Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Sɛ Womi Nɛ Je Blɔ Tsɔɔmi Ajla Toli Ɔmɛ A Ngɔ

Sɛ Womi Nɛ Je Blɔ Tsɔɔmi Ajla Toli Ɔmɛ A Ngɔ

Nyɛmi nɛ wa suɔ:

Kaa bɔ nɛ o le ɔ, Baiblo ɔ ji womi ko nɛ tu nimli a he munyu wawɛɛ. Nihi nɛ Baiblo ɔ tu a he munyu ɔ a kpɛti nihi fuu ji nyumuhi kɛ yihi anɔkualetsɛmɛ nɛ a kɛ haomihi nɛ waa kɛ kpee mwɔnɛ ɔ eko kpe. A ji ‘nimli kaa wɔ nɔuu.’ (Yakobo 5:17) Haomihi kɛ yeyeeye peemi ha nɛ a ti ni komɛ a kɔni mi wo nyu. A kpɛti ni komɛ a weku li aloo nihi nɛ a kɛ mɛ ngɛ jami kake mi po pee mɛ nɔ́ dɔdɔɛ. Nɛ a ti nihi fuu a he nile kojo mɛ ngɛ tɔmihi nɛ a tɔ̃ ɔ he je.

Anɛ jamɛatsɛmɛ ɔmɛ si Yehowa kulaa lo? Dɛbi. A ti nihi fuu pee a ní kaa la polɔ ɔ. E sɔle ke: “I ngɛ lalaalo woe kaa to nɛ laa; mo hla imi, o tsɔlɔ ɔ koo! Ejakaa i je we ye hɛ ngɛ o mlaa amɛ a nɔ.” (La 119:176) Anɛ mo hu o ma nyɛ ma de jã nɔuu lo?

Yehowa hɛ ji nihi nɛ a jaa lɛ nɛ a je asafo ɔ mi ɔ a nɔ kɔkɔɔkɔ. Mohu ɔ, e hlaa a se blɔ. Behi fuu ɔ, e peeɔ jã kɛ guu a nyɛmimɛ Odasefohi a nɔ. Kaa nɔ hyɛmi nɔ́ ɔ, mo susu bɔ nɛ Yehowa ye bua e sɔmɔlɔ Hiob nɛ e kɛ haomihi babauu kpe ɔ he nɛ o hyɛ. E ye ohia, e bimɛ gbo, nɛ hiɔ ngua ko hu fia lɛ. Nihi nɛ jinɛ e sa kaa a ko wo Hiob bua a, a ba tu munyu dɔdɔɛ mohu kɛ si lɛ. Se Hiob kua we Yehowa kɔkɔɔkɔ, e ngɛ mi kaa be ko ɔ, e ná susumi nɛ dɛ mohu. (Hiob 1:22; 2:10) Mɛni blɔ nɔ Yehowa gu kɛ ye bua Hiob nɛ e dla e juɛmi?

Blɔ kake nɛ Yehowa gu nɔ kɛ ye bua Hiob ji kaa e ha nɛ Hiob nyɛmi Yehowa jalɔ ko nɛ a tsɛɛ lɛ ke Elihu ɔ ye bua lɛ. Benɛ Hiob ngɛ kɔmɔ yee ɔ, Elihu bu lɛ tue, nɛ lɔ ɔ wo lɛ he wami nɛ e tu munyu kɛ tsɔɔ Hiob. Mɛni e de Hiob? Anɛ e tu munyu kɛ si lɛ, aloo e tu munyu kɛ gbe lɛ zo lo? Anɛ Elihu bu e he kaa e nɔ kuɔ pe Hiob lo? Elihu pee we jã kulaa! Mawu mumi ɔ wo Elihu kã nɛ e de ke: “Bɔ nɛ o ngɛ ɔ, jã nɔuu imi hu i ngɛ ngɛ Mawu hɛ mi. Imi hu tabo zu ɔ kɛ̃ lɛ a kɛ puɛ mi.” Kɛkɛ nɛ e wo Hiob bua ke: “Lɔ ɔ he ɔ, koo ye mi gbeye; pi nɔmlɔ nɛ ke e daa si ngɛ o hɛ mi nɛ o tsui maa po ji mi.” (Hiob 33:6, 7) Elihu ha we nɛ Hiob nɛ e ye kɔmɔ, se mohu e je suɔmi mi nɛ e wo Hiob ga, nɛ e wo lɛ he wami hulɔ.

Wa kpa mo pɛɛ, wa suɔ nɛ o le kaa yi mi tomi nɛ ɔ nɔuu he je nɛ wa ngma womiyo nɛ ɔ nɛ. Kekleekle ɔ, wa ta ni komɛ nɛ a je asafo ɔ mi ɔ a nya mi, nɛ wa bu níhi nɛ a de ɔ tue. Wa susu a si fɔfɔɛ kɛ níhi nɛ a de wɔ ɔ he saminya. (Abɛ 18:13) Lɔ ɔ se ɔ, wa ya Ngmami ɔ mi nɛ waa kɛ sɔlemi susu bɔ nɛ Yehowa ye bua e sɔmɔli nɛ a hi si blema nɛ a ya je si fɔfɔɛ kaa kikɛ ɔ mi ɔ a he. Nyagbe ɔ, wa bua munyuhi nɛ ngɛ Ngmami ɔ mi, kɛ wa be nɛ ɔ mi níhi a si kpamihi a nya kɛ pee womiyo nɛ ɔ. Waa kɛ bua jɔmi ngɛ mo he wami woe nɛ o kane womiyo nɛ ɔ. Mo ná nɔ mi mami kaa wa suɔ mo.

Yehowa Odasefohi A Blɔ Tsɔɔmi Ajla Toli