NƆ́ HE JE NƐ E HE HIA

Ní komɛ ngɛ nɛ a he hia pe bɔ nɛ o naa o he ha ngɛ ahuhuɛ mi ɔ.

MƐNI O MAA PEE?

Mo susu si fɔfɔɛ nɛ ɔ he nɛ o hyɛ: Be fɛɛ be nɛ Julia maa hyɛ e he ngɛ ahuhuɛ mi ɔ, e naa e he kaa e kle tsɔ. E ngɛ mi kaa e fɔli kɛ e huɛmɛ deɔ lɛ kaa e ngɛ kaa “bɛ ngu” mohu lɛɛ, se kɛ̃ ɔ, e deɔ e he ke: “E sa nɛ ye nɔ nɛ gbɔ bɔɔ.”

Lingmi nɛ ɔ, Julia susu níhi nɛ ke e pee ɔ, e nɔ ma gbɔ “kilo enyɔ kɛ fã” a he. E na kaa e sa nɛ e ha e he hwɔ ligbi bɔɔ ko . . .

Ke e peeɔ mo kaa bɔ nɛ e peeɔ Julia a, mɛni o maa pee?

MOO MLƐ NƐ O SUSU HE!

Bɔ nɛ o susuɔ kaa o ngɛ ha a ma nyɛ maa pee kaa nɔ́ nɛ o ngɛ o he hyɛe ngɛ ahuhuɛ nɛ jɛɛ nɔ mi

Tɔmi ko be he kaa o maa hao ngɛ bɔ nɛ o nɔmlɔ tso ngɛ ha a he. Ngɛ anɔkuale mi ɔ, Baiblo ɔ tu ni komɛ kaa Sara, Rahel, Abigail, Yosef, kɛ David a he munyu kaa a he ngɛ fɛu. Baiblo ɔ tsɔɔ kaa yo ko nɛ a tsɛɛ lɛ ke Abishag ɔ “he ngɛ fɛu saminya.”1 Matsɛmɛ 1:4.

Se nihewi kɛ yihewi fuu haoɔ a he tsɔ ngɛ bɔ nɛ a nɔmlɔ tso ngɛ ha a he. Enɛ ɔ ma nyɛ maa ye mɛ awi wawɛɛ. Mo susu he nɛ o hyɛ:

  • Níhi a mi hlami ko nɛ a pee ɔ tsɔɔ kaa ke a hla yihewi lafa a, a kpɛti nihi 58 deɔ ke a kle tsɔ, se ngɛ anɔkuale mi ɔ, a kpɛti nihi 17 pɛ nɛ a kle tsɔ.

  • Níhi a mi hlami kpa ko hu nɛ a pee ɔ tsɔɔ kaa ke a hla yihi nɛ a klee we lafa a, a kpɛti nihi 45 susuɔ kaa a kle tsɔ!

  • Akɛnɛ nihewi kɛ yihewi komɛ suɔ wawɛɛ kaa a nɔ nɛ gbɔ he je ɔ, a ná hiɔ ko nɛ a tsɛɛ ke anorexia. E ji hiɔ ko nɛ haa nɛ nɔ haa e he hwɔ, nɛ e ma nyɛ maa gbe nɔ po.

 Ke o na kaa o nu jamɛ a hiɔ aloo o nyɛ we ní yemi kpakpa ko ɔ, ha nɛ nihi nɛ a ye bua mo. Kekleekle ɔ, moo bɔ o fɔli aloo nɔ ko nɛ wa nɛ o he lɛ ye amaniɛ. Baiblo ɔ de ke: ‘Huɛmɛ suɔ a he be tsuaa be, haomi be mi tete po a si we a sibi.’—Abɛ 17:17.

NƆ́ NƐ HI PE KULAA NƐ O MA NYƐ MAA PEE!

Ngɛ anɔkuale mi ɔ, suhi nɛ nɔ ko ngɛ ɔ lɛ haa nɛ nihi a bua jɔɔ e he loo a bua jɔɛ e he. Mo susu Matsɛ David bi Absalom he nɛ o hyɛ. Baiblo ɔ de ke:

Nɔ ko nɔ ko be nɛ he ngɛ fɛu kɛ Absalom sɔ; kɛ je e nane sisi hluu kɛ ya si e yi gbɛtɛ mi ɔ, sé ko be e he.”2 Samuel 14:25.

Se kɛ̃ ɔ, Absalom woɔ e he nɔ, e suɔ kaa e ma ná blɔ nya, nɛ e nɔ kutupɔtsɛ ko be! Enɛ ɔ he ɔ, Baiblo ɔ tui Absalom he munyu kpakpa, mohu ɔ, e tu e he munyu kaa nɔ ko nɛ e yi anɔkuale, zo be e hɛ mi, e náa nɔ he ninyɛ, nɛ e ji nɔmlɔ gbelɔ hulɔ.

Yi mi tomi kpakpa he je nɛ Baiblo ɔ wo wɔ ga nɛ nyɛɛ se nɛ ɔ nɛ:

“Nyɛɛ wo nɔmlɔ su he.”Kolose Bi 3:10.

‘Nyɛ ko ngɔ níhi kaa yi gbɔmi, loo sika tsu ní womi, loo bo nɛ ngɛ fɛu bumi kɛ dla nyɛ he. Se mohu, bɔ nɛ nyɛ ngɛ ha ngɛ nyɛ tsui mi ɔ, lɔ ɔ maa tsɔɔ nyɛ he fɛu ɔ nitsɛnitsɛ.’1 Petro 3:3, 4.

Tɔmi ko be he kaa wa maa suɔ kaa wa he nɛ pee fɛu mohu lɛɛ, se nɔ́ nɛ he hia wawɛɛ ji kaa wa ma ná su kpakpahi. Ke o ngɛ su kpakpahi ɔ, lɔ ɔ ma ha nɛ nihi a bua maa jɔ o he wawɛɛ pe ke o ngɛ nɔmlɔ tso mi he wami aloo o he ngɛ fɛu ngɛ nɔmlɔ tso mi! Zangmayo ko nɛ a tsɛɛ lɛ ke Phylicia a de ke: “Ke o he ngɛ fɛu ɔ, o muɔɔ nihi a hɛ, se ke o ngɛ su kpakpahi ɔ, lɔ ɔ nɛ nihi kɛ ma kai mo wawɛɛ.”

HYƐ BƆ NƐ O NƆMLƆ TSO Ɔ NGƐ HA

Anɛ behi fuu ɔ, o bua jɔɛ bɔ nɛ o nɔmlɔ tso ngɛ ha a he lo?

Anɛ e pee mo hyɛ kaa o ma ha nɛ a pee mo operation aloo o maa yu o he ngɛ niye ní komɛ a he konɛ o kɛ tsake bɔ nɛ o nɔmlɔ tso ɔ ngɛ ha a lo?

Kaa o ma nyɛ ma tsake nɔ́ ko ngɛ o nɔmlɔ tso ɔ he ɔ, jinɛ mɛni o ko tsake? (Moo hla nɔ́ nɛ o ko tsake.)

  • KAMI

  • KLEMI

  • YI BWƆMI

  • NƆMLƆ TSO

  • HƐ MI

  • O YUMI LOO O TSUMI

Ke o ha sane bimi kake kɛ enyɔ ɔ a heto ke ee, nɛ o hla níhi etɛ aloo nɔ nɛ hiɛ pe jã ngɛ sane bimi etɛne ɔ mi ɔ, lɛɛ mo susu munyu nɛ nyɛɛ se nɛ ɔ he: Eko ɔ, nihi fuu nɛ mo kaa bɔ nɛ o naa o he ɔ. E yi kaa o maa pee yeyeeye tsɔ ngɛ bɔ nɛ o nɔmlɔ tso ngɛ ha a he.1 Samuel 16:7.