Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Sane Kpakpa Nɛ Je Mawu Ngɔ!

 NÍ KASEMI 7

Mɛni Ji Mawu Matsɛ Yemi ɔ?

Mɛni Ji Mawu Matsɛ Yemi ɔ?

1. Mɛni ji Mawu Matsɛ Yemi ɔ?

Mɛni he je nɛ Yesu ji Matsɛ nɛ sa a?—MARKO 1:40-42.

Mawu Matsɛ Yemi ɔ ji nɔ yemi nitsɛ nɛ ngɛ hiɔwe. E ma je nɔ yemi kpahi tsuo kɛ je nɛ e ma ha nɛ́ a pee Mawu suɔmi nya ní ngɛ hiɔwe kɛ zugba a nɔ. E ji sane kpakpa kaa Mawu maa ngɔ e Matsɛ Yemi ɔ kɛ tsu ní ngɛ blɔ nɛ ɔ nɔ. E be kɛe nɛ Mawu Matsɛ Yemi ɔ ma ha adesahi ma ná nɔ yemi kpakpa nɛ a ngɛ hlae ɔ. E maa pee adesahi tsuo nɛ a ngɛ zugba a nɔ ɔ kake.Kane Daniel 2:44; Mateo 6:9, 10; 24:14.

Matsɛ yemi saisaa ngɛ e nya matsɛ. Yehowa hla e Bi Yesu Kristo kaa e Matsɛ Yemi ɔ nya Matsɛ.Kane Kpojemi 11:15.

2. Mɛni he je nɛ Yesu ji Matsɛ nɛ sa a?

Mawu Bi ɔ ji Matsɛ nɛ sa ejakaa e mi mi hi, nɛ e yeɔ dami sane. (Yohane 1:14) Jehanɛ hu ɔ, e ngɛ he wami nɛ e kɛ maa ye bua adesahi ejakaa e maa hi hiɔwe kɛ ye zugba a nɔ. Benɛ a tle lɛ si se ɔ, e ho hiɔwe ya nɛ e ya hi si nɛ e mlɛ ngɛ Yehowa hiɔ nɔ. (Hebri Bi 10:12, 13) Nyagbe ɔ, Mawu ha lɛ he wami konɛ e bɔni nɔ yemi.Kane Daniel 7:13, 14.

3. Mɛnɔmɛ maa piɛɛ Yesu he kɛ ye matsɛ?

Kuu ko nɛ a tsɛɛ mɛ ke ‘ni klɔuklɔuhi’ maa piɛɛ Yesu he kɛ ye matsɛ ngɛ hiɔwe. (Daniel 7:27) Yesu kaseli anɔkualetsɛmɛ ɔmɛ ji kekle ni klɔuklɔuhi nɛ a hla. Yehowa ya nɔ nɛ e hla nyumuhi kɛ yihi nɛ a ji anɔkualetsɛmɛ kaa ni klɔuklɔuhi kɛ ba si mwɔnɛ ɔ. A ma tle mɛ si nɛ a ma ha mɛ mumi mi nɔmlɔ tso kaa bɔ nɛ a tle Yesu si nɛ a ha lɛ mumi mi nɔmlɔ tso ɔ.Kane Yohane 14:1-3; 1 Korinto Bi 15:42-44.

 Nihi enyɛmɛ nɛ a maa ya hiɔwe? Yesu tsɛ mɛ ke “kuu nyafii.” (Luka 12:32) A yibɔ ji 144,000. A maa piɛɛ Yesu he kɛ ye zugba a nɔ.Kane Kpojemi 14:1.

4. Mɛni ba benɛ Yesu bɔni nɔ yemi ɔ?

Mawu Matsɛ Yemi ɔ bɔni nɔ yemi ngɛ jeha 1914 mi. * Benɛ a wo Yesu Matsɛ ɔ, kekleekle nɔ́ nɛ e pee ji kaa e fie Satan kɛ e daimonio ɔmɛ kɛ je hiɔwe kɛ ba zugba a nɔ. Satan mi mi fu wawɛɛ nɛ e kɛ haomi ba zugba a nɔ tsuo. (Kpojemi 12:7-10, 12) Kɛ je jamɛ a be ɔ mi kɛ ma nɛ ɔ, adesahi a haomihi ba hiɛ babauu. Tahi, hwɔ, hiɔ nɛ sãa nɔ, kɛ zugba mimiɛmihi piɛɛ “okadi” nɛ tsɔɔ kaa e be kɛe nɛ Matsɛ Yemi ɔ maa ye zugba a nɔ tsuo ɔ he.Kane Luka 21:7, 10, 11, 31.

5. Mɛni Mawu Matsɛ Yemi ɔ maa pee?

Mawu Matsɛ Yemi ɔ bɔni asafo kuu babauu nɛ a je ma slɔɔtohi a mi ɔ kake peemi momo kɛ gu fiɛɛmi ní tsumi ɔ nɔ. He si bali ayɔhi abɔ ngɛ nɔ kplɛɛe kaa a maa pee Mawu Matsɛ Yemi ɔ nɛ Yesu ji e nya Matsɛ ɔ sisi bimɛ. Mawu Matsɛ Yemi ɔ maa bu a he be mi nɛ e ma kpata je yaya nɛ ɔ hɛ mi ɔ. Enɛ ɔ he ɔ, e sa kaa nihi tsuo nɛ a suɔ kaa a ná jɔɔmi nɛ Mawu Matsɛ Yemi ɔ kɛ maa ba a eko ɔ nɛ́ a pee tue bumi kɛ ha Yesu.Kane Kpojemi 7:9, 14, 16, 17.

Ngɛ jeha 1,000 ɔ mi ɔ, Matsɛ Yemi ɔ ma tsu Mawu yi mi tomi kɛ ha adesahi ɔ he ní. Zugba a tsuo maa pee paradeiso. Nyagbe ɔ, Yesu maa ngɔ Matsɛ Yemi ɔ kɛ ha e Tsɛ ɔ ekohu. (1 Korinto Bi 15:24-26) Anɛ o le nɔ ko nɛ o maa suɔ kaa o maa tu Mawu Matsɛ Yemi ɔ he munyu kɛ tsɔɔ lɛ lo?Kane La 37:10, 11, 29.

 

^ kk. 6 Ke o ngɛ hlae nɛ o le níhi fuu ngɛ Baiblo mi gbami nɛ kɔɔ jeha 1914 he ɔ, hyɛ womi nɛ ji Mɛni Baiblo ɔ Ma Nyɛ Maa Tsɔɔ Wɔ? ba fa 217-220.