Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 112: Lɛ ɔ Ya Butu Ngɛ Zugba Kpɔ Ko Nɔ

Ní kasemi 112: Lɛ ɔ Ya Butu Ngɛ Zugba Kpɔ Ko Nɔ

HYƐ! lɛ ɔ sɛ haomi mi! Nɛ e bɔni ywiami! O na ni ɔmɛ nɛ a tu kɛ pue wo ɔ mi ɔ lo? A ti ni komɛ ba su wo ɔ nya momo. Anɛ Paulo hu piɛɛ a he ngɛ lejɛ ɔ lo? Ha nɛ waa hyɛ nɔ́ nɛ ba e nɔ.

Nihi nɛ a yi ná wami ngɛ lɛ nɛ butu ɔ mi

Mo kai kaa a wo Paulo tsu jeha enyɔ ngɛ Kaisarea. Lɔɔ se ɔ, a ngɔ e kɛ ni kpahi nɛ a wo mɛ tsu ɔ kɛ sɛ lɛ mi kɛ yaa Roma. Benɛ a be Kreta zugba kpɔ ɔ he ɔ, a kɛ kɔɔhiɔ nɛ nya wa ko kpe. Kɔɔhiɔ ɔ nya wami ɔ ha nɛ lɛ hluili ɔmɛ nyɛ we nɛ a kudɔ lɛ ɔ hu. A nɛ́ pu piani, nɛ a nɛ́ dodoe gbɔkuɛ hulɔ. Nyagbe ɔ, ngɛ ligbihi fuu se ɔ, nihi nɛ ngɛ lɛ ɔ mi ɔ be hɛ nɔ kami ko kulaa hu kaa a yi ma ná wami.

Kɛkɛ nɛ Paulo te kɛ da si nɛ e de ke: ‘Nyɛ ti nɔ ko nɔ ko be gboe; lɛ ɔ pɛ nɛ maa ywia. Ejakaa hiɛ nyɔ mi ɔ, Mawu bɔfo ko ba ye ngɔ nɛ e ba de mi ke, “Paulo, koo ye gbeye! O ma ya da Roma nɔ yelɔ Kaisare hɛ mi. Nɛ Mawu ma kpɔ nihi tsuo nɛ a kɛ mo ngɛ lɛ ɔ mi.”’

Benɛ kɔɔhiɔ ɔ je sisi ɔ, e nɔ ligbi nyɔngma kɛ eywiɛne ɔ nyɔ mi ɔ, lɛ hluili ɔmɛ na kaa wo ɔ fã kulaa! Nɛ akɛnɛ a ye gbeye kaa lɛ ɔ ma ya hɛ tɛsa ko ngɛ diblii ɔ mi heje ɔ, a fɔ osɛkɛ ha lɛ ɔ. Benɛ je na a, a na zugba kpɔ ko. Nɛ a bɔ mɔde kaa a ma kudɔ lɛ ɔ kɛ ya sa si ngɛ lejɛ ɔ.

Se benɛ a su wo ɔ nya ta a, lɛ ɔ hɛ zia a, nɛ e pu zu. Kɛkɛ nɛ oslɔke ɔ bɔni lɛ ɔ fiaami, nɛ lɛ ɔ bɔni ywiami. Tabuli ɔmɛ a nyatsɛ ɔ de ke: ‘Nɔ tsuaa nɔ nɛ́ le slemi ɔ, e tu kɛ wo wo ɔ mi kekle, nɛ e wu nyu ɔ kɛ ya nu kpo. Nyɛ nihi nɛ piɛ ɔmɛ ɔ, nyɛɛ bu lɛ ɔ gbegbeli ɔmɛ ekomɛ a nɔ kɛ nyɛɛ a se.’ Nɛ a pee ja. Enɛ ɔ ha nɛ nihi 276 nɛ ngɛ lɛ ɔ mi tsuo ba nu kpo ngɛ wo ɔ nya slɔkee, kaa bɔnɛ bɔfo ɔ wo si ɔ.

A tsɛɛ zugba kpɔ nɛ ɔ ke Melita. Mabi ɔmɛ ji nimli kpakpahi, nɛ a hyɛ nihi nɛ je lɛ ɔ mi ɔ nɔ. Benɛ je ɔ mi ba tsɔ ɔ, a ngɔ Paulo kɛ wo lɛ kpa mi kɛ ho Roma ya.

Bɔfo ɔmɛ A Nítsumi 27:1-44; 28:1-14.



Sane Bimihi

  • Mɛni ba benɛ lɛ nɛ Paulo ngɛ mi ɔ be Kreta zugba kpɔ ɔ he ɔ?
  • Mɛni Paulo de nihi nɛ ngɛ lɛ ɔ mi?
  • Kɛ ba kɛɛ loko lɛ ɔ ywia dukuduku ɔ?
  • Mɛni tabuli ɔmɛ a nya tsɛ ɔ de ni ɔmɛ, nɛ nihi enyɛmɛ ya nu kpo slɔkee?
  • Kɛ a tsɛɛ zugba kpɔ nɛ a ya nɔ ɔ kɛɛ, nɛ mɛni a pee Paulo benɛ je ɔ mi ba tsɔ ɔ?

Sane bimi kpahi

  • Kane Bɔfo ɔmɛ A Nítsumi 27:1-44.

    Mɛni blɔ nɔ Paulo wo nɔ blɔ hiami kɛ ya Roma he sane ɔ kanemi woɔ he kɛ nɔ fɔmi nɛ wa ngɛ kaa Baiblo ɔ da a mi he wami ngɛ? (Níts. 27:16-19, 27-32; Luka 1:3; 2 Tim. 3:16, 17)

  • Kane Bɔfo ɔmɛ A Nítsumi 28:1-14.

    Ke Melitabi wɔ jali po nyɛ nɛ a pee Paulo kɛ nihi nɛ e kɛ mɛ ya butu ɔ “kpakpa saminya” a, lɛɛ mɛni e sa kaa Kristofoli a ná gɛjɛmi kɛ pee, nɛ titli ɔ ngɛ mɛni blɔ nɔ? (Níts. 28:1, 2; Heb. 13:1, 2; 1 Pet. 4:9)