1. Mɛni ji sane kpakpa a nɛ je Mawu ngɔ ɔ?

Mawu suɔ nɛ adesahi nɛ a ná bua jɔmi ngɛ si himi mi ngɛ zugba a nɔ. E bɔ zugba a kɛ nɔ́ tsuaa nɔ́ nɛ ngɛ nɔ ɔ akɛnɛ e ngɛ suɔmi kɛ ha adesahi he je. E be kɛe nɛ e ma ha adesahi tsuo ngɛ he tsuaa he ɔ ma ná si himi kpakpa. E ma jé níhi nɛ ngɔɔ haomi kɛ baa adesahi a nɔ ɔ tsuo kɛ je.​—Kane Yeremia 29:11.

Nɔ yemi ko nyɛ we nɛ e je basabasa peemi, hiɔ kɛ gbenɔ kɛ je. Se sane kpakpa ko ngɛ. E be kɛe nɛ Mawu maa ngɔ e nɔ yemi ɔ kɛ to adesahi a nɔ yemihi a nane mi. E sisi bimɛ ma ná tue mi jɔmi kɛ nɔmlɔ tso mi he wami kpakpa.​—Kane Yesaya 25:8; 33:24; Daniel 2:44.

2. Mɛni he je nɛ sane kpakpa a he hia wawɛɛ mwɔnɛ ɔ?

Ja Mawu je yayami peeli kɛ je zugba nɛ ɔ nɔ loko nɔ́ nami se maa po. (Zefania 2:3) Mɛni be enɛ ɔ maa ba mi? Mawu Munyu ɔ gba si himi nɛ ngɛ adesahi haoe mwɔnɛ ɔ he sane kɛ fɔ si. Ní yayamihi nɛ ngɛ nɔ yae ngɛ zugba a nɔ amlɔ nɛ ɔ tsɔɔ kaa be nɛ Mawu kɛ ma tsu nɔ́ nɛ ɔ he ní ɔ su ta.​—Kane 2 Timoteo 3:1-5.

3. Mɛni e sa kaa waa pee?

E sa kaa waa kase Mawu he ní kɛ je e Munyu nɛ ji Baiblo ɔ mi. Baiblo ɔ ngɛ kaa sɛ womi nɛ tsɛ nɛ ngɛ suɔmi ngma kɛ ba ha wɔ. E tsɔɔ wɔ bɔ nɛ wa maa pee ha kɛ ná bua jɔmi mwɔnɛ ɔ kɛ bɔ nɛ wa maa pee ha kɛ ná neneene wami ngɛ zugba a nɔ hwɔɔ se. Ngɛ anɔkuale mi ɔ, ni komɛ a bua be he jɔe kaa a maa na kaa o ngɛ Baiblo ɔ kasee. Se akɛnɛ Mawu wo si kaa wa ma nyɛ ma ná hwɔɔ se si himi kpakpa he je ɔ, e sɛ kaa waa ngmɛ blɔ nɛ ni kpahi nɛ a ha nɛ wa kpa e he ní kasemi.​—Kane Abɛ 29:25; Kpojemi 14:6, 7.