Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Sanehi 10 Nɛ Nihewi Kɛ Yihewi biɔ ɔ A Hetohi

 SANE BIMI 4

Ke I Tɔ̃ ɔ, Mɛni Ma Pee Ngɛ He?

Ke I Tɔ̃ ɔ, Mɛni Ma Pee Ngɛ He?

NƆ́ HE JE NƐ E HE HIA

Ke o kplɛɛɔ o tɔmihi a nɔ ɔ, nihi maa bu mo, nɛ a ma he mo maa ye.

MƐNI O MAA PEE?

Mo susu si fɔfɔɛ nɛ ɔ he nɛ o hyɛ: Benɛ Tim kɛ e huɛmɛ ngɛ bɔɔlu fiae ɔ, Tim fia bɔɔlu ɔ nɛ e ya ywia lɔle ko hɛ mi ahuhuɛ.

Ke mo ji Tim ɔ, mɛni o maa pee?

MOO MLƐ NƐ O SUSU HE!

O MA NYƐ MAA PEE NÍHI ETƐ:

  1. A. O ma nyɛ maa tu fo.

  2. B. O ma nyɛ maa tsɛ̃ kɛ fɔ nɔ ko nɔ.

  3. D. O ma nyɛ ma ya bɔ nɔtsɛ ɔ amaniɛ, nɛ o de lɛ ke o maa wo nɔ́ nɛ o puɛ ɔ he hiɔ.

Eko ɔ, o maa pee kaa bɔ nɛ a tsɔɔ ngɛ A mi ɔ. Se be fɛɛ be ɔ, e maa hi kaa o maa kplɛɛ o tɔmihi a nɔ, o ywia nɔ ko lɔle hɛ mi ahuhuɛ jio, o pee nɔ́ kpa ko jio.

 YI MI TOMIHI ETƐ A HE JE NƐ E SA KAA O KPLƐƐ O TƆMIHI A NƆ

  1. E da blɔ kaa o maa pee jã.

    Baiblo ɔ de ke: “Wa suɔ nɛ waa kɛ anɔkuale yemi nɛ ba wa je mi ngɛ nɔ́ tsuaa nɔ́ mi.”Hebri Bi 13:18, NW.

  2. Behi fuu ɔ, ke nihi kplɛɛɔ a tɔmihi a nɔ ɔ, nihi ngɔɔ jamɛatsɛmɛ ɔmɛ a tɔmihi kɛ paa mɛ.

    Baiblo ɔ de ke: “Nɔ nɛ laa e yayamihi a nɔ ɔ, e yɛ nɔ. Se nɔ nɛ jajeɔ e he yayami, nɛ e kpaa yayami peemi ɔ, a maa na lɛ mɔbɔ.”Abɛ 28:13.

  3. Nɔ́ nɛ he hia pe kulaa a, ke nɔ ko kplɛɛɔ e tɔmihi a nɔ ɔ, Mawu bua jɔɔ e he.

    Baiblo ɔ de ke: ‘Yehowa sume lakpatsɛmɛ; nihi nɛ peeɔ nɔ́ nɛ da lɛ e kɛ bɔɔ.’Abɛ 3:32.

Yiheyo ko nɛ a tsɛɛ lɛ ke Karina nɛ e ye jeha 20 ɔ wo lɔle fo nɛ polisihi nu lɛ, nɛ a po hiɔ ha lɛ. E sume kaa e papaa nɛ le. Se Karina de ke: “Jeha kake se ɔ, ye papaa na womi nɛ polisi ɔmɛ ha mi kaa i wo lɔle fo ɔ. Ye papaa kɛ mi ye ngɛ he wawɛɛ!”

Anɛ Karina kase nɔ́ ko ngɛ mi lo? E de ke: “Ke o laa o tɔmihi a nɔ ɔ, e puɛɔ sane ɔ mohu. O maa na e mi nɔ́ pee se!”

BƆ NƐ O MA PLƐ KƐ KASE NÍ KƐ JE O TƆMIHI A MI HA

Baiblo ɔ de ke: “Wɔ tsuo wa pɔɔ tɔmi peemi babauu.” (Yakobo 3:2) Nɛ kaa bɔ nɛ wa na a, ke nɔ ko kplɛɛɔ e tɔmihi a nɔ mla a, lɔ ɔ tsɔɔ kaa nɔ ɔ baa e he si, nɛ e buɔ e he hulɔ.

Lɔ ɔ se ɔ, e sa nɛ o kase nɔ́ ko kɛ je o tɔmi ɔ mi. Yoyo ko nɛ a tsɛɛ lɛ ke Vera a de ke: “Be fɛɛ be nɛ ma tɔ̃ ɔ, i bɔɔ mɔde kaa ma kase nɔ́ ko ngɛ mi, konɛ be kpa a, ma ko tɔ̃ jamɛ a tɔmi ɔ hu.” Ha nɛ waa hyɛ bɔ nɛ o ma plɛ kɛ pee jã ha.

O ba o papaa baisikle nɛ o ya puɛ lɛ. Mɛni o maa pee?

  • O kɛ ma ya ma si dii, nɛ o maa hi sɔlee kaa e ko na.

  • O ma de o papaa nɔ́ tutuutu nɛ ya nɔ ɔ.

  • O maa bɔ o papaa amaniɛ, se o maa tsɛ̃ tɔmi ɔ kɛ fɔ nɔ kpa nɔ.

O kase we ní, lɔ ɔ he ɔ, o kpe ngɛ sukuu ka ko mi. Mɛni o maa pee?

  • O ma de ke ka a mi wa.

  • O maa kplɛɛ nɔ kaa ní nɛ o kase we ɔ he je nɛ o kpe ɔ nɛ.

  • O maa tsɛ̃ kɛ fɔ tsɔɔlɔ ɔ nɔ kaa lɛ nɛ e sume o sane.

Ke nɔ ko kɛ e juɛmi maa tɔmi ko nɛ e tɔ̃ be ko nɛ be ɔ nɔ ɔ, e ngɛ kaa lɔle kudɔlɔ ko nɛ e ngɛ ahuhuɛ nɛ e kɛ hyɛɛ e se ɔ mi hyɛe be mi nɛ lɔle ɔ ngɛ nyɛɛe

 Jehanɛ ɔ, mo susu si fɔfɔɛhi nɛ wa wo ta a he, nɛ o ngɔ lɛ kaa ngɛ (1) mi ɔ, mo ji o papaa, nɛ ngɛ (2) mi ɔ, mo ji tsɔɔlɔ ɔ. Ke o kplɛɛ o tɔmi ɔ nɔ amlɔ ɔ, kɛ o papaa kɛ tsɔɔlɔ ɔ maa na mo ha kɛɛ? Ke o laa o tɔmi ɔ nɔ ɔ, kɛ a maa na mo ha kɛɛ?

Amlɔ nɛ ɔ, mo susu tɔmi ko nɛ o tɔ̃ jeha nɛ be ɔ he, nɛ o ha sane bimihi nɛ nyɛɛ se nɛ ɔ a heto.

Mɛni tɔmi o tɔ̃? Kɛ o pee o ní ha kɛɛ?

  • I laa nɔ.

  • I tsɛ̃ kɛ fɔ nɔ ko nɔ.

  • I kplɛɛ nɔ amlɔ nɔuu.

Ke o kplɛɛ we o tɔmi ɔ nɔ ɔ, pee se ɔ, kɛ e pee mo ha kɛɛ?

  • Ye bua jɔ—i je mi slɔkee!

  • Ye he nile fiaa mi kpa—e sa nɛ i ko tu anɔkuale.

Mɛni ji blɔ kpakpa nɛ o ko gu nɔ kɛ tsu sane ɔ he ní?

Mɛni o kase ngɛ o tɔmi ɔ mi?

KƐ O SUSU KƐƐ?

Mɛni he je nɛ ni komɛ kplɛɛ we a tɔmihi a nɔ ɔ?

Ke o bɔɔ mɔde kaa o maa laa o tɔmihi a nɔ ɔ, kɛ nihi maa na mo ha kɛɛ? Ke o kplɛɛɔ o tɔmihi a nɔ ɔ, kɛ nihi maa na mo ha kɛɛ?Luka 16:10.