Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Mawu Matsɛ Yemi ɔ Ngɛ Nɔ Yee!

 YI 11

Je Mi Bami He Tsakemihi—E Tsɔɔ Bɔ Nɛ Mawu Ngɛ Klɔuklɔu Ha

Je Mi Bami He Tsakemihi—E Tsɔɔ Bɔ Nɛ Mawu Ngɛ Klɔuklɔu Ha

OTI NƐ NGƐ YI NƐ Ɔ MI

Bɔ nɛ Matsɛ ɔ ye bua e sisi bi konɛ a kɛ Mawu mlaahi nɛ kɔɔ je mi bami he ɔ nɛ tsu ní

Moo po he foni ngɛ o juɛmi mi kaa o yaa sɛ Yehowa mumi mi sɔlemi we ngua a mi

1. Mɛni ji nɔ́ nɛ Ezekiel na ngɛ nina mi nɛ peeɔ wɔ nyakpɛ?

KAA o na nina nɛ gbalɔ Ezekiel na maa pee jeha 2,500 nɛ be ji nɛ ɔ, jinɛ kɛ o ko pee o ní ha kɛɛ? Mo susu enɛ ɔ he nɛ o hyɛ: Ngɔɔ lɛ kaa o yaa sɔlemi we ngua ko nɛ ngɛ kpɛe wawɛɛ mi. Hiɔwe bɔfo ko nɛ e he wa ngɛ lejɛ ɔ, nɛ e kɛ mo maa kpa si ngɛ sɔlemi we nɛ ngɛ nyakpɛ nɛ ɔ mi! O kuɔ kpoku kpaago kɛ ya agbo nguahi etɛ ɔ kake nya. Agbo ngua amɛ ha nɛ o nya kpɛ o he. Agbo ɔmɛ a hiɔwe yami maa pee nanewɛɛ 100. O na buli a tsuhi ngɛ ablanaa amɛ a nɔ. A tɛni tãhi ngɛ titima amɛ a he.Ezek. 40:1-4, 10, 14, 16, 22; 41:20.

2. (a) Mɛni nɛ sɔlemi we he nina a daa si kɛ ha? (Hyɛ sisi ningma a hulɔ.) (b) Mɛni wa ma nyɛ maa kase ngɛ níhi nɛ ngɛ sɔlemi we ɔ agbo ɔmɛ a nya a he?

2 Mumi mi sɔlemi we nɛ ɔ ji gbami. Ezekiel tsɔɔ mumi mi sɔlemi we nɛ ɔ mi fitsofitso ngɛ e womi ɔ yi 40 kɛ ya si 48 ɔ mi. Sɔlemi we nɛ ɔ peeɔ anɔkuale jami nɛ Yehowa to blɔ nya a he okadi. Níhi nɛ ngɛ sɔlemi we ɔ mi ɔ tsuo kɔɔ jami nɛ waa kɛ haa Yehowa ngɛ nyagbe ligbi nɛ ɔmɛ a mi ɔ he. * Mɛni agbo ngua amɛ tsɔɔ? A kaiɔ wɔ kaa e sa nɛ nihi nɛ a maa ba anɔkuale jami nɛ Yehowa to blɔ nya a mi ɔ nɛ a hi si ngɛ Mawu mlaahi nɛ a da amɛ a nya. Tãhi nɛ a tɛni ɔmɛ hu tsɔɔ jã, ejakaa be komɛ ɔ, Baiblo ɔ kɛ dami ní peepee toɔ tã he. (La 92:12) Nɛ buli a tsu ɔmɛ hu nɛɛ? E ngɛ heii kaa a be nihi nɛ a kɛ Mawu mlaa tsu we ní ɔ blɔ ngmɛe nɛ a sɛ jami klɔuu nɛ ngɛ fɛu nɛ haa wami nɛ ɔ mi.Ezek. 44:9.

3. Mɛni he je nɛ e he ba hia kaa Kristo nɛ ya nɔ nɛ e tsu e se nyɛɛli ɔmɛ a he ɔ?

3 Mɛni blɔ nɔ Ezekiel nina a bami ngɛ? Kaa bɔ nɛ wa na ngɛ womi nɛ ɔ Yi 2 ɔ mi ɔ, Yehowa gu Kristo nɔ kɛ tsu e we bi a he kɛ je jeha 1914 kɛ ya si jeha 1919 ɔ sisije. Anɛ he tsumi ɔ ba nyagbe ngɛ jamɛ a be ɔ mi lo? Dɛbi! Ngɛ jeha lafa nɛ be ɔ mi ɔ, Kristo hyɛ kaa e we bi kɛ Mawu mlaahi nɛ ngɛ klɔuu nɛ kɔɔ je mi bami he ɔ ma tsu ní. Lɔ ɔ he ɔ, e he ba hia kaa e ya nɔ nɛ e tsu e se nyɛɛli ɔmɛ a he. Mɛni he je? Ejakaa be mi nɛ Kristo ngɛ e se nyɛɛli a nya buae ngɛ je yaya nɛ ɔ mi ɔ, Satan hu kpa we mɔde nɛ e ngɛ bɔe kaa e ma ha nɛ Kristo se nyɛɛli kɛ a he nɛ wo je mi bami yaya mi ɔ. (Kane 2 Petro 2:20-22.) Nyɛ ha nɛ wa susu níhi etɛ nɛ anɔkuale Kristofohi pee tsakemihi ngɛ a he bɔɔbɔɔbɔɔ ɔ a he nɛ waa  hyɛ. Kekleekle ɔ, wa ma susu tsakemihi nɛ a pee ngɛ je mi bami blɔ fa mi, kɛ nɔ́ ko nɛ e he hia nɛ a pee konɛ a kɛ ha nɛ asafo ɔ he nɛ tsɔ ɔ he. Kɛkɛ nyagbe ɔ, wa ma susu blɔ nya nɛ a to kɛ ha wekuhi ɔ he.

Je Mi Bami He Tsakemihi Nɛ A Pee

4, 5. Mɛni ga Satan kɛ ngɛ ní tsue kɛ je blema, nɛ mɛni je mi kɛ ba?

4 Be tsuaa be ɔ, Yehowa we bi suɔ kaa a maa ba a je mi saminya. Lɔ ɔ he ɔ, a kplɛɛ blɔ tsɔɔmi nɛ ngɛ heii nɛ kɔɔ je mi bami he ɔ nɔ. Mo susu nɔ hyɛmi ní nɛ ɔmɛ a he nɛ o hyɛ.

5 Ajuama bɔmi. Yehowa to bɔmi nami blɔ nya kɛ ha nihi nɛ a sɛ gba si himi konɛ e pee nɔ́ nɛ e he tsɔ nɛ ngɛ bua jɔmi. Satan suɔ nɛ e kɛ nike ní nɛ je Mawu ngɔ nɛ ɔ nɛ tsu ní kɛ ka Yehowa we bi nɛ a kɛ a he nɛ wo je mi bami yaya mi bɔ nɛ pee nɛ a ko ná Mawu hɛ mi dloomi. Satan ye nihi awi kɛ gu ga nɛ e tsɔ̃ kɛ sisi nihi ngɛ Balaam be ɔ mi ɔ nɔ, nɛ e kɛ jamɛ a ga blɔ ɔ nɔuu ngɛ ní tsue wawɛɛ ngɛ nyagbe ligbi nɛ ɔmɛ a mi.4 Mose 25:1-3, 9; Kpoj. 2:14

6. Mɛni ji kita nɛ a ngma ngɛ Hwɔɔmi Mɔ ɔ mi, nɛ kɛ a kɛ tsu ní ha kɛɛ, nɛ mɛni he je nɛ a kɛ tsu we ní hu ɔ? (Hyɛ sisi ningma a hulɔ.)

6 Bɔ nɛ pee nɛ wa nyɛ nɛ waa da Satan ga tsɔmi ɔmɛ a nya a, June 15, 1908 Blɛfo gbi Hwɔɔmi Mɔ ɔ ngma kita ko, e mi munyu ɔ fã ko de ke: “Ma hyɛ ye he nɔ saminya ngɛ bɔ nɛ i kɛ nyumu loo yo nɛ pi ye he piɛɛlɔ ɔ maa hi si ha a he be tsuaa be, kɛ he tsuaa he nɛ i ngɛ.” * E ngɛ mi kaa kita nɛ ɔ pi mlaa mohu lɛɛ, se nihi fuu kplɛɛ nɔ, nɛ a ngɔ a biɛ kɛ ha konɛ a ngma ngɛ Hwɔɔmi Mɔ ɔ mi. Jeha komɛ a se ɔ, e ba pee heii kaa kita nɛ ɔ ye bua nihi mohu lɛɛ, se e ba pee nɔ́ ko nɛ a deɔ kɛkɛ, nɛ lɔ ɔ he ɔ, a kɛ tsu we ní hu. Se kɛ̃ ɔ, a kɛ je mi bami he mlaahi nɛ a nɔ kuɔ ɔ tsu ní.

7. Mɛni nyagba nɛ Hwɔɔmi Mɔ ɔ tu he munyu ngɛ jeha 1935 ɔ mi, nɛ mɛni nɛ Hwɔɔmi Mɔ ɔ kpale ma nɔ mi?

7 Satan si temi kɛ womi ɔ nya ba wa. March 1, 1935 Blɛfo gbi Hwɔɔmi Mɔ ɔ tu nyagba ko nɛ ya nɔ ngɛ Mawu we bi a kpɛti ɔ he munyu. Ni komɛ susu kaa a he nɛ a kɛ woɔ sɔmɔmi ní tsumi ɔ mi ɔ tsɔɔ kaa a ye a he ngɛ je mi bami he mlaahi nɛ Yehowa wo ɔmɛ a he. Hwɔɔmi Mɔ ɔ de ke: “Pi fiɛɛmi ní tsumi ɔ nɛ nɔ ko kɛ e he maa wo mi ɔ pɛ nɛ he hia. Yehowa Odasefohi ji Yehowa nane mi dali, nɛ a blɔ nya ní tsumi ji kaa a maa ye Yehowa kɛ e Matsɛ Yemi ɔ he odase saminya.” Womi ɔ kɛ ga womi nɛ ngɛ heii nɛ kɔɔ gba si himi kɛ ajuama bɔmi he ɔ ha, nɛ lɔ ɔ ye bua Mawu we bi nɛ a ‘tu ajuama bɔmi nya fo.’1 Kor. 6:18.

8. Mɛni he je nɛ Hwɔɔmi Mɔ ɔ tsɔɔ Hela munyungu kɛ ha ajuama bɔmi ɔ sisi si abɔ ɔ?

8 Lingmi nɛ ɔ, Hwɔɔmi Mɔ ɔ tsɔɔ munyungu nɛ ji por·neiʹa nɛ a kɛ tsu ní ngɛ Hela Ngmami ɔ mi kɛ ha ajuama bɔmi ɔ sisi saminya. Por·neiʹa kɔ we bɔmi nami nitsɛ pɛ he, mohu ɔ e kɔɔ bɔmi nami ní peepeehi tsuo nɛ nihi nɛ sɛ we gba si himi mi ngɛ Ngmami nya kɛ a he woɔ mi ɔ a he. Enɛ ɔ po Kristo se nyɛɛli a he piɛ ngɛ je mi bami yaya nɛ nihi fuu kɛ a he woɔ mi ngɛ je ɔ mi mwɔnɛ ɔ he.Kane Efeso Bi 4:17-19.

9, 10. (a) Mɛni je mi bami nɛ Hwɔɔmi Mɔ ɔ tu he munyu ngɛ jeha 1935? (b) Mɛni Baiblo ɔ tsɔɔ ngɛ dã he?

 9 Dã demi. March 1, 1935 Blɛfo gbi Hwɔɔmi Mɔ ɔ tu je mi bami kpa ko he munyu ke: “Wa yɔse kaa ke ni komɛ maa ya fiɛɛmi loo ke a ma tsu asafo ɔ mi ní tsumi ko ɔ, a nuɔ [dã]. Mɛni ji nɔ́ nɛ ngmami ɔ de ngɛ dã numi he? Anɛ e sa kaa bɔ nɛ nɔ ko kɛ dã ma tsu ní ha a nɛ sa e sɔmɔmi ngɛ Nyɔmtsɛ ɔ asafo ɔ mi ɔ he lo?”

10 Heto ɔ tsɔɔ blɔ nɛ da nɛ Mawu Munyu ɔ tsɔɔ kaa a ma nyɛ maa ngɔ dã kɛ tsu ní ɔ mi. Baiblo ɔ bui wai kɛ dã kpahi nɛ nɔ ko maa nu bɔɔ ko ɔ fɔ, se e buu dã demi fɔ. (La 104:14, 15; 1 Kor. 6:9, 10) Kɛ je blema nɛ a de Mawu we bi nɛ a nuu dã loko a tsuɔ sɔmɔmi klɔuu ɔ kaa a kai kaa Aaron binyumu ɔmɛ ngɔ afɔle nɛ he tsɔ we kɛ ya Mawu hɛ mi, nɛ lɔ ɔ he je ɔ, Mawu kpata a hɛ mi. Pee se ɔ, a tsɔɔ nɔ́ he je nɛ nɔ́ nɛ Aaron binyumu ɔmɛ pee ɔ dɛ ɔ mi kaa, Mawu wo osɔfo ɔmɛ tsuo mlaa kaa a ko nu dã kɛ ya kpe he bo tsu ɔ mi. (3 Mose 10:1, 2, 8-11) Kristo se nyɛɛli kɛ sisi tomi mlaa nɛ ɔ tsuɔ ní, lɔ ɔ he ɔ, ke a ma tsu a ní tsumi nɛ ngɛ klɔuu ɔ, a nui dã.

11. Mɛni he je nɛ níhi nɛ a tsɔɔ mi fitsofitso kɛ kɔ dã demi he ɔ ji jɔɔmi kɛ ha Mawu we bi?

11 Ngɛ jehahi bɔɔ nɛ be ɔ mi ɔ, Kristo se nyɛɛli ba nu níhi nɛ kɔɔ dã numi fuu loo dã numi nɛ tlɔɔ nɔ he ɔ sisi saminya. Ngɛ mumi mi niye ní nɛ a kɛ ha ngɛ e be nya a he je ɔ, a ye bua nihi babauu nɛ a ye haomi nɛ ɔ nɔ kunimi, nɛ a ngɛ a je mi bae saminya. Mumi mi niye ní nɛ ɔ hu ye bua nihi babauu nɛ a kua dã numi kulaa. E sɛ nɛ wa ti nɔ ko nɛ ha nɛ dã nɛ puɛ e weku, kɛ e Mawu jami nɛ ngɛ klɔuu ɔ.

“Wa le kaa taba be fu jee ngɛ Nyɔmtsɛ ɔ he loo kaa e kɛ nɔ́ ko nɛ he tsɔ we maa wo e nya mi.”—C. T. Russell

12. Loko nyagbe ligbi ɔmɛ maa je sisi po ɔ, kɛ Kristo we bi na taba numi ha kɛɛ?

12 Taba numi. Kristo se nyɛɛli bɔni nihi demi kaa a je a he kɛ je taba numi he loko nyagbe ligbi ɔmɛ po je sisi. Jeha komɛ nɛ be ɔ, nyɛminyumu ko nɛ a tsɛɛ lɛ ke Charles Capen ɔ tu kekle be nɛ e kɛ Charles Taze Russell sɛɛ ní maa pee jeha lafa kɛ se ji nɛ ɔ he munyu. Capen nɛ jamɛ a be ɔ mi ɔ, e ye jeha 13 ɔ kɛ e nyɛmimɛ nyumuhi etɛ daa si ngɛ atlakpe ko nɔ ngɛ Bible House ngɛ Allegheny, Pennsylvania. Benɛ Russell bee ngɛ he nɛ a ngɛ ɔ, e bi mɛ ke: “Anɛ nyɛ ngɛ taba nue lo? I nu taba he fu.” A ma nɔ mi kɛ ha lɛ kaa a nui taba. E ji anɔkuale kaa a na Nyɛminyumu Russell susumi ngɛ taba numi he. Ngɛ August 1, 1895 Blɛfo gbi Hwɔɔmi Mɔ ɔ mi ɔ, Nyɛminyumu Russell tu 2 Korinto Bi 7:1 ɔ he munyu ke: “I nɛ́ se nami nɛ ngɛ taba numi he kɛ ha Kristofo no loo bɔ nɛ taba numi ma nyɛ maa wo Mawu hɛ mi nyami ha. . . . Wa le kaa taba be fu jee ngɛ Nyɔmtsɛ ɔ he loo kaa e kɛ nɔ́ ko nɛ he tsɔ we maa wo e nya mi.”

13. Ngɛ jeha 1973 ɔ, mɛni je mi bami he tsakemihi a pee?

13 Ngɛ jeha 1935 ɔ mi ɔ, Hwɔɔmi Mɔ ɔ de ngɛ taba he kaa e ji “ba nɛ he tsɔ we,” nɛ e de hu kaa ke nɔ ko kpe loo e nu ɔ, a be lɛ blɔ ngmɛe nɛ e ya nɔ nɛ e sɔmɔ ngɛ Betel, loo nɛ e sɔmɔ kaa kpokpa nɔ hyɛlɔ loo kpɔ mi nɔ hyɛlɔ loo blɔ gbalɔ.  Tsakemihi fuu ya nɔ ngɛ je mi bami blɔ fa mi ngɛ jeha 1973 ɔ mi. June 1 Hwɔɔmi Mɔ ɔ tsɔɔ mi kaa ke Yehowa Odasefo no ko kɛ e he woɔ ní peepee nɛ ngɛ gbeye, nɛ ji mu ní tsumi nɛ tsɔɔ we suɔmi nɛ ɔ mi ɔ, a be lɛ blɔ ngmɛe nɛ e ya nɔ nɛ e hi asafo ɔ mi. E kɛ we nɛ a fiee nihi nɛ a nyɛ we nɛ a kpa taba kɛ ní tsumi ɔ kɛ je asafo ɔ mi. * Nɔ́ kake nɛ e he hia nɛ Kristo pee kɛ tsɔ e we bi a he ji nɛ ɔ nɛ.

14. Mɛni mlaa Mawu wo ngɛ muɔ he, nɛ mɛni ha nɛ muɔ hami ngɛ hiɔ tsami mi ɔ ba pɔ he?

14 Muɔ nɛ a kɛ tsuɔ ní ngɛ blɔ nɛ dɛ nɔ. Ngɛ Noa be ɔ mi ɔ, Mawu de ke e ji yayami kaa nɔ ko maa ye muɔ. Ngɛ Mlaa nɛ Mawu kɛ ha Israel bi ɔmɛ mi ɔ, e ma munyu nɛ ɔ nɔ mi ekohu, nɛ jã kɛ̃ nɛ e de Kristofohi asafo ɔ ke a “kua . . . muɔ.” (Níts. 15:20, 29, NW; 1 Mose 9:4; 3 Mose 7:26) Se e be nyakpɛ kaa ngɛ wa be nɛ ɔ mi ɔ, Satan gu blɔ ko nɔ nɛ e ha nɛ nihi babauu kɛ Mawu mlaa nɛ ɔ tsu we ní. Ngɛ jeha 1800 jeha amɛ a mi ɔ, dɔkitahi bɔni muɔ kɛ nihi hami ngɛ hiɔ tsami mi konɛ a kɛ kpa níhi a si. Se benɛ a na kaa muɔ mi ngɛ slɔɔtoslɔɔto ɔ, a kɛ muɔ bɔni ní tsumi wawɛɛ ngɛ hiɔ tsami mi. Ngɛ jeha 1937 ɔ mi ɔ, a bɔni nihi a muɔ gblami konɛ a kɛ to ngɛ muɔ si tomi he, nɛ Je Mi Ta enyɔne ɔ hu ha nɛ muɔ nɛ a kɛ haa nihi ɔ ya hɛ mi wawɛɛ. E kɛ we nɛ muɔ nɛ a gblaa kɛ haa hiɔtsɛmɛ ɔ ba pee nɔ́ nɛ a kplɛɛ nɔ ngɛ je ɔ mi he tsuaa he.

15, 16. (a) Mɛni yi mi kpɔ nɛ Yehowa Odasefohi mwɔ ngɛ muɔ nɛ a haa nɔ ngɛ hiɔ tsami mi ɔ he? (b) Mɛni yemi kɛ buami Kristo we bi ná kɛ kɔ hiɔ tsami nɛ a kɛ muɔ tsu we ni ngɛ mi ɔ he, nɛ mɛni je mi kɛ ba?

15 Kɛ je jeha 1944 ɔ mi tɔɔ nɛ Hwɔɔmi Mɔ ɔ tsɔɔ mi kaa ke a kɛ muɔ ha nɔ ko kɛ gu e pani mi ɔ, e ye muɔ. Ngɛ jeha nɛ nyɛɛ se ɔ mi ɔ, womi ɔ ya nɔ nɛ e tsɔɔ nɔ́ nɛ Baiblo ɔ deɔ ngɛ muɔ he ɔ mi saminya, nɛ e tsɔɔ mi heii. Benɛ e ke suu jeha 1951 ɔ, a ngma sane bimihi kɛ hetohi nɛ kɔɔ muɔ he ɔ he womi konɛ e ye bua Mawu we bi nɛ a le nɔ́ nɛ a ma de dɔkitahi. Ngɛ je ɔ mi tsuo ɔ, Kristo se nyɛɛli anɔkualetsɛmɛ pee kã kɛ ye Mawu mlaa nɛ kɔɔ muɔ he ɔ nɔ, se behi fuu ɔ, a yeɔ a he fɛu, nɛ a waa mɛ yi mi. Se Kristo ya nɔ nɛ e kɛ yemi kɛ buami nɛ e we bi hia a ha mɛ kɛ gu e we asafo ɔ nɔ. A hla muɔ he sanehi a mi fitsofitso, nɛ a da nɔ kɛ pee womiyohi, nɛ a ngma he munyu ngɛ womi tɛtlɛɛhi hu a mi.

16 Ngɛ jeha 1979 ɔ mi ɔ, asafo mi nikɔtɔma komɛ bɔni hiɔ tsami hehi slaami, nɛ a ye bua dɔkitahi babauu nɛ a nu nɔ́ he je nɛ wa ngɔɛ muɔ ɔ sisi kɛ nɔ́ nɛ Ngmami ɔ de ngɛ muɔ he ɔ. Jehanɛ hu, a ha nɛ a le kaa blɔ kpahi ngɛ nɛ a ma nyɛ maa gu nɔ kɛ tsa nihi nɛ a kɛ muɔ be ní tsue. Ngɛ jeha 1980 ɔ mi ɔ, a kɛ tsɔsemi klɛdɛɛ ko ha asafo mi nikɔtɔmahi ngɛ mahi 39 mi ngɛ United States konɛ a ye bua dɔkitahi. E kɛ we nɛ Blɔ Tsɔɔmi Ajla Toli ɔmɛ kplɛɛ nɔ kaa a to Hiɔ Tsami He Kɛ Ní Sɛɛmi Ajla Toli blɔ nya ngɛ je ɔ mi tsuo. Kɛ je benɛ a to blɔ nya nɛ ɔ, mɛni je mi kɛ ba? Mwɔnɛ ɔ, dɔkitahi babauu kplɛɛ nɔ kaa a ma tsa Yehowa Odasefohi nɛ a  kɛ muɔ be ní tsue. Hiɔ tsami hehi fuu ngɛ nihi tsae nɛ a kɛ muɔ tsu we ní, nɛ ekomɛ po na kaa enɛ ɔ ji blɔ nɛ hi pe kulaa nɛ e sa kaa a gu nɔ kɛ tsa nihi. Anɛ e pee we wɔ bua jɔmi kaa Yesu po e we bi a he piɛ konɛ Satan nɛ ko wo a he mu lo?Kane Efeso Bi 5:25-27.

Hiɔ tsami hehi fuu ngɛ nihi tsae nɛ a kɛ muɔ tsu we ní, nɛ ekomɛ po na kaa enɛ ɔ ji blɔ nɛ hi pe kulaa nɛ e sa kaa a gu nɔ kɛ tsa nihi

17. Mɛni e sa nɛ waa pee kɛ tsɔɔ kaa wa bua jɔ bɔ nɛ Kristo ngɛ e se nyɛɛli a he tsue ha a he?

17 E sa nɛ wɔ tsuo wa bi wa he ke, ‘Bɔ nɛ Kristo ngɛ wɔ e se nyɛɛli wa he tsue nɛ e ngɛ wɔ tsɔsee konɛ waa ye Yehowa mlaahi nɛ a nɔ kuɔ nɛ kɔɔ je mi bami he ɔ nɔ ɔ, anɛ wa bua jɔ he lo?’ Ke jã a, lɛɛ nyɛ ha nɛ e hi wa juɛmi mi kaa Satan ngɛ hlae nɛ bu nɛ wa ngɛ kɛ ha Yehowa mlaahi nɛ kɔɔ je mi bami he ɔ nɛ ba si konɛ e je wɔ kɛ je Yehowa kɛ Yesu a he. Bɔ nɛ pee nɛ Satan ko ye manye ɔ, Yehowa asafo ɔ jeɔ suɔmi mi nɛ e bɔɔ wɔ kɔkɔ, nɛ e kɛ kaimihi haa wɔ ngɛ je mi bami yaya nɛ yaa nɔ ngɛ je ɔ mi ɔ he. Nyɛ ha nɛ wa hɛ nɛ hi wa he nɔ, nɛ waa pee tue bumi, nɛ waa kplɛɛ ga womi kpakpa nɛ ɔmɛ a nɔ.Abɛ 19:20.

A Po Asafo ɔ He Piɛ Konɛ Nihi Ko Gbe He Guɛ

18. Mɛni ji nɔ́ nɛ Ezekiel nina a kaiɔ wɔ ngɛ nihi nɛ a kplii a tsui kaa a kɛ Mawu je mi bami he mlaa amɛ be ní tsue ɔ he?

18 Nɔ́ enyɔne nɛ anɔkuale Kristofohi pee tsakemi ngɛ he ɔ kɔɔ asafo ɔ nɛ a ma ha nɛ e he nɛ tsɔ ɔ he. E ngɛ aywilɛho  kaa pi nihi nɛ a kplɛɛ Yehowa mlaa a nɔ nɛ a jɔɔ a he nɔ kɛ ha lɛ ɔ tsuo nɛ a ya nɔ ye anɔkuale. Pee se ɔ, a ti ni komɛ kplii a tsui, nɛ a kɛ Mawu mlaa amɛ tsu we ní hu. Mɛni e sa kaa waa pee ngɛ nihi kaa jã a he? Wa ma nyɛ maa na sane bimi nɛ ɔ heto ngɛ Ezekiel nina nɛ kɔɔ mumi mi sɔlemi we ɔ nɛ wa susu he ngɛ yi nɛ ɔ sisije ɔ mi. Mo kai agbo ngua amɛ. Ngɛ ablanaa a eko tsuaa eko nɔ ɔ, buli a tsuhi ngɛ lejɛ ɔ. E ngɛ heii kaa buli ngɛ sɔlemi we ɔ he bue konɛ a tsi nihi nɛ a hɛɛ tsui yaya a blɔ nɛ a ko sɛ mi. (Ezek. 44:9) Enɛ ɔ ji odase nɛ ngɛ heii nɛ tsɔɔ kaa nihi nɛ a bɔɔ mɔde kaa a maa hi si ngɛ Yehowa mlaahi nɛ a he tsɔ ɔ nya a pɛ nɛ a kɛ he blɔ nɛ ɔ dloo mɛ. Jã kɛ̃ nɛ mwɔnɛ ɔ, pi nɔ tsuaa nɔ nɛ e ma nyɛ ma ná he blɔ kaa e kɛ nyɛmimɛ Kristofohi maa bɔ.

19, 20. (a) Mɛni blɔ nɔ nɛ Kristo ye bua e se nyɛɛli bɔɔbɔɔbɔɔ nɛ a pee tsakemi ngɛ bɔ nɛ a yeɔ nihi nɛ a pee yayami nɛ hɛdɔ ngɛ he ɔ a sane ha a he? (b) Mɛni yi mi tomi etɛ a he je nɛ a fieɔ nihi nɛ a tsakee we a tsui ngɛ asafo ɔ mi?

19 Ngɛ jeha 1892 ɔ mi ɔ, Hwɔɔmi Mɔ ɔ de ke, “wa blɔ nya ní tsumi ji kaa waa fie nihi (Kristofohi) nɛ a kplɛɛ we nɔ kaa Kristo ngɔ e he kɛ ha kaa kpɔmi nɔ́ kɛ ha nihi tsuo ɔ kɛ je asafo ɔ mi.” (Kane 2 Yohane 10.) Ngɛ jeha 1904 ɔ mi ɔ, womi nɛ ji, The New Creation ɔ tsɔɔ mi kaa nihi nɛ a yaa nɔ nɛ a peeɔ ní yayahi ɔ ma nyɛ ma puɛ asafo ɔ. Ngɛ jamɛ a be ɔ mi ɔ, ke nɔ ko pee yayami nɛ hɛdɔ ngɛ he ɔ, asafo ɔ tsuo hlaa sane ɔ mi, nɛ asafo ɔ tsuo hii si nɛ a yeɔ sane ɔ. Se si fɔfɔɛ kaa kikɛ pɔɛ bami. Ngɛ jeha 1944 ɔ mi ɔ, Hwɔɔmi Mɔ ɔ tsɔɔ kaa asafo mi nikɔtɔmahi pɛ nɛ e sa kaa a ye yayami peeli a sane. Ngɛ jeha 1952 ɔ mi ɔ, Hwɔɔmi Mɔ ɔ ngɔ blɔ tsɔɔmi nɛ da Baiblo ɔ nɔ kɛ ha ngɛ bɔ nɛ a ma tsu sane yemi he ní ha, nɛ a tsɔɔ nɔ́ tutuutu he je nɛ a fieɔ nihi nɛ a tsakee we a tsui ngɛ asafo ɔmɛ a mi—konɛ asafo ɔ he nɛ tsɔ.

20 Kɛ je lɔ ɔ se ɔ, Kristo ye bua e se nyɛɛli nɛ a pee tsakemi ngɛ bɔ nɛ a yeɔ sanehi nɛ kɔɔ yayami nɛ hɛdɔ ngɛ he ɔ he. A tsɔse asafo mi nikɔtɔmahi saminya konɛ a tsu sane yemi he ní ngɛ blɔ nɛ maa sa Yehowa hɛ mi ɔ nɔ, nɛ́ a ye dami sane, nɛ́ a je mɔbɔ nami kpo. Mwɔnɛ ɔ, ke e hí kulaa a, wa na yi mi tomi etɛ he je nɛ e sa kaa a fie nihi nɛ a tsakee we a tsui ɔ kɛ je asafo ɔ mi: (1) konɛ nihi ko gbe Yehowa biɛ ɔ he guɛ, (2) konɛ e po asafo ɔ he piɛ nɛ jamɛ a yayami nɛ hɛdɔ ngɛ he ɔ nɛ ko wo asafo ɔ he mu, kɛ jehanɛ hu (3) konɛ ke e maa hi ɔ, yayami peelɔ ɔ nɛ tsake e tsui.

21. Mɛni blɔ nɔ nɛ nɔ fiemi blɔ nya tomi ɔ pee jɔɔmi kɛ ha Mawu we bi ngɛ?

21 O na bɔ nɛ nɔ fiemi blɔ nya tomi ɔ ye bua Kristo se nyɛɛli nɛ a ngɛ mwɔnɛ ɔ ha lo? Ngɛ blema Israel ɔ, yayami peeli náa ma a nɔ he wami wawɛɛ, nɛ be komɛ ɔ, a he hiɛ pe nihi nɛ a suɔ Yehowa nɛ a suɔ kaa a maa pee nɔ́ nɛ da a. Behi fuu ɔ, Israel ma a kɛ a ní peepee gbe Yehowa biɛ ɔ he guɛ, nɛ lɔ ɔ ha nɛ Mawu kua mɛ. (Yer. 7:23-28) Se mwɔnɛ ɔ, Yehowa kɛ nyumuhi kɛ yihi nɛ a bua jɔ mumi mi níhi a he ɔ ngɛ ní tsue. Akɛnɛ a jeɔ yayami peeli nɛ a tsakee we a tsui kɛ  jee a kpɛti he je ɔ, Satan nyɛ we nɛ e kɛ nihi nɛ a fieɔ mɛ ɔ nɛ tsu ní kaa ta hwumi níhi ngɛ e dɛ mi konɛ e kɛ puɛ asafo ɔ. A nyɛ we nɛ a ná asafo ɔ nɔ he wami. Wa ngɛ nɔ mi mami kaa Yehowa kplɛɛ wa nɔ kaa asafo. Mo kai kaa Yehowa wo si ke: “Ta hwumi níhi nɛ a sɔ̃ nɛ ɔmɛ ekoeko be nyɛe maa pee mo nɔ́ ko.” (Yes. 54:17) Anɛ wa fĩɔ asafo mi nikɔtɔmahi nɛ a tsuɔ a blɔ nya ní tsumihi nɛ he wa nɛ ji sane yemihi a he ní ɔ se lo?

A Wo Nɔ Nɛ Ha Wekuhi Tsuo A Biɛ ɔ Hɛ Mi Nyami

22, 23. Mɛni he je nɛ wa bua jɔ wa nyɛmimɛ Kristofohi nɛ a hi si ngɛ jeha 1900 jeha amɛ a mi ɔ a he wawɛɛ ɔ, se mɛni tsɔɔ kaa e he hia nɛ a pee tsakemi ngɛ weku si himi mi?

22 Tsakemi etɛne nɛ Kristo se nyɛɛli pee nɛ a ná he se ɔ kɔɔ gba si himi kɛ weku si himi he. Anɛ wa tsake bɔ nɛ wa naa weku si himi ha a ngɛ jehahi nɛ be ɔmɛ a mi lo? Ee. Kaa nɔ hyɛmi nɔ́ ɔ, ke wa kane Mawu we bi nɛ a hi si ngɛ jeha 1900 jeha amɛ a mi ɔ a he ní ɔ, wa naa kaa bɔ nɛ a ngɔ a he kɛ sa afɔle ha a ngɛ nyakpɛ. Wa bua jɔ bɔ nɛ a kɛ sɔmɔmi klɔuu ɔ pee oti ngɛ a si himi mi ɔ he wawɛɛ. Se ngɛ jamɛ a be ɔ mi nɔuu ɔ, wa na kaa e he hia nɛ a ná juɛmi nɛ da. Ngɛ mɛni blɔ nɔ?

23 Behi fuu ɔ, nyɛmimɛ nyumuhi kplɛɛ sɔmɔmi ní tsumi loo kpɔ mi nɔ hyɛmi ní tsumi nɛ a ha mɛ ɔ nɔ, nɛ enɛ ɔ haa nɛ a jeɔ a wekuhi a he nyɔhiɔhi abɔ. Jamɛ a be ɔ mi ɔ, a bui gba si himi kaa bɔ nɛ Ngmami ɔ tsɔɔ ɔ, nɛ a tui níhi nɛ maa fia Kristofohi a gba si himi kɛ ma si ɔ he munyu tsɔ̃. Anɛ si fɔfɔɛ kaa jã a ngɛ Kristo se nyɛɛli nɛ a ngɛ mwɔnɛ ɔ a kpɛti lo? Dɛbi!

E sɛ nɛ wa ha nɛ asafo ɔ mi ní tsumihi nɛ ngɔ wa be tsuo nɛ waa ngmɛɛ wa weku blɔ nya ní tsumihi a he

24. Mɛni blɔ nɔ nɛ Kristo ye bua e we bi anɔkualetsɛmɛ nɛ a ná juɛmi nɛ da ngɛ gba si himi kɛ weku si himi he?

24 Mwɔnɛ ɔ, e sɛ nɛ wa ha nɛ asafo ɔ mi ní tsumihi nɛ ngɔ wa be tsuo nɛ waa ngmɛɛ wa weku blɔ nya ní tsumihi a he. (Kane 1 Timoteo 5:8.) Jehanɛ hu, Kristo ye bua e se nyɛɛli anɔkualetsɛmɛ ngɛ zugba a nɔ bɔɔbɔɔ nɛ a na Ngmami ɔ mi ga womihi nɛ da nɛ kɔɔ gba si himi kɛ weku si himi he ɔ. (Efe. 3:14, 15) A pee womi nɛ ji, Making Your Family Life Happy ngɛ jeha 1978 ɔ mi. Ngɛ jeha 18 se ɔ, a pee womi nɛ ji, The Secret of Family Happiness. Jehanɛ hu, ngɛ Hwɔɔmi Mɔ ɔmɛ a mi ɔ, a ngma munyu slɔɔtohi nɛ maa ye bua nɔ kɛ e yo konɛ a kɛ Ngmami ɔ mi sisi tomi mlaahi nɛ tsu ní ngɛ a gba si himi ɔ mi.

25-27. Jehahi babauu ji nɛ ɔ, mɛni a pee konɛ a kɛ ye bua jokuɛwi?

25 Nɛ jokuɛwi ɔmɛ hu nɛɛ? Jehahi babauu ji nɛ ɔ, a pee níhi fuu nɛ maa ye bua mɛ hulɔ. Yehowa asafo ɔ pee ní kpakpahi nɛ maa ye bua jokuɛwi ngɛ jeha nɛ a ye ɔ nya. Jinɛ ke e ngɛ mi hluu loko a peeɔ níhi kɛ haa jokuɛwi, se amlɔ nɛ ɔ lɛɛ a peeɔ níhi kɛ haa mɛ be tsuaa be. Kaa nɔ hyɛmi nɔ́ ɔ, a ngma munyu nɛ ji, “Juvenile Bible Study” ɔ ngɛ The Golden Age ɔ mi kɛ je jeha 1919 kɛ ya si jeha 1921. Ngɛ lɔ ɔ se ɔ, a pee womiyo nɛ ji, The Golden Age ABC ngɛ jeha 1920, nɛ a  pee womi nɛ ji, Children ngɛ jeha 1941. Ngɛ jeha 1970 ɔmɛ a mi ɔ, a pee womihi nɛ ji, Listening to the Great Teacher, Your Youth—Getting the Best out of It Ye Womi Nɛ Sɛɛɔ Baiblo Mi Sanehi. A bɔni munyu nɛ e yi ji, “Young People Ask” ɔ ngmami ngɛ Awake! ɔ mi ngɛ jeha 1982 ɔ mi, nɛ lɔ ɔ ye bua nɛ a pee womi nɛ ji, Questions Young People Ask—Answers That Work ɔ ngɛ jeha 1989 ɔ mi.

Nihi a bua jɔ womiyo nɛ ji, Ye Baiblo Kasemi Womi ɔ he wawɛɛ ngɛ kpe nɛ ɔ sisi ngɛ Germany

26 Mwɔnɛ ɔ, wa pee Young People Ask womi ɔ nɛ a mi munyuhi ngɛ e be nya a kpohi enyɔ, nɛ a ngmaa munyuyi ɔ eko ngɛ wa Intanɛti ní tsumi he nɛ ji jw.org ɔ nɔ. Jehanɛ hu, womi nɛ ji, Learn From the Great Teacher a hu ngɛ. A pee níhi fuu ngɛ wa Intanɛti ní tsumi he ɔ nɔ kɛ ha jokuɛwi, ekomɛ ji, nihi nɛ a tu a he munyu ngɛ Baiblo ɔ mi ɔ a he fonihi, Baiblo kasemi ní tsumihi nɛ a pee kɛ ha jokuɛwi, nɔ́ he susumi níhi, videohi, Baiblo mi sanehi nɛ a tɛni, kɛ Baiblo kasemi níhi kɛ ha jokuɛwi nɛ a ye jeha etɛ, kɛ ni nɛmɛ nɛ a sui jã. E ngɛ heii kaa kɛ je be nɛ Kristo wo jokuɛwi ngɛ e kɔni bɔkɔ mi benɛ  e ngɛ zugba a nɔ kɛ ba si mwɔnɛ ɔ, bɔ nɛ Kristo naa jokuɛwi ha a tsakee we. (Mar. 10:13-16) E suɔ nɛ jokuɛwi nɛ a ngɛ wa kpɛti ɔ nɛ a nu he kaa wa suɔ mɛ, nɛ wa suɔ nɛ́ waa lɛ mɛ saminya ngɛ mumi mi.

27 Yesu suɔ hu kaa jokuɛwi ma ná he piɛ pomi konɛ nihi ko ye mɛ awi. Akɛnɛ je mi bami yaya ngɛ hɛ mi yae ngɛ je ɔ mi he je ɔ, jokuɛwi nɛ a yeɔ mɛ awi nɛ a peeɔ mɛ basabasa a pɔ he wawɛɛ. Lɔ ɔ he ɔ, a pee womihi nɛ a mi munyu ɔmɛ ngɛ tɛɛ kɛ ha fɔli konɛ a kɛ po a bimɛ a he piɛ kɛ je yi mi wami ní peepeehi a he. *

28. (a) Kaa bɔ nɛ Ezekiel nina nɛ kɔɔ sɔlemi we ɔ he ɔ tsɔɔ ɔ, mɛni e biɔ nɛ waa pee loko wa ma nyɛ maa hi jami klɔuu ɔ mi? (b) Mɛni o fia o pɛɛ si kaa o maa pee?

28 Kristo ya nɔ nɛ e tsu e se nyɛɛli a he bɔ nɛ pee nɛ a hi si ngɛ Yehowa mlaahi nɛ a nɔ kuɔ nɛ kɔɔ je mi bami he ɔ nya konɛ a ná he se. Ke wa susu enɛ ɔ he ɔ, anɛ e pee we wɔ bua jɔmi lo? Mo susu mumi mi sɔlemi we nɛ Ezekiel na ngɛ nina mi ɔ he ekohu. Mo kai sɔlemi we ɔ agbo ngua amɛ. Ngɛ anɔkuale mi ɔ, jamɛ a sɔlemi we ɔ pi nɔ́ nitsɛnitsɛ, mohu ɔ, e ji mumi mi nɔ́. Se kɛ̃ ɔ, anɛ wa naa lɛ kaa e ji nɔ́ nitsɛnitsɛ lo? Matsɛ Yemi Asa a nɔ nɛ wa maa ya, Baiblo ɔ mi nɛ wa ma bli, loo nihi a sinya nɛ wa maa fia a tsɔɔ we kaa wa sɛ sɔlemi we ɔ mi. Lɔ ɔmɛ lɛɛ a ji níhi nɛ wa naa. Osatotsɛ po ma nyɛ maa pee ní nɛ ɔmɛ tsuo, se e be nyɛe maa sɛ Yehowa sɔlemi we ɔ mi. Se ke wa peeɔ ní nɛ ɔmɛ tsuo, nɛ waa kɛ Yehowa mlaahi nɛ a nɔ kuɔ nɛ kɔɔ je mi bami he ɔ tsu ní, nɛ waa kɛ juɛmi nɛ da ja Yehowa ngɛ anɔkuale mi kɛ wa tsui tsuo ɔ, lɛɛ wa sɛ sɔlemi we ɔ mi, nɛ wa ngɛ sɔmɔe ngɛ he nɛ ngɛ klɔuu, nɛ ji blɔ nya nɛ Yehowa to kɛ ha e jami klɔuu ɔ! Nyɛ ha nɛ wa bua nɛ jɔ he blɔ ngua nɛ ɔ he. Jehanɛ hu, nyɛ ha nɛ waa ya nɔ nɛ waa pee nɔ́ tsuaa nɔ́ nɛ wa ma nyɛ konɛ waa kɛ je mi bami he mlaahi nɛ Yehowa wo ɔmɛ nɛ tsu ní!

^ kk. 2 Ngɛ jeha 1932 ɔ mi ɔ, womi nɛ ji, Vindication Kpo 2 ɔ tsɔɔ kaa Baiblo gbamihi nɛ gbla juɛmi kɛ ya Mawu we bi nɛ a maa kpale kɛ ya a ma mi ɔ nɔ ɔ ba mi ngɛ wa be nɛ ɔ mi, nɛ e kɔ we he lo nya Israel he se mohu mumi mi Israel. Jamɛ a gbami ɔmɛ tsɔɔ kaa a maa to jami klɔuu sisi ekohu. March 1, 1999 Hwɔɔmi Mɔ ɔ tsɔɔ mi kaa sɔlemi we nɛ Ezekiel na ngɛ nina mi ɔ kɔɔ jami klɔuu nɛ a kpale maa to sisi ekohu ɔ he, lɔ ɔ he ɔ, e ná e mi bami nɛ he hia ngɛ mumi mi ngɛ nyagbe ligbi nɛ ɔmɛ a mi.

^ kk. 6 Kita nɛ ɔ ngmɛ́ blɔ kaa nyumu kɛ yo pɛ nɛ a hi tsu kake mi, ja a bli sinya a kɛ fɔ si gbajaa bɔ nɛ nihi ma nyɛ maa na mɛ—loo ja a ji nɔ kɛ e yo loo weku li nitsɛnitsɛ. A kɛ jehahi babauu ti kita nɛ ɔ mi daa ngɛ Mɔtu Mawu Jami blɔ nya tomi nɛ a peeɔ ngɛ Betel ɔ mi.

^ kk. 13 Taba kɛ ní tsumi ngɛ blɔ yaya nɔ ɔ ekomɛ ji e numi loo e kpemi loo e dumi ngɛ yi tomi nɛ ɔmɛ a he.

^ kk. 27 Kaa nɔ hyɛmi nɔ́ ɔ, hyɛ womi nɛ ji, Learn From the Great Teacher a yi 32; hyɛ munyu nɛ ji “Keep Your Children Safe!” nɛ je kpo ngɛ October 2007 Awake! ɔ mi ɔ hulɔ.