Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Bua Jɔmi Ma Nyɛ Maa Hi O Weku ɔ Mi

 FA 9

O Kɛ O Weku ɔ Nɛ Bla Kɛ Ja Yehowa

O Kɛ O Weku ɔ Nɛ Bla Kɛ Ja Yehowa

‘Nyɛ ja nɔ nɛ pee hiɔwe kɛ zugba a.’Kpojemi 14:7

Kaa bɔ nɛ o kase ngɛ womiyo nɛ ɔ mi ɔ, sisi tomi mlaahi fuu ngɛ Baiblo ɔ mi nɛ maa ye bua o kɛ o weku ɔ. Yehowa suɔ kaa o bua nɛ jɔ. E wo si kaa ke o kɛ e sɔmɔmi ye kekle blɔ he ɔ, e kɛ ‘ní kpahi tsuo maa piɛɛ he ngɔ ha mo.’ (Mateo 6:33) E suɔ nɛ waa pee e huɛmɛ. Enɛ ɔ he ɔ, moo pee nɔ́ tsuaa nɔ́ nɛ o ma nyɛ konɛ o kɛ Mawu nɛ pee huɛ. Enɛ ɔ ji he blɔ nɛ pe kulaa nɛ nɔ ko ma nyɛ ma ná.Mateo 22:37, 38.

 1 HA NƐ O KƐ YEHOWA HUƐ BƆMI Ɔ MI NƐ WA

NƆ́ NƐ BAIBLO Ɔ DE: “Ma pee nyɛ tsɛ, nɛ nyɛ maa pee ye binyumuhi kɛ ye biyihi. Imi, Nyɔmtsɛ Ope ɔ, lɛ i de.” (2 Korinto Bi 6:18) Mawu suɔ nɛ o ba pee e huɛ nitsɛnitsɛ. Sɔlemi ji blɔ kake nɔ nɛ o maa gu kɛ pee jã. Yehowa ha wɔ he blɔ kaa waa “sɔle be tsuaa be.” (1 Tesalonika Bi 5:17) E suɔ nɛ o de lɛ o tsui mi sanehi kɛ o hiami níhi. (Filipi Bi 4:6) Ke o kɛ o weku ɔ peeɔ kake kɛ sɔleɔ ɔ, a ma yɔse kaa o naa Mawu kaa nɔ ko nɛ ngɛ nitsɛnitsɛ.

Ngɛ sɔlemi nɛ o maa sɔle ha Mawu se ɔ, e sa nɛ o bu lɛ tue. O ma nyɛ maa pee enɛ ɔ kɛ gu e Munyu ɔ, kɛ womihi nɛ a da Baiblo ɔ nɔ kɛ pee ɔ nɛ o maa kane ɔ nɔ. (La 1:1, 2) Mo susu nɔ́ nɛ o kase ɔ he. (La 77:11, 12) Mawu tue nɛ o maa bu ɔ biɔ nɛ o ya Kristofohi a kpehi daa.La 122:1-4.

Yehowa he ní nɛ o maa sɛɛ ha nihi ɔ ma ha nɛ o kɛ lɛ nyɛ huɛ bɔmi ɔ mi maa wa. Ke o pee jã a, e ma ha nɛ o maa hɛ mo kɛ su e he.Mateo 28:19, 20.

NƆ́ NƐ O MA NYƐ MAA PEE:

  • Moo to be nɛ o kane Baiblo ɔ nɛ o sɔle daa ligbi

  • Kaa weku ɔ, e sa nɛ nyɛ ha nɛ Mawu jami mi ní tsumihi a he nɛ hia nyɛ pe hɛja jemi kɛ he jɔɔmi

2 NYƐƐ PEE NYƐ WEKU MAWU JAMI Ɔ

NƆ́ NƐ BAIBLO Ɔ DE: “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.” (Yakobo 4:8) E sa nɛ nyɛɛ to be kɛ ha weku Mawu jami, nɛ nyɛ ko po mi. (1 Mose 18:19) Se pi lɔ ɔ pɛ. E sa nɛ o kai Mawu daa ligbi ngɛ o si himi mi. Mo ha nɛ huɛ bɔmi nɛ ngɛ o weku ɔ kɛ Mawu kpɛti ɔ mi nɛ wa kɛ gu e he ní nɛ o maa sɛɛ ha mɛ “be nɛ nyɛ ngɛ we mi, be nɛ nyɛ hia blɔ, be nɛ nyɛ hwɔɔ si, kɛ be nɛ nyɛ te si” ɔ nɔ. (5 Mose 6:6, 7) Mo ha nɛ e pee o pɛɛ si fiami kaa o maa pee kaa Yoshua nɛ e de ke: ‘Imi kɛ ye we ɔ lɛɛ, wa ma sɔmɔ Yehowa’ a.Yoshua 24:15.

NƆ́ NƐ O MA NYƐ MAA PEE:

  • Moo to blɔ nya kɛ tsɔse o weku mi bi ɔmɛ daa, konɛ o tsu a hiami níhi a he ní ha mɛ