MƐNI o na ngɛ hiɛ ɔ? Tabuli nɛ hii si ngɛ okpɔngɔ futahi a nɔ. Se hyɛ he nɛ a je kɛ ma a. Okpɔngɔ ɔmɛ hɛɛ fo wawɛɛ kɛ ngɛ si kplee kɛ ngɛ hiɔwe bɔku ɔmɛ a mi jee! Anɛ okpɔngɔhi nitsɛnitsɛ ngɛ hiɔwe lo?

Yesu nɛ a wo lɛ Matsɛ ngɛ hiɔwe

Dɛbi, pi okpɔngɔhi nitsɛnitsɛ. Wa le enɛ ɔ ejakaa okpɔngɔhi be nyɛe maa tu fo ngɛ bɔku mi, aloo a ma nyɛ? Se Baiblo ɔ tu okpɔngɔhi nɛ a ngɛ hiɔwe he munyu. O le nɔ́ nɛ ha e de ja a lo?

Ejakaa, blema a, okpɔngɔhi nɛ a kɛ pɔɔ ta hwumi. Lɔɔ he ɔ, Baiblo ɔ tu nihi nɛ a hii si ngɛ okpɔngɔhi a nɔ kɛ ngɛ si kplee kɛ ngɛ hiɔwe jee he munyu kɛ tsɔɔ kaa Mawu kɛ nihi nɛ ngɛ zugba a nɔ maa hwu ta. O le ta nɛ ɔ biɛ lo? Harmagedon. Ta nɛ ɔ ma je yayami tsuo kɛ je zugba a nɔ.

Yesu ji Nɔ nɛ maa nyɛɛ hɛ mi kɛ hwu Harmagedon ta nɛ ɔ nɛ. Mo kai kaa Yesu ji nɔ nɛ Yehowa hla kɛ to E nɔyemi ɔ nya kaa matsɛ. Lɔɔ heje nɛ Yesu bu matsɛ pɛɛ ɔ nɛ. Nɛ klaate ɔ hu tsɔɔ kaa e maa gbe Mawu henyɛli ɔmɛ tsuo. Anɛ e sa kaa e pee wɔ nyakpɛ kaa Mawu ma kpata yayami peeli tsuo a hɛ mi lo?

Mo bli kɛ ya Ní kasemi 10. Mɛni o na ngɛ lejɛ ɔ? Lɔɔ ji Nyu Afua nguaa nɛ kpata yayami peeli a hɛ mi ɔ. Mɛnɔ ha Nyu Afua a ba? Yehowa Mawu. Jehanɛ ɔ, mo bli kɛ ya Ní kasemi 15. Mɛni ngɛ nɔ yae ngɛ lejɛ ɔ? Yehowa ngɔ la kɛ kpata Sodom kɛ Gomora hɛ mi.

Mo bli kɛ ya Ní kasemi 33. Hyɛ nɔ́ nɛ ba Mizraimbi kɛ a we okpɔngɔ ɔmɛ, kɛ a ta hwilii ɔmɛ a nɔ. Mɛnɔ ha nɛ a gbo ngɛ wo ɔ mi ɔ? Yehowa. E pee ja nɛ e kɛ kpɔ e webi ɔmɛ. Hyɛ Ní kasemi 76. O maa na kaa Yehowa ha nɛ a kpata e webi nɛ ji Israelbi ɔmɛ a hɛ mi ngɛ a ní yayami ɔmɛ a heje.

Lɔɔ he ɔ, e sɛ kaa e pee wɔ nyakpɛ kaa Yehowa maa tsɔ e hiɔwe tabuli kɛ ba je yayami peemi tsuo kɛ je zugba a nɔ. Se mo susu nɔ́ nɛ lɔɔ tsɔɔ he nɛ o hyɛ! Mo bli kɛ ya bafa nɛ nyɛɛ se ɔ, konɛ waa hyɛ.

Kpojemi 16:16; 19:11-16.



Sane Bimihi

  • Mɛni heje Baiblo ɔ tu okpɔngɔhi nɛ ngɛ hiɔwe he munyu?
  • Kɛ a tsɛɛ ta nɛ Mawu kɛ nimli yayamihi ngɛ zugba a nɔ maa hwu ɔ kɛɛ, nɛ mɛni ta nɛ ɔ ma tsu?
  • Kaa bɔnɛ o na ngɛ foni ɔ mi ɔ, mɛnɔ ji Nɔ nɛ maa nyɛɛ hɛ mi ngɛ ta a mi, mɛni heje e bu matsɛ pɛɛ, nɛ mɛni e klaate ɔ hu tsɔɔ?
  • Ke wa hyɛ Ní kasemi 10, 15, kɛ 33, mɛni heje e sɛ nɛ e pee wɔ nyakpɛ kaa Mawu ma kpata yayami peeli a hɛ mi?
  • Mɛni blɔ nɔ Ní kasemi 3676 tsɔɔ kaa Mawu ma kpata yayami peeli a hɛ mi ke a deɔ ke a jaa lɛ po ɔ?

Sane bimi kpahi

  • Kane Kpojemi 19:11-16.

    Mɛni blɔ nɔ Ngmami ɔ ha e pee faii kaa Yesu ji nɔ nɛ ngɛ okpɔngɔ futaa nɔ ɔ? (Kpoj. 1:5; 3:14; 19:11; Yes. 11:4)

    Mɛni blɔ nɔ muɔ ɔ nɛ ngɛ Yesu tade ɔ mi ɔ maa nɔ mi ngɛ kaa e kunimi yemi ɔ maa pi si? (Kpoj. 14:18-20; 19:13; Yes. 63:1-6)

    Eko ɔ, mɛnɔmɛ piɛɛ tabuli nɛ nyɛɛ Yesu nɛ hii si ngɛ okpɔngɔ futaa nɔ ɔ se ɔ he? (Kpoj. 12:7; 19:14; Mat. 25:31, 32)