Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 98: Ngɛ Nu Yoku ɔ Nɔ

Ní kasemi 98: Ngɛ Nu Yoku ɔ Nɔ

YESU ji nɛ ɔ ngɛ Nu Yoku ɔ nɔ. Nɛ e bɔfohi ji nyumuhi eywiɛ nɛ piɛɛ e he ɔ nɛ. Mɛ ji Andrea kɛ e nyɛmi Petro, kɛ Yakobo kɛ e nyɛmi Yohane. Mawu sɔlemi we nɛ́ ngɛ Yerusalem ɔ ji nɔ́ nɛ o ngɛ hyɛe jee ngɛ a se ɔ nɛ.

Ligbi enyɔ ji nɛ ɔ nɛ Yesu hi teji ɔ nɔ kɛ ba Yerusalem. E ji Pɛplɛgbi. Yesu ya sɔlemi we ɔ ngɛ mɔtu ɔ mi. Nɛ osɔfo ɔmɛ bɔ mɔde kaa a maa nu lɛ nɛ a gbe lɛ. Se a ye mabi ɔmɛ gbeye, ejakaa a suɔ Yesu sane.

Yesu kɛ e bɔfo ɔmɛ

Yesu tsɛ Yuda jami hɛ mi nyɛɛli nɛ ɔmɛ ke: ‘Sinɔhi kɛ sinɔhi a nina!’ Nɛ e de mɛ ke Mawu maa gbla a tue ngɛ ní yayamihi tsuo nɛ a pee ɔ heje. Lɔɔ se ɔ, Yesu ba Nu Yoku ɔ nɔ, kɛkɛ nɛ bɔfohi eywiɛ nɛ ɔmɛ bɔni lɛ munyu bimi. O le nɔ́ nɛ a ngɛ lɛ bie lo?

Bɔfo ɔmɛ ngɛ Yesu níhi nɛ maa ba hwɔɔ se ɔ he munyu bie. A le kaa Yesu ma ha yayami peemi tsuo se maa po ngɛ zugba a nɔ. Se a suɔ nɛ a le benɛ enɛ ɔmɛ maa ba mi. Mɛni be Yesu ma ba ye Matsɛ?

Yesu le kaa e se nyɛɛli ngɛ zugba a nɔ ɔ be nyɛe maa na lɛ ke e ba ekohu. Nɔ́ heje ji kaa e maa hi hiɔwe, nɛ a be nyɛe maa na lɛ. Enɛ ɔ he ɔ, Yesu de e bɔfo ɔmɛ ní komɛ nɛ maa ya nɔ ngɛ zugba a nɔ ke e bɔni matsɛ yemi ngɛ hiɔwe ɔ. Mɛni ji ní nɛ ɔmɛ ekomɛ?

Yesu de mɛ ke ta nguahi maa ba, hiɔ maa nu nimli babauu, hwɔ maa ba, awi yemi maa pɔ he, nɛ zugba ma mimiɛ ngɛ hehi fuu. Yesu de kɛ piɛɛ he hu kaa, a maa fiɛɛ Mawu matsɛ yemi ɔ he sane kpakpa a ngɛ zugba a nɔ he tsuaa he. Anɛ wa na kaa ní nɛ ɔmɛ tsuo ngɛ nɔ yae ngɛ wa be nɛ ɔ mi lo? Ee! Enɛ ɔ heje ɔ, wa ngɛ nɔ mi mami kaa Yesu ngɛ matsɛ yee ngɛ Hiɔwe amlɔ nɛ ɔ. E be kɛe nɛ e ma je yayami peemi tsuo kɛ je zugba a nɔ.

Mateo 21:46; 23:1-39; 24:1-14; Marko 13:3-10.



Sane Bimihi

  • Mɛnɔ ji Yesu ngɛ foni ɔ mi, nɛ mɛnɔmɛ piɛɛ e he ɔ?
  • Mɛni osɔfo ɔmɛ bɔ mɔde kaa a maa pee Yesu ngɛ sɔlemi we ɔ, nɛ mɛni e de mɛ?
  • Mɛni Yesu bɔfo ɔmɛ bi lɛ?
  • Mɛni heje Yesu de e bɔfo ɔmɛ ní komɛ nɛ maa ya nɔ ke e bɔni Matsɛ Yemi ngɛ hiɔwe ɔ?
  • Mɛni Yesu de kaa e maa ya nɔ loko e ma je yayami peemi tsuo kɛ je zugba a nɔ?

Sane bimi kpahi

  • Kane Mateo 23:1-39.

    E ngɛ mi kaa Ngmami ɔ tsɔɔ kaa a ma nyɛ maa ngɔ je ɔ mi sablaihi kɛ tsɛ nɔ ko mohu, se mɛni ji nɔ́ nɛ Yesu munyu nɛ je kpo ngɛ Mateo 23:8-11 tsɔɔ ngɛ sablaihi nɛ a kɛ tsuɔ ní ngɛ Kristofoli asafo ɔ mi ɔ he? (Níts. 26:25; Rom. 13:7; 1 Pet. 2:13, 14)

    Mɛni Farisibi ɔmɛ kɛ tsu ní kɛ tsi nihi a nya konɛ a ko plɛ Kristofoli, nɛ mɛni blɔ nɔ jami hɛ mi nyɛɛli hu ngɛ ja pee mwɔnɛ ɔ? (Mat. 23:13; Luka 11:52; Yoh. 9:22; 12:42; 1 Tes. 2:16)

  • Kane Mateo 24:1-14.

    Mɛni blɔ nɔ a ma bɔnɛ tsui si tomi he hia ha a nɔ mi ngɛ Mateo 24:13?

    Mɛni ji munyu nɛ ji “nyagbe ɔ” nɛ je kpo ngɛ Mateo 24:13 sisi? (Mat. 16:27; Rom. 14:10-12; 2 Kor. 5:10)

  • Kane Marko 13:3-10.

    Mɛni ngɛ Marko 13:10 nɛ tsɔɔ bɔnɛ sane kpakpa a fiɛɛmi ɔ he hia wawɛɛ ha, nɛ kɛ e sa kaa waa pee wa ní ngɛ Yesu munyu ɔ he kɛɛ? (Rom. 13:11, 12; 1 Kor. 7:29-31; 2 Tim. 4:2)