Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 110: Timoteo—Paulo Yemi Kɛ Bualɔ Ehe

Ní kasemi 110: Timoteo—Paulo Yemi Kɛ Bualɔ Ehe

NIHEYO ɔ nɛ e kɛ bɔfo Paulo daa si ngɛ hiɛ ɔ ji Timoteo. Timoteo kɛ e weku ɔ ngɛ Listra. A tsɛɛ e nyɛ ke Eunike, nɛ e na hu biɛ ji Loise.

Enɛ ɔ ji si etɛne nɛ Paulo ba slaa Listra. Paulo kɛ Barnaba ba hiɛ ɔ kekle ngɛ a fiɛɛmi blɔ hiami nítsumi ɔ mi maa pee jeha kake ji nɛ ɔ. Nɛ amlɔ nɛ ɔ, Paulo kɛ e huɛ Sila kpale kɛ ba ekohu.

Timoteo kɛ Paulo

O le nɔ́ nɛ Paulo ngɛ Timoteo dee lo? E ngɛ lɛ dee ke: ‘Anɛ o suɔ kaa o maa piɛɛ i kɛ Sila he lo? O ma nyɛ maa ye bua wɔ kɛ fiɛɛ ha nihi nɛ́ ngɛ ma se ɔmɛ.’

Timoteo ha heto ke: ‘Ee, i suɔ kaa ma piɛɛ nyɛ he.’ Lɔɔ he ɔ, e kɛ we nɛ Timoteo si e weku ɔ, nɛ e kɛ Paulo kɛ Sila ho. Se loko wa maa kase a blɔ hiami ɔ he ní ɔ, ha nɛ waa hyɛ nɔ́ nɛ ba Paulo nɔ. Maa pee jeha 17 ji nɛ ɔ nɛ Yesu je e he kpo kɛ tsɔɔ lɛ ngɛ Damasko blɔ ɔ nɔ.

Mo kai kaa Paulo ba Damasko konɛ e ba hao Yesu kaseli ɔmɛ, se amlɔ nɛ ɔ, lɛ nitsɛ hu e plɛ kaselɔ! Pee se ɔ, henyɛli komɛ to kaa a maa gbe Paulo ejakaa a bua jɔɛ Yesu he ní nɛ e ngɛ tsɔɔe ɔ he. Se kaseli ɔmɛ ye bua Paulo nɛ e tu fo. A ngɔ lɛ kɛ wo kusii (kɛ̃tɛ) mi nɛ a kple lɛ si kɛ gu ma a gbogbo ɔ nɔ.

Pee se ɔ, Paulo ya Antiokia nɛ e ya fiɛɛ ngɛ lejɛ ɔ. Hiɛ ɔ ji he nɛ a tsɛ Yesu se nyɛɛli ɔmɛ ngɛ kekleekle ke Kristofoli ɔ nɛ. Lɔɔ se ɔ, a tsɔ Paulo kɛ Barnaba kɛ je Antiokia kɛ ya ma se tsitsaa nɛ a ya fiɛɛ ngɛ lejɛ ɔmɛ. Ma amɛ nɛ a ya nɔ ɔ kake ji Listra, nɛ ji Timoteo ma mi.

Amlɔ nɛ ɔ, maa pee jeha kake se ɔ, Paulo nyɛɛ blɔ hiami enyɔne ɔ nɔ kɛ kpale kɛ ba Listra ekohu. Benɛ Timoteo piɛɛ Paulo kɛ Sila he kɛ ho ɔ, o le he nɛ a ya lo? Hyɛ mahi a he foni ɔ, konɛ waa kase ma amɛ ekomɛ a he ní.

Kekleekle ɔ, a ya Ikoniom, nɛ́ ngɛ Listra kasa nya a, nɛ a tsa nɔ kɛ ya ma enyɔne ɔ nɛ a tsɛɛ ke Antiokia a mi. Lɔɔ se ɔ, a pue nɔ kɛ ya Troya, nɛ a tsa nɔ kɛ ya su Filipi, Tesalonika, kɛ Beroya. Anɛ o na Atene ngɛ mahi a he foni ɔ mi lo? Paulo ya fiɛɛ ngɛ lejɛ ɔ. Lɔɔ se ɔ, a ngɔ jeha kake kɛ fã kɛ fiɛɛ ngɛ Korinto. Nyagbe ɔ, a ya ye be kpiti ko ngɛ Efeso. Kɛkɛ nɛ a sɛ lɛ mi kɛ kpale kɛ ba Kaisarea, nɛ a tsa nɔ kɛ ya Antiokia nɛ Paulo ya hi lejɛ ɔ.

Lɔɔ he ɔ, Timoteo hia blɔ si tomi lafahi babauu nɛ e kɛ fĩ Paulo se kɛ fiɛɛ “sane kpakpa” a, nɛ a kɛ to Kristofoli asafo ehehi fuu hu sisi. Ke o wa a, anɛ o maa pee Mawu sɔmɔlɔ anɔkualetsɛ kaa Timoteo lo?

Bɔfo ɔmɛ A Nítsumi 9:19-30; 11:19-26; yi 13 kɛ ya si 17; 18:1-22.

Zugba he foni ko

1. Roma; 2. Melita; 3. Beroya; 4. Tesalonika; 5. Korinto; 6. Filipi; 7. Atene; 8. Kreta; 9. Troya; 10. Efeso; 11. Mileto; 12. Kolose; 13. Antiokia; 14. Ikoniom; 15. Listra; 16. Kipro; 17. Antiokia; 18. Kaisarea; 19. Yopa; 20. Damasko; 21. Yerusalem; 22. Wo Ngua a (Mediterenia)



Sane Bimihi

  • Mɛnɔ ji niheyo ɔ nɛ ngɛ foni ɔ mi ɔ, nɛ jije e hi, nɛ kɛ a tsɛɛ e nyɛ kɛ e na kɛɛ?
  • Benɛ Paulo bi Timoteo keji e suɔ nɛ e piɛɛ e kɛ Sila he ngɛ ma se fiɛɛmi nítsumi ɔ mi ɔ, mɛni e de?
  • Jije a tsɛ Yesu se nyɛɛli ɔmɛ ngɛ kekle ke Kristofoli ɔ?
  • Mɛni mahi komɛ nɛ Paulo kɛ Sila kɛ Timoteo ya slaa benɛ a je Listra a?
  • Mɛni blɔ nɔ Timoteo ye bua Paulo ngɛ, nɛ mɛni sane e sa kaa nihewi kɛ yihewi a bi a he mwɔnɛ ɔ?

Sane bimi kpahi

  • Kane Bɔfo ɔmɛ A Nítsumi 9:19-30.

    Mɛni blɔ nɔ bɔfo Paulo kɛ ní lemi tsu ní benɛ a te si kɛ wo lɛ ngɛ sane kpakpa a fiɛɛmi ɔ he ɔ? (Níts. 9:22-25, 29, 30; Mat. 10:16)

  • Kane Bɔfo ɔmɛ A Nítsumi 11:19-26.

    Mɛni blɔ nɔ sane nɛ a ngma ngɛ Bɔfo ɔmɛ A Nítsumi 11:19-21, 26 tsɔɔ kaa Yehowa mumi ɔ ngɛ fiɛɛmi nítsumi ɔ kudɔe?

  • Kane Bɔfo ɔmɛ A Nítsumi 13:13-16, 42-52.

    Mɛni blɔ nɔ Bɔfo ɔmɛ A Nítsumi 13:51,52 tsɔɔ kaa kaseli ɔmɛ ha we nɛ si nɛ a te kɛ wo mɛ ɔ nɛ jɔ a kɔni mi? (Mat. 10:14; Níts. 18:6; 1 Pet. 4:14)

  • Kane Bɔfo ɔmɛ A Nítsumi 14:1-6, 19-28.

    Mɛni blɔ nɔ munyu nɛ ji “a ngɔ mɛ kɛ wo Yehowa dɛ mi” ɔ ma nyɛ maa ye bua wɔ konɛ wa ko pee yeyeeye be mi nɛ wa ngɛ ni ehehi ye buae ɔ? (Níts. 14:21-23; 20:32; Yoh. 6:44)

  • Kane Bɔfo ɔmɛ A Nítsumi 16:1-5.

    Mɛni blɔ nɔ kplɛɛmi nɛ Timoteo kplɛɛ nɛ a po lɛ ɔ maa bɔnɛ e he hia ha kaa waa pee “nɔ́ tsuaa nɔ́ ngɛ sane kpakpa a heje” ɔ nɔ mi? (Níts. 16:3; 1 Kor. 9:23; 1 Tes. 2:8)

  • Kane Bɔfo ɔmɛ A Nítsumi 18:1-11, 18-22.

    Mɛni Bɔfo ɔmɛ A Nítsumi 18:9, 10 tsɔɔ ngɛ bɔnɛ Yesu nitsɛ nyɛɛ fiɛɛmi nítsumi ɔ hɛ mi ɔ he, nɛ mɛni nɔ mi mami enɛ ɔ haa wɔ mwɔnɛ ɔ? (Mat. 28:20)