Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Bua Jɔmi Ma Nyɛ Maa Hi O Weku ɔ Mi

 FA 5

Bɔ Nɛ O Kɛ O Weku Li Maa Hi Si Ngɛ Tue Mi Jɔmi Mi Ha

Bɔ Nɛ O Kɛ O Weku Li Maa Hi Si Ngɛ Tue Mi Jɔmi Mi Ha

‘Nyɛ ha nɛ a na subai nɛ ɔmɛ ngɛ nyɛ he kaa tade nɛ nyɛ wo: mi mi jɔmi, he si bami, kpoo peemi kɛ tsui si tomi.’Kolose Bi 3:12

Ke nɔ ko sɛ gba si himi mi pɛ kɛkɛ e ná weku ehe. E ngɛ mi kaa o suɔ o fɔli a sane nɛ o buu mɛ mohu lɛɛ, se o he piɛɛlɔ ɔ ba pee nɔ nɛ he hia mo pe kulaa ngɛ zugba a nɔ. Enɛ ɔ he ma nyɛ maa wa kɛ ha o weku li ɔmɛ a ti ni komɛ kaa a maa kplɛɛ nɔ. Se Baiblo sisi tomi mlaahi ma nyɛ maa ye bua mo nɛ o ná juɛmi nɛ da, konɛ tue mi jɔmi nɛ hi o kɛ o weku li ɔmɛ nyɛ kpɛti be mi nɛ o ngɛ mɔde bɔe kaa o maa to weku ehe sisi ɔ.

 1 MO NÁ O WEKU LI ƆMƐ A HE JUƐMI KPAKPA

NƆ́ NƐ BAIBLO Ɔ DE: “Buu o tsɛ kɛ o nyɛ.” (Efeso Bi 6:2) Ngɛ jeha abɔ nɛ o ye ɔ tsuo se ɔ, e sa nɛ be tsuaa be ɔ, o bu o fɔli ɔmɛ. Mo kadi kaa o he piɛɛlɔ ɔ hu ji nɔ ko bi, nɛ e sa nɛ e bu e fɔli. “Suɔmi hɛ kɔɛ.” Enɛ ɔ he ɔ, ko ha nɛ huɛ bɔmi nɛ ngɛ o he piɛɛlɔ ɔ kɛ e fɔli a kpɛti ɔ nɛ hao mo.1 Korinto Bi 13:4; Galatia Bi 5:26.

NƆ́ NƐ O MA NYƐ MAA PEE:

  • Koo tu munyu komɛ kaa, “O weku li bui mi kulaa” loo “Nɔ́ ko be nɛ ke i pee ɔ, o yayo bua jɔ he”

  • Moo bɔ mɔde nɛ o nu o he piɛɛlɔ ɔ sisi

 2 BE KO NGƐ NƐ E SA KAA O NGƆ O NANE KƐ MA SI

NƆ́ NƐ BAIBLO Ɔ DE: “Enɛ ɔ he je nɛ nyumu siɔ e tsɛ kɛ e nyɛ, nɛ e ngɔɔ e he ya mɛtɛɛ e yo he nɛ a peeɔ nɔ kake ɔ nɛ.” (1 Mose 2:24) Ke o sɛ gba si himi mi ɔ, o fɔli ma nyɛ ma susu kaa loloolo ɔ, o ngɛ a sisi nɛ a maa suɔ kaa a kɛ a he maa wo o gba si himi ɔ mi.

O kɛ o he piɛɛlɔ ɔ lɛ nyɛ maa tsɔɔ níhi nɛ a ma nyɛ maa pee ha nyɛ kɛ níhi nɛ a be nyɛe peemi, kɛkɛ ɔ, nyɛɛ je suɔmi mi nɛ nyɛ ha nɛ a le. Nyɛɛ kɛ mɛ nɛ sɛɛ he ní ngɛ bumi blɔ nɔ. (Abɛ 15:1) He si bami, mi mi jɔmi, kɛ tsui si tomi maa ye bua nyɛ konɛ nyɛɛ kɛ nyɛ weku li nɛ hi si saminya, nɛ ‘nyɛɛ tsɔɔ kaa nyɛ suɔ mɛ niinɛ.’Efeso Bi 4:2.

NƆ́ NƐ O MA NYƐ MAA PEE:

  • Ke bɔ nɛ weku li kɛ a he ngɛ nyɛ gba si himi ɔ mi woe ha a haoɔ nyɛ ɔ, o kɛ o he piɛɛlɔ ɔ nɛ susu he

  • E sa nɛ nyɛ ni enyɔ ɔmɛ tsuo nyɛɛ kplɛɛ bɔ nɛ nyɛ ma tsu sane ɔ he ni ha a nɔ