Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Ní kasemi 94: E Suɔ Jokuɛwi A Sane

Ní kasemi 94: E Suɔ Jokuɛwi A Sane

HYƐ Yesu nɛ e fua jokuɛ nyumuyo ɔ ngɛ hiɛ ɔ. Enɛ ɔ tsɔɔ kaa Yesu susuɔ jokuɛwi a he saminya. Nɛ e kaseli ɔmɛ ji nihi nɛ ngɛ lɛ hyɛe ɔ nɛ. Mɛni Yesu ngɛ mɛ dee? Ha nɛ waa hyɛ.

Piɔ pɛ Yesu kɛ e kaseli ɔmɛ je blɔ hiami gagaaga ko kɛ ba. Benɛ a ma ngɛ blɔ nɔ ɔ, kaseli ɔmɛ kɛ a sibi je atsinyɛ. Lɔɔ he ɔ, benɛ a ba su ɔ, Yesu bi mɛ ke: ‘Mɛni he atsinyɛ nyɛ ngɛ jee ngɛ blɔ ɔ nɔ ɔ?’ Ngɛ anɔkuale mi ɔ, Yesu le nɔ́ nɛ a ngɛ he atsinyɛ jee ɔ. Se e bi mɛ munyu ɔ konɛ e kɛ hyɛ kaa a ma de lɛ lo.

Yesu kɛ jokuɛ ko

Kaseli ɔmɛ ha we heto ko, ejakaa a kpɛti nɔ nɛ kle pe kulaa he atsinyɛ nɛ a ngɛ jee ngɛ blɔ nɔ ɔ nɛ. Kaseli ɔmɛ ekomɛ ngɛ hlae nɛ a pee nihi nɛ a nɔ kuɔ pe a sibi. Mɛni blɔ nɔ Yesu maa gu kɛ de mɛ kaa e sɛ nɛ nɔ ko peeɔ e he agbo pe nɔ tsuaa nɔ?

Yesu tsɛ jokuɛ wayoo ɔ kɛ ba da e kaseli ɔmɛ a hɛ mi. Kɛkɛ nɛ e de mɛ ke: ‘I suɔ kaa nyɛɛ le enɛ ɔ faii, kaa ke nyɛ tsakee we nɛ́ nyɛ plɛ kaa jokuɛ nɛ ɔ, lɛɛ nyɛ be Mawu matsɛ yemi ɔ mi sɛe gblegbleegble. Nɔ nɛ kle pe kulaa ngɛ matsɛ yemi ɔ mi ji nɔ nɛ baa e he si kaa jokuɛ nɛ ɔ nɛ.’ O le nɔ́ nɛ ha Yesu de enɛ ɔ lo?

Ejakaa, jokuɛwi hɛwi a he kaa a maa pee nihi nɛ a nɔ kuɔ pe a sibi. Lɔɔ he ɔ, e sa kaa kaseli ɔmɛ nɛ a kase jokuɛwi ngɛ kikɛmɛ a blɔ nɔ, konɛ a ko pɛ ngɛ nɔmlɔ ngua nɛ a maa pee he.

Yesu tsɔɔ bɔnɛ e susuɔ jokuɛwi a he ha ngɛ be kpa komɛ a mi hulɔ. Nyɔhiɔ bɔɔ komɛ a se ɔ, ni komɛ ngɔ a bimɛ kɛ ba Yesu ngɔ. Kaseli ɔmɛ ka kaa a maa tsi jokuɛwi ɔmɛ a nya. Se Yesu de mɛ ke: ‘Nyɛ ha jokuɛwi ɔmɛ blɔ nɛ a ba ye ngɔ, nɛ nyɛ ko tsi a nya. Ejakaa nihi nɛ ngɛ kaa jokuɛwi nɛ ɔmɛ lɛ a maa sɛ Mawu matsɛ yemi ɔ mi ɔ nɛ.’ Kɛkɛ nɛ Yesu fua jokuɛwi ɔmɛ, nɛ e jɔɔ mɛ. Anɛ e pi bua jɔmi kaa wa maa le kaa Yesu suɔ jokuɛwi a sane lo?

Mateo 18:1-4; 19:13-15; Marko 9:33-37; 10:13-16.



Sane Bimihi

  • Mɛni ji nɔ́ nɛ bɔfo ɔmɛ je he atsinyɛ benɛ a je blɔ hiami gagaaga ko kɛ ma a?
  • Mɛni heje Yesu tsɛ jokuɛ wayoo ko kɛ ba da e bɔfo ɔmɛ a hɛ mi?
  • Mɛni blɔ nɔ e sa nɛ kaseli ɔmɛ nɛ a kase jokuɛwi ngɛ?
  • Ngɛ nyɔhiɔ bɔɔ komɛ a se ɔ, mɛni Yesu pee kɛ tsɔɔ kaa e suɔ jokuɛwi a sane?

Sane bimi kpahi

  • Kane Mateo 18:1-4.

    Mɛni heje Yesu ngɔ nɔhyɛ níhi kɛ tsɔɔ ní? (Mat. 13:34, 36; Mar. 4:33, 34)

  • Kane Mateo 19:13-15.

    Mɛni ji jokuɛwi a suhi nɛ e sa kaa waa kase bɔnɛ pee nɛ wa ná Matsɛ Yemi ɔ mi jɔɔmi ɔmɛ eko? (La 25:9; 138:6; 1 Kor. 14:20)

  • Kane Marko 9:33-37.

    Mɛni Yesu tsɔɔ e kaseli ɔmɛ ngɛ blɔ nya hlami he? (Mar. 9:35; Mat. 20:25, 26; Gal. 6:3; Fil. 2:5-8)

  • Kane Marko 10:13-16.

    Mɛni blɔ nɔ Yesu ji nɔ ko nɛ nihi nyɛ nɛ a su e he, nɛ mɛni Kristofoli asafo mi nikɔtɔmahi ma nyɛ maa kase ngɛ e nɔhyɛ nɔ́ ɔ mi? (Mar. 6:30-34; Fil. 2:1-4; 1 Tim. 4:12)