Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 106: A Je Mɛ Kɛ Je Tsu Mi

Ní kasemi 106: A Je Mɛ Kɛ Je Tsu Mi

HYƐ bɔfo ɔ nɛ bli tsu ɔ sinya nɛ e pɛtɛ he ɔ. Yesu kaseli ji nyumu ɔmɛ nɛ e ha a ngɛ kpo jee ngɛ tsu ɔ mi ɔ nɛ. Ha nɛ waa hyɛ nɔ́ nɛ ha a wo mɛ tsu ɔ.

Bɔfo ko nɛ e ngɛ kaseli ɔmɛ jee

Be bɔɔ pɛ ji nɛ ɔ nɛ́ a plɛ mumi klɔuklɔu ɔ kɛ pue Yesu se nyɛɛli ɔmɛ a nɔ. Nɛ nɔ́ nɛ ba ji nɛ ɔ nɛ: Petro kɛ Yohane yaa sɔlemi we ɔ ngɛ Yerusalem ligbi ko piani. A na nyumu ko nɛ e ji obubuafo kɛ je benɛ a fɔ lɛ nɛ e hii si ngɛ agbo ɔ nya. Nihi ngɔɔ lɛ kɛ ya hii lejɛ ɔ daa ligbi, konɛ e ba sika ngɛ nihi nɛ baa sɔlemi we ɔ a dɛ. Benɛ e na Petro kɛ Yohane ɔ, e kpa mɛ pɛɛ kaa a ha lɛ nɔ́ ko. Kɛ kaseli ɔmɛ maa pee kɛɛ?

A da si nɛ a hyɛ nyumu nɛ e ní ngɛ mɔbɔ nɛ ɔ. Kɛkɛ nɛ Petro de lɛ ke: ‘I be sika, se ma ha mo nɔ́ nɛ i ngɛ ɔ. Ngɛ Yesu biɛ mi ɔ, tee si nɛ o nyɛɛ!’ Kɛkɛ nɛ Petro pɛtɛ e hiɔ nine he, nɛ amlɔ nɔuu nɛ e te kɛ da si nɛ e bɔni nyɛɛmi. Benɛ nihi na enɛ ɔ, a nya kpɛ a he, nɛ a bua jɔ hulɔ ngɛ nyakpɛ nɔ́ nɛ ɔ he.

Petro de mɛ ke: ‘Mawu nɛ́ tle Yesu si kɛ je gbeje ɔ he wami nɛ wa kɛ pee enɛ ɔ nɛ.’ Benɛ e kɛ Yohane kɛ ni ɔmɛ ngɛ munyu ɔ tue ɔ, jami hɛ mi nyɛɛli komɛ ba lejɛ ɔ. A mi mi fu ejakaa Petro kɛ Yohane ngɛ ni ɔmɛ dee kaa a tle Yesu si kɛ je gbeje. Lɔɔ he ɔ, a nu mɛ nɛ a wo mɛ tsu.

E nɔ jena a, jami hɛ mi nyɛɛli ɔmɛ pee kpe ngua ko. Nɛ a ya ngɔ Petro kɛ Yohane, kɛ nyumu ɔ nɛ a tsa lɛ ɔ kɛ ba lejɛ ɔ. Jami hɛ mi nyɛɛli ɔmɛ bi mɛ ke: ‘Mɛnɔ ha nyɛ he wami nɛ nyɛɛ kɛ pee nyakpɛ nɔ́ nɛ ɔ?’

Petro de mɛ ke Mawu nɛ́ tle Yesu si kɛ je gbeje ɔ he wami nya nɛ a pee ja ngɛ. Osɔfo ɔmɛ li bɔnɛ a maa pee ha, ejakaa a be nyɛe maa je nyakpɛ nɔ́ nɛ a pee nɛ ɔ he atsinyɛ. Lɔɔ he ɔ, a bɔ kaseli ɔmɛ kɔkɔ kaa a ko sɛɛ Yesu Kristo he ní hu, nɛ a ngmɛɛ a he.

Kaseli ɔmɛ ya nɔ nɛ a fiɛɛ Yesu he sane nɛ a tsa nihi. Nyakpɛ ní nɛ ɔmɛ a he sanehi gbɛ fia. Lɔɔ he ɔ, nimli babauu je ma amɛ nɛ bɔle Yerusalem ɔ mi nɛ a ngɔ a hiɔtsɛmɛ kɛ ba konɛ kaseli ɔmɛ nɛ tsa mɛ. Enɛ ɔ ha osɔfo ɔmɛ je a he hunga, nɛ a nu kaseli ɔmɛ kɛ wo tsu. Se a se kɛ we ngɛ tsu ɔ mi.

Jamɛ a nyɔ ɔ mi ɔ, Mawu bɔfo ba bli tsu ɔ sinya a, kaa bɔnɛ o na ngɛ hiɛ ɔ. Bɔfo ɔ de mɛ ke: ‘Nyɛɛ ya sɔlemi we ɔ nɛ nyɛ ya tsa nyɛ fiɛɛmi ɔ nɔ.’ E nɔ jena, benɛ osɔfo ɔmɛ tsɔ nihi kɛ ya tsu ɔ mi konɛ a ya ngɔ kaseli ɔmɛ kɛ ba a, a be tsu ɔ mi. Pee se ɔ, a ya na mɛ ngɛ sɔlemi we ɔ nɛ a ngɛ nihi ní tsɔɔe. Nɛ a nu mɛ kɛ ba Kpe Ngua a hɛ mi.

Osɔfo ɔmɛ de mɛ ke: ‘Wa wo nyɛ si veveeve kaa nyɛ ko tsɔɔ ní ngɛ Yesu biɛ mi hu. Se nyɛ ha Yerusalem hyi tɔ kɛ nyɛ tsɔɔmi ɔ.’ Kɛkɛ nɛ kaseli ɔmɛ ha heto ke: ‘E sa kaa waa bu Mawu tue kaa nɔ yelɔ mohu pe nimli.’ Lɔɔ he ɔ, a ya nɔ nɛ a fiɛɛ “sane kpakpa” a. Anɛ enɛ ɔ pi nɔhyɛ nɔ́ kpakpa nɛ e sa kaa waa nyɛɛ se lo?

Bɔfo ɔmɛ A Nítsumi yi 3 kɛ ya si 5.



Sane Bimihi

  • Mɛni ba ligbi ko piani benɛ Petro kɛ Yohane yaa sɔlemi we ɔ?
  • Mɛni Petro de nyumu obubuafo ɔ, nɛ mɛni nɔ́ ko nɛ he jua wa pe sika Petro ha lɛ?
  • Mɛni ha jami hɛ mi nyɛɛli ɔmɛ a mi mi fu ɔ, nɛ mɛni a pee Petro kɛ Yohane?
  • Mɛni Petro de jami hɛ mi nyɛɛli ɔmɛ, nɛ mɛni kɔkɔ bɔmi a kɛ ha bɔfo ɔmɛ?
  • Mɛni heje jami hɛ mi nyɛɛli ɔmɛ je hunga a, se mɛni ba benɛ a wo bɔfo ɔmɛ tsu si enyɔne ɔ?
  • Benɛ a ya ngɔ bɔfo ɔmɛ kɛ ba Kpe Ngua a hɛ mi ɔ, mɛni heto a ha mɛ?

Sane bimi kpahi

  • Kane Bɔfo ɔmɛ A Nítsumi 3:1-10.

    E ngɛ mi kaa a ha we wɔ he wami kaa wa kɛ pee nyakpɛ ní mwɔnɛ ɔ mohu, se mɛni blɔ nɔ Petro munyu nɛ ngɛ Bɔfo ɔmɛ A Nítsumi 3:6 yeɔ bua wɔ konɛ waa na bɔnɛ Matsɛ Yemi ɔ he sɛgbi ɔ he jua wa ha? (Yoh. 17:3; 2 Kor. 5:18-20; Fil. 3:8)

  • Kane Bɔfo ɔmɛ A Nítsumi 4:1-31.

    Kɛ a te si kɛ wo wɔ ngɛ fiɛɛmi nítsumi ɔ mi ɔ, mɛni blɔ nɔ e sa kaa waa kase wa nyɛmimɛ nɛ a hi si ngɛ kekleekle jeha lafa a mi ngɛ? (Níts. 4:29, 31; Efe. 6:18-20; 1 Tes. 2:2)

  • Kane Bɔfo ɔmɛ A Nítsumi 5:17-42.

    Ni komɛ nɛ pi Odasefoli nɛ a hi si blema, kɛ ni komɛ hu nɛ ngɛ mwɔnɛ ɔ je juɛmi kpakpa kpo ngɛ wa fiɛɛmi nítsumi ɔ he ngɛ mɛni blɔ nɔ? (Níts. 5:34-39)