Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

“Nyɛɛ To Nyɛ He Ngɛ Mawu Suɔmi ɔ Mi”

 MI TSƆƆMI MUNYUHI

Mɛni Be E Sa Kaa A Ha Yi Nɔ, Nɛ Mɛni He Je?

Mɛni Be E Sa Kaa A Ha Yi Nɔ, Nɛ Mɛni He Je?

Mɛni be e sa kaa yo nɛ e ji Kristofo no ɔ nɛ ha e yi nɔ, nɛ mɛni he je? Ha nɛ wa susu nɔ́ nɛ Mawu mumi ɔ ha bɔfo Paulo ngma ngɛ sane nɛ ɔ he ɔ he nɛ waa hyɛ. E ha wɔ blɔ tsɔɔmihi nɛ he hia wɔ bɔ nɛ pee nɛ waa pee juɛmihi nɛ sa nɛ maa wo Mawu hɛ mi nyami. (1 Korinto Bi 11:3-16) Paulo tsɔɔ níhi etɛ nɛ sa kaa wa susu he: (1) níhi nɛ yo peeɔ nɛ biɔ kaa e ha e yi nɔ, (2) si himi mi nɛ sa kaa e pee jã ngɛ, kɛ (3) yi mi tomihi a he je nɛ e he hia kaa e ngɔ sisi tomi mlaa nɛ ɔ kɛ tsu ní ngɛ.

Níhi nɛ yo peeɔ. Paulo tsɔɔ níhi enyɔ: sɔlemi kɛ gbami. (Kuku 4, 5) Sɔlemi ji blɔ nɔ nɛ wa guu nɛ waa kɛ Yehowa tuɔ munyu ngɛ bumi mi. Mwɔnɛ ɔ, ke Kristofo no ko ngɛ Baiblo ɔ mi tsɔɔmihi a nya tsɔɔe ɔ, lɔ ɔ tsɔɔ kaa e ngɛ gbae. Anɛ Paulo ngɛ tsɔɔe kaa e sa nɛ yo nɛ ha e yi nɔ be tsuaa be nɛ e maa sɔle aloo ke e ngɛ Baiblo ɔ mi anɔkuale ko tsɔɔe lo? Dɛbi. Si himi mi nɛ yo ko maa sɔle, aloo e maa tsɔɔ ní ngɛ ɔ lɛ maa tsɔɔ kaa e ha e yi nɔ loo e ko ha e yi nɔ.

Si himi mi nɛ e sa kaa e ha e yi nɔ. Paulo munyu ɔ tsɔɔ si himihi enyɔ—weku ɔ mi kɛ asafo ɔ mi. E de ke: “Yo tsuaa yo ɔ, e yi ji nyumu. . . . Yo tsuaa yo nɛ ngɛ sɔlee, aloo e ngɛ Mawu sɛ gbi ɔ fiɛɛe, nɛ́ e kɛ nɔ́ hɛ e yi nɔ ɔ, e huno nɛ ji e yi ɔ hɛ mi si e ngɛ puee ɔ nɛ.” (Kuku 3, 5) Ngɛ weku blɔ nya tomi  mi ɔ, nyumu ɔ ji nɔ nɛ Yehowa hla kaa yo ɔ yi. Ke yo ɔ bui blɔ nya nɛ e huno ɔ hɛɛ ɔ, nɛ e ngɔ nyumu ɔ blɔ nya ní tsumi nɛ Yehowa ha lɛ ngɛ e dɛ ɔ, e pue e huno ɔ hɛ mi si. Kaa nɔ hyɛmi nɔ́ ɔ, ke e he hia kaa e pee Baiblo mi ní kasemi nɛ e huno ɔ ngɛ lejɛ ɔ, e sa nɛ e ha e yi nɔ kɛ tsɔɔ bumi nɛ e ngɛ ha e huno ɔ. Akɛnɛ nyumu ɔ ji weku ɔ yi he je ɔ, a baptisi lɛ jio, a baptisii we lɛ jio ɔ, e sa nɛ yo ɔ nɛ pee jã. * Jã kɛ̃ nɛ ke e maa sɔle aloo e maa tsɔɔ ní, nɛ e binyumu wayoo nɛ a baptisi lɛ ngɛ lejɛ ɔ, e sa nɛ e ha e yi nɔ. Enɛ ɔ tsɔɔ we kaa e bi ɔ ji weku ɔ yi, se mohu, ngɛ blɔ nya nɛ a kɛ ha nyumuhi nɛ a baptisi mɛ ngɛ Kristofohi asafo ɔ mi ɔ he je.

Ngɛ asafo ɔ blɔ fa mi ɔ, Paulo de ke: “Se ke nɔ ko susuɔ kaa nɔ́ nɛ i de ngɛ nɔ́ nɛ ɔ he ɔ be mi ɔ, nɔ́ nɛ ma de kɛkɛ ji kaa i kɛ Mawu asafo ɔ, wɔɔ lɛɛ wa be jami blɔ nya tomi kpa ko ngɛ enɛ ɔ se.” (kuku 16) Ngɛ Kristofohi asafo ɔ mi ɔ, nyumuhi nɛ a baptisi mɛ pɛ ji nihi nɛ a haa mɛ blɔ nya ní tsumi. (1 Timoteo 2:11-14; Hebri Bi 13:17) Nyumuhi pɛ ji nihi nɛ sɔmɔɔ kaa asafo mi nikɔtɔmahi kɛ asafo mi sɔmɔli. Mawu ha mɛ he blɔ kaa a hyɛ e to ɔmɛ a nɔ. (Bɔfo Ɔmɛ A Ní Tsumi 20:28) Se be komɛ ɔ, si himi komɛ biɔ kaa yo nɛ e ji Kristofo no nɛ tsu blɔ nya ní tsumi nɛ nyumu nɛ a baptisi lɛ tsuɔ ɔ. Eko ɔ, e maa ba kaa e hyɛ fiɛɛmi yami kpe nɔ ke nyumu nɛ a baptisi lɛ nɛ sa be nɛ maa hyɛ nɔ. Aloo eko ɔ, e maa ba kaa e hyɛ Baiblo mi ní kasemi ko nɔ benɛ e kɛ nyumu nɛ a baptisi lɛ nyɛɛ ngɛ fiɛɛmi mi. * Akɛnɛ ní peemi nɛ ɔmɛ piɛɛ asafo ɔ mi ní tsumi ɔmɛ a he he je ɔ, e sa nɛ e ha e yi nɔ kɛ tsɔɔ kaa e ngɛ ní tsumi nɛ sa kaa nyumu tsuɔ ɔ tsue.

Se jami mi ní tsumi fuu ngɛ nɛ ke yo ngɛ tsue ɔ, e he hia we kaa e ha e yi nɔ. Kaa nɔ hyɛmi nɔ́ ɔ, e he hia we kaa e ha e yi nɔ loko e ha munyu heto ngɛ Kristofohi a kpehi a sisi, aloo ke e kɛ e huno loo nyɛminyumu ko nɛ a baptisi lɛ ngɛ  fiɛɛe ngɛ wehi a mi, aloo ke e kɛ e bimɛ nɛ a baptisii we mɛ ngɛ ní kasee loo a ngɛ sɔlee. Se ke nyɛmiyo ko yi mi ngɛ lɛ pee enyɔɔnyɔ kaa e ha e yi nɔ loo e ko ha e yi nɔ ngɛ si fɔfɔɛ ko mi ɔ, e ma nyɛ ma hla níhi a mi ngɛ asafo womihi a mi. * Nɛ kaa bɔ nɛ wa na ngɛ foni ɔ mi ɔ, tɔmi ko be he kaa e maa ha e yi nɔ ke e yi mi tɛ̃ lɛ, nɛ e he nile hu ngɛ lɛ dee ke e pee jã.

Yi mi tomihi a he je. Yi mi tomi enyɔ a he je nɛ e sa kaa yo nɛ e ji Kristofo no nɛ ha e yi nɔ ɔ ngɛ 1 Korinto Bi 11:10. E de ke: “Enɛ ɔ he ɔ, e sa kaa yo nɛ ha e yi nɔ kaa okadi ha hiɔwe bɔfo ɔmɛ kɛ tsɔɔ kaa a ha lɛ he blɔ.” Kekleekle ɔ, mo kadi munyu nɛ ji ‘okadi kaa a ha lɛ he blɔ’ ɔ. Yo ɔ yi nɔ nɛ e maa ha a tsɔɔ kaa e kplɛɛ blɔ nya nɛ Yehowa ha nyumuhi nɛ a baptisi mɛ ngɛ asafo ɔ mi ɔ nɔ. Enɛ ɔ he ɔ, e jeɔ suɔmi kɛ anɔkuale yemi kpo haa Yehowa Mawu. Wa naa yi mi tomi enyɔne ɔ ngɛ munyu nɛ ji “ngɛ hiɔwe bɔfo ɔmɛ a he” ɔ mi. Ke yo ha e yi nɔ ɔ, kɛ e peeɔ bɔfohi nɛ ngɛ he wami ɔ ha kɛɛ?

Bɔfo ɔmɛ a bua jɔɔ ke a na kaa a ngɔ Mawu yi yemi blɔ nya a kɛ ngɛ ní tsue ngɛ Yehowa blɔ nya tomi ɔ tsuo mi ngɛ hiɔwe kɛ zugba a nɔ. A kaseɔ ní kɛ jeɔ nɔ hyɛmi níhi nɛ adesahi nɛ yi mluku ɔ peeɔ ngɛ enɛ ɔ blɔ fa mi ɔ mi hulɔ. E sa nɛ mɛ hu a ba a he si ha Yehowa blɔ nya tomi ɔ. Be ko nɛ be ɔ, hiɔwe bɔfohi fuu nyɛ we nɛ a pee jã. (Yuda 6) Amlɔ nɛ ɔ, eko ɔ, bɔfo ɔmɛ ma yɔse kaa Kristofo no yo ko ngɛ níhi a si kpami fuu, nɛ e juɛmi nya hu wa pe nyumu ko nɛ a baptisi lɛ ngɛ asafo ɔ mi. Se kɛ̃ ɔ, yo ɔ baa e he si kɛ haa blɔ nya nɛ  nyumu ɔ hɛɛ ɔ. Be komɛ ɔ, yo ɔ ji Kristofo no nɛ́ a pɔ lɛ nu nɛ maa piɛɛ nihi nɛ a kɛ Kristo maa ye matsɛ hwɔɔ se ɔ he. Nyagbenyagbe ɔ, yo nɛ ɔ ma ná he blɔ nɛ nɔ kuɔ po pe he blɔ nɛ bɔfo ɔmɛ ngɛ ɔ. E kɛ Kristo ma ya ye matsɛ ngɛ hiɔwe. Enɛ ɔ ji nɔ hyɛmi nɔ́ kpakpa nɛ bɔfo ɔmɛ ngɛ nae amlɔ nɛ ɔ! Niinɛ, e ji he blɔ ngua nɛ nyɛmimɛ yihi tsuo ná kaa a maa pee tue bumi kɛ gu anɔkuale yemi kɛ he si bami kpo nɛ a ma je ɔ nɔ, ejakaa bɔfohi anɔkualetsɛmɛ ayɔhi abɔ ngɛ mɛ hyɛe!

^ kk. 3 E sɛ nɛ yogbayo ko nɛ e ji Kristofo no woɔ e gbi nɔ kɛ sɔleɔ ngɛ e huno nɛ e ji Kristofo no hɛ mi, ja e huno ɔ be he wami nɛ e nyɛ we munyu tumi.

^ kk. 1 Ke nyɛmiyo ko kɛ nyumu ko nɛ e ji fiɛɛlɔ nɛ a baptisii we lɛ lolo, nɛ tsa pi e huno ya fiɛɛmi nɛ e ba kaa nyɛmiyo ɔ maa hyɛ Baiblo mi ní kasemi ko nɔ ɔ, e he hia we nɛ e ha e yi nɔ.

^ kk. 2 Ke o ngɛ hlae nɛ o le níhi fuu ngɛ sane nɛ ɔ he ɔ, wa kpa mo pɛɛ nɛ o hyɛ February 15, 2015 Blɛfo gbi Hwɔɔmi Mɔ ɔ, ba fa 30; July 15, 2002 Blɛfo gbi Hwɔɔmi Mɔ ɔ, ba fa 26-27; kɛ February 15, 1977 Blɛfo gbi Hwɔɔmi Mɔ ɔ, ba fa 125-128.