Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Tsɔɔ O Bimɛ Ní

 NÍ KASEMI 6

David Yi Gbeye

David Yi Gbeye

Ke o ngɛ gbeye yee ɔ, mɛni o peeɔ?— Eko ɔ, o yaa o papaa kɛ o yayo a ngɔ nɛ a ye bua mo. Se nɔ kpa ko hu ngɛ nɛ e ma nyɛ maa ye bua mo. E ngɛ he wami pe nɔ tsuaa nɔ. O le nɔ nɛ ji lo?— Ee, lɛ ji Yehowa Mawu. Mo ha nɛ waa kase niheyo ko nɛ e biɛ ji David nɛ ngɛ Baiblo ɔ mi ɔ he ní. E le kaa Yehowa maa ye bua lɛ be tsuaa be, lɔɔ he ɔ, e yi gbeye.

Kɛ je benɛ David ji bimwɔyo nɛ e fɔli tsɔse lɛ nɛ e suɔ Yehowa. Enɛ ɔ ye bua David nɛ ke e kɛ níhi nɛ a ngɛ gbeye kpe po ɔ, e yi gbeye. E le kaa Yehowa ji e huɛ, nɛ Yehowa maa ye bua lɛ. Ligbi ko ɔ, David ya ngɛ tohi hyɛe ngɛ nga a nɔ, nɛ jata agbo ko ba nu to ɔ kake! O le nɔ́ nɛ David pee lo? E nyɛɛ jata a se nɛ e ya gbe lɛ! Nɛ be kpa ko hu ɔ, benɛ osisiblisi ko ma to ɔ eko numi ɔ, David gbe lɛ! Mɛnɔ lɛ o susu kaa e ye bua David ɔ?— Anɔkuale, Yehowa lɛ ye bua David.

Be ko hu ɔ, David tsɔɔ kaa e yi gbeye kulaa. Jamɛ a be ɔ mi ɔ, Israelbi ɔmɛ kɛ Filistibi ɔmɛ ngɛ ta hwue. Filistibi ɔmɛ a ta bulɔ kake ka wawɛɛ nitsɛ nɛ e je oblai! A tsɛɛ lɛ ke Goliat. Oblai nɛ ɔ ye Israel ta buli ɔmɛ kɛ Yehowa a he fɛu. Goliat de Israel ta buli ɔmɛ kaa ke a ma nyɛ lɛ ɔ, a ba nɛ a kɛ lɛ ba hwu ta. Se Israelbi ɔmɛ tsuo ye gbeye wawɛɛ kaa a kɛ lɛ maa hwu ta. Benɛ David nu sane ɔ he ɔ, e de Goliat ke: ‘I kɛ mo maa hwu! Yehowa maa ye bua mi nɛ ma ye o nɔ kunumi!’ O susu kaa David ngɛ kã lo?— Ee, David ngɛ kã. O suɔ nɛ o maa le nɔ́ nɛ ba ngɛ lɔɔ se lo?

David ngɔ e we amlami ɔ kɛ tɛ enuɔ, nɛ e ho konɛ e kɛ oblai ɔ ya hwu ta. Benɛ Goliat hyɛ David nɛ e na kaa e wɛ ɔ, e ye David he fɛu. Se David de lɛ ke: ‘Moo lɛɛ o kɛ klaate ma ye ngɔ, se imi lɛɛ i ma o ngɔ ngɛ Yehowa biɛ mi!’ Kɛkɛ nɛ e ngɔ tɛ kɛ wo amlami ɔ mi, nɛ e sa fo nɛ e kɛ Goliat yaa kpe, nɛ e fɔ tɛ ɔ. Tɛ ɔ ya ná Goliat hɛ nya, nɛ e sɛ lo ɔ mi! Oblai ɔ nɔ si nɛ e gbo! Filistibi  ɔmɛ ye gbeye nɛ mɛ tsuo a tu fo. Kɛ pee kɛɛ nɛ niheyo wayoo kaa David nyɛ nɛ e ye oblai ɔ nɔ kunimi ɔ?— Yehowa ye bua lɛ, ejakaa Yehowa ngɛ he wami kulaa pe jamɛ a oblai ɔ!

David yi gbeye ejakaa e le kaa Yehowa maa ye bua lɛ

Mɛni o ma nyɛ maa kase ngɛ David sane ɔ mi?— Yehowa ngɛ he wami pe nɔ tsuaa nɔ. Nɛ e ji o Huɛ. Enɛ ɔ he ɔ, be tsuaa be nɛ o maa ye gbeye ɔ, mo kai kaa Yehowa ma nyɛ maa ye bua mo konɛ o ko ye gbeye!

KANE NGƐ O BAIBLO Ɔ MI

  • La 56:3, 4

  • 1 Samuel 17:20-54