Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Sane Kpakpa Nɛ Je Mawu Ngɔ!

 NÍ KASEMI 2

Mɛnɔ Ji Mawu?

Mɛnɔ Ji Mawu?

1. Mɛni he je nɛ e sa kaa wa ja Mawu?

Anɔkuale Mawu ɔ ji níhi tsuo a Bɔlɔ. E be sisije nɛ e be nyagbe hulɔ. (La 90:2) Sane kpakpa nɛ ngɛ Baiblo ɔ mi ɔ je e ngɔ. (1 Timoteo 1:11) Akɛnɛ Mawu haa wɔ wami he je ɔ, lɛ pɛ ji nɔ nɛ e sa kaa wa ja.Kane Kpojemi 4:11.

2. Kɛ Mawu su ngɛ kɛɛ?

Nɔmlɔ ko nɛ Mawu gblee ejakaa Mumi ji lɛ, nɛ́ tsɔɔ kaa e nɔ kuɔ pe nibɔ níhi nɛ ngɛ zugba a nɔ ɔ. (Yohane 1:18; 4:24) Se kɛ̃ ɔ, wa ma nyɛ maa le Mawu suhi kɛ gu níhi nɛ e bɔ ɔmɛ a nɔ. Kaa nɔ hyɛmi nɔ́ ɔ, tso yiblii slɔɔtohi kɛ mɔmɔ slɔɔtohi tsɔɔ wɔ kaa e ngɛ suɔmi kɛ nile. Bɔ nɛ je mluku ɔ kle ha a tsɔɔ wɔ kaa e ngɛ he wami.Kane Roma Bi 1:20.

Wa ma nyɛ maa kase Mawu suhi a he ní babauu kɛ gu Baiblo ɔ kanemi nɔ. Kaa nɔ hyɛmi nɔ́ ɔ, Baiblo ɔ deɔ wɔ nɔ́ nɛ Mawu suɔ kɛ nɔ́ nɛ e sume, bɔ nɛ e sa kaa waa kɛ nihi nɛ hi si ha, kɛ bɔ nɛ e sa kaa waa pee wa ní ha ngɛ si fɔfɔɛ slɔɔtohi a mi.Kane La 103:7-10.

3. Anɛ Mawu ngɛ biɛ lo?

Yesu de ke: “Wa Tsɛ nɛ ngɛ hiɔwe; O biɛ ɔ he nɛ tsɔ.” (Mateo 6:9) E ngɛ mi kaa Mawu ngɛ palemi biɛhi fuu mohu lɛɛ, se e ngɛ biɛ kake pɛ. E biɛ ji “Yehowa.” Ngɛ gbi tsuaa gbi mi ɔ, e slɔ bɔ nɛ a tsɛɔ biɛ Yehowa a ha. Se ni komɛ tsɛɔ lɛ “Yawɛ.”Kane La 83:18.

A jé Mawu biɛ ɔ kɛ je Baiblohi fuu a mi nɛ a kɛ palemi biɛhi kaa Nyɔmtsɛ kɛ Mawu to nane mi. Se benɛ a ngma Baiblo ɔ, Mawu biɛ ɔ je kpo ngɛ mi maa pee kaa si 7,000. Benɛ Yesu tsɔɔ nihi Mawu he ní ɔ, e ha nɛ a le Mawu biɛ ɔ.Kane Yohane 17:26.

 4. Anɛ Yehowa susuɔ wa he lo?

Kaa bɔ nɛ tsɛ nɛ́ ngɛ suɔmi nɛ ɔ ji ɔ, Mawu ngɛ níhi nɛ wa ma ná he se kɛ ya daa a he blɔ nya toe

Anɛ nɔ́ nami nɛ pɔ he ɔ tsɔɔ kaa Yehowa ji Mawu nɛ susuu we wa he lo? Ni komɛ deɔ kaa e ngɔɔ nɔ́ nami kɛ kaa wɔ, se enɛ ɔ pi anɔkuale.Kane Yakobo 1:13.

Mawu ha nɔmlɔ he blɔ konɛ e hla nɔ́ nɛ e suɔ. Anɛ wa bua jɔɛ he blɔ nɛ wa ná kaa wa maa hla kaa wa ma sɔmɔ Mawu ɔ he lo? (Yoshua 24:15) Se nihi fuu suɔ kaa a maa pee ni kpahi ní yayamihi, nɛ enɛ ɔ haa nihi fuu naa nɔ́. Dami sane nɛ a yi nɛ ɔ dɔɔ Yehowa. Kane 1 Mose 6:5, 6.

Yehowa ji Mawu nɛ susuɔ wa he. E suɔ nɛ wa ná bua jɔmi ngɛ si himi mi. E be kɛe nɛ e ma jé haomi kɛ nihi nɛ ngɔɔ haomihi kɛ baa a tsuo kɛ je. Se, e ngɛ yi mi tomi kpakpa he je nɛ e ngmɛ nɔ́ nami blɔ be bɔɔ ɔ. Wa maa kase yi mi tomi nɛ ɔ he ní ngɛ Ní Kasemi 8 ɔ mi.Kane 2 Petro 2:9; 3:7, 13.

5. Mɛni blɔ nɔ wa maa gu kɛ hɛ wɔ kɛ su Mawu he?

Yehowa deɔ wɔ nɛ waa hɛ wɔ kɛ su e he kɛ gu sɔlemi nɔ. E susuɔ wa he kakaaka. (La 65:2; 145:18) E suɔ kaa e maa ngɔ wa tɔmihi kɛ pa wɔ. Ke wa ngɛ mɔde bɔe kaa wa maa sa e hɛ mi nɛ be komɛ wa nyɛ we po ɔ, e le. Enɛ ɔ he ɔ, ngɛ mluku nɛ wa yi ɔ tsuo se ɔ, wa ma nyɛ nɛ waa kɛ Mawu ma ná huɛ bɔmi nɛ mi wa.Kane La 103:12-14; Yakobo 4:8.

Akɛnɛ Yehowa ha wɔ wami he je ɔ, e sa nɛ waa suɔ lɛ pe nɔ tsuaa nɔ. (Marko 12:30) Ke o kase Mawu he ní babauu nɛ o pee níhi nɛ e deɔ mo ɔ, lɔ ɔ tsɔɔ kaa o suɔ lɛ, nɛ lɔ ɔ ma ha nɛ́ o hɛ mo kɛ su e he.Kane 1 Timoteo 2:4; 1 Yohane 5:3.