua jɔmi sɔuu he je ɔ, Herode de jokuɛ yo ɔ ke: “Bi mi nɔ́ tsuaa nɔ́ nɛ o suɔ nɛ ma ha mo!” E ka lɛ kita po ke: “Nɔ́ tsuaa nɔ́ nɛ o ma bi mi ɔ, ma ha mo; ke ye matsɛ yemi ɔ mi fa tete po ma ha mo.” Se loko Salome maa tsɔɔ nɔ́ nɛ e suɔ ɔ, e ya nɛ e ya bi e nyɛ ɔ ke: “Mɛni ma bi?”​​—Marko 6:22-24.

Enɛ ɔ ji he blɔ nɛ Herodia ngɛ hlae kɛ je blema a nɛ! Oya nɔuu nɛ e ha e bi ɔ heto ke: ‘Yohane Nɔ Baptisilɔ ɔ yi.’ Salome puɛ we be kulaa, nɛ e kpale kɛ ho nɛ e ya de Matsɛ ɔ ke: ‘I ngɛ hlae nɛ o ngɔ Yohane Nɔ Baptisilɔ ɔ yi ngɔ ha mi ngɛ sowe nɔ amlɔ nɔuu.’​​—Marko 6:24, 25.

Nɔ́ nɛ ɔ hao Herode wawɛɛ, se e ka Salome kita ngɛ nibwɔ ɔmɛ a hɛ mi momo. Ke Herode susu e hɛ mi nɛ ma pue si ngɛ e nya se nɛ e maa kpale ɔ he ɔ, lɛɛ afani nɛ e gbe nyumu nɛ sane ko be e he ɔ mohu. Lɔ ɔ he ɔ, e tsɔ e plaafo nɛ e ya po Yohane yi ngɛ tsu ɔ mi. E kɛ we nɛ plaafo ɔ kpale kɛ ba kɛ e dɛ mi Yohane yi ngɛ sowe nɔ. E ngɔ kɛ ha Salome, nɛ lɛ hu e kɛ ya ha e nyɛ ɔ.

Benɛ Yohane kaseli ɔmɛ nu sane ɔ, a ya wo e gbogboe ɔ nɛ a ya pu. Lɔ ɔ se ɔ, a ya bɔ Yesu amaniɛ.

Pee se benɛ Herode nu kaa Yesu ngɛ nihi tsae, nɛ e ngɛ mumi yayamihi hiae ngɛ nihi a mi ɔ, e ye gbeye. Akɛnɛ Yesu ngɛ nyakpɛ ní pee he je ɔ, Herode susu kaa Yesu ji Yohane Nɔ Baptisilɔ ɔ nɛ “a tle lɛ si kɛ je gbeje.” (Luka 9:7) Lɔ ɔ he ɔ, Herode Antipa hla kaa e maa na Yesu. Pi nɛ e ngɛ hlae nɛ e maa nu sɛ gbi nɛ Yesu ngɛ fiɛɛe ɔ. Mohu ɔ, e ngɛ hlae nɛ e maa na Yesu konɛ e hyɛ kaa nɔ́ nɛ e ngɛ susue ɔ ngɛ mi jã niinɛ lo.