Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 113: Paulo Ngɛ́ Roma

Ní kasemi 113: Paulo Ngɛ́ Roma

HYƐ kɔsɔkɔsɔ ɔ ngɛ Paulo nine he, nɛ hyɛ Roma tabulɔ ɔ nɛ ngɛ e nɔ hyɛe ɔ hulɔ. A wo Paulo tsu ngɛ Roma. Nɛ e ngɛ mlɛe kɛ ya si benɛ Roma Kaisare ɔ maa na bɔnɛ e maa pee lɛ ha. A wo lɛ tsu mohu, se a haa nihi blɔ nɛ a ba slaa lɛ.

Benɛ Paulo ya su Roma ligbi etɛ se ɔ, e tsɔ nɛ a ya tsɛ Yuda nimeli komɛ kɛ ba e ngɔ. Lɔɔ ha nɛ Yudabi fuu ngɛ Roma ba e ngɔ. Paulo tu Yesu kɛ Mawu matsɛ yemi ɔ he munyu kɛ tsɔɔ mɛ. Nɛ a kpɛti ni komɛ he ye nɛ a ba plɛ Kristofoli, se ni komɛ hu he we yi.

Paulo nɛ a wo lɛ tsu

Paulo fiɛɛ kɛ ha tabuli slɔɔtohi nɛ ba bu e he ɔ hulɔ. Ngɛ jeha enyɔ tsuo nɛ a wo Paulo tsu ɔ mi ɔ, e fiɛɛ kɛ ha nɔ tsuaa nɔ nɛ ba e ngɔ. Enɛ ɔ ha Kaisare we ɔ mi bi po nu Matsɛ Yemi ɔ he sane kpakpa a, nɛ a kpɛti ni komɛ ba plɛ Kristofoli.

Se mɛnɔ ji nubwɔ ɔ nɛ ngɛ ní ngmae ngɛ okplɔɔ he ɔ? Mɛnɔ o susu kaa e ji? Lɛ ji Timoteo. A wo Timoteo hu tsu ngɛ Matsɛ Yemi ɔ fiɛɛmi heje, se amlɔ nɛ ɔ, a ngmɛɛ e he. Nɛ e ba konɛ e ba ye bua Paulo. O le nɔ́ nɛ Timoteo ngɛ ngmae lo? Ha nɛ waa hyɛ.

O kai mahi nɛ ji Filipi kɛ Efeso ngɛ Ní kasemi 110 mi lo? Paulo ye bua nɛ a to asafohi sisi ngɛ ma nɛ ɔmɛ a mi. Nɛ benɛ a wo lɛ tsu nɛ ɔ, e ngma womi kɛ ya ha lejɛ ɔ Kristofoli ɔmɛ. Womi nɛ ɔmɛ ngɛ Baiblo ɔ mi, nɛ a tsɛɛ mɛ ke Efesobi kɛ Filipibi. Amlɔ nɛ ɔ, Paulo ngɛ Timoteo nɔ́ nɛ é ngma kɛ ya ha a huɛmɛ Kristofoli ngɛ Filipi ɔ dee.

Filipibi ɔmɛ pee Paulo kpakpa. A ngɔ nike ní kɛ mane Paulo ngɛ tsu ɔ mi, nɛ e ngɛ mɛ si nae ngɛ he. Epafrodito ji nɔ nɛ ngɔ nike ní ɔ kɛ ba a nɛ. Se e ba nu hiɔ wawɛɛ nɛ e piɛ bɔɔ jinɛ e gbo. Piɔ lɛɛ e hi ha lɛ nɛ be su nɛ e maa kpale kɛ je. E maa ngɔ Paulo kɛ Timoteo womi ɔ kɛ ya Filipi.

Paulo ngma womi kpahi enyɔ nɛ ngɛ Baiblo ɔ mi benɛ e ngɛ tsu mi ɔ. E ngma kake kɛ ya ha Kristofoli nɛ ngɛ Kolose. O le womi ɔ biɛ lo? Lɔɔ ji Kolosebi. Enyɔne ɔ lɛɛ e ngma kɛ ya ha e huɛ kpakpa nɛ a tsɛɛ lɛ Filemon nɛ ngɛ Kolose ɔ. Womi ɔ kɔ Filemon tsɔlɔ Onesimo he.

Onesimo tu fo kɛ je Filemon ngɔ kɛ ba Roma. Onesimo ba ná le kaa Paulo ngɛ tsu mi. Benɛ e ya slaa Paulo ɔ, Paulo fiɛɛ kɛ tsɔɔ lɛ. E kɛ we nɛ Onesimo ba plɛ Kristofono. Onesimo pia e he kaa e tu fo kɛ je Filemon ngɔ. Lɔɔ he ɔ, o le nɔ́ nɛ Paulo ngma kɛ ya ha Filemon lo?

Paulo de Filemon kaa e ngɔ Onesimo tɔmi ɔ kɛ pa lɛ. Paulo ngma ke: ‘I kpale Onesimo kɛ ma o ngɔ. Se amlɔ nɛ ɔ, pi o tsɔlɔ kɛkɛ ji lɛ hu. E ji o nyɛmi Kristofono kpakpa.’ Benɛ Onesimo kpale kɛ yaa Kolose ɔ, e ngɔ womi enyɔ ɔmɛ kɛ ho, Kolosebi a nɔ kake kɛ Filemon hu nɔ kake. Filemon bua maa jɔ nitsɛ kaa e maa le kaa e tsɔlɔ ɔ ba plɛ Kristofono.

Paulo hɛɛ sane kpakpa kɛ ha Filipibi kɛ Filemon benɛ e ngɛ mɛ womi ɔ ngmae ɔ. E ngma kɛ mane Filipibi ɔmɛ ke: ‘I ngɛ Timoteo tsɔe kɛ ma nyɛ ngɔ. Se imi nitsɛ hu ma ba ngɛ be kpiti mi.’ Nɛ e ngma kɛ ya ha Filemon hu ke: ‘Mo dla he ko ngɔ fɔ si nɛ ke i ba a ma ba to lejɛ ɔ.’

Benɛ a ngmɛɛ Paulo he ɔ, e ya slaa e nyɛmimɛ Kristofoli ngɛ hehi fuu. Se pee se ɔ, a nu Paulo kɛ wo tsu mi ngɛ Roma ekohu. Jehanɛ ɔ lɛɛ e le kaa a maa gbe lɛ. Lɔɔ he ɔ, e ngma Timoteo womi nɛ e de lɛ kaa e ba e ngɔ amlɔ nɔuu. Paulo ngma ke: ‘I ye Mawu anɔkuale, nɛ e maa wo mi he hiɔ.’ Benɛ a gbe Paulo jeha bɔɔ se ɔ, Romabi ɔmɛ ba kpata Yerusalem hɛ mi ekohu.

Se ní kpahi fuu ngɛ Baiblo ɔ mi. Yehowa Mawu ha nɛ Bɔfo Yohane ngma Baiblo mi nyagbe womi ɔmɛ, nɛ a kpɛti kake ji Kpojemi. Womi nɛ ɔ tsɔɔ nɔ́ nɛ maa ba hwɔɔ se. Jehanɛ ɔ, ha nɛ waa kase níhi nɛ maa ba hwɔɔ se ɔ he ní.

Bɔfo ɔmɛ A Nítsumi 28:16-31; Filipibi 1:13; 2:19-30; 4:18-23; Hebribi 13:23; Filemon 1-25; Kolosebi 4:7-9; 2 Timoteo 4:7-9.



Sane Bimihi

  • Mɛnɔmɛ Paulo fiɛɛ kɛ ha benɛ a wo lɛ tsu ngɛ Roma a?
  • Mɛnɔ ji nubwɔ ɔ nɛ ngɛ okplɔɔ ɔ he ngɛ foni ɔ mi ɔ, nɛ mɛni e ngɛ pee ha Paulo?
  • Mɛnɔ ji Epafrodito, nɛ mɛni e hɛɛ kɛ ho Filipi ya?
  • Mɛni heje Paulo ngma womi kɛ ya ha e huɛ kpakpa Filemon?
  • Benɛ a je Paulo ngɛ tsu mi ɔ, mɛni e pee, nɛ mɛni ba e nɔ pee se?
  • Mɛnɔ nɔ Yehowa gu kɛ ngma Baiblo ɔ nyagbe womi ɔmɛ, nɛ mɛni he munyu Kpojemi womi ɔ tuɔ?

Sane bimi kpahi

  • Kane Bɔfo ɔmɛ A Nítsumi 28:16-31 kɛ Filipibi 1:13.

    Mɛni blɔ nɔ Paulo ngɔ e be kɛ tsu ní benɛ a wo lɛ tsu ngɛ Roma a, nɛ mɛni he wami e hemi kɛ yemi nɛ mi wa a ná ngɛ Kristofoli asafo ɔ nɔ? (Níts. 28:23, 30; Fil. 1:14)

  • Kane Filipibi 2:19-30.

    Mɛni sina kpo Paulo je ngɛ Timoteo kɛ Epafrodito he, nɛ mɛni blɔ nɔ wa ma nyɛ maa kase Paulo nɔhyɛ nɔ́ ɔ? (Fil. 2:20, 22, 25, 29, 30; 1 Kor. 16:18; 1 Tes. 5:12, 13)

  • Kane Filemon 1-25.

    Mɛni nɔ Paulo da nɛ e kɛ wo Filemon he wami konɛ e pee nɔ́ nɛ da blɔ, nɛ mɛni asafo mi nikɔtɔmahi ma nyɛ maa kase ngɛ enɛ ɔ mi? (Filem. 9; 2 Kor. 8:8; Gal. 5:13)

    Mɛni blɔ nɔ munyu nɛ Paulo tu ngɛ Filemon 13, 14 tsɔɔ kaa e ngɛ bumi kɛ ha asafo ɔ mi bi kpahi a he nile? (1 Kor. 8:7, 13; 10:31-33)

  • Kane 2 Timoteo 4:7-9.

    Mɛni blɔ nɔ wa maa gu kɛ ná nɔ mi mami kaa ke wa ye anɔkuale kɛ ya su nyagbe kaa Bɔfo Paulo ɔ, Yehowa maa wo wɔ hiɔ? (Mat. 24:13; Heb. 6:10)