Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

“Nyɛɛ To Nyɛ He Ngɛ Mawu Suɔmi ɔ Mi”

 YI 2

Kɛ O Maa Pee Kɛ Hɛɛ He Nile Kpakpa Kɛɛ?

Kɛ O Maa Pee Kɛ Hɛɛ He Nile Kpakpa Kɛɛ?

“Nyɛɛ hi si saminya, nɛ nyɛ he nile ko bu nyɛ fɔ.”1 PETRO 3:16.

1, 2. Mɛni he je nɛ kɔmpas ji klama nɛ he hia saminya a, nɛ mɛni blɔ nɔ a ma nyɛ maa ngɔ kɛ to he nile he?

MELE kudɔlɔ ko ngɛ e mele kudɔe ngɛ wo gbajaa ko nɛ oslɔke ngɛ kue ngɛ nɔ ɔ nɔ kɛ yaa; blɔ hialɔ ko ngɛ nyɛɛe ngɛ nga kplanaa ko nɔ kɛ yaa; kɔɔhiɔ mi lɛ kudɔlɔ ko ngɛ e kɔɔhiɔ mi lɛ kudɔe kɛ bee ngɛ bɔku ɔmɛ a mi. Anɛ o le nɔ́ nɛ ni etɛ nɛ ɔmɛ tsuo hɛɛ lo? Eko ɔ, a ti nɔ tsuaa nɔ maa sɛ haomi mi ke e hɛɛ we klama nɛ tsɔɔ nɔ blɔ nɛ a tsɛɛ ke kɔmpas ɔ.

2 Kɔmpas ji klama wayoo ko nɛ maginɛti nɛ ji he wami nɛ gblaa nɔ́ ngɛ mi, nɛ e nine tsɔɔ yiti je be tsuaa be. Ke kɔmpas ɔ ngɛ ní tsue saminya nɛ a ngɔ zugba he foni nɛ da kɛ piɛɛ he ɔ, e ma nyɛ ma he nɔ yi wami. Ngɛ blɔ ko nɔ ɔ, a ma nyɛ maa ngɔ he nile nɛ ji nike ní  nɛ he jua wa nɛ Yehowa kɛ ha wɔ ɔ kɛ to klama nɛ ɔ he. (Yakobo 1:17) Kaa wa be he nile ɔ, jinɛ wa be blɔ tsɔɔlɔ ko kulaa. Ke waa kɛ wa he nile tsu ní saminya a, e ma nyɛ maa ye bua wɔ nɛ wa maa nyɛɛ blɔ kpakpa nɔ ngɛ si himi mi. Enɛ ɔ he je ɔ, ha wa susu nɔ́ nɛ he nile ji kɛ bɔ nɛ e tsuɔ ní ha a he nɛ waa hyɛ. Kɛkɛ ɔ, wa ma nyɛ ma susu sane oti nɛ ɔmɛ a he: (1) Nɔ́ nɛ wa maa pee kɛ tsɔse wa he nile, (2) nɔ́ he je nɛ e sa kaa wa susu ni kpahi a he nile he, kɛ (3) se nami nɛ ngɛ he nile kpakpa nɛ wa maa hɛɛ ɔ he.

NƆ́ NƐ HE NILE JI, KƐ BƆ NƐ E TSUƆ NÍ HA

3. Mɛni ji Hela munyungu nɛ a tsɔɔ sisi ke “he nile” ɔ sisi tutuutu, nɛ mɛni ji nɔ́ klɛdɛɛ nɛ e tsuɔ ngɛ adesahi pɛ a mi?

3 Ngɛ Baiblo ɔ mi ɔ, Hela munyungu nɛ a tsɔɔ sisi ke “he nile” ɔ tsɔɔ “nɔ́ nɛ nɔ nitsɛ le.” Ngɛ zugba nɛ ɔ nɔ adebɔ níhi tsuo a kpɛti ɔ, wɔ nimli adesahi pɛ lɛ Mawu ha wɔ he nile. Enɛ ɔ he ɔ, wa ma nyɛ maa kpa wa mi nɛ waa hyɛ kaa wa je mi bami sa loo e sɛ. Wa he nile ma nyɛ maa ye wa ní peepeehi, wa suhi, kɛ wa juɛmi peemihi a he odase kaa a da, loo e kojo wɔ. E ma nyɛ ma kudɔ wɔ konɛ waa pee juɛmi kpakpa loo e bɔ wɔ kɔkɔ ngɛ juɛmi yaya peemi he. Pee se ɔ, e ma nyɛ maa wo wa bua ngɛ juɛmi kpakpa nɛ wa pee ɔ he loo e hao wɔ ngɛ nɔ́ yayami nɛ wa pee ɔ he.

4, 5. (a) Kɛ wa peeɔ kɛ leɔ kaa a ha Adam kɛ Hawa he nile kɛɛ, nɛ mɛni ba benɛ a kua Mawu mlaa a? (b) Mɛni nɔ hyɛmi níhi tsɔɔ kaa nyumuhi anɔkualetsɛmɛ nɛ hi si blema a bu a he nile tue?

4 Sisije nɛ a bɔ Adam kɛ Hawa a, a ha mɛ he nile. A ní peepee tsɔɔ kaa a ngɛ he nile. Enɛ ɔ je kpo heii ngɛ zo nɛ gbe mɛ benɛ a pee yayami ɔ mi. (1 Mose 3:7, 8) Se aywilɛho sane ji kaa a he nile nɛ hao mɛ ɔ he ya bɛ se nami ha mɛ jamɛ a be ɔ mi. A je blɔ nɛ a kua Mawu mlaa a. Lɔ ɔ he ɔ, a hɛ ngɛ he nɛ a tsɔ atua, nɛ a ba plɛ  Yehowa Mawu he nyɛli. Akɛnɛ a ji adesahi nɛ a ye mluku he je ɔ, a le kaa nɔ́ nɛ a pee ɔ dɛ, nɛ a be nyɛe maa kpale kɛ ba Mawu ngɔ hu.

5 Adesahi fuu nɛ yi mluku ɔ pee we a ní kaa Adam kɛ Hawa. A bu a he nile tue. Kaa nɔ hyɛmi nɔ́ ɔ, anɔkualetsɛ Hiob nyɛ nɛ e de ke: “Nɔ́ nɛ i ngɛ dee ke i pee we nɔ́ ko nɛ dɛ blɔ ɔ, jamɛ a munyu kake too ɔ i ngɛ tue; ye he nile bui mi fɔ ligbi ko ligbi ko.” (Hiob 27:6) Hiob bu e he nile tue, nɛ e ha lɔ ɔ kudɔ e ní peepee kɛ e juɛmi peemihi. Enɛ ɔ he je nɛ e nyɛ nɛ e de kɛ bua jɔmi ke e he nile bui lɛ fɔ loo e hɛwi lɛ ɔ nɛ. Moo to slɔɔto nɛ ngɛ Hiob kɛ David a kpɛti ɔ he hɛ. Saul ji matsɛ nɛ Yehowa pɔ lɛ nu. Be ko ɔ, David pee nɔ́ ko kɛ tsɔɔ kaa e bui Saul. Enɛ ɔ ha nɛ “David he nile bɔni lɛ haomi.” (1 Samuel 24:5) David kase ní ngɛ e he nile nɛ hao lɛ ɔ mi, nɛ e pee we jã hu.

6. Mɛni tsɔɔ kaa a ha adesahi tsuo nike ní nɛ ji he nile?

6 Anɛ Yehowa sɔmɔli pɛ lɛ a ngɛ nike ní nɛ ji he nile lo? Mo susu bɔfo Paulo munyu nɛ je Mawu ngɔ ɔ he nɛ o hyɛ. E ke: “Ke ma je li ɔmɛ nɛ yi Mose mlaa a nɔ ngɛ a fɔmi su ɔ nya a tsuɔ mlaa a nya ní ɔ, a peeɔ mlaa ha mɛ nitsɛmɛ a he; pohu mlaa ko yi a nɔ. A ní peepee tsɔɔ kaa nɔ́ nɛ mlaa a ngɛ hlae kaa a pee ɔ, Mawu ngɔ wo a tsui mi momo; nɛ a he nile hu yeɔ enɛ ɔ he odase. Ejakaa be komɛ ɔ, a susumi deɔ mɛ ke nɔ́ nɛ a ngɛ pee ɔ dɛ, nɛ be komɛ hu e deɔ mɛ ke e da.” (Roma Bi 2:14, 15) Nihi nɛ li Yehowa mlaa amɛ a he nɔ́ ko tete po a he nile ma nyɛ ma ha nɛ a pee níhi nɛ kɛ Mawu sisi tomi mlaa amɛ kɔ.

7. Mɛni he je be komɛ ɔ he nile tsɔɔ we nɔ blɔ nɛ da a?

7 Se kɛ̃ ɔ, be komɛ ngɛ nɛ wa he nile ɔ tsɔɔ we wɔ blɔ nɛ da. Mɛni he je? Ke a ngɔ kɔmpas kɛ fɔ dade nɛ maginɛti ngɛ mi ɔ kasa nya a, kɔmpas nine ɔ maa tsɔɔ  he kpa, pi yiti je. Nɛ ke zugba he foni piɛɛ we kɔmpas he ɔ, se nami kpakpa ko be he bae. Jã nɔuu nɛ ke wa tsui nya ní peemi ná wa nɔ he wami ɔ, wa he nile ɔ be wɔ blɔ kpakpa tsɔɔe. Nɛ ke waa kɛ Mawu Munyu ɔ kudɔɔ we wa he nile saminya a, e be hae nɛ waa le kpakpa kɛ yayami mi tso ngɛ níhi nɛ a he hia fuu a mi. Ngɛ anɔkuale mi ɔ, ja wa ha Yehowa mumi klɔuklɔu ɔ tsɔɔ wɔ blɔ loko wa he nile ɔ ma tsu ní saminya. Paulo ngma ke: “Ye he nile maa nɔ mi ngɛ mumi klɔuklɔu ɔ mi kaa nɔ́ nɛ i ngɛ dee ɔ, i yi lakpa.” (Roma Bi 9:1) Se kɛ wa ma plɛ kɛ le kaa Yehowa mumi klɔuklɔu ɔ ngɛ wa he nile kudɔe ha kɛɛ? Ja wa tsɔse lɛ.

BƆ NƐ WA MA PLƐ KƐ TSƆSE WA HE NILE HA

8. (a) Mɛni blɔ nɔ wa tsui ma nyɛ ma ná wa he nile nɔ he wami ngɛ, nɛ mɛni e sa kaa e hia wɔ titli ngɛ wa juɛmi peemihi a mi? (b) Mɛni he je nɛ pi be tsuaa be nɛ he nile kpakpa pɛ kɛkɛ he hia Kristofo no ko ɔ? (Hyɛ sisi ningma.)

8 Ke e sa kaa o da o he nile nɔ kɛ mwɔ o yi mi kpɔ ngɛ nɔ́ ko he ɔ, kɛ o peeɔ o ní ha kɛɛ? Ngɛ ni komɛ a blɔ fa mi ɔ, a susumihi kɛ a he numihi a nɔ nɛ a daa kɛ mwɔɔ a yi mi kpɔ. Nɛ eko ɔ, lɔ ɔ se ɔ, a ma de ke, “E hɛwi ye he nile.” Nɔ nitsɛ e suɔmi nya ní peemi nɛ mi wa wawɛɛ ɔ nyɛɔ náa he nile ɔ nɔ he wami. Baiblo ɔ de ke: “Mɛnɔ maa le nɔmlɔ adesa tsui mi? E nɔ nɔ sisilɔ ko be ɔ, e hiɔ ɔ hu be tsaba.” (Yeremia 17:9) Enɛ ɔ he ɔ, e sɛ kaa wa suɔmi nya ní peemi nɛ pee nɔ́ titli ha wɔ. Mohu ɔ, e sa kaa waa pee nɔ́ nɛ sa Yehowa Mawu hɛ mi kekle. *

9. Mɛni ji Mawu gbeye yemi, nɛ mɛni blɔ nɔ e ma nyɛ maa sa wa he nile he ngɛ?

 9 Ngɛ anɔkuale mi ɔ, ke wa da wa he nile nɛ wa tsɔse lɛ ɔ nɔ kɛ pee juɛmi ɔ, lɔ ɔ maa tsɔɔ kaa wa yeɔ Mawu gbeye, nɛ wa pee we wɔ nitsɛmɛ wa suɔmi nya ní. Kaa nɔ hyɛmi nɔ́ ɔ, Nehemia ji amlaalo nane mi dalɔ nɛ e yeɔ anɔkuale. Jinɛ e ngɛ he blɔ kaa Yerusalem ma mi bimɛ ɔmɛ woɔ to ha lɛ. Se e ha we nɛ a pee jã. Mɛni he je? Ejakaa e sume nɛ e wa Mawu we bi ɔmɛ yi mi, nɛ́ Yehowa mi mi nɛ ba fu lɛ. E de ke: “I pee we jã; ejakaa i yeɔ Mawu gbeye.” (Nehemia 5:15) E he hia nɛ waa je wa tsui mi nɛ waa ye Mawu gbeye. Lɔ ɔ ma ha nɛ wa be wa hiɔwe Tsɛ ɔ nɔ tɔ̃e. Gbeye yemi kpakpa nɛ ɔ maa wo wɔ gɛjɛmi nɛ wa ma hla blɔ tsɔɔmi kɛ je Mawu Munyu ɔ mi ngɛ wa juɛmi peemihi a mi.

10, 11. Mɛni ji Baiblo sisi tomi mlaahi nɛ kɔɔ dã numi he, nɛ mɛni e sa kaa waa pee konɛ Mawu nɛ tsɔɔ wɔ bɔ nɛ waa kɛ ma tsu ní ha?

10 Kaa nɔ hyɛmi nɔ́ ɔ, mo susu dã numi he nɛ o hyɛ. Juɛmi nɛ wa ti nihi fuu peeɔ ngɛ he nya buamihi a sisi ji, Ma nu dã loo ma ko nu? E sa nɛ wa tsɔse wa he kekle. Mɛni ji Baiblo sisi tomi mlaahi nɛ kɔɔ dã numi he? Baiblo ɔ gui dã bɔɔ numi. Baiblo ɔ jeɔ Yehowa yi ngɛ wai nɛ e kɛ dloo wɔ ɔ he je. (La 104:14, 15) Se Baiblo ɔ gu dã fuu numi kɛ e he hoo peemi. (Luka 21:34; Roma Bi 13:13) Jehanɛ se ɔ, e bu dã demi ngɔ si yayami nguanguahi kaa ajuama bɔmi nɔ. *1 Korinto Bi 6:9, 10.

11 Kristofo no ngɔɔ sisi tomi mlaahi kaa jã kɛ tsɔseɔ e he nile nɛ lɔ ɔ haa e he nile ɔ hii hɛngmengmle. Enɛ ɔ he ɔ, ke e ba kaa wa maa nu dã ngɛ he nya buami he ko ɔ, e sa kaa wa bi wa he sane nɛ ɔmɛ: ‘Mɛni he  nya buami a ngɛ pee ɔ? Anɛ basabasa peemi ma nyɛ maa te si lo? Mɛni ji níhi nɛ i nyaa he? Ke i nui dã a, i nyɛ we si himi lo? Anɛ i nuɔ dã kɛ tsakeɔ ye ní peepee lo? Anɛ ma nyɛ ma ye ye he nɔ nɛ i be fuu nue lo?’ Benɛ wa ngɛ Baiblo sisi tomi mlaahi kɛ sane bimihi nɛ a tleɔ si ɔ a he susue ɔ, e sa kaa waa sɔle kɛ bi Yehowa blɔ tsɔɔmi. (Kane La 139:23, 24.) Enɛ ɔ nɛ wa maa pee ɔ maa tsɔɔ kaa wa ngɛ Yehowa bie nɛ e ngɔ e mumi klɔuklɔu ɔ kɛ tsɔɔ wɔ blɔ. Lɔ ɔ hu tsɔɔ kaa wa ngɛ wa he nile ɔ tsɔsee nɛ e kɛ Mawu sisi tomi mlaahi nɛ kɔ. Se nɔ́ kpa ko hu ngɛ nɛ sa kaa wa susu he ke wa ngɛ juɛmi ko pee.

MƐNI HE JE E SA KAA WA SUSU NI KPAHI A HE NILE HE?

O he nile nɛ o ngɔ Baiblo ɔ kɛ tsɔse ɔ maa ye bua mo nɛ o pee juɛmi kaa o maa nu dã loo o be nue

12, 13. Mɛni he je Kristofohi a he nile ngɛ ekpaekpa a, nɛ kɛ e sa kaa waa pee wa ní ngɛ he ha kɛɛ?

12 Eko ɔ, e maa pee mo nyakpɛ kaa o maa na kaa bɔ nɛ Kristofohi kɛ a he nile tsuɔ ní ha a ngɛ ekpaekpa. Nɔ ko ma nyɛ maa na tɔmi ngɛ ní peepee ko loo kusumi ko he, se nɔ kpa ko lɛɛ e bua maa jɔ jamɛ a ní peepee ɔ loo kusumi ɔ he, nɛ e be tɔmi ko nae ngɛ he. Kaa nɔ hyɛmi nɔ́ ɔ, nɔ ko bua maa jɔ he kaa gbɔkuɛ ko ɔ, e kɛ e huɛmɛ ma bla kɛ nu dã kɛ jɔɔ a he. Nɔ ko hu ngɛ nɛ e sume lɛ jã. Mɛni he je nɛ e slo nɔ tsuaa nɔ susumi ngɛ níhi kaa jã a a he ɔ, nɛ kɛ e sa kaa enɛ ɔ nɛ sa wa juɛmi peemihi a he ha kɛɛ?

13 E slo bɔ nɛ nihi ngɛ ha ngɛ yi mi tomihi fuu a he je. E slo bɔ nɛ a tsɔse nɔ tsuaa nɔ ha. Ni komɛ le a gbɔjɔmi, kɛ dengme nɛ a gbo loko a nyɛ ye nɔ. Ni komɛ po ngɛ nɛ eko ɔ, a nyɛ we nɛ a ye nɔ kɛ pi si. (1 Matsɛmɛ 8:38, 39) Nihi kaa kikɛ a he nile maa hao mɛ ngɛ dã numi he. Ke nɔ ko nɛ ngɛ jã ba slaa mo nɛ o ha lɛ dã a,  e he nile ma nyɛ ma de lɛ ke e ko nu. Anɛ o mi mi ma fu lɛ lo? Anɛ o maa nyɛ e nɔ lo? Dɛbi. O le yi mi tomi he je nɛ e pee jã jio, o li jio, e sa kaa nyɛmi suɔmi nɛ ha nɛ o nu lɛ sisi. Eko ɔ, lɛ nɔ kake e sane.

14, 15. Mɛni he je Kristofohi nɛ a hi si ngɛ kaseli ɔmɛ a be ɔ mi ɔ a he nile ngɛ ekpaekpa a, nɛ mɛni ga Paulo wo mɛ?

14 Bɔfo Paulo na kaa Kristofohi nɛ a hi si ngɛ kaseli ɔmɛ a be ɔ mi ɔ, a he nile ngɛ ekpaekpa. Kristo se nyɛɛli komɛ a he nile hao mɛ ngɛ wɔ nya lohi a yemi he ngɛ jamɛ a be ɔ mi. (1 Korinto Bi 10:25) Paulo he nile hɛwi lɛ ngɛ lo nɛ ɔmɛ nɛ a juaa ngɛ jua mi ɔ he. Ngɛ e blɔ fa mi ɔ, wami be amagahi a mi, nɛ niye ní nɛ je Yehowa ngɔ be nyɛe maa pee amagahi a nɔ́ kɔkɔɔkɔ. Se Paulo na kaa ni komɛ hɛɛ juɛmi kpa ngɛ sane nɛ ɔ he. Eko ɔ, ni komɛ ja wɔ hluu loko a ba pee Kristofohi. Ngɛ a blɔ fa mi ɔ, a sume níhi tsuo nɛ a kɛ wɔ jami ngɛ tsakpa be ko nɛ be ɔ kulaa. Kɛ Paulo tsu sane ɔ he ní ha kɛɛ?

15 Paulo de ke: “Wɔ nihi nɛ wa hemi kɛ yemi mi wa a, e sa kaa waa ye bua ni nɛmɛ nɛ a hemi kɛ yemi mi wɛ ɔ. Wa ko susu wɔ nitsɛmɛ pɛ wa he. Ejakaa Kristo hu pee we lɛ nitsɛ e suɔmi nya ní.” (Roma Bi 15:1, 3) Paulo tsɔɔ nya kaa wa fo wa nyɛmimɛ a nɔ́ mi kekle kaa bɔ nɛ Kristo pee ɔ. Benɛ Paulo ngɛ sane kpa ko nɛ ngɛ kaa enɛ ɔ he munyu tue ɔ, e tsɔɔ kaa e be lo yee bɔ nɛ pee nɛ e ko tɔ̃tɔ̃ nɔ ko nɛ Kristo ngɔ e wami kɛ ha ngɛ e he ɔ nane.Kane 1 Korinto Bi 8:13; 10:23, 24, 31-33.

16. Mɛni he je nɛ e sɛ kaa nihi nɛ a he nile tsiɔ a nya ngɛ ni komɛ a he ɔ kojoɔ nihi nɛ a he nile ngɛ ekpa a?

16 Se e sɛ kaa nihi nɛ a he nile tsiɔ a nya ngɛ ní komɛ a he ɔ tuɔ munyu kɛ siɔ ni kpahi, nɛ́ a fi a nɔ kaa a kɛ mɛ nɛ ná susumi kake. (Kane Roma Bi 14:10.) Ngɛ  anɔkuale mi ɔ, e sa kaa waa ngɔ wa he nile ɔ kɛ kojo wɔ nitsɛmɛ wa he se pi ni kpahi. Mo kai munyu nɛ Yesu tu ɔ. E de ke: “Nyɛ kó kojo nihi, konɛ Mawu hu ko kojo nyɛ.” (Mateo 7:1) E sɛ kaa nihi nɛ ngɛ asafo ɔ mi jeɔ atsinyɛ ngɛ sanehi nɛ ma bi nɛ nɔ nitsɛ maa ngɔ e he nile kɛ tsu he ní ɔ a he. Mohu ɔ, e sa kaa waa di suɔmi kɛ kake peemi se nɛ waa wo wa sibi he wami, konɛ wa ko wo nɔ ko kɔni mi nyu.Roma Bi 14:19.

SE NAMI NƐ NGƐ HE NILE KPAKPA NƐ WA MAA HƐƐ Ɔ HE

He nile kpakpa ma nyɛ maa tsɔɔ wɔ blɔ ngɛ je mi, nɛ wa bua maa jɔ, nɛ wa tue mi hu maa jɔ wɔ

17. Kɛ nihi fuu a he nile pee ha kɛɛ mwɔnɛ ɔ?

17 Bɔfo Petro ngma ke: “Nyɛɛ hi si saminya, nɛ nyɛ he nile ko bu nyɛ fɔ.” (1 Petro 3:16) E ji jɔɔmi agbo  kaa wa ma ná he nile kpakpa ngɛ Yehowa Mawu hɛ mi. Mwɔnɛ ɔ, nihi fuu be he nile kpakpa. Paulo tu a he munyu kaa “a he nile gbo pɛsɛpɛsɛ” kaa bɔ nɛ ke a kɛ dade nɛ dɔ la wawɛɛ sã nɔ ko nɛ pa a gbo nɛ e hi ɔ. (1 Timoteo 4:2) Ke dade nɛ dɔ la sã nɔ ko nɛ pa a gbo ɔ, e peeɔ pa doku, nɛ jamɛ a pa doku ɔ nui nɔ́ he hu. Nihi fuu a he nile gbo. A he nile ɔ nui nɔ́ he hu, enɛ ɔ he ɔ, e bɔɛ mɛ kɔkɔ ngɛ a ní peepeehi a he hu, nɛ a zo tɔ ywia. Mwɔnɛ ɔ, nihi fuu bui a yi mi nɛ kojoɔ mɛ ɔ tete.

18, 19. (a) Mɛni se nami ngɛ wa yi mi nɛ kojoɔ wɔ ɔ he? (b) Mɛni wa ma nyɛ maa pee ke wa he nile ngɛ wɔ fɔ bue kpamisa ngɛ yayami nɛ wa pee nɛ wa tsake wa tsui ngɛ he ɔ he?

18 Niinɛ, ke wa he nile ngɛ wɔ fɔ bue ngɛ nɔ ko he ɔ, lɔ ɔ haa wa leɔ kaa wa tɔ̃. Ke nɔ ko nɛ pee yayami yi mi  kojo lɛ nɛ e pia e he ɔ, ke e yayami ɔ kle kaa mɛni po ɔ, a ma nyɛ ma kɛ pa lɛ. Kaa nɔ hyɛmi nɔ́ ɔ, Matsɛ David yi mi kojo lɛ ngɛ yayami agbo ko nɛ e pee ɔ he, se a kɛ pa lɛ, titli ngɛ e tsui mi nɛ e je kɛ pia e he ɔ he je. Akɛnɛ yayami nɛ e pee ɔ dɔ lɛ, nɛ e mwɔ e yi mi kpɔ kaa kɛ je lɔ ɔ se ɔ, e maa ye Yehowa mlaa amɛ a nɔ he je ɔ, lɔ ɔ ha e na kaa Yehowa ‘hi nɛ e kɛ yayami paa.’ (La 51:1-19; 86:5) Se ke wa yi mi ngɛ wɔ kojoe kpamisa ngɛ yayami ko nɛ wa pia wa he ngɛ he nɛ a kɛ pa wɔ he ɔ hu nɛɛ?

19 Be komɛ ɔ, he nile nyɛɔ kojoɔ nɔ pe nine. Ke nɔ ko pee yayami nɛ e pia e he, nɛ e kpa peemi momoomo po ɔ, nɔ ɔ he nile yaa nɔ nɛ e haoɔ lɛ. Ke e ba jã a, e sa nɛ waa le kaa Yehowa kle pe wa tsui ɔ nɛ ngɛ wɔ fɔ bue ɔ. Kaa bɔ nɛ wa woɔ nihi he wami kaa a pee ɔ, e sa nɛ wɔ hu wa he ye, nɛ waa kplɛɛ nɔ kaa Mawu ngɛ suɔmi, nɛ e kɛ yayami paa nɔ. (Kane 1 Yohane 3:19, 20.) Se he nile kpakpa haa nɔ tue mi jɔmi, bua jɔmi kɛ he jɔmi nɛ pɔɛ he ngɛ je ɔ mi mwɔnɛ ɔ. Nihi babauu nɛ a pee yayami nɛ ngɛ hɛdɔ be ko ɔ, amlɔ nɛ ɔ, a ná tue mi jɔmi, nɛ a kɛ he nile kpakpa ngɛ Yehowa Mawu sɔmɔe.1 Korinto Bi 6:11.

20, 21. (a) A pee womi nɛ ɔ nɛ e ye bua mo kɛ pee mɛni? (b) Mɛni he yemi wɔ Kristofohi wa ngɛ, se kɛ e sa kaa wa kɛ tsu ní ha kɛɛ?

20 A pee womi nɛ ɔ nɛ e ye bua mo konɛ o ná bua jɔmi, nɛ o hɛɛ he nile kpakpa ngɛ Satan je nɛ ɔ nyagbe ligbi ɔmɛ a mi. Ngɛ anɔkuale mi ɔ, pi Baiblo ɔ mi mlaahi kɛ sisi tomi mlaahi nɛ he hia kaa o susu a he nɛ o kɛ tsu ní daa ligbi ngɛ o si himi mi ɔ tsuo nɛ a tu he munyu ngɛ womi nɛ ɔ mi. Jehanɛ se hu ɔ, o be bɔ nɛ a kɛ he nile tsuɔ ní ha a he mlaahi pɔtɛɛ nae ngɛ mi. Yi mi tomi nɛ womi nɛ ɔ hɛɛ ji e ye bua mo konɛ o kase bɔ nɛ o maa nyɛɛ ngɛ Mawu Munyu ɔ nya ha, bɔ nɛ  pee nɛ o he nile ɔ nɛ hi hɛngmengmle. Ngɛ be mi nɛ Mose Mlaa a biɔ mlaa pɔtɛɛhi a nɔ yemi ɔ, “Kristo mlaa a” biɔ kaa nihi nɛ ngɔ a he nile, kɛ sisi tomi mlaahi kɛ tsu ní. (Galatia Bi 6:2) Lɔ ɔ he ɔ, Yehowa ha Kristofohi he yemi nɛ se be. Se kɛ̃ ɔ, e Munyu ɔ kaiɔ wɔ kaa wa ko ngɔ he yemi nɛ ɔ kɛ pee ‘yayami nɔ hami nɔ́’ kɔkɔɔkɔ. (1 Petro 2:16) Mohu ɔ, e sa nɛ waa ngɔ he yemi nɛ ɔ kaa he blɔ agbo nɛ wa ná nɛ wa kɛ tsɔɔ kaa wa suɔ Yehowa.

21 Ke o sɔle nɛ o susu bɔ nɛ o maa nyɛɛ ngɛ Baiblo sisi tomi mlaahi a nya a he, nɛ o tsu níhi nɛ o mwɔ o yi mi kpɔ ngɛ he ɔ nya ní ɔ, e ma ha nɛ o maa ya nɔ ngɛ o he nile nɛ o bɔni tsɔsemi kɛ je benɛ o ba le Yehowa kekleekle ɔ mi. O ma tsɔse o ‘juɛmi ɔ ke o kɛ pɔɔ ní tsumi.’ (Hebri Bi 5:14) O ma ná o he nile nɛ o ngɔ Baiblo ɔ kɛ tsɔse ɔ he se ngɛ o si himi mi daa ligbi. Kaa bɔ nɛ kɔmpas tsɔɔ blɔ hialɔ blɔ ɔ, jã nɔuu o he nile maa ye bua mo konɛ o pee juɛmi nɛ sa o hiɔwe Tsɛ ɔ hɛ mi. Enɛ ɔ ji blɔ nitsɛnitsɛ nɛ o maa gu nɔ kɛ to o he ngɛ Mawu suɔmi ɔ mi.

^ kk. 8 Baiblo ɔ tsɔɔ kaa ní komɛ hu a he hia kɛ piɛɛ he nile kpakpa he. Kaa nɔ hyɛmi nɔ́ ɔ, Paulo de ke: ‘Ye he nile tete bui mi fɔ, se enɛ ɔ tsɔɔ we kaa i yeɔ nguɔ. Yehowa ji nɔ nɛ kojoɔ mi.’ (1 Korinto Bi 4:4) Kaa bɔ nɛ Paulo pee be ko ɔ, nihi wa Kristofohi yi mi nɛ a he nile hɛwi mɛ, ejakaa a susu kaa nɔ́ nɛ a pee ɔ sa Mawu hɛ mi. E sa kaa waa hɛɛ he nile kpakpa nɛ e he nɛ tsɔ ngɛ Mawu hɛ mi.Bɔfo Ɔmɛ A Ní Tsumi 23:1; 2 Timoteo 1:3.

^ kk. 10 Dɔkitahi fuu de ke dã deli be nyɛe maa ye a he nɔ nɛ́ a nu dã bɔɔ; ngɛ a blɔ fa mi ɔ, “bɔɔ numi” tsɔɔ kaa a ko nu kulaa.