“Benɛ i sɛ gba si himi mi jeha 25 se ɔ, i kɛ ye huno ɔ wa po gba mi. Ye bimɛ ɔmɛ je anɔkuale ɔ mi. Hiɔhi nɛ a mi wa slɔɔtohi ba fia mi. I hao wawɛɛ. I nɛ ye je mi nya, nɛ i nu he kaa nɔ́ ko be nɛ ma nyɛ ma pee hu. I kpa asafo mi kpehi yami, nɛ i yɛ fiɛɛmi hu.”—June.

NƆ TSUAA NƆ peeɔ yeyeeye. Mawu we bi po peeɔ yeyeeye. La polɔ ɔ ngma ke, “Yi mi susumi tsɔ ha nɛ i pee basaa.” (La 94:19) Yesu tsɔɔ kaa ngɛ nyagbe be ɔ mi ɔ, “si himi ɔ mi yeyeeye peemi” ma nyɛ ma ha nɛ e he maa wa ha nihi kaa a ma sɔmɔ Yehowa. (Luka 21:34, NW) Nɛ mo nɛɛ? Anɛ ohia, weku mi haomihi, aloo hiɔ ha nɛ o peeɔ yeyeeye lo? Mɛni blɔ nɔ Yehowa maa gu kɛ ye bua mo konɛ o nyɛ nɛ o da nya?

“He Wami Kpetekpleenyɛ”

Ja nɔ ko ye bua wɔ loko wa ma nyɛ ma tsu níhi nɛ haa nɛ wa peeɔ yeyeeye ɔ a he ní. Bɔfo Paulo ngma ke: ‘Nihi haoɔ wɔ be tsuaa be. Wa yi mi peeɔ wɔ enyɔɔnyɔ. A kongoɔ wɔ basabasa.’ Se kɛ̃ ɔ, e tsɔɔ hu kaa, “a yi wa nɔ,” “wa nine mi wui nyu,” nɛ “wa gbo we.” Mɛni yeɔ bua wɔ nɛ wa fĩɔ si? Yehowa nɛ ji wa Mawu ope ɔ, haa wɔ ‘he wami kpetekpleenyɛ.’2 Korinto Bi 4:7-9.

Mo susu blɔ nɔ nɛ Yehowa gu kɛ ha mo “he wami kpetekpleenyɛ” be ko nɛ be ɔ he nɛ o hyɛ. Anɛ o kai bɔ nɛ magbɛ nɔ munyu ko nɛ a tu wo mo he wami, nɛ lɔ ɔ ha nɛ o ná hɛsa kɛ ha Yehowa suɔmi nɛ ngɛ daa a lo? Benɛ o yaa fiɛɛmi nɛ o tsɔɔ nihi kaa hwɔɔ se ɔ, zugba a maa pee Paradeiso ɔ, anɛ hemi kɛ yemi nɛ o ngɛ ngɛ Yehowa si womi ɔmɛ a mi ɔ mi wɛ lo? Ke wa ya Kristofohi a kpehi nɛ wa tu wa hemi kɛ yemi ɔ he munyu kɛ tsɔɔ nihi ɔ, wa náa he wami kɛ daa je nɛ ɔ mi nya gbamihi a nya, nɛ wa náa tue mi jɔmi. Enɛ ɔ haa nɛ wa nyɛɔ nɛ wa jaa Yehowa kɛ bua jɔmi.

‘Nyɛɛ Ka Yehowa Nɛ Nyɛɛ Hyɛ, Nɛ Nyɛ Maa Na Kaa E Hi’

Anɔkuale mi ɔ, o ma nyɛ maa nu he kaa níhi hyɛ ngɛ o kuɛ nɔ nɛ o be mumu womi he. Kaa nɔ hyɛmi nɔ́ ɔ, Yehowa deɔ wɔ ke wa hla Matsɛ Yemi ɔ se blɔ kekle nɛ waa ya nɔ nɛ wa tsu Mawu jami mi ní tsumihi nɛ wa tsuɔ ɔ. (Mateo 6:33; Luka 13:24) Ke si temi kɛ womi, hiɔ, loo weku mi haomihi ha we nɛ waa pee fuu hu nɛɛ? Aloo ke o ní tsumi ngɔɔ o be kɛ o he wami, nɛ o nyɛ we nɛ o tsu asafo ɔ mi ní tsumihi hu nɛɛ? Ke níhi fuu ngɛ o kuɛ nɔ nɛ e sa kaa o tsu, se o be be kɛ he wami nɛ o kɛ ma tsu ɔ, o ma nyɛ maa pee yeyeeye. Eko ɔ, o susu po kaa níhi nɛ Yehowa ngɛ bie nɛ o pee ɔ hiɛ tsɔ.

Yehowa nuɔ nɔ sisi. Enɛ ɔ he ɔ, e hyɛ we blɔ kaa waa pee nɔ́ ko nɛ wa be nyɛe maa pee. E le kaa ke nɔ ko hao ɔ, e heɔ be loko e ma nyɛ maa da e nane nɔ ekohu.La 103:13, 14.

Kaa nɔ hyɛmi nɔ́ ɔ, mo susu bɔ nɛ Yehowa hyɛ gbalɔ Eliya nɔ ha a he nɛ o hyɛ. Benɛ Eliya kɔni mi wo nyu, nɛ sawale nu lɛ, nɛ e tu fo kɛ ho nga a nɔ ya a, anɛ Yehowa kã e hɛ mi nɛ e fã lɛ kaa e ho nɛ e ya tsu e ní tsumi ɔ lo? Dɛbi. Yehowa tsɔ bɔfo ko si enyɔ sɔuu nɛ e ya tsɛ̃ɛ̃ Eliya  blɛuu nɛ e ha lɛ niye ní nɛ e ye. Ligbi 40 se po ɔ, loloolo ɔ, Eliya pee yeyeeye nɛ e ngɛ gbeye yee. Mɛni ekohu Yehowa pee kɛ ye bua lɛ? Kekleekle ɔ, Yehowa ha nɛ e na kaa e ma nyɛ maa po e he piɛ. Enyɔne, Yehowa kɛ ‘gbi nɛ he jɔ blɛuu’ wo Eliya bua. Nyagbe ɔ, Yehowa ha nɛ e le kaa e sɔmɔli babauu ngɛ nɛ a kɛ anɔkuale yemi ngɛ Mawu jae. Kɛkɛ nɛ Eliya nɔ gbagba te, nɛ e kɛ kã tsa e gbami ní tsumi ɔ nɔ. (1 Matsɛmɛ 19:1-19) Mɛni wa kaseɔ ngɛ enɛ ɔ mi? Benɛ yeyeeye peemi ha Eliya gbɔjɔ ɔ, Yehowa to e tsui si ha lɛ nɛ e na lɛ mɔbɔ. Yehowa tsakee we. E susuu wɔ hu wa he jã nɔuu.

Ke o ngɛ nɔ́ nɛ o maa pee ha Yehowa he susue ɔ, mo susu nyɛmi nɛ o ngɛ ɔ hu he. Koo ngɔ nɔ́ nɛ o ma nyɛ ma tsu mwɔnɛ ɔ kɛ to nɔ́ nɛ o tsu be ko nɛ be ɔ he. Nɔ́ hetomi nɔ́ ko ji nɛ ɔ nɛ: Ke fo tulɔ ko kpa fo tumi nyɔhiɔhi abɔ loo jehahi fuu nɛ e je fo tumi sisi ekohu ɔ, e ma he be loko e he maa wa nɛ e ma nyɛ maa tu fo kaa bɔ nɛ e tuu sa a. Sisije ɔ, e kɛ oti nyafinyafi komɛ maa e hɛ mi kɛ ya siɔ benɛ e náa he wami. Kristofohi ngɛ kaa fo tuli. A kɛ oti komɛ ma a hɛ mi ngɛ fo nɛ a ngɛ tue ɔ mi. (1 Korinto Bi 9:24-27) Mɛni he je nɛ o kɛ mumi mi oti nɛ o ma nyɛ maa su he amlɔ nɛ ɔ ma we o hɛ mi? Kaa nɔ hyɛmi nɔ́ ɔ, o ma nyɛ maa ngɔ asafo mi kpe yami kɛ pee oti ngɛ o hɛ mi. Moo sɔle ha Yehowa konɛ e ye bua mo nɛ o su oti nɛ o kɛ ma o hɛ mi ɔ he. Be mi nɛ o he ngɛ wae ngɛ mumi mi ɔ, o ‘maa na kaa Yehowa hi.’ (La 34:8) Mo kai kaa nɔ́ tsuaa nɔ́ nɛ o maa pee kɛ tsɔɔ kaa o suɔ Yehowa a, ke nyafii po ɔ, e bua jɔ he.Luka 21:1-4.

Yehowa hyɛ we blɔ kɔkɔɔkɔ kaa waa pee nɔ́ ko nɛ wa be nyɛe maa pee

“Nɔ́ Nɛ Wo Mi He Wami”

Mɛni blɔ nɔ Yehowa gu kɛ wo June he wami nɛ e kpale kɛ ba e ngɔ? June de ke: “I sɔleɔ ha Yehowa nɛ i deɔ lɛ ke e ye kɛ bua mi. Kɛkɛ nɛ ye binyumu ɔ e yo ba de mi ke a maa pee kpe ko ngɛ ma a mi. I pee ye juɛmi kaa ma ya kpe ɔ ligbi kake. Ye bua jɔ wawɛɛ kaa i ba piɛɛ Yehowa we bi a he ekohu! Kpe nɛ ɔ ji nɔ́ nɛ wo mi he wami. Amlɔ nɛ ɔ, i kɛ bua jɔmi ngɛ Yehowa sɔmɔe ekohu. Ye tsui nɔ ye mi saminya ngɛ si himi mi. I ba yɔse kaa i hia nyɛmimɛ nyumuhi kɛ yihi, nɛ e sa nɛ ma kplɛɛ nɛ a ye kɛ bua mi. Ye bua jɔ kaa i nyɛ nɛ i kpale kɛ ba.”