Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Tsɔɔ O Bimɛ Ní

 NÍ KASEMI 9

Yeremia Kpa We Yehowa He Munyu Tumi

Yeremia Kpa We Yehowa He Munyu Tumi

Mɛni he je nɛ ni ɔmɛ a mi mi fu Yeremia a?

Yehowa he Yeremia yi wami

Be komɛ ngɛ nɛ nihi yeɔ wa he fɛu loo a mi mi fuɔ wɔ ke wa tu Yehowa he munyu kɛ tsɔɔ mɛ. Enɛ ɔ ma nyɛ maa wo wa kɔni mi nyu nɛ wa kpa Mawu he munyu tumi kɛ tsɔɔ nihi. E pee mo ja hyɛ lo?— Baiblo ɔ deɔ wɔ kaa niheyo ko hi si blema nɛ e suɔ Yehowa, se e piɛ bɔɔ nɛ jinɛ e kpa Yehowa he munyu tumi. A tsɛɛ lɛ ke Yeremia. Mo ha nɛ waa kase e he ní.

Benɛ Yeremia ji niheyo ɔ, Yehowa de lɛ kaa e bɔ nihi kɔkɔ konɛ a kpa ní yayami peemi. Nítsumi nɛ ɔ he wa ha Yeremia, nɛ e ye gbeye. E de Yehowa ke: ‘I li nɔ́ nɛ ma de. Jokuɛyo kɛkɛ ji mi.’ Se Yehowa de lɛ ke: ‘Koo ye gbeye. Ma ye bua mo.’

 Lɔɔ he ɔ, Yeremia bɔni nihi kɔkɔ bɔmi kaa ke a kpa we ní yayami peemi ɔ, Yehowa maa gbla a tue. O susu kaa ni ɔmɛ pee nɔ́ nɛ Yeremia de mɛ ɔ lo?— Dɛbi. A mi mi fuu lɛ wawɛɛ nɛ a ye e he fɛu. A ti ni komɛ po to kaa a maa gbe lɛ! Ke o hyɛ ɔ, kɛ Yeremia nu he ha kɛɛ?— E ye gbeye nɛ e de ke: ‘I be Yehowa he munyu tue hu.’ Se, anɛ Yeremia kpa Yehowa he munyu tumi lo?— Dɛbi, e kpa we. Yeremia suɔ Yehowa saminya, enɛ ɔ he ɔ, e kpa we Yehowa he munyu tumi. Nɛ akɛnɛ Yeremia kpa we Mawu he munyu tumi heje ɔ, Yehowa po e he piɛ.

Kaa nɔ hyɛmi nɔ́ ɔ, be ko ɔ, nimli yaya komɛ nu Yeremia nɛ a kɛ lɛ wo muɔ nɛ e mi kuɔ nɛ mɔsɔ ngɛ mi ko mi. E yi ní nɛ e nui nyu. Nimli nɛ ɔmɛ a suɔ nɛ a je e he ngɛ lejɛ ɔ nɛ e gbo. Se Yehowa ye bua lɛ nɛ e je kpo!

Mɛni o ma nyɛ maa kase ngɛ Yeremia nɔ hyɛmi nɔ ɔ mi?— Ngɛ anɔkuale mi ɔ, e ye gbeye be komɛ, se e kpa we Yehowa he munyu tumi. Ke o ngɛ Yehowa he munyu tue ɔ, nihi mi mi ma nyɛ ma fu loo a maa ye o he fɛu. Zo ma nyɛ maa gbe mo loo o maa ye gbeye po. Se ko kpa Yehowa he munyu tumi. E maa ye bua mo be tsuaa be kaa bɔnɛ e ye bua Yeremia a.

KANE NGƐ O BAIBLO Ɔ MI

  • Yeremia 1:4-8; 20:7-9; 26:8-19, 24; 38:6-13