Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Tsɔɔ O Bimɛ Ní

 NÍ KASEMI 2

Rebeka Suɔ Nɛ E Ha Yehowa Bua Nɛ Jɔ

Rebeka Suɔ Nɛ E Ha Yehowa Bua Nɛ Jɔ

Rebeka ji yo ko nɛ e suɔ Yehowa. A tsɛɛ e huno ke Isak. Isak hu suɔ Yehowa. Mɛni blɔ nɔ nɛ Isak ba pee Rebeka huno ngɛ? Mɛni e pee kɛ tsɔɔ kaa e suɔ nɛ e ha nɛ Yehowa bua nɛ jɔ? Ha nɛ waa kase e he ní fuu.

Isak fɔli ji Abraham kɛ Sara. A hi Kanaan zugba a nɔ. Se Kanaanbi ɔmɛ ja we Yehowa. Abraham suɔ kaa e bi ɔ nɛ ngɔ yo nɛ jaa Yehowa. Enɛ ɔ heje ɔ, Abraham tsɔ kɛ ya Haran, he nɛ e wekuli ɔmɛ ekomɛ ngɛ ɔ, konɛ e tsɔlɔ ɔ nɛ ya hla yo kɛ ba ha Isak. Eko ɔ, Eliezer ji nɔ nɛ e tsɔ ɔ nɛ.

Rebeka tsu ní wawɛɛ nɛ e yɛ nyu kɛ ha afukpɔngɔ ɔmɛ

Abraham tsɔli kpahi piɛɛ Eliezer he kɛ hia blɔ ɔ. He nɛ a hia blɔ kɛ ya a kɛ saminya. A kɛ afukpɔngɔhi nyɔngma nɛ a ngɔ niye ní kɛ nike níhi kɛ pue a nɔ lɛ ya. Mɛni blɔ nɔ Eliezer maa gu kɛ na yo nɛ Isak maa suɔ? Benɛ Eliezer kɛ tsɔli kpa amɛ ya su Haran ɔ, a to si ngɛ nyu vu ko he. Eliezer le kaa e be kɛe nɛ nihi ma ba bɔni nyu yɛmi. E sɔle kɛ ha Yehowa nɛ e de ke: ‘Yiheyo nɛ ma ba lɛ nyu, nɛ e ma ha i afukpɔngɔ ɔmɛ nyu nɛ wa maa nu ɔ, ha jamɛ a yiheyo ɔ nɛ pee nɔ nɛ o hla a.’

E kɛ we nɛ yiheyo ko nɛ a tsɛɛ lɛ ke Rebeka ma nyu yɛmi ngɛ vu ɔ mi. Baiblo ɔ de kaa e he ngɛ fɛu saminya. Eliezer de Rebeka ke e ha lɛ nyu ɔ eko nɛ e maa nu. Nɛ Rebeka he nɔ ke: ‘I kpa mo pɛɛ yoo. Ma ha o kɛ afukpɔngɔ ɔmɛ nyu nɛ nyɛɛ  nu.’ Moo po he foni nɛ o hyɛ! Afukpɔngɔhi nɛ kuma ngɛ mɛ yee ɔ nuu nyu saminya. Lɔɔ he ɔ, Rebeka sa fo kɛ ya vu ɔ he si abɔ nɛ e ya yɛ nyu ɔ kɛ ba ha mɛ. Anɛ o na bɔnɛ Rebeka ngɛ ní tsue wawɛɛ ngɛ foni ɔ mi ɔ lo?— Bɔnɛ Yehowa plɛ kɛ ha Eliezer sɔlemi ɔ heto ɔ pee lɛ nyakpɛ.

Eliezer ha Rebeka nike ní nɛ ngɛ fɛu fuu. Nɛ Rebeka ngɔ Eliezer kɛ tsɔli kpa amɛ kɛ ho a we ɔ mi ya. Eliezer de mɛ nɔ́ heje nɛ Abraham tsɔ lɛ kɛ bɔnɛ Yehowa ha e sɔlemi ɔ heto ha. Rebeka wekuli ɔmɛ a bua jɔ nɛ a kplɛɛ nɔ kaa e ya nɛ e ya pee Isak yo.

Rebeka kɛ Eliezer ya Kanaan nɛ e ya gba Isak

O susu kaa Rebeka suɔ kaa e ma ya gba Isak lo?​— Rebeka le kaa Yehowa lɛ e tsɔ Eliezer kɛ ba lejɛ ɔ nɛ. Lɔɔ he ɔ, benɛ Rebeka wekuli ɔmɛ bi lɛ kaa e maa ya Kanaan nɛ e ya gba Isak lo ɔ, e ha heto ke: ‘Ee, i suɔ nɛ ma ya.’ Amlɔ nɔuu nɛ e kɛ Eliezer ho. Benɛ a su Kanaan ɔ, e ya pee Isak yo.

Akɛnɛ Rebeka pee nɔ́ nɛ Yehowa de lɛ kaa e pee heje ɔ, Yehowa jɔɔ lɛ. Jeha komɛ a se ɔ, a fɔ Yesu ngɛ e weku ɔ mi! Ke o ngɛ kaa Rebeka nɛ o ha nɛ Yehowa ná bua jɔmi ɔ, mo hu e maa jɔɔ mo.

KANE NGƐ O BAIBLO Ɔ MI

  • 1Mose 12:4, 5; 24:1-58, 67