Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

“Nyɛɛ To Nyɛ He Ngɛ Mawu Suɔmi ɔ Mi”

 MI TSƆƆMI MUNYUHI

Aflangaa Ngami, Sɔ Fɔmi, Kɛ Ní Nɛ A Tsuɔ Ha Ma

Aflangaa Ngami, Sɔ Fɔmi, Kɛ Ní Nɛ A Tsuɔ Ha Ma

Aflangaa ngami. Yehowa Odasefohi he ye kaa si bami ha aflangaa, loo aflangaa ngami be mi nɛ a ngɛ ma he suɔmi la ko lae ɔ, ji jami ní peepee nɛ tsɔɔ kaa ma a loo nɔ yeli ɔmɛ ji a yi wami helɔ se pi Mawu. (Yesaya 43:11; 1 Korinto Bi 10:14; 1 Yohane 5:21) Matsɛ Nebukadnezar nɛ hi blema Babilon ɔ ji nɔ yeli nɛ ɔmɛ a kpɛti nɔ kake. Matsɛ he walɔ nɛ ɔ puɛ amaga ngua ko konɛ e kɛ ha nɛ ma bimɛ ɔmɛ nɛ na kaa e je agbo nɛ e bɔɔ jami he mɔde. Nɛ e fĩ e sisi bi ɔmɛ a nɔ kaa a kpla si ha kikɛmɛ a amaga nɛ ɔ be mi nɛ a ngɛ maje la ko fiae ɔ. Se Hebri bi etɛ nɛ ji Shadrak, Meshak, kɛ Abednego kua si kplami ha amaga a, e ngɛ mi kaa a ke a maa gbe mɛ mohu.Daniel yi 3.

Yi nɔ sane ngmalɔ Carlton Hayes ngma ke, “Aflangaa ji ma he suɔmi okadi titli nɛ a jaa. Ke nyumuhi na aflangaa a, a jeɔ a pɛɛhi ngɛ a yi. Nihi ngmaa asilɛhi kɛ jeɔ aflangaa yi, nɛ jokuɛwi hu laa lahi.” E de hu kaa ma he suɔmi “gbijlɔhi” ngɛ nɛ a yeɔ, kaa bɔ nɛ July Ligbi Eywiɛne ɔ ji ngɛ United States ɔ, nɛ a woɔ “he tsɔli kɛ nimli nguahi” nɛ hi si blema a, kɛ a “jami hehi” a hɛ mi nyami. Benɛ a ye gbijlɔ ko ngɛ Brazil ɔ, nɔkɔtɔma nɛ hyɛɔ ta buli a nɔ ɔ de ke: “A kɛ bumi haa aflangaa . . . nɛ a jaa lɛ kaa bɔ nɛ a jaa Nimeli a ma a.” Niinɛ, womi ko nɛ ji The Encyclopedia Americana a de be ko ke: “Aflangaa a ngɛ klɔuklɔu kaa klɔɔs.”

 Womi nɛ ɔ nɔuu de lingmi nɛ ɔ ke, ma he suɔmi lahi “ji nɔ́ nɛ a kɛ tsɔɔ kaa a suɔ ma a, nɛ behi fuu ɔ, a biɔ Mawu kaa e tsɔɔ ma bimɛ kɛ nɔ yeli blɔ, nɛ e po a he piɛ.” Enɛ ɔ he ɔ, nile ngɛ mi kaa Yehowa sɔmɔli buu ma he suɔmi kusumihi nɛ aflangaa ngami kɛ ma he suɔmi lahi a lami piɛɛ he ɔ kaa jami ní peepeehi. Benɛ womi nɛ ji, The American Character a ngɛ Yehowa Odasefohi a bimɛ nɛ ngɛ sukuu yae ngɛ United States nɛ a nga we aflangaa, loo a kã we ma kita a he munyu tue ɔ, e de ke: “Nyagbenyagbe ɔ, Kojomi He Ngua a ma nɔ mi ngɛ sanehi fuu nɛ e ye ɔ mi kaa daa ligbi ní peepee nɛ ɔ ji jami kusumihi.”

E ngɛ mi kaa Yehowa we bi kɛ a he wui ma kusumihi nɛ a buu kaa ngmami ɔ kplɛɛ we nɔ ɔ mi mohu, se a tsi we ni kpahi a nya ngɛ he. Jehanɛ se hu ɔ, a buɔ ma aflangaahi kaa ma okadihi, nɛ a baa a he si kɛ haa “ma nɔ yeli” nɛ́ a hla mɛ ngɛ mlaa nya, nɛ́ sɔmɔɔ kaa ‘Mawu tsɔli’ ɔ. (Roma Bi 13:1-4) Enɛ ɔ he ɔ, Yehowa Odasefohi buɔ ga womi nɛ tsɔɔ kaa a sɔle “ha matsɛmɛ, kɛ nihi tsuo nɛ hɛɛ blɔ nya” a tue. Se yi mi tomi ɔ ji, konɛ ‘waa hi si kpoo ngɛ tue mi jɔmi mi, nɛ waa ye Mawu gbeye saminya, nɛ waa ba wa je mi bɔ nɛ sa.’1 Timoteo 2:2.

Sɔ nɛ a fɔɔ kɛ hlaa ma nɔ yeli. Anɔkuale Kristofohi buu he blɔ nɛ nihi ngɛ kaa a fɔɔ sɔ ɔ. A tsi we nihi a nya kaa a ko fɔ sɔ, nɛ a baa a he si ha ma nɔ yeli nɛ́ a fɔ sɔ kɛ hla mɛ ɔ. Se kɛ̃ ɔ, a kɛ a he wui je ɔ mi ma kudɔmi sanehi a mi. (Mateo 22:21; 1 Petro 3:16) Mɛni Kristofo no ko maa pee ke ma nɛ e ngɛ mi ɔ, a nyɛɔ nihi a nɔ ngɛ mi kaa a fɔ sɔ, loo a teɔ si kɛ woɔ nihi nɛ́ yɛ he nɛ a fɔɔ sɔ ɔ ngɛ ɔ? Kristofo no nɛ ngɛ si fɔfɔɛ nɛ ɔ mi ɔ ma susu kaa akɛnɛ Shadrak, Meshak, kɛ Abednego hu ya Dura nga a nɔ he je ɔ, lɛ hu e ma nyɛ maa ya he nɛ a ngɛ sɔ ɔ fɔe ngɛ ɔ, ke e he nile kojo we lɛ. Se e sa kaa e hyɛ e he nɔ saminya nɛ e ko fĩ ma kudɔmi kuu ko se. E sa kaa e ha nɛ sisi tomi mlaahi ekpa nɛ nyɛɛ se nɛ ɔmɛ nɛ hi e juɛmi mi:

  1. Yesu se nyɛɛli ɔmɛ “pi je ɔ mi bi.”Yohane 15:19.

  2. Kristofohi daa si ngɛ Kristo kɛ e Matsɛ Yemi ɔ nane mi.Yohane 18:36; 2 Korinto Bi 5:20.

  3.   Nihi nɛ ngɛ Kristofohi asafo ɔ mi ɔ hɛɛ hemi kɛ yemi kake, nɛ suɔmi nɛ ngɛ kaa Kristo nɔ́ ɔ nɛ a ngɛ kɛ ha a sibi ɔ pee mɛ kake.1 Korinto Bi 1:10; Kolose Bi 3:14.

  4. Ke nihi fɔ sɔ kɛ hla amlaalo nane mi dalɔ ko nɛ e ya pee nɔ́ ko nɛ dɛ blɔ ɔ, a ma nyɛ ma pia nihi nɛ a fɔ sɔ kɛ hla lɛ ɔ hulɔ.—Mo kadi sisi tomi mlaahi nɛ ngɛ 1 Samuel 8:5, 10-18 kɛ 1 Timoteo 5:22.

  5. Yehowa bu Israel bi ɔmɛ kaa a kua lɛ benɛ a de ke a suɔ nɛ adesa nɛ ye a nɔ ɔ.1 Samuel 8:7.

  6. E sa kaa Kristofohi kɛ he nile kpakpa nɛ́ sɛɛ Mawu Matsɛ Yemi ɔ he ní ha nihi nɛ́ fĩ ma kudɔmi kuu slɔɔtohi tsuo a se ɔ.Mateo 24:14; 28:19, 20; Hebri Bi 10:35.

Ní nɛ a tsuɔ ha ma. Ngɛ ma komɛ a nɔ ɔ, Amlaalo ɔ wo mlaa kaa nihi nɛ kuaa ta buli a ní tsumi maa ngɔ be ko kɛ tsu ní ha ma a. Ke waa kɛ si fɔfɔɛ nɛ ɔ kpe ɔ, e sa kaa waa sɔle ngɛ he, nɛ waa kɛ Kristofo no ko nɛ pi si ngɛ Mawu jami mi nɛ sɛɛ he ní, nɛ lɔ ɔ se ɔ, waa da wa he nile kɛ nɔ́ nɛ wa kase ngɛ sane ɔ he ɔ nɔ kɛ mwɔ wa yi mi kpɔ.Abɛ 2:1-5; Filipi Bi 4:5.

Mawu Munyu ɔ de wɔ ke waa ‘ba wa he si ngɔ ha ma nɔ yeli, kɛ ni nɛmɛ nɛ hɛɛ blɔ nya. Waa bu mɛ, nɛ waa pee klaalo kaa wa ma tsu ní tsumi kpakpa be tsuaa be, nɛ waa hi si kpoo.’ (Tito 3:1, 2) Benɛ enɛ ɔ ngɛ wa juɛmi mi ɔ, wa ma nyɛ ma bi wa he ke: ‘Anɛ ke i kplɛɛ ma sɔmɔmi ní tsumi nɛ ɔ nɔ ɔ, lɔ ɔ maa tsɔɔ kaa i ngɔ ye he kɛ wo ma kudɔmi sanehi nɛ Kristofohi kɛ a he wui mi ɔ mi, aloo lakpa jami mi lo?’ (Mika 4:3, 5; 2 Korinto Bi 6:16, 17) ‘Anɛ ní nɛ ɔ nɛ ma tsu ɔ ma ha nɛ e he maa wa ha mi kaa ma tsu ye blɔ nya ní kaa Kristofo no, aloo e maa tsi ye nya nɛ́ i be a he ní nyɛe ma tsu lo?’ (Mateo 28:19, 20; Efeso Bi 6:4; Hebri Bi 10:24, 25) ‘Jehanɛ se hu ɔ, anɛ ní nɛ ɔ nɛ ma tsu ɔ ma ha nɛ ma ná blɔ kɛ bli ye sɔmɔmi ní tsumi ɔ mi, nɛ́ eko po ɔ, ma ngɔ ye he kɛ wo be tsuo sɔmɔmi ní tsumi ɔ mi lo?’Hebri Bi 6:11, 12.

Ke Kristofo no ko da e he nile nɔ kɛ pee juɛmi kaa e ma tsu ma sɔmɔmi ní tsumi mohu pe nɛ a maa wo lɛ tsu ɔ, e sɛ kaa e nyɛmimɛ Kristofohi tuɔ munyu kɛ siɔ lɛ. (Roma Bi 14:10)  Nɛ ke e pee e juɛmi kaa e be ma sɔmɔmi ní tsumi ko tsue ɔ, lɔ ɔ hu e sa kaa nihi nɛ kplɛɛ juɛmi nɛ e pee ɔ nɔ.1 Korinto Bi 10:29; 2 Korinto Bi 1:24.