Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Tsɔɔ O Bimɛ Ní

 NÍ KASEMI 5

Samuel Ya Nɔ Nɛ E Pee Nɔ́ Nɛ Da

Samuel Ya Nɔ Nɛ E Pee Nɔ́ Nɛ Da

Kɛ je be nɛ Samuel ji jokuɛyo ɔ, e ya hi kpe he bo tsu ɔ, he nɛ a jaa Yehowa ngɛ ɔ, nɛ e tsu ní ngɛ lejɛ ɔ. O le bɔnɛ pee ha nɛ Samuel ya hi kpe he bo tsu ɔ lo? Mo ha nɛ waa kase Samuel yayo Hana he ní kekle.

Hana hla bi hluu, se e fɔ we eko. Enɛ ɔ he ɔ, e sɔle kɛ kpa Yehowa pɛɛ kaa e ye kɛ bua lɛ. Hana wo Yehowa si kaa ke e fɔ binyumu ɔ, e ma ha nɛ e ya hi sɔlemi we ɔ nɛ e tsu ní ngɛ lejɛ ɔ. Yehowa bu e sɔlemi ɔ tue nɛ e fɔ binyumu. E wo lɛ biɛ ke Samuel. Nɛ kaa bɔnɛ Hana wo si ɔ, benɛ Samuel ye maa pee jeha etɛ loo eywiɛ ɔ, e kɛ lɛ ho kpe he bo tsu ɔ mi ya konɛ Samuel ya sɔmɔ Mawu ngɛ lejɛ ɔ.

Eli ji osɔfo nɔkɔtɔma ngɛ kpe he bo tsu ɔ mi. E bimɛ nyumuhi enyɔ hu tsuɔ ní ngɛ lejɛ ɔ. Mo kai kaa kpe he bo tsu ɔ ji he nɛ a jaa Mawu ngɛ. Enɛ ɔ he ɔ, e sa nɛ nihi nɛ a pee ní kpakpahi ngɛ lejɛ ɔ. Se Eli binyumu ɔmɛ peeɔ ní yayamihi. Samuel na níhi nɛ a ngɛ pee ɔ. O susu kaa Samuel pee ní yayamihi kaa bɔnɛ Eli binyumu ɔmɛ pee ɔ lo?​— Dɛbi, e ya nɔ nɛ e pee nɔ́ nɛ da kaa bɔnɛ e fɔli ɔmɛ tsɔɔ lɛ ɔ.

Mɛni nɛ e sa kaa Eli ko pee e binyumu enyɔ ɔmɛ?​— E sa nɛ e ko gbla a tue. E sɛ nɛ e ko ha mɛ blɔ nɛ a tsu ní ngɛ Mawu we ɔ hu. Se Eli pee we jã, lɔɔ he ɔ, Yehowa mi mi fu e kɛ e binyumu enyɔ ɔmɛ. Yehowa pee e juɛmi kaa e maa gbla a tue.

Samuel de Eli nɔ́ nɛ Yehowa de lɛ ɔ

Ligbi ko nyɔ mi benɛ Samuel hwɔɔ si ɔ, e nu nɛ nɔ ko ngɛ lɛ tsɛɛ ke: ‘Samuel!’ E tu fo kɛ ho Eli ngɔ ya, se Eli de lɛ ke: ‘I tsɛ we mo.’ Nɔ́ nɛ ɔ ya nɔ si etɛ. Si etɛne ɔ se ɔ, Eli de Samuel kaa ke e nu gbi ɔ ekohu ɔ, e de ke: ‘I kpa mo pɛɛ, Yehowa, moo tu munyu; I ngɛ mo tue bue.’ Enɛ ɔ he ɔ, Samuel pee jã. Kɛkɛ nɛ Yehowa de Samuel ke: ‘Mo de Eli kaa ma gbla e weku ɔ tue ngɛ ní yayamihi nɛ a pee ɔ he.’ O susu kaa e he wɛ ha Samuel kaa e maa tu munyu nɛ ɔ kɛ tsɔɔ Eli lo?​— Ngɛ anɔkuale mi ɔ, e he wa ha lɛ. E ngɛ mi kaa Samuel ye gbeye mohu lɛɛ, se e pee nɔ́  nɛ Yehowa de lɛ kaa e pee ɔ. Nɔ́ nɛ Yehowa de ɔ ba mi. A gbe Eli binyumuhi enyɔ ɔmɛ, nɛ Eli hu gbo.

Samuel pee nɔ hyɛmi nɔ́ kpakpa kɛ ha wɔ. E na nɛ nihi ngɛ ní yayamihi pee, se lɛɛ e pee nɔ́ nɛ da. Mo nɛɛ? O maa pee kaa Samuel nɛ o ya nɔ nɛ o pee nɔ́ nɛ da lo? Ke o pee jã a, o ma ha nɛ Yehowa kɛ o fɔli a bua maa jɔ.

KANE NGƐ O BAIBLO Ɔ MI

  • 1 Samuel 2:22-26; 3:1-21