Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

 NÍ KASEMI 3

Anɛ Sane Kpakpa a Je Mawu Ngɔ Niinɛ Lo?

Anɛ Sane Kpakpa a Je Mawu Ngɔ Niinɛ Lo?

1. Mɛnɔ ji Baiblo ɔ Ngmalɔ?

A ngma sane kpakpa nɛ ji kaa adesahi maa hi zugba a nɔ kɛ ya neneene ɔ ngɛ Baiblo ɔ mi. (La 37:29) Womi nyafinyafihi 66 nɛ ngɛ Baiblo ɔ mi. Nyumuhi anɔkualetsɛmɛ maa pee 40 ji nihi nɛ Mawu ha nɛ a ngma jamɛ a womi ɔmɛ. Mose lɛ ngma womi enuɔ nɛ sɛ hlami ɔ maa pee kaa jeha 3,500 ji nɛ ɔ. Bɔfo Yohane lɛ ngma nyagbe womi ɔ maa pee kaa jeha 1,900 ji nɛ ɔ. Mɛnɔ yi mi munyu nɛ Baiblo ngmali ɔmɛ ngma a? Mawu kɛ Baiblo ngmali ɔmɛ tu munyu kɛ gu mumi klɔuklɔu ɔ nɔ. (2 Samuel 23:2) A ngma Mawu yi mi munyu se pi mɛ nitsɛmɛ a yi mi munyu. Enɛ ɔ he ɔ, Yehowa ji Baiblo ɔ Ngmalɔ.Kane 2 Timoteo 3:16; 2 Petro 1:20, 21.

2. Mɛni blɔ nɔ o maa gu kɛ ná nɔ mi mami kaa munyuhi nɛ ngɛ Baiblo ɔ mi ɔ ji anɔkuale?

Wa le kaa Baiblo ɔ je Mawu ngɔ ejakaa e deɔ wɔ níhi nɛ maa ba hwɔɔ se ɔ fitsofitso. Adesa ko be nyɛe maa pee jã. (Yoshua 23:14) Mawu Ope ɔ pɛ lɛ ma nyɛ maa na níhi nɛ maa ba ngɛ adesahi a si himi mi hwɔɔ se.Kane Yesaya 42:9; 46:10.

E sa kaa womi nɛ je Mawu ngɔ ɔ nɛ hi slɔɔto, nɛ jã ji bɔ nɛ e ngɛ. A gba Baiblo ayɔ akpehi abɔ ngɛ gbi lafahi abɔ mi. E ngɛ mi kaa Baiblo ɔ se kɛ mohu lɛɛ, se e kɛ adebɔ he ní kasemi kpa gbi. Jehanɛ se hu, nihi 40 ɔmɛ ngma munyuhi nɛ́ kɛ a he kpa gbi. * Enɛ ɔ se ɔ, nɔ́ nɛ Baiblo ɔ deɔ ngɛ suɔmi he ɔ je anɔkuale Mawu nɛ ngɛ suɔmi ɔ ngɔ, nɛ loloolo ɔ, Baiblo ɔ ngɛ he wami nɛ́ e kɛ tsakeɔ nihi a si himi konɛ a si himi nɛ pee kpakpa. Anɔkuale munyu nɛ ɔmɛ ha nihi ayɔhi abɔ na kaa Baiblo ɔ ji Mawu Munyu.Kane 1 Tesalonika Bi 2:13.

 3. Mɛni he munyu Baiblo ɔ tuɔ?

Baiblo ɔ mi munyuyi titli ɔmɛ a kpɛti kake tsɔɔ kaa Mawu ngɛ yi mi tomi kpakpa kɛ ha adesahi. Ngmami ɔ tsɔɔ bɔ nɛ sisije ɔ, he blɔ nɛ adesa ná kaa e maa hi si ngɛ paradeiso zugba a nɔ ɔ je e dɛ, kɛ bɔ nɛ hwɔɔ se ɔ, paradeiso ɔ maa ba ekohu ɔ mi.Kane Kpojemi 21:4, 5.

Mlaahi kɛ sisi tomi mlaahi, kɛ ga womihi hu ngɛ Mawu Munyu ɔ mi. Jehanɛ hu, bɔ nɛ Mawu kɛ adesahi ye ha a he nɔ hyɛmi níhi ngɛ Baiblo ɔ mi, nɛ nɔ hyɛmi ní nɛ ɔmɛ tsɔɔ nɔ tutuutu nɛ Mawu ji. Enɛ ɔ he ɔ, Baiblo ɔ ma nyɛ maa ye bua mo konɛ o le Mawu. E tsɔɔ blɔ nɔ nɛ o maa gu kɛ pee Mawu huɛ.Kane La 19:7, 11; Yakobo 2:23; 4:8.

4. Mɛni blɔ nɔ o maa gu kɛ nu Baiblo ɔ mi munyu ɔmɛ a sisi?

Blɔ nɔ nɛ Yesu gu nɛ e kɛ ngmamihi tsu ní ɔ, jamɛ a blɔ nɔ nɔuu nɛ womiyo nɛ ɔ maa ye bua mo konɛ o nu Baiblo ɔ mi munyu ɔmɛ a sisi. Yesu tsɛɔ Baiblo ɔ mi ngmamihi a se nɛ e tsɔɔ ‘Ngmami ɔ mi munyu ɔmɛ a sisi.’Kane Luka 24:27, 45.

Nɔ́ ko be nɛ haa nɔ bua jɔmi kaa sane kpakpa a nɛ je Mawu ngɔ ɔ. Se, ni komɛ a bua jɔɛ he, nɛ ni kpahi hu lɛɛ sane kpakpa a woɔ a mi mi la po. Se o kɔni mi ko jɔ. O hɛ kɛ nɔ fɔmi kaa o ma ná neneene wami ɔ daa si ngɛ Mawu nɛ o maa le ɔ nɔ.Kane Yohane 17:3.

 

^ kk. 3 Hyɛ womiyo nɛ ji A Book for All People ɔ mi.