Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 91: Yesu Tsɔɔ Ní Ngɛ Yoku Nɔ

Ní kasemi 91: Yesu Tsɔɔ Ní Ngɛ Yoku Nɔ

HYƐ Yesu nɛ hii si ngɛ hiɛ ɔ. E ngɛ nimli ɔmɛ tsuo ní tsɔɔe ngɛ Galilea yoku ko nɔ. Nihi nɛ a hii si ngɛ e kasa nya haa ji e kaseli ɔmɛ. E hla a kpɛti nihi 12 kaa e bɔfohi. Bɔfo ɔmɛ ji Yesu kaseli pɔtɛɛ. O le a biɛhi lo?

Yesu nɛ e ngɛ nihi ní tsɔɔe

Simon Petro kɛ e nyɛminyumu Andrea piɛɛ he. Jehanɛ ɔ, Yakobo kɛ Yohane, nɛ́ mɛ hu nyɛmimɛ ji mɛ ɔ hu piɛɛ he. A tsɛɛ bɔfo kpa ke Yakobo, nɛ a tsɛɛ nɔ kpa hu ke Simon. A tsɛɛ bɔfohi enyɔ komɛ hu ke Yuda. Yuda Iskariot ji nɔ kake, nɛ a tsɛɛ Yuda kaketsɛ ɔ hu kɛ biɛ kpa nɛ ji Tadeo. Jehanɛ se ɔ, Filipo kɛ Natanael (nɛ e biɛ kpa hu ji Bartolomeo), kɛ Mateo kɛ Toma hu piɛɛ a he.

Benɛ a je Samaria kɛ ba a, Yesu bɔni fiɛɛmi ke: ‘Hiɔwe matsɛ yemi ɔ su si ta.’ Anɛ o le nɔ́ nɛ matsɛ yemi nɛ ɔ ji lo? E ji Mawu nɔyemi nitsɛ. Nɛ Yesu ji matsɛ ngɛ nya. E maa ye nɔ kɛ je hiɔwe, nɛ e kɛ tue mi jɔmi maa ba zugba a nɔ. Mawu matsɛ yemi ɔ ma ha zugba a nɔ tsuo maa pee paradeiso nɛ ngɛ fɛu.

Yesu ngɛ ni ɔmɛ matsɛ yemi ɔ he ní tsɔɔe ngɛ hiɛ ɔ. E de mɛ ke: ‘Nyɛɛ sɔle ke, Wa tsɛ nɛ ngɛ hiɔwe, ha o biɛ ɔ he nɛ tsɔ. Ha o matsɛ yemi ɔ nɛ ba. Ha a pee o suɔmi nya ní ngɛ zugba a nɔ kaa bɔnɛ a pee ɔ ngɛ hiɔwe ɔ.’ Nihi fuu tsɛɛ sɔlemi nɛ ɔ ke ‘Nyɔmtsɛ ɔ Sɔlemi Ɔ.’ Ni komɛ hu tsɛɛ lɛ ke ‘Wa Tsɛ nɛ Ngɛ Hiɔwe.’ Anɛ o ma nyɛ ma de sɔlemi ɔ tsuo lo?

Jehanɛ ɔ, Yesu tsɔɔ ni ɔmɛ bɔnɛ a kɛ a sibi maa hi si ha. E de mɛ ke: ‘Nɔ́ fɛɛ nɔ́ nɛ nyɛ suɔ kaa nihi nɛ pee ha nyɛ ɔ, nyɛ hu nyɛɛ pee ja nɔuu kɛ ha mɛ.’ Ke nɔ ko pee mo kpakpa a, anɛ o sume lo? Lɔɔ he ɔ, nɔ́ nɛ Yesu ngɛ dee ji kaa, waa pee ni kpahi kpakpa. Anɛ paradeiso si himi ɔ be bua jɔmi pee akɛnɛ nɔ fɛɛ nɔ maa pee e nyɛmi kpakpa a lo?

Mateo yi 5 kɛ ya si 7; 10:1-4.



Sane Bimihi

  • Ngɛ foni ɔ mi ɔ, jije Yesu ngɛ ní tsɔɔe ngɛ ɔ, nɛ mɛnɔmɛ lɛ a hii si ngɛ e kasa nya haa a?
  • Kɛ a tsɛɛ bɔfo 12 ɔmɛ kɛɛ?
  • Mɛni Matsɛ Yemi nɛ Yesu fiɛɛ he sane ɔ?
  • Mɛni Yesu tsɔɔ ni ɔmɛ kaa a sɔle ngɛ he?
  • Mɛni Yesu de ngɛ bɔnɛ e sa kaa nɔ kɛ e nyɛmi nɛ hi si ha he?

Sane bimi kpahi

  • Kane Mateo 5:1-12.

    Mɛni blɔhi a nɔ wa ma nyɛ maa tsɔɔ ngɛ kaa wa hɛ ngɛ Mawu jami mi níhi a nɔ? (Mat. 5:3; Rom. 10:13-15; 1 Tim. 4:13, 15, 16)

  • Kane Mateo 5:21-26.

    Mɛni blɔ nɔ Mateo 5:23, 24 maa nɔ mi ngɛ kaa bɔnɛ waa kɛ wa nyɛmimɛ hii si ha a saa huɛ bɔmi nɛ ngɛ waa kɛ Yehowa kpɛti ɔ he. (Mat. 6:14, 15; La 133:1; Kol. 3:13; 1 Yoh. 4:20)

  • Kane Mateo 6:1-8.

    Mɛni ji suhi komɛ nɛ tsɔɔ kaa nɔ ko buu e he dalɔ nɛ e sa kaa Kristofoli nɛ kua? (Luka 18:11, 12; 1 Kor. 4:6, 7; 2 Kor. 9:7)

  • Kane Mateo 6:25-34.

    Mɛni Yesu tsɔɔ ngɛ bɔnɛ e hia kaa waa ngɔ wa he kɛ fɔ Yehowa nɔ kɛ ha wa helo nya níhi he? (2 Mose 16:4; La 37:25; Fil. 4:6)

  • Kane Mateo 7:1-11.

    Mɛni nɔhyɛ nɔ́ nɛ ngɛ faii nɛ ngɛ Mateo 7:5 tsɔɔ wɔ? (Abɛ 26:12; Rom. 2:1; 14:10; Yak. 4:11, 12)