Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Tsɔɔ O Bimɛ Ní

 NÍ KASEMI 11

A Ngma Yesu He Munyu

A Ngma Yesu He Munyu

O na nyumu ɔmɛ ngɛ foni ɔ mi ɔ lo?— Mɛ ji Mateo, Marko, Luka, Yohane, Petro, Yakobo, Yuda kɛ Paulo. Nyumuhi nɛ ɔmɛ tsuo a kɛ Yesu hi si ngɛ be kake mi, nɛ a ngma Yesu he munyu. Mo ha nɛ waa kase a he ní.

Mɛni o le ngɛ nimli nɛ ɔmɛ a he?

A kpɛti nihi etɛ ji Yesu bɔfohi nɛ a piɛɛ e he kɛ fiɛɛ Mawu munyu ɔ. O le nihi etɛ nɛ ɔmɛ lo?— Mateo, Yohane kɛ Petro. Bɔfo Mateo kɛ bɔfo Yohane le Yesu saminya, nɛ a ti nɔ tsuaa nɔ ngma Yesu si himi he  womi. Bɔfo Yohane ngma womi ko nɛ a tsɛɛ lɛ Kpojemi, kɛ sɛ womi etɛ nɛ ji Yohane Kekleekle Womi, Yohane Womi Enyɔne, kɛ Yohane Womi Etɛne. Bɔfo Petro hu ngma sɛ womi enyɔ nɛ ngɛ Baiblo ɔ mi ɔ. A tsɛɛ mɛ ke Petro Kekleekle Womi kɛ Petro Womi Enyɔne. Ngɛ Petro womi enyɔne ɔ mi ɔ, e ngma benɛ Yehowa tu munyu kɛ je hiɔwe nɛ e de ngɛ Yesu he ke: ‘Ye bi ji nɛ ɔ nɛ. I suɔ e sane, nɛ i bua jɔ e he.’

Nyumu kpa amɛ nɛ a ngɛ foni ɔ mi ɔ hu tsɔɔ wɔ Yesu he ní ngɛ womihi nɛ a ngma amɛ a mi. A ti nɔ kake ji Marko. Eko ɔ, be mi nɛ a nu Yesu ɔ, e ngɛ lejɛ ɔ nɛ e na nɔ́ nɛ ya nɔ ɔ tsuo. Luka hu ji a ti nɔ kake. E ji dɔkita nɛ eko ɔ, benɛ Yesu gbo se loko e ba pee Kristofono.

Baiblo ngmali enyɔ nɛ a piɛ ngɛ foni ɔ mi ɔ a ji Yesu senihi. O le a biɛhi lo?— A tsɛɛ mɛ ke Yakobo Yuda. Sisije ɔ, a be hemi kɛ yemi ngɛ Yesu mi. A susu kaa Yesu ngɛ godo nue po. Se, pee se ɔ, a ná hemi kɛ yemi ngɛ Yesu mi nɛ a ba pee Kristofoli.

Nyagbe Baiblo ngmalɔ nɛ o na ngɛ foni ɔ mi ɔ ji Paulo. Loko e ba pee Kristofono ɔ, a tsɛɛ lɛ ke Saulo. E sume Kristofoli a sane nɛ e wa mɛ yi mi. O le nɔ́ heje nɛ Paulo suɔ kaa e maa pee Kristofono ɔ lo?— Ligbi ko ɔ, Paulo ngɛ blɔ hiae, nɛ benɛ e ngɛ blɔ ɔ nɔ kɛ yaa a, tlukaa nɛ e nu nɛ nɔ ko tu munyu kɛ je hiɔwe. Yesu lɛ tu munyu ɔ nɛ! E bi Paulo ke: ‘Mɛni heje nɛ o ngɛ nihi nɛ a he mi ye ɔ yi mi wae ɔ?’ Kɛ je lɔɔ se ɔ, Paulo tsake nɛ e ba pee Kristofono. Paulo ngma womi 14 ngɛ Baiblo ɔ mi, kɛ je Romabi a womi ɔ kɛ ya si Hebribi a womi ɔ nɔ.

Wa kaneɔ Baiblo ɔ daa ligbi, pi jã lo?— Ke wa kase Baiblo ɔ, wa maa le Yesu he ní fuu. Anɛ o suɔ nɛ o maa kase Yesu he ní fuu lo?—