Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Bua Jɔmi Ma Nyɛ Maa Hi O Weku ɔ Mi

 FA 7

Bɔ Nɛ O Ma Tsɔse O Bi ɔ Ha

Bɔ Nɛ O Ma Tsɔse O Bi ɔ Ha

“Mlaahi nɛ i ngɛ nyɛ woe mwɔnɛ ɔ, nyɛ hɛ nɛ hi a nɔ. Nyɛɛ tsɔɔ nyɛ bimɛ.”—5 Mose 6:6, 7

Be nɛ Yehowa to weku sisi ɔ, e kɛ fami ha fɔli kaa a hyɛ a bimɛ ɔmɛ a nɔ. (Kolose Bi 3:20) E ji fɔli a blɔ nya ní tsumi kaa a ma tsɔse a bimɛ nɛ a suɔ Yehowa, nɛ a ba pee nikɔtɔmahi nɛ a le a blɔ nya ní tsumi. (2 Timoteo 1:5; 3:15) E sa nɛ o le nɔ́ nɛ ngɛ o binyumu ɔ loo o biyo ɔ tsui mi. Ngɛ anɔkuale mi ɔ, nɔ hyɛmi nɔ́ nɛ o maa pee ɔ he hia wawɛɛ. O ma nyɛ maa tsɔɔ o bimɛ Yehowa munyu ɔ saminya ke o sɛ hlami nɛ o kɛ wo mo nitsɛ o tsui mi.La 40:8.

 1 E HE KO WA HA O BIMƐ KAA A KƐ MO MAA SƐƐ NÍ

NƆ́ NƐ BAIBLO Ɔ DE: “Ke nɔ ko ngɛ munyu tue ɔ, nyɛɛ bu tue; nyɛ he ko sɔ kɛ tu munyu.” (Yakobo 1:19) Mo ha nɛ o bimɛ ɔmɛ nɛ a na kaa a ma nyɛ kɛ mo maa sɛɛ ní faa. E sa nɛ o ha nɛ a le kaa be saa be nɛ a suɔ kaa a kɛ mo maa sɛɛ ní ɔ, o maa bu mɛ tue. Nyɛ ha nɛ tue mi jɔmi nɛ hi we ɔ mi konɛ e he ko wa ha mɛ kaa a ma je a gbi kpo. (Yakobo 3:18) Ke a yɔse kaa o sane he wa nɛ o kãa nɔ hɛ mi ɔ, a be mo a tsui mi munyu dee. Enɛ ɔ he ɔ, moo to o tsui si ha o bimɛ ɔmɛ, nɛ o ha nɛ a le kaa o suɔ a sane.Mateo 3:17; 1 Korinto Bi 8:1.

NƆ́ NƐ O MA NYƐ MAA PEE:

  • Mo ná be kɛ ha o bi ɔmɛ ke a ngɛ hlae nɛ a kɛ mo maa sɛɛ ní

  • O kɛ mɛ nɛ pɔ ní sɛɛmi, se pi be mi nɛ nyagba ko te si pɛ

2 MOO BƆ MƆDE NƐ O NU MƐ SISI

NƆ́ NƐ BAIBLO Ɔ DE: “Ní lelɔ peeɔ e ní kɛ juɛmi.” (Abɛ 13:16) Be komɛ ngɛ nɛ e sa nɛ o kɛ nɔ́ se kɔmi nɛ tsu ní konɛ o nu nɔ́ nɛ o bi ɔ ngɛ tsɔɔe tutuutu ɔ sisi. Be ngɛ nɛ jokuɛwi woɔ munyu he za loo a deɔ ní komɛ nɛ pi jã kulaa ji sane ɔ. ‘Ke nɔ kɛ mo ngɛ munyu tue ɔ, bu tue loko o ha heto. Ke o pee we jã a, a ma tsɛ mo kuasia.’ (Abɛ 18:13) O mi mi ko fu mɛ mlamlaamla.Abɛ 19:11.

NƆ́ NƐ O MA NYƐ MAA PEE:

  • Ke o bi ɔmɛ kɛ mo ngɛ munyu tue ɔ, ngɛ nɔ́ nɛ a ma de ɔ tsuo se ɔ, koo kpɔ munyu kɛ wo a nya, se mohu mo ná a he tsui

  • Moo bɔ mɔde nɛ o kai bɔ nɛ o nu níhi a he ha, kɛ níhi nɛ o bua jɔ he be mi nɛ o ye jeha nɛ a ye ɔ

 3 NYƐƐ PEE KAKE KƐ TSƆSE MƐ

NƆ́ NƐ BAIBLO Ɔ DE: “Ye bi, ke o tsɛ ngɛ mo tsɔsee ɔ, bu tue! Ke o nyɛ hu ngɛ mo ní tsɔɔe ɔ, ko kua.” (Abɛ 1:8) Yehowa ha tsɛ kɛ nyɛ tsuo he wami ngɛ a bimɛ ɔmɛ a nɔ. Enɛ ɔ he ɔ, e sa nɛ nyɛ tsɔse nyɛ bimɛ ɔmɛ nɛ a kɛ bumi nɛ ha nyɛ. (Efeso Bi 6:1-3) Ke fɔli ɔmɛ ‘pee we a nya kake’ ɔ, jokuɛwi ɔmɛ yɔseɔ. (1 Korinto Bi 1:10) Ke o kɛ o he piɛɛlɔ ɔ juɛmi kɔ we ngɛ nɔ́ ko he ɔ, nyɛ ko gbla mi ngɛ nyɛ bimɛ ɔmɛ a hɛ mi, ke pi jã a, a be nyɛ bue.

NƆ́ NƐ O MA NYƐ MAA PEE:

  • Nyɛɛ sɛsɛ bɔ nɛ nyɛ ma tsɔse nyɛ bimɛ ɔmɛ ha a he nɛ nyɛɛ pee kake kɛ tsu he ní

  • Ke o kɛ o he piɛɛlɔ ɔ nyɛ hɛɛ juɛmi ekpaekpa ngɛ bɔ nɛ nyɛ ma tsɔse nyɛ bimɛ ɔmɛ ha a he ɔ, nyɛɛ bɔ mɔde nɛ nyɛɛ nu nyɛ sibi a sisi

 4 NYƐƐ TO BLƆ NYA

NƆ́ NƐ BAIBLO Ɔ DE: “Tsɔse jokuɛyo nɛ e le bɔ nɛ e maa ba e je mi ha.” (Abɛ 22:6) E biɔ mɔde bɔmi loko o maa ye manye ngɛ bimɛ tsɔsemi mi. E sa nɛ o to blɔ nya nɛ o kɛ ma tsɔse o bimɛ ɔmɛ, nɛ tue gblami hu nɛ e piɛɛ he. (La 127:4; Abɛ 29:17) Tsɔsemi tsɔɔ we kaa o maa hi mɛ kpa fiae kɛkɛ, se mohu, e biɔ nɛ o ye bua o bimɛ ɔmɛ nɛ a nu yi mi tomi he je nɛ o wo mlaa ko ɔ sisi. (Abɛ 28:7) Jehanɛ se hu ɔ, o kɛ mɛ nɛ kase Baiblo ɔ konɛ a bua nɛ jɔ Yehowa Munyu ɔ he, nɛ a nyɛ nɛ a yɔse sisi tomi mlaahi nɛ ngɛ mi ɔ. (La 1:2) Enɛ ɔ maa ye bua mɛ konɛ a ná he nile kpakpa.Hebri Bi 5:14.

NƆ́ NƐ O MA NYƐ MAA PEE:

  • Bɔɔ mɔde nɛ o ye bua o bimɛ ɔmɛ nɛ a na kaa Mawu ji Nɔ ko nɛ e ngɛ nitsɛnitsɛ nɛ a ma nyɛ kɛ a he maa fɔ e nɔ

  • Moo ye bua mɛ nɛ a nyɛ nɛ a yɔse ní peepeehi nɛ ma nyɛ ma puɛ a je mi bami konɛ a kua, kaa nɔ hyɛmi nɔ́ ɔ, huɛ bɔmi hehi nɛ ngɛ Intanɛti ɔ nɔ ɔ. Moo ye bua mɛ nɛ a hyɛ a he saminya ngɛ nihi nɛ a tuaa nɔ abonua a he

“Tsɔse jokuɛyo nɛ e le bɔ nɛ e maa ba e je mi ha”