Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 102: Yesu Hɛ Ngɛ

Ní kasemi 102: Yesu Hɛ Ngɛ

ANƐ o le nihi nɛ yo ɔ kɛ nyumuhi enyɔ ɔmɛ ji lo? Yo ɔ ji Yesu huɛ, nɛ e biɛ ji Maria Magdalena. Nɛ nyumu ɔmɛ nɛ a wo tade ehiɔ ɔ ji bɔfohi. Tsu nyafii ɔ nɛ Maria ngɛ mi hyɛe ɔ ji he nɛ a ngɔ Yesu gbogboe ɔ kɛ ya to ɔ nɛ. A tsɛɛ lɛ ke yɔkɔ. Se amlɔ nɛ ɔ gbogboe ɔ be lejɛ ɔ! Mɛnɔ ba ngɔ kɛ je? Ha nɛ waa hyɛ.

Bɔfohi nɛ a kɛ Maria Magdalena ngɛ munyu tue

Benɛ Yesu gbo se ɔ, osɔfo ɔmɛ ya de Pilato ke: ‘Benɛ Yesu ngɛ je mi ɔ, e de kaa a ma tle lɛ si ngɛ ligbi etɛ se. Lɔɔ he ɔ, mo fã nɛ a ya bu yɔkɔ ɔ he. Kɛkɛ ɔ, e kaseli ɔmɛ be nyɛe ma ya ju e gbogboe ɔ nɛ́ a de ke a tle lɛ si kɛ je gbeje!’ Pilato de osɔfo ɔmɛ konɛ a tsɔ tabuli nɛ a ya bu yɔkɔ ɔ he.

Se Yesu gbenɔ ɔ se ligbi etɛne ɔ we mɔtu mla a, Yehowa bɔfo ko ba yɔkɔ ɔ he tlukaa. Nɛ e ba tsitsɛɛ tɛ ɔ kɛ je yɔkɔ ɔ nya. Tabuli ɔmɛ ye gbeye wawɛɛ nɛ a nyɛ we nɛ a mimiɛ a he po. Nyagbe ɔ, benɛ a hyɛ yɔkɔ ɔ mi ɔ, gbogboe ɔ be mi! Tabuli ɔmɛ ekomɛ ho ma a mi ya, nɛ a ya bɔ osɔfo ɔmɛ amaniɛ. O le nɔ́ nɛ osɔfo yayami ɔmɛ pee lo? A ha tabuli ɔmɛ sika konɛ a ye lakpa. A de tabuli ɔmɛ ke: ‘Nyɛ de ke e kaseli ɔmɛ ba sɛ yɔkɔ ɔ mi nyɔ mi benɛ wa hwɔ mahe nɛ a ju gbogboe ɔ.’

Benɛ enɛ ɔmɛ tsuo ngɛ nɔ yae ɔ, Yesu huɛmɛ yihi komɛ ba yɔkɔ ɔ he. A nya kpɛ a he saminya kaa yɔkɔ ɔ mi fɔɔ si gu! Si kake too ɔ, bɔfohi enyɔ nɛ a wo tadehi nɛ ngɛ kpɛe ba je a he kpo kɛ tsɔɔ mɛ. A bi yi ɔmɛ ke: ‘Mɛni heje nyɛ ba ngɛ Yesu hlae ngɛ hiɛ ɔ? A tle lɛ si. Nyɛɛ ya esɔ nɛ nyɛ ya de e kaseli ɔmɛ.’ Yi ɔmɛ tu fo wawɛɛ kɛ ho! Se benɛ a yaa ngɛ blɔ nɔ ɔ, a kɛ nyumu ko ya kpe. O le nɔ nɛ e ji lo? Lɛ ji Yesu! E de mɛ ke: ‘Nyɛ ya de ye kaseli ɔmɛ.’

Benɛ yi ɔmɛ ya de kaseli ɔmɛ kaa a tle Yesu si nɛ a na lɛ ɔ, kaseli ɔmɛ he we yi kpakpa ko. Petro kɛ Yohane tu fo kɛ ya yɔkɔ ɔ he konɛ mɛ nitsɛmɛ a ya hyɛ, se yɔkɔ ɔ mi fɔɔ si gu! Benɛ Petro kɛ Yohane je ɔ, Maria Magdalena tlɔ si. Jamɛ a be ɔ mi nɛ e hyɛ yɔkɔ ɔ mi nɛ e na bɔfohi enyɔ ɔmɛ ɔ nɛ.

O le nɔ́ nɛ ba Yesu gbogboe ɔ nɔ lo? Mawu ha nɛ e laa. Mawu tle we Yesu si kɛ helo nɔmlɔtso nɛ e hɛɛ kɛ gbo ɔ. Se mohu E ha Yesu mumi nɔmlɔtso kaa hiɔwe bɔfo ɔmɛ. Se bɔnɛ pee nɛ Yesu kaseli ɔmɛ nɛ a na kaa e te si heje ɔ, e ngɔ nɔmlɔtso nɛ nihi ma nyɛ kɛ maa na lɛ, kaa bɔnɛ wa maa na ngɛ ní kasemi nɛ nyɛɛ se ɔ mi ɔ.

Mateo 27:62-66; 28:1-15; Luka 24:1-12; Yohane 20:1-12.



Sane Bimihi

  • Mɛnɔ ji yo ɔ kɛ nyumuhi enyɔ ɔmɛ nɛ ngɛ foni ɔ mi ɔ, nɛ jije a ngɛ ɔ?
  • Mɛni heje Pilato de osɔfo ɔmɛ kaa a tsɔ nihi nɛ a ya bu Yesu yɔkɔ ɔ he?
  • Yesu gbenɔ se ligbi etɛne ɔ we mɔtu mla a, mɛni bɔfo ko pee, se mɛni osɔfo ɔmɛ hu pee?
  • Mɛni ha yihi komɛ a nya kpɛ a he benɛ a ya Yesu yɔkɔ ɔ he ɔ?
  • Mɛni heje Petro kɛ Yohane tu fo kɛ ya Yesu yɔkɔ ɔ he, nɛ mɛni a na?
  • Mɛni ba Yesu gbogboe ɔ nɔ, se bɔnɛ pee nɛ e kaseli ɔmɛ nɛ a na kaa e te si ɔ, mɛni e pee?

Sane bimi kpahi

  • Kane Mateo 27:62

    Benɛ Yesu te si ɔ, mɛni blɔ nɔ osɔfo nikɔtɔma amɛ, Farisibi ɔmɛ, kɛ ma nimeli ɔmɛ pee yayami kɛ si mumi klɔuklɔu ɔ ngɛ? (Mat. 12:24, 31, 32; 28:11-15)

  • Kane Luka 24:1

    Mɛni blɔ nɔ Sane nɛ kɔ Yesu si temi ɔ he ɔ tsɔɔ ngɛ kaa Yehowa buu yihi kaa Odasefoli nɛ a ma nyɛ kɛ he maa fɔ a nɔ? (Luka 24:4, 9, 10; Mat. 28:1-7)

  • Kane Yohane 20:1

    Mɛni blɔ nɔ Yohane 20:8, 9 yeɔ bua wɔ nɛ waa to wa tsui si ngɛ ke wa nui Baiblo mi gbami ko nɛ e ba mi ɔ sisi ɔ? (Abɛ 4:18; Mat. 17:22, 23; Luka 24:5-8; Yoh. 16:12)