Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 104: Yesu Kpale Kɛ Ho Hiɔwe Ya

Ní kasemi 104: Yesu Kpale Kɛ Ho Hiɔwe Ya

YESU je e he kpo kɛ tsɔɔ e se nyɛɛli ɔmɛ si abɔ ngɛ ligbi ɔmɛ a mi. Ngɛ be ko mi ɔ, kaseli maa pee 500 na lɛ. Benɛ Yesu je e he kpo kɛ tsɔɔ mɛ ɔ, o le nɔ́ he munyu nɛ e kɛ mɛ tu lo? Lɔɔ ji Mawu matsɛ yemi ɔ. Yehowa tsɔ Yesu kɛ ba zugba a nɔ konɛ e ba tsɔɔ nihi Matsɛ Yemi ɔ he ní. Nɛ Yesu ya nɔ nɛ e pee enɛ ɔ benɛ a tle lɛ si kɛ je gbeje po.

Yesu nɛ e ngɛ e se kpalee kɛ yaa hiɔwe

O kai nɔ́ nɛ Mawu matsɛ yemi ɔ ji lo? Ee, Matsɛ Yemi ɔ ji Mawu nɔyemi nitsɛ nɛ ngɛ hiɔwe, nɛ Yesu ji Nɔ nɛ Mawu hla kɛ to nya kaa matsɛ. Kaa bɔnɛ wa kase momo ɔ, Yesu tsɔɔ kaa e maa pee matsɛ kpakpa kɛ gu niye ní nɛ e ha nihi nɛ hwɔ ye mɛ, kɛ hiɔtsɛmɛ nɛ e tsa, kɛ gbogboehi po nɛ e tle mɛ si kɛ ba wami mi ɔ nɔ!

Lɔɔ he ɔ, ke Yesu ye matsɛ ngɛ hiɔwe jeha akpe ɔ, kɛ zugba a nɔ maa hi kɛɛ? Zugba a tsuo maa pee paradeiso nɛ ngɛ fɛu. A be ta hwue hu, nɛ awi yemi, loo hiɔ, loo gbenɔ tete po be si hie hu. Wa le kaa enɛ ɔ ji anɔkuale ejakaa Mawu bɔ zugba a kaa e pee paradeiso kɛ ha nimli nɛ a ná bua jɔmi ngɛ nɔ. Lɔɔ he nɛ e pee Eden abɔɔ ɔ ngɛ sisije ɔ nɛ. Yesu ma ha nɛ Mawu suɔmi nya ní maa ba mi pɛpɛɛpɛ.

Jehanɛ ɔ, be su nɛ́ Yesu maa kpale kɛ ho hiɔwe ya. Yesu je e he kpo kɛ tsɔɔ e kaseli ɔmɛ ligbi 40 sɔuu. Lɔɔ he ɔ, a ngɛ nɔ mi mami kaa e hɛ ngɛ. Se loko e maa je e kaseli ɔmɛ a he ɔ, e de mɛ ke: ‘Nyɛ ko je Yerusalem kɛ ya si benɛ nyɛ nine maa su mumi klɔuklɔu ɔ nɔ.’ Mumi klɔuklɔu ɔ ji Mawu he wami nɛ e kɛ tsuɔ ní, nɛ lɔɔ ji nɔ́ nɛ maa ye bua Yesu se nyɛɛli ɔmɛ nɛ a pee Mawu suɔmi nya ní. Nyagbe ɔ, Yesu de e kaseli ɔmɛ ke: ‘Nyɛɛ ye ye he odase kɛ ya si zugba a nyagbe he ɔmɛ tɔ̃ɔ.’

Benɛ Yesu tu munyu ɔ ta a, nyakpɛ nɔ́ ko ba. E bɔni hiɔwe yami kaa bɔnɛ o na ngɛ hiɛ ɔ. Kɛkɛ nɛ bɔku ko ba ha e nɔ, nɛ kaseli ɔmɛ nɛ́ lɛ hu. Yesu ho hiɔwe ya, nɛ e ya bɔni e se nyɛɛli nɛ ngɛ zugba a nɔ ɔ a nɔ matsɛ yemi.

Bɔfo ɔmɛ nɛ a ngɛ hiɔwe hyɛe

1 Korintobi 15:3-8; Kpojemi 21:3, 4; Bɔfo ɔmɛ A Nítsumi 1:1-11.



Sane Bimihi

  • Kaseli enyɛmɛ na Yesu ngɛ be ko mi, nɛ mɛni e de mɛ?
  • Mɛni ji Mawu Matsɛ Yemi ɔ, nɛ ke Yesu ye Matsɛ jeha akpe ɔ kɛ zugba a nɔ si himi maa hi kɛɛ?
  • Yesu je e he kpo kɛ tsɔɔ e kaseli ɔmɛ ligbi enyɛmɛ, se jehanɛ ɔ, mɛni peemi be su ha lɛ?
  • Mɛni Yesu de e kaseli ɔmɛ loko e je a he?
  • Mɛni ngɛ nɔ yae ngɛ foni ɔ mi, nɛ kɛ Yesu plɛ kɛ laa ngɛ a hɛ mi kɛɛ?

Sane bimi kpahi

  • Kane 1 Korintobi 15:3-8.

    Mɛni ha bɔfo Paulo nyɛ nɛ e tu munyu kɛ nɔ mi mami ngɛ Yesu si temi ɔ he, nɛ mɛni níhi a he munyu Kristofoli ma nyɛ maa tu mwɔnɛ ɔ kɛ nɔ mi mami? (1 Kor. 15:4, 7, 8; Yes. 2:2, 3; Mat. 24:14; 2 Tim. 3:1-5)

  • Kane Bɔfo ɔmɛ A Nítsumi 1:1-11.

    Kaa bɔnɛ Bɔfo ɔmɛ A Nítsumi 1:8 de kɛ to ɔ, jije a fiɛɛ kɛ ya su? (Níts. 6:7; 9:31; 11:19-21; Kol. 1:23)